留住這一刻II+首件聖誕禮物

唔好誤會﹐口水禧身後唔係我哋幅牆比人淋紅油嚟……

咁樣會唔會後現代少少﹐無咁淋紅油feel呢﹖

登登登登﹐其實佢身後乃係佢嘅個人傑作﹐又名「大耳窿淋紅油記」﹗講下笑啫﹐雖則我成日喺街同人結怨﹐不過都未至於咁嚴重比人淋油啩﹗

口水禧間唔中忽發雅興都會要求我哋開D水彩比佢發洩﹐佢重未識畫D我哋睇得明嘅圖畫﹐大多數都係呢D淋紅油嘅抽象野﹐真係唔係佢level都唔知佢畫乜。不過﹐作為父母﹐個仔畫乜我哋都覺得正架喇﹐就正如無論我哋點嘅樣﹐口水禧一樣都覺得媽媽係全世界最靚嘅﹐靚過電視機裡面D姐姐。(講完自己都嘔﹗)

一直都好希望屋企D牆唔好咁寡﹐但係出去買一幅畫返嚟真係唔好講笑﹐連IKEA嗰D印出嚟嘅都要幾廿蚊﹐重未連框。呢度有時畫框會貴過畫(名畫就當然例外喇)。諗落嘥一百幾十去買張畫同畫框有如掉錢落海﹐倒不如掛個仔畫嘅野上牆喇﹐一方面等佢有D鼓勵﹐另一方面D牆又唔洗咁空。

早排去IKEA買咗個畫框返嚟試下可唔可以表到口水禧幅大作先。畫框廿幾蚊﹐幅畫就無價。抵到爛喇﹐係嘛﹖買咗個框返嚟幾個禮拜﹐今日終於的起心肝整好佢。D邊就唔係好對稱架喇﹐話晒我都係美勞數一數二……差架嘛﹐剪野對稱係我嘅弱項﹐已經去到無得救嘅階段。唔緊要喇﹐小朋友畫﹐唔對稱先可愛。(自圓其說)

幾廿蚊有成個口水禧咁高﹐個框都算係咁喇啩﹗小朋友見到自己畫嘅野比人表起咗﹐重話要掛上牆當然會好開心。不停咁問﹕「呀﹐掛喺邊呀﹖」跟住我周屋行四圍揾個靚位掛佢幅寶貝。問佢打橫掛好D定係打直掛好﹐佢話要打直睇先靚﹐是但喇﹐佢畫嘅佢先睇得明﹐咁我當然要尊重個artist喇﹗(又想嘔多次﹗)

半來想掛呢度﹐位置最好﹐又啱個框嘅大細﹐只可惜裝修時安電燈制個叔叔大整蠱﹐將個制安喺高又未算高﹐低又未算低﹐左又唔左﹐右又唔右﹐中間又唔中得晒嘅位置﹐掛咗幅畫上去就會遮住個燈制。個制係夜晚如果我要出廳食時一出房門就可以開著個走廊燈而設嘅﹐家下真係捉晒蟲﹐要畫定要燈制吖﹖

暫時會企住喺度先﹐要等我屋企嘅掛畫負責人得閑先可以正式掛去飯廳。幾比面禧哥﹐食飯都要對住佢幅畫﹗唔長擺喺度係費事幅野遲早實會比人踢爆框﹐咁就真係枉我今日下晝用手指撬咗十幾口夾仔先開到個框後面塊板﹐然後先可以放幅畫入去。真係十指痛歸心﹗

希望你有幾耐頂幾耐﹐唔好未掛上牆就比人猛虎射球爆裂。

玩完掛畫﹐口水禧要求我影佢同聖誕樹合照。影咗N次都重要影。小朋友個個都鍾意聖誕樹﹐唔知係鍾意佢上面掛嘅野定係鐘意佢下面放嘅野。

今年唔會買太多聖誕禮物比佢喇﹐其實佢日日都似聖誕節。淨係氹佢自己去返學都送咗唔少野比佢。以前去玩具部無反應﹐摸下野摸完就算。而家都唔會點扭買野﹐不過會叫我或者老豆買。暫時都未會因為被拒絕而發老脾。我覺得算係咁。我最驚見到小朋友喺玩具部碌地大叫大喊扭買玩具。驚還驚﹐越扭我越唔買。再嘈就街都唔Q出﹐咁就包個細路「六根清靜」。禧婆婆成日自誇﹕「都係我個BB乖(佢稱呼佢個寶貝孫為BB﹐前面個B高音﹐後面個B低音)﹐唔會扭計買玩具。」我次次都同婆婆講﹕「咩呀﹐教架﹐你試下唔教吖拿﹐拆咗個玩具部呀唔買﹗」加埋呀媽嘅身教喇﹐呢層當然﹐見慣呀媽平時行街拎完D野睇完擺返低﹐自言自語﹕「咁貴﹐唔買喇。」瀟灑地行開。(係﹐我係寫比禧爸睇嘅呢句)

好彩﹐呀媽以前「掃街」嘅模樣未曾污染到個仔。不過當D玩具黨一喺身邊時﹐「脫俗」(被迫嘅)嘅口水禧當堂都會變咗一個好似未見過玩具嘅鄉下仔﹐呢樣又要嗰樣又要。好彩有時都識睇下呀媽咩面口﹐見我眼超超嘅時候都識同婆婆講唔要咁多﹐因為屋企已經有。

See﹖婆婆﹐要教架﹐太多玩具變成唔珍惜玩具。養成唔珍惜嘅壞習慣﹐以後唔娶李生個女﹐都唔知佢點算。

口水禧同棵聖誕樹好friend。成日叫我千其唔好未到聖誕節就拆咗棵樹。大佬﹐買咗唔少錢﹐我梗係擺盡D喇﹐掛得咁辛苦﹐點會咁快又拆呀﹐起嘛都過咗新年先喇。右手邊紅色嘅花﹐口水禧成日話﹕「媽媽﹐你睇下嗰朵花﹐係我種嚟送比你架﹐我落咗肥料架喇﹐好快就會有果添。」其實棵野已經比佢拎嚟拎去跌咗中間唔少花就真。

男仔天生係咪個個都咁識氹女仔架呢﹖口水禧成日唔係送花﹐就係送蘋果樹﹑香蕉樹﹑車呀﹑樓呀﹑衫褲鞋袜比呀媽。重會講﹕「我送粉紅色﹑紫色﹑白色﹑黑色﹑藍色﹑紅色嘅衫比你呀﹗」曾幾何事﹐我口痕話我鍾意紫色﹐口水禧就成日話送紫色嘅野比我。佢會因為媽媽鍾意紫色而喺學校專門揀紫色嘅顏料畫野﹑做手工﹑買佢件保暖泳衣都揀紫色(其實佢鍾意藍色但唔揀藍色嗰件)﹐通通都係因為媽媽鍾意紫色而揀。如果無紫色﹐佢會自己幻想嗰個唔係紫色嘅顏色就係紫色﹐然後話﹕「呀﹐呢個野係紫色架媽媽﹐我送比你。」

明知道佢都知嗰個唔係紫色﹐但我對於個仔為咗討媽媽歡喜而特登講媽媽鍾意嘅顏色嗰種心意實在感動。初初見佢揀乜都揀紫色﹐我重以為係佢鍾意﹐心諗﹕「嘩﹐男人老狗鍾意紫色﹖」原來一切都係因為我不經意講過嘅一句說話啫。

雖然我無真係收過蘋果樹﹑香蕉樹﹑車﹑樓﹐但收到個仔嘅心意﹐確實勝過世間所有金銀珠寶。

********************************************************

講完我收野﹐講下口水禧收嘅野先喇。幾個月前﹐有個傻婆嚟三藩市工幹﹐喺我度住咗一晚。住一晚﹐但就送咗成套床上用品過口水禧。床單枕袋已經用咗﹐但張被就未開﹐原諒我呢D cheapi 思奶﹐一張未爛﹐又點捨得開張新野用呢﹗

呢個茂利﹐聖誕前已經問定口水禧要乜野﹐其實我都唔知喇。佢比咗一家網上做手工藝品嘅網址叫我揀樣野比口水禧﹐我睇睇下見到有生日T恤﹐可以整生日嘅歲數同名上去又幾盞鬼喎﹐雖則唔知今年會唔會搞生日會(諗起都頭痛)﹐不過生日嗰日著起都幾特別吖﹗於是揀咗生日衫做口水禧嘅聖誕禮物。

前幾日就收到喇。試上身﹐啱啱好﹐多謝晒呀﹐Y姨姨(Ceci08唔知佢介唔介意我公開佢個blog出嚟﹐都係問咗當事人先。)哈哈﹐我尋晚爆石嘅時候諗到一個方法可能揾到你地址可以報仇﹐嘩哈哈﹗