尋日我去完廁所﹐刷完牙﹐洗完面﹐未戴返副眼鏡﹐一開門聽到口水禧好似比人庵住個嘴咁講野﹐因為近乎盲嘅近視度數﹐完全唔知佢做乜。
行埋D睇下……
天呀﹗乜有賊入咗屋咩﹖重要封埋我個仔個嘴添﹐唔通想綁架﹖
原來係有個傻人自己喺度玩膠紙﹐玩玩下玩上癮重要黐落自己個嘴度。貼完重好開心﹐覺得自己做咗項壯舉﹐鬼咁興奮﹗
其實都唔怪得佢嘅﹐從來都未試過比人用膠紙黐嘴﹐以為呢樣係一個遊戲。我話比佢知﹐媽媽細個返學嗰陣﹐只有成日上堂傾計嘅小朋友先會比老師用膠紙黐嘴。佢望咗我兩眼﹐繼續好享受個嘴被黐住嘅一刻。重話要咁樣嘅造型出街﹐搭車添。
封嘴嘅一分鐘裡面﹐間屋超靜。真係千金難求﹗
我要同佢解封﹐佢重唔制添。
最後係D膠紙頂唔順甩甩哋﹐兼夾我話佢呢個樣出街﹐呀媽會比警察叔叔拉去坐監﹐佢先肯撕走D膠紙。
