正所謂X開有條路(我講我自己咋﹗)﹐記得舊年嘅年初一我瞓咗一日﹐因為成個人都周身骨痛﹐又熱又凍﹐但係又無發燒喎﹐淨係好唔C服﹐好彩嗰日有成棚人幫我睇住口水禧﹐我當自己無生過個仔咁係咁瞓﹐連親戚長輩嚟坐我都無出過房同人拜過年﹐一路瞓到客人都走晒我先醒。
今年雖然無舊年咁大獲﹐但係又係唔知做乜周身骨痛﹐又係瞓同攤﹐下晝口水禧瞓晏覺嗰陣﹐我都頂唔順要跟埋佢瞓埋一份﹐瞓到口水禧起身我都未醒﹐真係服咗自己。年初二都一樣瞓到禧婆婆同公公肥玲去完開年返到屋企準備帶口水禧去玩嗰陣我先醒到。
一個二個已經換好衫準備出門口﹐我唯有睇住佢哋走人喇﹐阻住口水禧去玩﹐容乜易比佢呀婆柄架﹗
就係咁﹐佢哋四條友就竟然搭的士去公園玩喎﹗我真係要寫個「服」字比我呀媽﹗平時慳到隻野咁﹐但係同個孫去玩就飛的﹐真係除咗
﹐我都唔知應該講咩好喇。
當日嘅夜晚我同口水禧要去同禧爺爺嫲嫲重有其他屋企人食開年飯﹐所以我都要去買D野﹐於是約咗佢哋四個食晏﹐諗住食完順便買埋要買嘅野就一齊返屋企。
聽講個公園好大好新﹐有人重玩到要剝衫添﹗講到咁鬼正﹐咁我今日就一於跟埋去玩喇﹗
好可惜嘅係當我正想幫禧哥影相之際﹐舉起部機﹐扮晒專業嘅時候﹐shit﹐點解部野無反應嘅﹖啊﹗原來係無memory card﹗唉﹗重可以點﹖咪面懵懵咁擺返部機入個袋﹐跟住就全程陪住少爺曬咗兩粒鐘太陽囉。
咁呢篇野唯有用肥玲上次操刀嘅相喇。
由於我上次係無去嘅﹐所以當日佢四條友搞乜東東呢我係完全唔知架。
不過今日去過之後﹐我就覺得其實可以比口水禧著短袖短褲﹐雖則係見到個個都著住冬天衫褲﹐禧婆婆簡直係宇宙最強﹐佢係全程都著住一件好薄但係係樽領嘅衫﹐外加一件外套添。真係企喺隔離望住佢都覺得我咁著會中暑﹗
但係佢就猛話有風呀﹐要同口水禧著長袖﹐唔係玩嗰陣就更加要著多件抓毛外套添﹗即使口水禧髮尾都出水咁樣﹐呀婆仍然係驚個孫會冷親﹐堅持離開公園嗰陣一定要著返件外套。
睇返上次佢哋去嗰樹玩嘅時候﹐口水禧重要係著住長袖底衫加外面係棉裡面係抓毛嘅長褲﹐上身再加件衛衣個造型﹐唔怪之得佢哋去咗公園無耐就打電話叫我帶件底衫同毛巾出去喇﹐咁Q熱﹗真係唔變隻小狐仙都難喇﹗
其實喺外國返嚟香港嘅人唔會唔頂得冷﹐但肯定唔頂得熱。好似今日咁嘅溫度﹐比著喺嗰邊嘅話﹐D細路著咗背心出街玩架喇﹐就算凍到我要著羽絨嘅時候﹐一樣有細路著短袖當無事咁周圍行。不過禧婆婆猛話無太陽曬住嘅地方會好容易攝親﹐我就覺得入面短袖﹐出面加件外套就夠﹐有太陽曬住就唔洗外套﹐有冷氣嘅地方可能會涼少少就要著外套。我覺得可能係老人家怕凍D﹐所以少少風都會覺得叫做凍﹐但對後生嘅嚟講只係算涼咋喎。
舊年嘅新年就真係叫凍喇。我記得即使屋企開咗暖爐﹐但梢為企遠少少都會覺得好凍。搞到我以為今年都會好凍﹐重特登帶條雪褲嚟以備不時之需添﹐點知都無料到嘅。反而重比禧婆婆笑我誇得際添。而家D天氣真係估佢唔到﹐搞到個個你笑我誇時我又笑你咁﹐唉﹗
同親口水禧去公園﹐佢永遠都係即刻進入「老豆姓乜都唔記得」嘅狀態。不過都應該嘅﹐細路仔鍾意跑跑跳跳﹐爬高爬低﹐好過睇電視或者打機喇。
已經四歲嘅口水禧大致上都玩到八成園內嘅設施﹐而家鍾意玩D爬鋼架嘅物體﹐有時好鍾意玩下monkey bar﹐吊喺上面fing fing下對腳﹐覺得自己好型。通常我都有得佢自己玩﹐D野唔太高﹐地下又有軟墊﹐所以都唔洗驚佢會跌親整傷。除非係危險或者阻住其他小朋友﹐如果唔係嘅話﹐我都有得佢自由發揮﹐想點樣玩嗰樣野就點玩﹐其實有時有D玩意我都唔係好知係點玩就真﹐所以就有得佢自己研究下或者睇下人哋點玩跟住學。
今日有個就嚟夠三歲嘅小弟弟成日跟住口水禧﹐但係口水禧就鍾意同人哋個爸爸玩﹐因為嗰個叔叔會扮怪獸追佢哋。口水禧每次玩完滑梯都會走去個叔叔面前猛同人講野﹐玩玩下重好似同人好熟咁嘅款添。唔知嘅可能重以為我呢個企喺隔離嘅係路人甲﹐無奈我呢個呀媽真係唔知點樣扮怪獸呀大佬﹐應該係我從來都無諗過我係可以咁樣同個仔玩﹐年紀大﹐對兒時嘅玩意已經好模糊﹐又或者係陪慣咗佢去玩﹐一路都習慣喺隔離睇住﹐唔記得咗個仔已經長大咗﹐可以一齊玩「僕呢呢」添﹗
玩玩下唔止口水禧鍾意同嗰個叔叔玩﹐重有其他嘅小朋友都走晒過嚟趁噓咁﹐個叔叔都幾唔得閒﹗期間其實佢不停想叫個仔走架喇﹐但係無奈佢個仔又鍾意同口水禧追嚟追去﹐呀叔叔求咗個仔半個鐘﹐叫個仔去食飯﹐個仔都唔理佢老豆感受繼續同口水禧玩。有個小妹妹重問﹕「叔叔﹐你哋喺度挑戰緊邊樣野玩呀﹖」嗰個叔叔話﹕「我挑戰緊肚餓嘅極限呀﹗」真係聞者笑爆﹐見者流淚(睇見佢係咁求個仔去食飯嘅無奈樣真係笑到標眼淚﹗)
過咗一陣﹐個叔叔出殺手柬﹐攞咗支珍寶珠出嚟賄賂個仔﹐個小朋友抵受唔住誘惑﹐撇甩口水禧跟咗爸爸走佬。我諗個爸爸唔想比個仔食糖﹐諗住氹下個仔走﹐但係氹唔掂﹐唯有出殺手柬。
玩多一陣﹐我哋都要去醫肚。兩點幾離開個公園去咗APM食上海野。
口水禧經過兩個鐘頭嘅放電行動﹐食完野之後個樣已經係趕住去覆周公個追call咁。於是拿拿臨返屋企同佢沖涼﹐然後踢佢去瞓。即使返咗嚟節目係多過喺嗰邊﹐但係都盡量每日比佢瞓晏覺﹐因為唔想佢嘅生活習慣改變得太多。其實喺香港已經叫做瞓少咗﹐夜晚夜咗瞓﹐朝早又早起身(街外﹑房外嘅聲音嘈醒)﹐不過都知道喺呢度無可能有個好靜嘅環境瞓覺﹐咁唯有比佢瞓晏覺補返。因為瞓少咗﹐所以佢對黑眼圈成日都梗有一對喺左緊。
婆婆話口水禧今日嘅表現令佢發現其實口水禧都鍾意同其他小朋友玩﹐呀婆話初初以為口水禧係獨行俠喎。
其實口水禧由BB到而家都唔係一個怕陌生人嘅小朋友﹐佢細個嘅時候喺街都會自己同唔識嘅人打招呼﹐就算被第一次見面嘅人抱都唔會喊(當然﹐我要企喺隔離喇)。而其他嘅小朋友如果唔係喺口水禧隔離E嘩鬼叫﹐或者跑到bang bang聲地都震埋嗰隻嘅話﹐口水禧係無問題嘅﹐佢最怕係人哋太嘈或者動作太大啫。所以我從來都唔擔心佢會係個唔合群嘅小朋友。而家最緊要嘅係教佢同人哋玩嘅時候要守規矩﹐有禮貌﹐小心唔好整親細過自己嘅小朋友。其他野﹐自由發展喇﹗
