當小魔怪遇上天使

記得第一次食天使蛋糕嘅時候 ﹐ 覺得真係好味對到不得了 ﹐ 由其加咗 D焦糖碎上去之後重可好味 ﹗ 上過網想學整 ﹐ 不過遲遲都未有時間開工。曾經有一排迷上咗整蛋糕 ﹐ 下晝或者夜晚等口水禧瞓咗我就喺廚房整呀整 ﹐ 衰完又整 ﹐ 再整再衰 ﹐ 直至到終於整到一個似樣少少嘅威風蛋糕出嚟 ﹐ 不過最慘嘅係唔係次次都可以整到一樣嘅結果嗰下先得人驚 ﹗

自從某人開始返學 ﹐ 我就無再整過蛋糕。整呢 D野需要好多時間 ﹐ 對於我嚟講 ﹐ 時間比任何野都更奢侈 ﹐ 搞掂日常生活嘅野之後就已經無時間再整呢 D「花神」野喇 ﹐ 有時真係好想食嘅話就唯有去買返一件半件返嚟嘆下。

尋晚口水禧個大姨媽買咗個天使蛋糕嚟話預先慶祝情人節喎。食完晚飯 ﹐ 大家圍埋一齊等食 ﹐ 口水禧重係第一次食天使蛋糕添 ﹗

蛋糕呢佢嘅興趣還可以 ﹐ 但另外有樣野就更加吸引佢 ﹐ 係乜野 ﹖ 之唔係嗰 D焦糖碎囉 ﹗ 首先﹐ 可以比佢隨意咁灑上個蛋糕度已經另令佢覺得好過癮 ﹐ 呢 D叫有得玩又有得食 ﹐ 唔覺意掂到 D忌廉重可以偷食 ﹐ 特登掂又得 ﹐ 唔特登掂又得 ﹐ 得咗 ﹗

當一個天使比一群魔鬼包圍之後 ……

下場就梗係比我哋圍剿喇 ﹗

立晒架生嘅禧哥 ﹐ 望住蛋糕都唔知點落手好 ﹐ 唯有一邊偷食住 D焦糖粒先 ﹐ 一邊等呀姨媽郁手喇喂。我將 D焦糖粒吉咗喺個蛋糕邊 ﹐ 口水禧話個蛋糕似棵樹 ﹗ R晒頭 ﹗ 小朋友嘅聯想力真係估佢唔對到 ﹐ 不過咁都幾好吖 ﹐ 或者佢真係見過有一棵樹真係咁嘅樣架呢。

有時聽到 D大人會回應個細路話「唔係呀嘛 ﹖ 邊有樹係咁嘅樣架 ﹖有樹係白色架咩 ﹖ 」或者係「車 ﹗ 邊似樹啫 ﹗ 亂 o翁 ﹗ 」小朋友有佢自己嘅一套 ﹐ 唔通佢哋真係會連樹係點樣都唔知咩 ﹖ 不過係加少少佢哋自己嘅幻想而已 ﹐我覺得呢 D就係佢哋嘅創作 ﹐ 大人唔應該夾硬加插自己嘅意見入去。應該有得佢哋自由創作先啱。