今年嘅聖誕節終於過去喇﹐今年嘅天氣麻麻哋﹐又落雨又凍。入冬以嚟﹐差唔多個個禮拜都有雨落﹐破晒歷年嘅紀錄﹐我嚟咗咁耐都係第一次見到咁多日都落
屎咁落咋。天氣凍到我已經好多日無出過去睇下前院D花草凍瓜咗未﹐禧婆婆問親嗰盆XX重有無呀﹖我都係答佢唔知﹐因為無出過去睇。相信亦都應該不在「花」世勒。
好彩無揀呢個時候帶口水禧上雪山啫﹐事關落雨﹑大風﹑風雪等等情況下人哋都係唔開嘅。揸咁多個鐘頭上到去齋坐都咪話唔dum心﹗帶口水禧去滑雪﹖梗係唔係喇﹐等多幾年都唔知佢得未。諗住淨係帶佢去睇下同摸下雪啫﹐話晒都未見過。滑就唔好預我喇﹐留返第時等佢父子二人慢慢嘆喇。我就揾間startbucks坐下暖下好過。
平安夜約咗去朋友屋企食大餐。前一晚已經醃好咗D野食﹐平安夜下晝就係咁包禮物。差唔多五﹑六點就開始整野食﹐整好先帶去朋友屋企。年年都係咁樣過架喇我哋﹐無乜特別節目﹐唔會出去睇燈飾或者其他娛樂﹐一來怕人多擠迫﹐二來其實都無咩野睇或者玩喇。個個都係去朋友度或者招呼人返屋企食飯﹐傾下計咁喇。
一共三家共九個人開餐﹐每家負責整一﹑兩樣餸。我負責整燒豬頸肉同焗雞翼﹔主人家就炆牛肋骨肉排﹑意大利雲吞﹑焗露荀同甜品﹔另外一家負責整咖喱雞同法包。一字排開原來都幾多野食架喎﹐好在人哋張枱夠大夠長﹗
呢個豬頸肉真係搞到我要抹一把汗﹗話說前幾日我喺超市見到有包野寫住Pork Neckbone(豬頸骨)﹐其實都唔係好骨﹐都幾多肉下。咁我就諗﹐豬頸肉咪即係豬條頸D肉囉﹐咁呢包叫豬頸骨﹐黐喺上面D肉咪係豬頸肉囉﹗
心諗﹐重唔比我揾到你﹖
記得多年前我喺唐人街嘅豬肉鋪問D呀叔有無豬頸肉﹐比人鬧住問﹕「乜野豬頸肉呀﹖豬頸肉咪即係梅頭囉﹐豬乜野頸肉啫﹗超﹗@*##$&*$%(﹗﹗﹗」(係﹐我喺街市不下唔知幾多次比D呀叔鬧架喇﹐黐Q線架佢哋﹗
)就係咁﹐個呀叔就成舊梅頭執比我。梅頭﹖唔係攞去煲湯用架咩﹖頂﹐咁點解要叫炭燒豬頸肉﹐唔叫炭燒梅頭肉架呢﹖嗰陣係新手煮飯婆﹐完全唔知豬頸肉係乜野樣﹐話時話﹐如果個呀叔有心玩野﹐比舊豬羅友過我﹐我諗我都唔知賴野﹐照樣攞返屋企整架。D街市人最衰就係呢樣﹐睇你係新仔就蝦你﹐聲大大講到好似「你唔明就收聲喇﹐我話係咁就係咁喇﹗」揀野實揀D唔靚嘅比你﹐海鮮就揀D就瓜柴嘅比你﹐你同佢無返咁上下感情﹐都咪洗旨意佢會真心對你(所謂真心對你只係講緊唔呃你稱﹐唔迫你買D就嚟死嘅海鮮咋喎﹐唔代表佢會幫你揀最靚嗰個架﹗最靚嗰舊﹐梗係留返比佢個熟客﹐惡C能登﹐街頭嗌﹐街尾都聽到佢把聲嘅惡C奶喇﹗)
結果﹐我嗰次真係攞咗舊梅頭嚟整﹐一大舊煲湯梅頭要片開一片片﹐真係唔片到講粗口嗰個都唔係人﹗
片完重要醃﹐醃好攞去燒﹐結果味道都唔差嘅。不過真係嫌工夫多﹐所以之後就無再整過。而且硬係覺得自己比個呀叔昆咗﹐邊有人會攞舊腳板咁大舊嘅梅頭嚟片做豬頸肉架﹖片死人咩想﹗
好喇﹐嗰日懶醒見到包豬頸骨就買咗返屋企諗住先做個實驗試整一次先﹐就算衰咗都有時間走盞諗過整第二樣野食攞去人哋屋企吖嘛。上網揾咗幾個食譜﹐不外乎都係用生抽老抽糖魚露醃﹐點知有一個零零舍舍淨係唔用生抽老抽嘅食譜﹐重講到自己幾正宗嗰隻﹐就係比正宗呢兩個字累死我﹗諗住泰式豬頸肉吖嘛﹐梗係用魚露架喇﹐點會用老抽呀﹖一用老抽就變咗係中國人野喇﹐重點會係泰國菜呢﹖好﹐一於就跟個「正宗」嘅。雖然醃緊舊肉嘅時候都覺得齋用魚露同其他香料﹐無老抽生抽﹐咁舊肉咪無顏色囉﹖不過由於個食譜最尾寫住焗至金黃然後切片上碟﹐咁我心諗﹐人哋都話會變金黃就即係會變喇﹐跟喇。
焗完出嚟﹐試埋味﹐唉﹗立野出街食飯喇﹐煮好飯都開唔成呀﹐無餸吖嘛大佬﹗
而家大家知道我其實並唔識煮餸架﹐喺呢個blog出現嗰D係經過我不知練咗幾多次先夠膽攞出嚟見人架﹗平時都唔知衰幾多獲呀﹗
點知又咁橋喎﹐過咗兩日﹐我又去超市﹐都諗住用返我用開愛嚟整叉燒嗰隻豬肉喇﹐重大舊過梅頭呀陰公﹐已經做好心理準備又要片到講粗口架喇。點知忽然比我見到有pork cheek(豬面)賣﹐印象中見過有人整豬頸肉話用豬面珠肉整好好食﹐於是又膽粗粗買嚟整。再加埋嗰舊大梅頭墊底﹐萬一呢個豬面衰咗﹐都重有一舊後備頂上。
今次揾返D睇開嘅blog﹐乖乖哋用返生抽老抽嗰D調味料就算﹐生抽老抽﹐調啱味就係好抽﹐話Q知佢正唔正宗喇﹐還掂我哋成班食嘅人當中又無泰國人﹐鬼有人知正唔正宗咩﹗
結果﹐係成功嘅﹗再加埋個醬什﹐真係無一百都應該有九十喇啩﹗
張相入面盤野個賣相係衰咗D﹐無辦法喇﹐攞到去人哋屋企先片﹐趕住開飯﹐片完都費事排返靚﹐就咁飛入去個盤就算。反正都係熟人啫﹐唔會怪我唔排好D肉啩﹗
雞翼就無難度﹐好少會衰啫﹗
主人家嘅牛肋骨肉排﹐睇下﹖我哋都係就咁成煲就攞上枱食架喇﹐都費事理靚唔靚。好食就得喇。唔洗太講究喇。聽講呢煲整嘅時候又係發生咗D小意外。話說本來主人家係用個slow cooker(類似D電炆鍋)之前一晚開始炆﹐點知個煲壞壞哋﹐到尋日開餐前幾粒鐘重係一D都唔林﹐主人家唯有出動呢個重到呀媽都唔認得嘅Le Creuset大煲出嚟接力繼續炆咗幾粒鐘﹐終於搞掂。話時話﹐呢個煲唔止重﹐重好鬼貴添﹗我除咗無錢買﹐重無力托佢﹐所以我廚房應該暫時都容立唔到佢住。尋晚托返佢入廚房都要好小心﹐一來驚跌落地爛煲爛埋人哋D地板﹐最驚係個煲會擲斷晒我十隻腳趾﹐駁都駁唔返﹐因為D骨如無意外﹐應該係會比個煲擇碎晒嘅。
再嚟都係主人家嘅意大利雲吞﹐入面係菠菜同芝士﹐加鮮茄汁辣腸淋喺面。口水禧都有食。不過食得唔多﹐因為枱面有佢另一愛好 – 麵包。自助餐千其咪帶口水禧去﹐佢淨係去食人哋D麵包﹐真係比咁多錢去食麵包﹐蝕都蝕到喊﹗
唔經唔覺﹐同主人家已經識咗十年﹐禧爸就識得男主人更耐﹐可能有十幾廿年添﹐因為男主人以前係禧爸喺香港做野時嘅上司。多得佢哋多年嚟關顧我哋兩個﹐當日我哋兩條茂利戇居居赤手空拳嚟到人生路不熟嘅美國﹐週末﹑大時大節都係黐住佢哋一家三口一齊過﹐佢哋喺呢度又係舉目無親﹐所以我哋成日都一齊過節﹑食飯﹑消遣娛樂。
知遇之恩﹐希望有日可以報答人哋。
等開飯之前﹐老豆抱仔密斟﹔兩條中坑自拍。
又係winnie出場嘅時候喇﹐叫佢一齊同主人影張全家幅﹐點知個衰女包唔制﹐瞓喺地下罷影扮C狗喎﹗
昔日我睇住主人家嘅女大﹐我第一次見佢嘅時候佢可能同口水禧而家咁大﹐到我嚟美國嘅時候佢就大約一年班。跟住就到佢哋睇住我哋兩個由年青人兩袖清風﹐到有頭家大埋肚生咗口水禧﹐然後又到我哋睇住佢哋買BB winnie返嚟﹐跟住而家winnie牛乸咁大隻﹐比佢踩一腳都痛到由內至外再由外至內﹗時間真係過得快﹐「斬」下眼﹐我哋兩個已經變咗中坑﹐小妹妹已經婷婷玉立喇﹗
平時winnie最鍾意撩人同佢玩扯大纜﹐不過我哋成日掛住食同傾﹐完全唔理佢。嗰日佢發現原來口水禧咁鍾意同佢玩呢尾野﹐於是佢都唔理好醜但求就手﹐雖知winnie嘅體重係口水禧嘅三倍﹐口水禧拉都拉唔郁winnie行1cm﹐反之﹐人哋winnie係咁意fing下個頭﹐口水禧就即刻跌喺地﹐其實winnie同口水禧玩呢個遊戲確實係超無癮﹗不過無人同佢玩﹐winnie唯有張就少少﹐口水禧都殺住先﹐好過無喇。
就係咁﹐食完正餐食甜品﹐傾下笑下就十二點要返歸。每年嘅聖誕我哋就係咁樣過架喇﹗
