遊西貢

一連幾日假期﹐除咗帶過口水禧去公園之外﹐都無乜點真係玩過﹐今朝佢竟然同婆婆講話想去西貢玩﹐咁我哋一行人就梗係要奉陪到底﹐一行四人﹐三件阿四同一個少爺﹐浩浩蕩蕩咁搭巴士去西貢。

等緊呀婆著鞋﹐口水禧喺到自己娛樂自己﹐拎住婆婆部電話郁身郁勢﹐唔知重以為佢部電話漏電﹐電到佢條舞﹗

而家會自己打電話比老豆﹐早﹑午﹑晚﹑半夜都會打……如果唔及時制止佢嘅話﹗亦都會玩電話重打﹐打比上一個電話嘅機主﹐試過打過嘅開緊工嘅舅公﹐又試過打過比大佰父。真係驚佢遲早連警察叔叔都call埋﹗如果你哋邊個有一日接到一個電話﹐話筒裡面係個亂o翁廿四嘅細路﹐九唔搭八精神錯亂咁自問自答﹐咁你最好盡快收線喇﹐唔好浪費時間吖嘛。

望見佢呢個神情﹐不禁令到佢呀媽有D打冷震兼起鷄皮。莫講話係男仔整呢D眼神﹐就算係女仔整﹐我都頂唔順喇﹗呢D回眸一笑樣唔係個個受得架大佬﹗不過大家唔洗擔心﹐呢個神情係我連續影幾張相之中嘅一張﹐即係口水禧並唔係特登整比我影嘅﹐係咁啱唔知回頭望緊乜啫。

等到婆婆嚟到﹐我哋就行去等巴士﹐都等咗十五分鐘有多先有。例牌上到巴士﹐有人一定要求坐上層最前嗰排﹐又有人例牌乜都應承奉陪個孫嘅要求﹐於是四條友左搖右擺咁上上層坐頭位。其實我真係有D唔明﹐巴士同小巴嘅司機點解唔可以等乘客坐好先至開車架呢﹖尤其係老人家或者拖男帶女嘅人﹐唔通真係連嗰十幾杪嘅時間都等唔到﹖仍然記得第一次帶口水禧嚟香港嘅時候﹐有一日我自己帶住未夠兩歲嘅口水禧﹑佢架手推車﹑奶粉袋﹑自己個袋﹑兩件褸出去搭巴士。由美國帶返嚟嘅手推車又重又大架﹐摺埋都要兩隻手先摺到﹐重要o都八達通﹐成個站得我哋兩母子上車﹐但係個司機都無理我哋感受﹐一腳油就行郁架車﹐口水禧被嗰股衝力推到成個人向車尾咁衝﹐已經再無第三隻手去拉住佢嘅我只可以望住個仔喺我面前以三杪嘅時速就去到車尾咁濟﹐真係叫都嚟唔切﹐好彩有乘客一手拉住咗口水禧兼dick埋佢上凳坐﹐而我重要一仆一look咁擡住部手推車去放喺傷殘人士個位度用安全帶鎖住架野﹐然後先在一仆一look咁look埋去個仔度。真係心裡面不禁媽聲四起﹐發誓以後唔會再帶架手推車喺香港任何一個地方出現﹐咁就唯有辛苦少少口水禧對腳囉。

所以我到而家都唔明點解D司機要咁趕﹐幾杪都唔可以等﹗

去到西貢總站落車﹐婆婆話食咗晏先。佢話西貢家下有好多餐廳﹐於是我哋就揀咗個個都鍾意嘅泰國菜食。話時話﹐真係唔係講笑﹐通常D裝修靚嘅就食物嘅味道唔夠好﹐係要去D你一入到去就覺得食咗會肚疴嗰D先至好食。或者係我已經好耐無喺香港四圍揾食﹐有D唔慣呢隻衛生程度嘅餐廳﹐尤其係帶住手多多嘅口水禧﹐硬係覺得地方唔夠乾淨。不過野食嘅味道就當然好過嗰D裝修好靚嘅餐廳嘅。對上一次覺得好食嘅係喺九龍城一家泰國菜﹐不過地方就真係唔係好開胃嗰隻……如果唔係帶住細路嘅話我都無所謂﹐去過一D個地下「扇」到溜冰咁樣嘅打冷鋪﹐但係而家叫我帶住個仔去﹐我真係唔夠膽喇。

辣嘅野無佢份。呀婆同佢叫咗豌湯粉。佢自己「筆」嚟食﹐都算係幾合作﹐重留返條做宵夜添﹗

一向唔算食得好辣嘅我真係一年不如一年。呢D泰式鳳爪已經係極限。其他嗰D盡量叫人走辣少辣﹐咁樣去食泰國菜都幾樣衰﹗喺泰國餐廳唔食辣野﹐不如問人攞個兒童餐餐牌喇﹗

食完晏﹐我哋就帶住口水禧向住海邊進發﹐沿住海邊行下。

海邊向下望﹐會見到好多艇家泊喺度賣海鮮﹐要買就將D錢放喺老細伸上嚟個網度﹐老細重會幫客人劏埋先遞上嚟﹐呢D野口水禧都未見過﹐所以覺得好新奇。

有人重話想落去坐下隻船添﹗比佢落到去﹐人哋重洗做生意嘅﹗D海鮮唔比佢玩瓜晒至奇喇﹗

行下行下就有個公園仔﹐有D滑梯sir下﹐有人梗係唔會放過任何一個機會玩餐飽先走喇﹗今日著咗短打﹐就算有太陽曬住都唔怕熱爆。

當口水禧玩緊呢個旋轉滑梯嘅時候﹐有個大佢一﹑兩歲嘅男仔成日追住口水禧嚟迫﹐原來佢想口水禧同佢一齊sir鬥快喎﹐但係條滑梯好窄﹐又轉圈咁落﹐一齊sir可能有一件會飛咗出嚟﹐所以最後口水禧都無同佢一齊sir﹐個細路就猛咁追住佢﹐總之口水禧想邊樣﹐個細路就迫去口水禧前面玩咗先﹐而家見到呢D情景已無以前咁慶﹐除非危險﹐如果唔係就有得佢哋自己解決。我都想睇下無語言隔膜嘅問題﹐口水禧點樣應付呢D細路﹐結果係佢會選擇避開。除非對方死咬住唔放﹐口水禧就會走埋嚟我度﹐如果唔係﹐口水禧多數都唔理人哋﹐自己會行開去第二度玩。

我覺得呢個反應OK﹐如果佢選擇鬧人或者郁手嘅話﹐咁就可能會變咗開片。學校嘅老師通常都唔鼓勵還手﹐佢會教D細路清楚同對方講NO﹐然後行開﹐如果對方重嚟嘅話就話比大人知。呢個年紀﹐我覺得呢個方法係最適合小朋友﹐當然再大D嘅時候﹐有D人嘅行為可能唔容許你讓步﹐咁到時先至再教佢點樣應付嗰D蛋散。而家咁細﹐應該係以小朋友年紀嘅方法去解決﹐聽過好多例子係小朋友辱罵對方﹐甚至打人﹐再牽涉埋大人﹐變成最後係大人開片﹗我EQ負資產呀﹐我唔想通街同人嘈比人影咗上youtube呀﹗所以我成日都同婆婆講如果有一日我喺街同人嘈﹐記住提我小心比人影﹐我希望到時聽咗會識得即刻收火。

玩玩下越嚟越多人迫喺個細細哋嘅滑梯上面﹐又有八﹑九歲嘅細路﹐又有歲幾嘅細路﹐重有大人扶住D小朋友玩﹐唯有叫口水禧撤退。

玩到唔捨得走……

係都要爬埋呢個架先……

當口水禧爬緊呢個架嘅時候﹐有個起碼六﹑七歲嘅細路企喺個架隔離睥住口水禧﹐重用個身攬住一邊嘅架好唔耐煩咁嘅樣﹐佢嘅家長行埋嚟叫佢縮開比口水禧落咗嚟先﹐條細路發老脾話﹕「我咪喺度等緊佢落嚟囉……呢個野唔係用嚟落架﹗」鬼殺咁嘈﹐重要提高聲線添。我諗佢其中一個家長係佢呀公/爺嚟嘅﹐另外一個應該係佢呀媽﹐個細路無嚟禮貌﹐喝呀公喝呀媽﹐重夠膽睥埋我同禧婆婆﹐真係比著早幾年嘅我﹐佢係我個仔嘅話﹐我實dick佢返屋企用騰條fit到佢嗌救命嗌到失聲﹗包佢成個禮拜個羅友都坐唔到﹗

如今﹐我只會冷笑幾聲﹐心諗﹕「好彩唔係我個仔啫﹗」

禧婆婆話呀公而家叫做好有耐性﹐口水禧要幾耐玩幾耐﹐呀公都無怨言。兒女債兒孫債咪就係咁樣還架囉﹗我都一齊還緊架﹗曬住還又有﹐谷住度氣嚟還又有﹐真係易借唔易還呀﹗

以前嘅西貢係點我印象真係好模糊﹐不過而家真係多咗好多野玩。有船載人出海去睇咩波蘿包狀嘅岩石﹑去橋嘴島﹑咩睇海底生物呢D活動多到不得了。本來想帶鄉下仔去搭下船﹐不過晏得際﹐某人嘅電力開始無乜得淨﹐唯有下次再去坐船。

沿住海邊散步行去西沙酒店方向﹐一路上好多人放狗。口水禧真係顧得睇狗又唔顧得睇其他野﹐四圍亂咁走﹐我覺得佢係多野睇到失咗常﹐失埋控添﹗

行行下見有條樓梯可以比人行落海邊﹐帶住口水禧向下行﹐禧婆婆當然喺後面猛叫「唔好落呀﹗」唔通以為我會定咗佢個孫落海咩﹖

其實係三藩市嘅海邊多數大風﹐吹到企都企唔穩﹐所以我哋絕少帶口水禧去海邊。難得西貢咁多海景﹐唔比佢近距離睇下海點得呀﹖坐坐下﹐我叫口水禧伸手入水摸下D海草(我估係海草啩﹐其實我覺得個樣好核突﹐好似好多假髮喺海水入面咁)口水禧摸得好開心﹐此時禧婆婆已經勒令我哋即刻上返去﹐為免呀婆為咗救孫而踢咗個女落海﹐我哋唯有就範。希望有機會帶口水禧去海邊玩下喇。