360

每次返嚟香港﹐落咗機坐車返屋企途中都會經過360個站﹐顎高頭總會望到D纜車喺頭上面行緊﹐其實想坐好耐架喇﹐不過每年都係呢個時候返嚟﹐天氣有時落雨有時又大霧﹐一唔係就係假期多人﹐所以一直都得個想字而無付諸實行。

終於喺星期二嗰日我哋幾個就走咗去搭360纜車。

而家地鐵多咗好多條線﹐又東鐵又西鐵又輕鐵﹐真係搞到我變咗盲毛﹗如果喺地鐵車廂見到我頭顎顎﹐口擘擘﹐眼神迷罔﹐咁應該係我唔識路﹐睇緊路線圖研究緊自己要喺邊個站落車。嗰日同禧公公晨咁早中入去機場接禧爸嗰陣﹐兩條友都研究咗一輪先知要喺荔景轉車。我重老點呀公喺荔景轉機場快線﹐點知去到荔景站揾嚟揾去都唔見去機場嘅月台﹐結果要去問職員先至發現原來要搭東涌線﹐去到青衣再轉機場快線。

去360簡單D﹐好快我哋就到咗東X城(唔記得咗個名﹗)喺food court食咗野就起程行去對面嘅纜車站上車。

好彩嗰日係閑日﹐超少人﹐連隊都唔洗排就買到飛兼上車。我哋揀咗水晶車廂坐﹐咁樣口水禧就可以坐喺度耷低頭望地下睇野﹐唔洗跪上張凳度齋望窗。不過對於有D畏高嘅我嚟講真係有D驚﹐驚塊玻璃爆破﹐容乜易跌咗我落去架﹗就算唔爆破都可能會甩咗螺絲鬆咗出嚟﹐到時架車咪又係無底跌咗我哋落去﹖一路坐一路諗假如真係爛咗玻璃嘅話﹐我哋應該扶住邊度先唔會跌落去呢﹖咁如果電檻斷咗﹐咪成架車…..無辦法﹐一個畏高嘅鄉下婆第一次搭360係咁架喇﹐上次搭海洋公園嗰架重搞到搭完頭暈添﹗真係無Q用﹗

纜車即將衝出纜車站嘅時候加速﹐一個緊張到擘大個口﹔另一個腳都縮埋﹗揸機嗰個真係無D同情心﹐特登要影低我哋兩個嘅醜態﹐將佢嘅快樂築喺我哋兩個弱小嘅心靈之上﹗

水晶車廂有乜唔同﹖咪就係人人都會耷低頭睇下有無錢執囉﹗不過錢就無喇﹐腳軟就有。不過我覺得諗透明車底嘅人都幾好idea﹐原來從窗口望出去同喺車底望落去係唔同感覺嘅。唔怪之得要收多D錢喇﹗成程大概都搭咗幾個字(唔知有無記錯﹐畏高嘅人搭呢D野寧舍覺得時間過得好慢﹗)﹐其實都唔算貴﹐因為確實係一個好好嘅經驗﹗如果唔似我咁驚驚哋嘅話﹐應該會更加好﹗

嗰日嘅天氣都算幾好﹐唔算太曬又唔太凍﹐我哋上車嘅時候係下午兩﹑三點﹐車廂比太陽曬得暖暖哋﹐坐上去慢慢向山上行都幾舒服。如果禧公公同肥玲都有去就更加好玩。不過聽講放假嘅時候係會排滿人﹐成個鐘頭都未排到入去買飛﹗所以其實新年嗰陣就想趁公公同肥玲放假一齊揾D地方玩﹐但係一諗到周圍都迫爆就驚到唔敢去喇。

兩個驚到要攬埋一舊嘅母子

而家耐心望下呢兩件蛋散﹐驚覺原來都有少少似樣架喎﹗

口水禧﹕嘩﹗下面有好多靚女呀﹗

禧爸﹕邊度邊度﹖乜望個頭殼頂就知道係靚女架o拿﹖

你話勒﹐咁高﹐點會唔驚呀大佬﹖

天生尖pat pat嘅佢又點肯乖乖坐定定吖﹖雖然開頭係真係有D驚﹐驚到連企喺地下都唔敢﹐重要喺度E嘩鬼叫﹐好彩架車入面得我哋幾個﹐如果重有其他唔識嘅人﹐人哋可能以為我哋幾件老野想推個細路出車添呀﹗

但係點驚都敵不過好奇心﹐坐咗一半嘅車程左右﹐有個人已經心思思試下腳踏「玻璃」實地嘅滋味﹐膽粗粗踏出佢喺空中嘅第一步﹐令我諗起佢學行路嗰陣嘅點滴。

成功由一邊行去對面之後﹐佢對「摩打腳」就嚟料喇。

各位觀眾﹐等我介紹﹕左騰右騰先生。

家下除咗係「一言九頂」之外﹐重係「左騰右騰」添﹗

唔經唔覺﹐坐坐下就到咗纜車站嘅另一頭喇。落咗車經過勢要斬人一頸血嘅精品紀念品店﹐我哋大人定力夠﹐不過就有條友仔好似老豆係開金礦嘅咁起勢咁話要買呢樣嗰樣﹐好彩比我哋昆咗話回程嗰陣先買﹐費時拎住咁多野行街喇。結果係回程趕住搭返纜車落山﹐落咗車個茂李先醒起唔記得咗買玩具﹗重猛問﹕「呀﹖點解頭先無買到玩具嘅﹖」

我心諗﹕「由始至終都無諗過買架﹐傻仔﹗」

不過我哋就比人斬咗一張相同兩個鎖匙扣嘅錢囉。算喇﹐張相擺喺香港比呀婆呀公佢哋日對夜對﹐D瑣匙扣就比我同禧爸帶返去用喇。

落咗纜車之後﹐眼前就係一個市集咁嘅地方(實則人哋叫乜名我已經唔記得咗喇)。兩邊有D食店同售賣同佛教有關嘅精品或者中藝精品。我邊行邊睄下有乜野賣﹐諗住去完寶蓮寺返轉頭嗰陣先停低睇下。 (係﹐我認我係無賴﹐我買野就得﹐個仔就唔得﹗)

我十分鍾意佛象﹐屋企有個佛象擺設(得個頭到膊頭少少)﹐口水禧細個望到會有少少驚﹐大咗知道係乜野之後重會問﹕「呀﹖點解呀菩薩坐喺嗰度嘅﹖」如果嗰日夠時間﹐我會帶佢上去睇下﹐不過太晏﹐唯有下次先上去。

個髮型同呢樹好襯嘅禧爸喺度影張相都有氣質過人架jack!

口水禧﹕老豆﹐咪帶我去剃光頭呀﹐我係要有個豌”cup”喺度先好睇架﹗

越大越成日全身抽筋嘅佢幾乎係無時停嘅﹗等緊呀婆去廁所都要起舞﹗

條褲重要有D吊腳﹐成個A貨MJ咁款。

o拿﹗上身喇﹗

呢個情形無論喺邊度都會發生。甚至喺表舅父嘅結婚晚宴上﹐人哋去敬酒﹐呢條A貨MJ自己上台表演撐場。咁啱個攝影哥哥將部機影住個台﹐在場咁多位賓客被迫一係低頭食野﹐一係借視線唔望電視﹐如果唔係就要被迫觀賞台上情不自禁起舞嘅人嘅舞姿。唔怪之得枱枱都食淨咁多野喇﹐飽到人哋唔想食﹗(係喎﹐早知應該同呀舅父傾傾﹐我個仔幫佢慳咗D餸﹐係咪應該比返兩圍嘅人情當表演嘅酬勞先﹗)