港式口水禧

唔經唔覺﹐口水禧已經喺香港留咗兩個禮拜有多。由於近期流感肆虐﹐加上時差嘅影響之下﹐我哋嘅活動範圍都唔會去得太遠﹐亦都盡量避免去好多人嘅地方﹐就算去都會食完野就急急腳走人。

對於我嚟講﹐一個人帶個細路出街係滿清十大酷刑嘅其中一款﹐帶完一次返到屋企包你可以燃燒大量體內嘅肥膏﹗除咗要帶比平時多一倍嘅野(我一個袋﹐口水禧又一個袋)之外﹐腳步亦要放慢好多嚟就返慢我N拍嘅口水禧。追巴士係唔會發生喺我哋身上﹐因為我追到架巴士之時﹐個仔可能已經唔知look咗去邊﹐或者趴咗喺條街度。所以已經不下幾次望住唯一一架去目的地嘅巴士喺我眼前閂門離開都無計目送佢喺我眼前消失。隔離嗰件重要唔生性問﹕「呀﹐點解唔上巴士呀﹖搭嗰架巴士呀﹗」心諗﹕「唔係你﹐比著早幾年﹐你呀媽我晨早上咗車喇﹐衰仔﹗」

上咗車之後﹐對所有野都充滿好奇心嘅口水禧就開始嚟料 – 呀﹐下一站係咩呀﹖呀﹐點解係XX村嘅﹖嗰架巴士去邊架﹖點解去XX度嘅﹖點解我哋唔搭金色嘅巴士呀﹖點解呢架係白色嘅﹖點解嗰架係紅色嘅﹖點解我哋坐上面嘅﹖點解後面有空位嘅﹖點解D人坐樓下嘅﹖點解唔坐的士嘅﹖點解巴士慢過的士嘅﹖點解唔坐小巴嘅﹖(下刪一萬九千幾百條問題﹐重有係呢D問題會好似回帶咁問完又問﹐答完又答嘅)如果有一日﹐坐喺你隔離有兩母子不停咁一問一答﹐好抱歉﹐騷擾到你寧靜嘅車程真係唔好意思﹐但係我又唔可以叫佢唔好問我野。(雖然好想﹗)

今年開始﹐口水禧終於可以跟住我出去揾食喇。而家去到茶餐廳﹐一坐低就識得話要食魚蛋河同菠蘿油。如果得我同佢兩仔乸嘅話﹐佢會乖乖咁食﹔但係一有其他人喺度﹐尤其係禧婆婆嘅話﹐口水禧就會即刻變身做港童﹐飯來張口﹐三催四請﹐差唔多要哀求佢先等到佢食一口。中國人同外國人對於細路食野嘅睇法係完全相反嘅。中國人大部份都覺得細路要肥先至叫健康﹔外國人眼中嘅口水禧嘅生長線percentile已經有75%嘅體重同95%嘅高度﹐但係喺禧婆婆嘅眼中﹐口水禧係叫做太瘦同面色唔好。所以返咗嚟之後﹐口水禧每日都係過住如珠()如寶嘅生活。呀婆每隔幾分鐘就隊佢食野﹐真係食到我坐喺隔離望見都覺得飽。