家庭日節目 – 南丫島

今次返香港因為口水禧大個咗﹐帶佢出去無咁麻煩﹐所以都多咗好多機會同佢周圍去玩下睇下。星期日見天氣幾好﹐無落雨又唔太熱﹐於是戚起條筋就決定去離島行下喇﹐話晒好似咁耐以嚟除咗學校旅行之外都唔多去離島﹐一家人去就更加係少之有少。見公公同肥玲放假﹐難得嘅家庭日﹐走去行商場就好似嘥咗一日咁﹐加上口水禧咁大個仔都未搭過渡海小輪﹐正確嚟講係連船都好似未搭過﹐所以同佢去離島玩下就最啱。

搭車去到中環都成點鐘﹐走去翠華醫咗肚先正識出發。唔好話口水禧﹐其實我都係第一次去IFC(聽就聽得多)﹐穿過IFC就去到第四號碼頭。除咗想帶口水禧去搭船之外﹐另外一個目的係帶佢去沙灘﹐美國嗰邊除咗上次去過LA嘅Santa Monica之外我都唔知邊樹有沙灘﹐不過我估有都應該係超大風﹐吹完塊面直頭硬過打botox咁濟﹗所以我哋都無乜點帶過口水禧去沙灘玩。

我自己都唔記得對上一次搭船係幾時喇﹐分分鐘連口水禧都未有嗰陣先搭過啩。不過我係會暈船浪嘅人﹐上到船好容易失平衡﹐左中右中﹐完全係行唔到直線嘅。為咗口水禧可以一嘗搭船嘅滋味﹐行唔到直線都要頂硬上架喇﹐我又唔識游水﹐唔搭船唔游水﹐點去離島啫﹖

買咗去榕樹灣嘅船飛﹐喺碼頭企咗一陣就有船。上到去有人就即刻羅友有針吉咁全程無掂過張凳。見係佢鄉下仔第一次就算喇﹐反正佢身邊嘅左右護法bodyguard會傍實個大少架喇﹐我一於就集中精神……瞓覺。無介紹錯架﹐瞓覺係我由細到大對抗暈X浪嘅好方法﹐總之我一暈就合埋眼瞓﹐咁就會舒服好多架喇。

瞓之前不忘影返幾張相先﹐咁搞笑嘅pose試問點可以錯過呀﹖個body洗唔洗咁S呀﹖

坐喺佢附近﹐不停聽到佢連珠炮發咁起勢問﹕

呀﹐點解有船嘅﹖

呀﹐點解會郁嘅﹖

呀﹐點解向前行嘅﹖

呀﹐點解水會郁嘅﹖

呀﹐點解點解點解X1000﹗

坐坐下佢話要去船尾室外睇下﹐咁粗勞嘅事梗係由我做喇。而肥玲梗係走唔甩要幫手同我哋兩個一齊出去喇﹐如果唔係﹐容乜易我企唔穩變咗you jump I jump架﹗

頭搖又尾擺嘅狀態之下終於出到去船尾。兩邊座位已經有人坐住﹐唯有去最後一排睇兩眼。望住海上嘅浪花﹐口水禧話似隻船喺度放屁喎﹗

企咗一陣﹐(我)頂唔順拖返佢入去﹐我繼續閉目養「暈」﹐佢就繼續睇窗問野。全程大約係幾個字左右﹐隻船埋岸嗰下真係要口水禧睇下﹐事關喺外國我哋唔係咁容易有機會睇到呢D 大細嘅船係點樣埋岸嘅。無計喇﹐游輪又未有能力去坐﹐咁睇唔到游輪點埋岸就睇住渡海輪點埋岸先喇﹐係咪先﹗我細個都好鐘意睇船上D叔叔拋條大麻繩比企喺碼頭嘅另外一個呀叔﹐然後碼頭嗰個叔叔就將條繩箍住碼頭上嘅大石凳﹐跟住隻船又慢慢埋岸﹐嗰陣我以為真係單靠條繩就可以拉條咁大架嘅船埋岸添﹗

落咗船之後就係市集﹐好多人好多店鋪﹐其實我最初以為離島會少D人﹐點知都係迫迫澀澀﹐市集嘅兩邊都擺滿晒貨﹐條路又因為人多而變得窄咗﹐所以其實無想象中行得咁舒服。而家嘅離島已經唔再係好似細個學校帶我哋去旅行嗰陣咁有純撲嘅風味﹐除咗係島上無汽車之外﹐都同喺新界行街差唔多。

呢幾條友仔就唔係波喇﹐竟然喺離島都掛住買玩具喎﹗大佬﹐真係無野揾野嚟攞咩家陣﹗後來比我昆咗話不如走嗰陣先買喇(無錯﹐又係呢招﹗喬唔怕舊﹐最緊要受﹗)﹐咁先至肯離開檔野繼續向前行。

而家嘅口水禧﹐出親街就四圍貢﹐尤其是喺室外嘅地方就更加有如甩繩馬騮咁亂咁走。公公或婆婆拖住嗰陣佢就邊行邊扭腰左搖右擺或者甚至係嘗試想甩開手走咗去添。搞到我周不時都要大街大巷即曳即柄﹐通街鬧仔﹐核突到爆呀﹗一人多我就無晒EQ﹐加上佢再玩野﹐將我團火推至極限嘅時候﹐我真係想伸佢羅友﹗不過當然係無伸喇﹐容乜易我比佢呀婆伸返我轉頭架﹗佢個保鑣呀婆身手反應都勁過特首嗰D﹐唔好話伸口水禧一腳﹐幾乎連鬧都唔比﹐大聲D講野都話嚇親佢﹗口水禧已經變咗做一舊豆腐﹐重係鑲咗金同鑽石嗰隻﹗問你怕未﹗

禧哥﹐你八還八﹐千其唔好連人哋沖涼你都咁樣望呀﹐你老豆會學架﹗

經過天后廟想比口水禧見識多D中國人嘅文化習俗﹐不過佢對門口條鐵柱重有興趣﹐喺樹玩佢自創嘅鋼管舞﹗

行完市集之後﹐再行多幾個字就會去到洪聖爺海灘。都咪話唔甘﹗對於我呢D終日都係超市門前泊好車行三兩步就入去買野﹐然後又係三兩步就上返車嘅銀嚟講﹐嗰日都叫做行咗我大半年要行嘅路程架喇﹗重要邊行邊柄專門行喺路邊山坡邊爛路嘅口水禧﹐嗰段路真係唔容易。其實我都知道既然帶咗佢去大自然就唔應該再束縛佢嘅活動﹐之但係環境真係唔容許太過放鬆﹐如果唔嗌住佢﹐一係就係佢撞到人踩到人甚至係kick到人﹔再唔係就佢跌親look落山坡﹔一係就無尾飛陀行得鬼咁快連影都無咁制﹐一陣比人老笠咗嘅話﹐我點同佢老豆交待呀﹗未同佢老豆交待﹐怕且我都比呀婆呀公殺咗我喇﹗所以﹐呀仔﹐真係對唔住喇﹐嚟到香港﹐呀媽不得不化身變成一個地獄呀媽日柄夜柄你﹐學呀婆話齋﹐後悔係無藥食架﹐我都唔想因為太鬆(呢度嘅standard應該係叫疏忽至啱)而發生不必要嘅不快事﹐唯有要你硬食多少少貓麵架喇﹗

行到有D想調返轉頭走嘅時候(我講我咋)﹐終於到達海灘喇。又話水清沙幼嘅﹖D沙好鬼「吉」腳呀﹗D海水有D凍﹐不過都無損呢位大鄉里嘅雅興。見到浪湧上嚟就尖叫﹐但係個身係越行越出喎﹗

經過上次係LA Santa Monica嘅經驗﹐條褲濕咗水再黐埋沙嘅話對我嚟講簡直係滿清十大酷刑﹗所以今次學精D﹐有咁高將褲腳捲咁高﹐千其咪陪隔離個傻佬顛行咁出﹐佢有衫換我無衫換﹐容乜易我會好似上次咁一個浪沖埋離連內膽都濕埋﹐重要行返幾個字出去碼頭﹐在搭船又搭車先返到屋企換衫﹐嘩﹐又濕又刮腳﹐我直情想C﹗所以我基本上係唔會企喺水過腳眼嘅位置嘅。