當口水禧重係BB嘅時候﹐禧爸就已經妄想有朝一日同個仔一齊去學滑雪。嗰陣我成日串佢話等到個仔可以去滑雪嘅時候﹐佢都寧願同朋友去喇﹐點會同個骨頭脆﹐反應慢嘅呀叔去滑雪呀﹗但係雖然我咁講﹐但係似乎一D都無打沉到禧爸繼續去妄想。
等咗咁多年﹐今年終於可以同個仔去雪山睇雪。
(滑就未有耐喇﹐慢慢等喇傻佬﹗
)臨行前上網買好晒D裝備(睇咗上一篇嘅應該都知點解架喇﹗
)﹐最緊要係口水禧嗰D裝備一定要夠暖﹐萬一凍親佢嘅話﹐我就要自己跳落萬人坑架喇。本來諗住佢會去玩雪兜﹐所以買咗個飛虎隊咁嘅頭笠比佢暖住個頭同條頸﹐不過諗諗下條友仔氣管麻麻哋﹐都係唔好一下子就去得咁盡﹐比佢係咁易小試牛刀先﹐下次先在玩D體力勞動野。所以買咗都無用到﹐遲D可以攞去退返錢。
由我哋屋企揸車去雪山大概係三粒幾鐘左右(如果唔塞車嘅話)。通常D人都會留宿最少一晚﹐咁就可以滑兩次雪。不過我哋都無諗過要滑﹐一來唔識﹐二來唔想口水禧喺咁凍嘅室外玩太耐﹐諗住最多玩半個鐘至九個字就返歸﹐所以無打算住酒店﹐索性租車即日來回就算。
上雪山揸四驅車會安全D﹐除非識同四條呔裝鐵鏈就唔怕「羨」呔。我哋屋企無四驅車又無人識裝鐵鏈﹐所以唯有租架車上去。朝早八點幾起身食早餐﹐搞呢搞路成十一點先出門口。人哋上雪山係朝早天未光就出發﹐我哋就差唔多中午先去﹐無他嘅﹐唔想咁趕頭趕命好辛苦。尤其是有個細嘅就更加唔急得﹐一急俥就亂咁嚟﹐太早起身可能重會影響情緒﹐咁就真係盞搞。去玩都係想一家人開開心心輕鬆下啫﹐屎淋尿賴咁鞋都著唔切就要衝出街嗰隻留返返學先喇。
口水禧初時其實都唔知乜野叫去雪山。不過睇得出佢著咗條雪褲之後係好期待一陣間自己會去嘅地方係點樣。
沿路上口水禧擘盡個喉嚨係咁唱佢自己D首本名曲﹐唱咗成粒鐘﹐卒之今日變咗沙聲佬﹐講野都走晒音。去嗰程都係禧爸揸﹐我哋半路食過In & Out﹐食完都差唔多成點鐘﹐跟住又向雪山出發。
沿住山路行行下就會開始見到路邊有少少雪。口水禧見到雪之後就開心到傻咗﹐猛咁問佢老豆到未﹖幾時到同埋不如將架車停埋一邊比佢落去玩。重同我講要食下雪試味添。本來坐車坐到發晒呆嘅佢見到雪之後即刻好生猛﹐猛咁手指指D窗話見到好多雪。
我哋心諗﹐家陣都係小兒科喇﹐一陣見到再多D雪嘅話﹐我諗佢重開心過中六合彩﹗
果然﹐越接近雪山條友仔越唔耐煩﹐成日叫佢老豆不如停車比佢落去玩。我哋對上一次嚟都係十年前﹐D路完全唔係好認得﹐加上無諗住上雪山咁高﹐淨係想喺路邊有雪地嘅地方停低放條大鄉里落去玩下就算。如果要上雪山﹐就要搭吊車﹐大人每位八十幾蚊美金﹐細路都要半價﹐我哋一家三口上去齋坐都要差唔多二百幾蚊﹐發咗都唔會咁樣派錢喇﹐何況未發﹗所以cheap cheap哋﹐求其見有個湖﹐湖邊有雪地﹐我哋就停低車啪埋一邊﹐三條友喺車入換鞋﹑換襪﹑戴手套﹑笠冷帽﹐著羽絨﹐搞掂晒先落車。
可能著咗褸兼對鞋厚到打石膏咁勁﹐落咗車又唔覺凍喎。不過都見到D屋頂積咗成尺厚嘅雪﹐地下有D都有呎幾咁厚﹐要行都要插腳入雪咁行。
哈﹗我今次對鞋係靴咁嘅款﹐入面有晒棉包住對腳﹐著咗成對石膏咁﹐莫講話會凍親﹐我諗即使插住喺雪入面幾個鐘都無問題呀﹗相比起上次比人點我著去嗰隊真係蚊比同牛比﹐你話禧爸上次係幾咁大整蠱吖﹗
去到一個叫Lake View Avenue嘅地方﹐一排大屋對住個湖﹐每家都有一個獨立嘅碼頭仔﹐嘩﹗真係靚到唔識形容﹗夏天應該都幾靚﹐雪景就更加唔在講喇。又靜又乾淨﹐有一間咁嘅渡假屋都咪話唔盞﹗
其中有一間係人哋要嚟出租嘅渡假屋﹐個後園無鎖到﹐於是D人個個都由嗰間屋嘅後園走落去碼頭仔度玩雪。有D人重會由個山坡仔sir落去個湖邊嘅雪地上面﹐真係唔洗錢都有得玩。
大鄉里唔執輸﹐見地下有舊冰﹐即刻執咗嚟攬到實一實﹐好似人哋執到金咁。行下又執一舊行下有執多舊﹐重話要帶返屋企添﹗唉﹗我諗就算當時有成千萬喺地﹐佢都會去執舊冰都唔會執舊錢架喇﹗
望妻石與望媽石(我自己以為)
實質係望女石啫。兩個傻佬﹐天寒地凍﹐唔通會有靚女著住比肩尼等你哋嚟望咩﹗
但凡係凍到呀媽都唔認得嘅地方或者雪地都會見到高到見唔到個頂嘅松樹。
有幾高﹖睇下禧爸企咗埋去﹐我瞓喺地下同佢影都影唔到棵樹個頂呀﹗個人企咗埋去﹐真係好似小人國去咗大人國咁款。不過唔明點解沿路揸車經過嘅時候見到好多山上面嘅松樹都攔腰咁斷咗﹐嘩﹐住喺度有棵咁高嘅樹喺間屋隔離咪隨時都要驚佢會突然斷腰扑落間屋度﹖
因為雪厚﹐口水禧初初見自己對腳插咗入雪裡面驚到唔敢行。猛咁拉住個老豆鬼殺咁嘈。到後來識行識走喇﹐就梗係飛起個老豆自己去玩喇。等佢老豆重話要埋個仔一齊去滑雪喎﹐呀老豆﹐你都係自己一個人喺山頂「碌」落嚟把喇﹐個仔唔會同你去滑架喇。
其實禧爸以前想叫我同佢去學﹐之但係我以前因為走去學人溜冰嗰陣跌裂咗條尾龍﹐之後就有陰影﹐叫我去滑雪﹐我驚我除咗企喺度之外……都重係企喺度架咋。
望咩呀你哋﹖喺樹等運到呀﹖
見唔見到口水禧手上仍然係攬住舊爛鬼冰﹖
呵護舊冰﹖
地上執到寶
正一係傻佬﹗
哎吔﹐跌咗舊冰喎﹗
老豆竟然夠膽唔戴帽﹗之後實後悔﹗
插咗隻腳入去D雪度之後就唔見咗佢喇﹗如果係上次對鞋﹐咁插法﹐家下應該坐緊輪椅。所以要喺地上跑都唔容易﹐插完又要遞返起隻腳﹐真係誇欄咁款﹗
見個老豆瞓喺D雪度﹐口水禧又唔執輸即刻倒地。結果成頂帽連頸巾都係雪。
睇嚟口水禧嗰日真係心情大好﹐咁合作影相唔係時時有。
佢後來搖求我企喺一條橋下面﹐佢去橋上面等我低炒下佢個樣喎。d細路真係寧舍古靈精怪﹗
冰嚟架咋仔﹐呢個表情係見到好多錢或者靚女嗰陣先會表現出嚟架﹗
唔知係咪D雪鬆得制﹐想整雪球定佢﹐但係整極D雪都散鬼晒﹐未舉起手定都散晒。原本想整雪人﹐但係D雪堆極都好散﹐所以整唔到。
口水禧喺個碼頭仔度行嚟行去﹐腳插雪插嚟插去﹐四圍咁去﹐笑到鬼咁開心﹐小朋友真容易滿足。無野玩齋玩雪都可以咁開心﹐笑逐顏開。咁睇嚟下年都未洗開始滑雪住喎﹐繼續玩雪喇﹐買滑雪工具都慳返﹗本來買咗個頭盔﹐不過佢都無玩D乜野活動﹐所以個頭盔又可以攞去退。小朋友最麻煩係年年唔同size﹐口水禧個頭要戴中童嘅size﹐不過睇落都只係啱啱好﹐即係下年又要買過個。一個爛鬼小朋友(youth size)頭盔盛惠六十幾美金﹗戴一年又要再買過嘅話真係重皮﹗
兩母子有食雪試味﹐結果實驗證明D雪係無味嘅。小朋友就係咁﹐乜都新奇想試。情況許可嘅話﹐我就有得佢。話實我自己都知係咩味。地方乾淨﹐我有得佢食。佢自己做實驗﹐好過我直接將答案話佢聽。而家佢試咗﹐以後都會知道雪係咩味道。
喺我哋著到隻粽咁嘅樣之時﹐湖面有幾隻鴨仔游緊水。唔怪之得D羽絨咁鬼暖喇。口水禧成日想行落去玩鴨﹐由細個到而家都對動物好有興趣﹐唔知係咪mimi嘅功勞﹖
口水禧﹕好彩呢度無乜人﹐如果帶咗呀媽上雪山﹐睇怕見到佢咁嘅樣﹐個個都好想質舊雪入佢個口喇﹗
又做緊咩實驗呀大佬﹗知唔知亂咁潑D雪﹐我企喺橋下﹐中晒頭獎﹐D頭髮掂到雪﹐雪又溶﹐成個頭濕晒。最慘都係禧爸﹐又唔戴帽﹐點知比口水禧偷襲﹐兜頭兜面潑咗好多雪落老豆個頭度﹐老豆個頭咩環境唔係唔知架喇﹐凍到個老豆吖﹗
想帶呢D雪返屋企呀﹖
睇緊D鴨仔游水﹐佢自己都想游埋一份。完全不顧自己身上嘅衫﹗
本來我都有戴冷帽同手套。但係戴手套就揸機影相唔方便。因為重有少少太陽﹐所以都唔覺得真係好凍。於是連帽都唔戴。
點解次次同我影就望第二度架呢﹖係咪攝影師嘅問題呀﹖
準備偷襲老豆……
結果老豆唔單止成個豆殼頂都係雪﹐連副眼鏡亦都走唔甩﹐入晒雪﹗用冰洗眼﹐我都係第一次見﹗
D屋頂積咗雪搞到D屋好似比人噴咗忌廉咁﹗
簷逢重有冰柱一支支冰插咁倒吊﹐跌落嚟會唔會比佢插穿個頭架﹖
玩到四點嘅﹐見太陽落山﹐就叫口水禧一齊走。開頭唔想走咁嘅樣﹐不過梗係唔可以唔走喇﹐大佬﹐唔走嘅話第二朝就有兩大一細嘅冰雕喺人哋個後園架喇﹗
順便影咗禧爸去噤錢但唔洗落車嘅情況。話實﹐嚟咗咁耐﹐第一次見架咋﹗
我估天氣凍嘅地方就會有呢D叫drive through嘅櫃員機。等你可以坐喺暖笠笠嘅車廂內噤錢。
所有嘅drive through野其實最巖思奶﹐我哋下下都要抱個仔落車或者上car seat都幾係野架﹐有時一日去幾個地方﹐一日抬幾野個仔﹐真係返到屋企手都震呀﹗索性唔好落車﹐一齊留喺車上面。
回程好快就天黑﹐條山路彎彎曲曲﹐地下D線又甩晒色咁制﹔對面線D車頭燈又強光射過嚟﹐條路有時重會行行下要兩條變一條﹐有條友幾乎挨埋嚟我條線撞到我哋。見禧爸揸咗去嗰程﹐咁回程比我揸少少喇。點知好揀唔揀﹐揀著揸最難嗰段路﹐真係成個「藤原托呔」咁嘅樣﹗轉到頭都暈﹐中途有個油站﹐即刻轉返比禧爸揸﹐我做返乘客好D。
呢次嘅經驗幾好﹐下年可能可以比口水禧去玩雪兜。有興趣嘅話﹐再大D重可以去學滑雪添……不過要帶埋老豆喎﹗
