Banana Leaf 曾經係我同禧爸每個週末嘅晚飯食堂。
禧爸超鍾意食海南雞飯。
為咗佢﹐唔介意來回揸多過一粒鐘車。
為咗佢﹐唔介意返親香港都周圍揾邊度有好正嘅海南雞飯。
佢所謂嘅正﹐
係要同星加坡食到嘅差唔多水準為之叫正。
(大佬﹐呢樹係美國呀﹐有冰鮮雞你食都偷笑喇﹗)
有咗口水禧之後﹐
週末海南雞飯之約斷晒纜。
以前可以食到餐廳經理﹑伙記見到我哋兩個muk嘴
就已經知道落乜野單。
食完重有甜品送。
次次都食到隊爆我哋個肚為止﹐
搞到飲唔到夢咖啡(珍珠奶茶)。
而家係一年去幾次左右。
好彩經理重認得我哋兩個蛋散。
一樣有甜品送。
2011年1月1號﹐
一家三口食餐正野慶祝下新年喇。
口水禧對上一次應該重食緊燉飯。
(你話我哋幾耐無去吖﹗)
今次卒之都有份食喇佢。
一坐低就急不及待攞晒D架生出嚟先。
筷子﹑剪刀﹑匙羹﹑水壺樣樣齊。
喺個餐牌度指東指西﹐
樣樣都話要食。
喂﹐你幾時識咗睇字呀﹖
五點出門口﹐六點去到﹐
都幾乎無位。
以前未擴張之前個鋪位豆腐膶咁細﹐
每逢星期五﹑六夜晚過咗六點半去到﹐
包你企到腳軟都未有檯﹗
有時可以去到八點半都重有成棚人喺門口輪緊位。
呢篇野我絕對唔係幫佢宣傳﹐
呢個blog唔幫人賣廣告嘅。
呢間野我哋幫襯咗10年﹐
從來無一次係失望而回。
水準唔洗講﹐
招呼無得彈。
即使唔送甜品比我﹐我都係咁話。
人在異鄉﹐見到黑頭髮黃皮膚份外親切。
講同一語言又加多一分。
會記住客人嘅喜好就再加多一分。
10年裡面﹐
你睇住我成長﹐
由兩個人嚟變拖多個細嘅嚟﹔
我睇住你升職﹐
由伙記變做經理﹐
老闆娘依然成晚檯檯四圍傾﹐
即使大家唔係熟到朋友咁熟﹐
坐喺度食野﹐
好唔好味已經唔再係最重要﹐
反而有一份親切感先係最難得。
咁多年嚟﹐
我哋兩個都無試過甚麼fine dining。
可能我哋無條富貴脷﹐
唔識食貴野。
唔識欣賞餐廳情調。
唔識著靚D去襯托格調優雅嘅環境。
我哋成日講笑﹐
如果有日發咗達﹐
去fine dining會唔會都夠膽照著T恤牛仔褲﹖
車﹗註冊結婚都夠膽著﹐重有邊度唔夠膽咁著先﹖
口水禧都算識食﹐
問佢生日嗰日想唔想再嚟﹐
二話不說即答﹕想﹗
好遠水路喎……
不過見係你嘅話﹐
時間就到就去喇。
豪比你又點話吖﹗
最緊要係有甜品送﹐
可以慳返唔洗買蛋糕﹗
淨係睇呢張相﹐
我已經可以估到老咗係咩樣。
因為覺得個「婆樣」出出哋嚟。
做D手腳無咁婆。係殘啫……
我哋嘅餐單﹐10年如一日。
沙嗲雞串
Roti (印度薄餅﹖)
Balanchan Kangkong (蝦膏炒通菜)
海南雞飯 (淨黑肉)
菠蘿炒飯
口水禧未試過食沙嗲
起初望住支野唔知點食好
如果切比佢食﹐肯定食兩啖就話唔食。
比佢自己揸住支野叉住食﹐成支食晒。
有得玩有得食係小朋友乖乖進食嘅良方﹐
至少對付我屋企呢件幾洗得下。
自己撕開塊簿餅﹐分D比我。
以前﹐佢擺野落我個豌度我必柄佢玩食物。
後來發現佢未必係玩﹐
又唔似係唔想食(如果唔想食就成塊劈比我喇)。
呢餐飯揾到少少頭緒。
佢邊食邊用另一隻手揸住佢個匙羹「筆」野比我同佢老豆。
一邊「筆」﹐一邊話﹕媽媽﹐我「筆」比你食吖。
爸﹐我「筆」飯你食吖。
「筆」到天一半地一半。
以前柄咗九年喇﹐執C我咩想﹗
但嗰晚﹐無鬧佢不特止﹐
內心有D開心添。
我覺得呢個係佢關心人嘅開始。
或許佢只係貪好玩「筆」比呢個「筆」比嗰個﹐
並唔知呢D叫做關心。
咁﹐講比佢知咪得囉。
我哋讚佢乖﹐識夾餸比爸爸媽媽。
佢即刻發力夾多D比我哋食。
或者佢慢慢會體會到有好野同人分﹐
人哋食得開心﹐佢又開心﹐
推己及人﹐
將來做個好心地嘅人。
心地好﹐自然多朋友。
攞著數又好﹐蝦佢林善又好﹐
總會有真心對佢好嘅朋友。
第時如果好似老豆呀媽咁出外打拼﹐
無我哋喺身邊﹐
朋友好重要。
正所謂在家靠父母﹐出外靠朋友﹐
試過就會明。
叫佢用碟食飯﹐肯定「誓願」。
索性比個菠蘿殼佢當豌食﹐
邊摸住個殼邊食。
咁大個仔未食過菠蘿﹐亦唔知菠蘿係點樣。
嗰晚叫佢試下﹐唔制。
唔緊要﹐想試嗰陣自己試。
迫佢食到反感﹐
容乜易第時鬧我XXX﹐賣菠蘿﹗
口水禧﹕呢個係菠蘿殼﹐吉嘅。
小朋友﹐靠對手去開眼界﹐認識世事萬物。
菠蘿原來係喺地下種而唔係喺樹上生嘅﹐
我廿幾歲第一次去菠蘿種植場先知。
甜品嚟喇。
芒果雪糕伴炸香蕉。
以前兩個人食完晒D野﹐
再食埋呢碟甜品﹐
真係有爆肚嘅感覺。
如今一份甜品多咗一人個分﹐
啱啱好。
書講BB喺媽媽肚裡面其實都有味覺。
所以有D 小朋友嘅口味會同媽媽好相似。
口水禧鍾意食甜野。
最近竟然愛上蕃薯糖水﹑湯丸。
禧公公第時食呢D野時又多個伴勒。
係唔係個個小朋友都好鍾意搞甜品上面嘅車厘子﹖
睇下呀仔個猴琴樣同呀媽個藐嘴藐舌樣﹗
甜品永遠係口水禧會主動出擊嘅目標。
麻麻哋甜品嘅禧爸完全置身事外。
重要影低我哋兩母子自相殘殺……份甜品個樣添。
2011年嘅第一餐晚飯
前菜又香又好食 – 好嘅開始
雞飯保持水準 – 無風無浪﹐平穩
免費甜品 – 甜到o答糖咁﹐喂﹐重想點﹖
希望所有人今年都有好嘅開始﹐平平穩穩﹐係咁o答糖喇。
