口水禧正日生日嗰日陸續咁有驚喜比佢﹐朝早有老豆呀媽陪返學﹐重有得同guinea pig玩﹑餵下菜兼梳埋毛。生日嗰日去服侍人哋﹐但自己就要呀媽服侍﹐咁請問個呀媽又應該喺佢嘅受難日揾邊個嚟祭旗先﹖
唔好答話﹕梗係禧爸喇咁呀下﹗
睇唔睇到隻guinea pig嘅眼神幾咁無奈﹐焗住要比班o靚仔係咁同佢哋梳毛﹐有時最慘係D細路亂咁梳﹐人哋係順住D毛咁梳﹐佢哋係調返轉咁梳﹐搞到隻野通常梳完之後重亂過未梳之前﹗
上面張相嗰隻係A貨嚟嘅﹐用嚟比D細路過下隱﹐因為得兩隻真野﹐但通常一攞出嚟﹐D細路就會爭住要摸要抱﹐無隻A貨喺度頂住先﹐我諗D真野實比人五馬分C都似﹗
玩完guinea pig就玩下呢箱叫reindeer food嘅野。其實只係張D麥皮同D提子乾撈埋咁啫。D細路喺度起勢咁「筆」﹐一陣又攪﹐一陣又灑﹐又剷又倒﹐乜都玩。初初覺得好似嘥咗D野食咁喎﹐不過後來睇佢哋玩﹐我諗可能係訓練下佢哋執D細細粒嘅野﹐同埋學下用唔同嘅器皿裝野。呢盤野應該係winter wonderland嗰陣用過嘅嗰盤﹐分分鐘可能玩咗幾年到唔奇﹗
口水禧最鍾意提子乾﹐見到有就梗係要執嚟研究下。
小朋友嘅興趣真係估佢唔到。淨係玩呢盤野都可以玩幾個字。咁又係﹐咁樣學野應該有趣過揸筆做功課。
玩完室內就玩室外。呢排天氣真解好凍﹐嗰朝起身﹐室外只有唔夠一度﹐將口水禧著到隻粽咁至敢比佢出街。但有D同學都真係唔知佢係唔怕凍定係凍到無感覺﹐著到薄一薄﹐褸都無件﹐就咁就喺室外玩。你摸下佢對手凍過冰條﹐但你問佢洗唔洗比件外套佢﹐佢又會話唔洗。
口水禧見到隔離班D大哥哥喺度掘沙(禧爸笑人掘萬人坑喎﹗)﹐佢都唔執輸去八下。點知人哋掘緊條坑嗰陣﹐口水禧就當人哋嗰條係堆填區﹐係咁掉野落去﹐結果比D哥哥喝佢﹐兼且要老師dick走佢添。
老師帶咗佢去攞桶裝水﹐條友仔就打尖。唉﹗原來佢都係技安底嘅。
snack time而家夠膽去其他家長嗰組﹐唔會黐住我。不過就唔多記得要有禮貌同埋唔好自己未問過EE就伸手入去攞野食。
喺屋企食飯又唔見佢咁自動自覺嘅﹖
筆水筆到上咗隱。呢D水龍頭係專門為小朋友而設。唔洗下下都用手拎﹐撥一撥個制就會有水出。方便就好方便﹐但係有D細路係識開水唔識閂水﹐真係唔知學校一個月幾多錢水費﹗
點解人攞水佢攞水﹐寧舍姐手姐腳咁嘅﹖
倒水落坑都係小朋友其中一項「飛佛」。
口水禧迷上咗拖住野跑﹐然後令身後個野發出聲音﹐佢就覺得好過隱。
snack time嘅時候我服侍緊人哋嘅少爺仔。順便一路自己都食少少火腿。嗰日重有salami(沙林尾腸﹖)隔離戴帽嗰個食咗好多﹐我問佢辣都食﹐佢話唔覺辣。
重要講埋故事。嗰日嗰本係教手語﹐R爆頭。
好鬼衰﹐叫親佢一齊影相就特登望第二度。
做做下野比禧爸發現我條牛仔褲未剪牌﹐無要緊喇﹐好過無拉鏈吖﹗
口水禧條cheap友﹐同我哋一齊企嗰陣﹐我叫佢過去同全班口水禧覺得最靚嘅女同學合照﹐口水禧扮晒野話唔洗。點知轉個頭佢唔知幾時已經攝咗去人哋隔離同人玩泥膠。兩條友係咁差呀差……
佢話係花嚟嘅。我就覺得好面善﹐唔知喺邊度見過……
yes!我知喇﹐係小雲舊kare!
又嚟拒絕同我合照
媽媽﹕衰仔﹐趕住去邊呀﹖
口水禧﹕去識女仔囉﹐咪阻頭阻勢喇﹗
禧禧的決擇
女同學﹕你得一支花﹐比你呀媽定比我先﹖
口水禧心諗﹕E﹐呀媽真係唔通氣架﹐企喺隔離望實晒﹗
媽﹕千晒你D錢﹐等你賣個老婆比我喇﹗
口水禧﹕千乜吖千﹐D手腳咁慢﹗
隔離嗰個係同班同學﹐不過可能年紀細過口水禧好多﹐所以唔講重以為係低班嘅同學。
嗰日有大把野玩﹐重有勞作比佢哋做下。
第二次circle time﹐大家一齊唱歌。學校唔比生日嘅小朋友帶蛋糕去學校同其他小朋友一齊食﹐我估係怕有D有食物敏感嘅小朋友食錯咗野會發作。所以老師揸住嗰個係假嘅蛋糕。
但老師真係會點火嘅。
口水禧無巨肺﹐吹極都吹唔熄﹐要老師幫手吹。
口水禧咁大個仔都未試過有咁大棚人對住佢唱生日歌﹐所以個樣有D緊張﹐又有D開心﹐又有D唔知點算。
學校送嘅「主婚人」襟章(以前去飲見人心口都有呢D野)﹐生日嘅小朋友生日嗰日就做一次「主婚人」。
嗰晚如佢所願去咗Banana Leaf。食完晚飯重有直落﹐去winnie屋企一齊食蛋糕。今年都係無搞生日會﹐一來唔夠時間﹐二來係我懶。最緊要係個主角自己揀咗一項節目﹐係咩﹖
睇佢呢個造型估下喇﹗
