口水禧呢世仔第一次去雪地睇雪﹐呢個係佢嘅生日節目個人意願﹐所以我哋兩老為咗隆重其事﹐特登喺之前幾個禮拜已經訂定D衫褲鞋袜﹐準備陪禧哥處男下海去玩雪﹐實則係多年前嘅經驗﹐幾乎比禧爸「羨」到我今時今日分分鐘坐緊輪椅﹐有見及此﹐幾歹都迫佢準備齊晒D裝備先肯出發。
最基本嘅裝備起碼要包括﹕羽絨外套﹑雪褲﹑雪袜﹑雪靴﹑滑雪用手套﹑冷帽。個雪山前幾日得華氏7度﹐即係攝氏負14度﹐如果無呢D裝備﹐點會唔變雪條呀大佬﹖
話說2001年我初初嚟美國嘅時候﹐禧爸就興緻勃勃咁話帶我去雪山玩下。嗰陣我咁大個人都未見過落雪係點﹐梗係話好喇。第二日兩條友仔就咁就去喇﹐臨出門口之前我重問佢應該著咩鞋架﹖佢話平時嗰D鞋都OK。就係咁﹐我就著咗嗰陣好興嘅保齡球鞋款咁嘅便鞋去雪山勒。(係咪已經估到我咩事呢﹖
)
到達之後﹐兩個人好興奮﹐搭咗吊車上雪山﹐一出咗架車﹐一腳踩落D雪到﹐開頭覺得「嘩﹐幾凍架喎。」跟住都唔洗幾分鐘就覺得對腳凍到有D麻痺﹐但係都重未知領咗人野﹐於是兩個人繼續呢度影嗰度影﹐對腳有時重係插喺D雪裡面架下。
影影下覺得對腳越嚟越痛嘅﹖於是開始唔想企﹐周圍揾凳坐﹐重要縮起對腳。後來越嚟越痛﹐卒之頂唔順嗌走﹐落返山重夠膽走去第二個地方再影多幾張相﹐但係對腳已經痛到不得了﹐於是上返車除咗對鞋捽下腳﹐但係對腳已經無晒知覺。直頭要將對腳隊向D冷氣風口係咁叫禧爸開行暖氣吹下對腳﹐吹咗幾分鐘﹐D腳趾先開始有返知覺﹐慢慢先郁到。
返到屋企好開心稟告比禧婆婆知我見到雪喇﹐不過對腳就痛到爆﹐要吹好耐暖氣先有返知覺。禧婆婆一聽到我原來淨係著對薄chit chit嘅袜同鞋就踩落D雪度不禁鬧咗一獲﹐重話好彩我哋無喺雪地再玩耐D﹐如果唔係﹐D神經線凍壞咗嘅話﹐鋸腳都有我份呀﹗
聽完即睥住隔離個茂利﹐佢自己就著timberland D 爬山boot﹐個底同個鞋身不知幾厚﹐對袜都有網球袜咁厚﹐但係就點我著保齡球鞋同香港夏天著喺鞋裡面唔凸襪頭出嚟嗰D薄到C襪咁薄嘅襪﹐唔怪之得我猛話腳痛嗰陣佢話佢無事喇﹗
想收買人命咩大佬﹗
今次裝備齊全﹐對腳無事之餘重可以陪禧哥玩咗成粒幾鐘都唔覺得凍﹐禧哥重玩到唔想走添。
呀公呀婆﹐自己睇相簿先喇﹐明天再交報告。
唔好插我D相點解D色咁怪呀下﹐盡晒力架喇﹐唔知點解雪地影相好難較光暗色調﹐多數影出嚟都勁藍﹐經已用lightroom盡力調返好﹐不過都係唔鮮色囉……
