心聲

各位見過我同未見過我嘅朋友親友們﹐我哋三條友已經走咗返美國喇﹐香港又得以回復以往嘅繁榮同安全喇﹗(少咗三條友喺度阻住個地球轉吖嘛﹗)

暫時口水禧都無因為無返兩個月學而抗拒返學﹐尋日去到學校之後重主動問我可唔可以留底參加circle time添。(好彩啫﹐幾驚佢會習慣唔返學校嘅生活呀﹗)令我好驚訝嘅係口水禧嘅同學見到口水禧入學校嘅時候都好雀躍咁走埋嚟熱情地同口水禧講”hi Colin, we miss you!”或者興奮地講 “look! Here comes Colin!”可惜係口水禧完全漠視同學嘅一番熱情款待﹐睬都唔睬下人就調頭走鬼咗去﹐真係比佢激C﹗(再係咁串﹐遲早比人笠麻包袋拉入後巷打獲﹗)

重有好多香港blog未完成(應該係未開始就真)﹐不過我最想講嘅係以下呢件事﹕

相信有不少人睇緊呢篇野嘅時候亦都喺度媽緊我返咗香港都無揾過佢哋見面﹐粒聲唔出就閃添。我﹐絕對唔係串﹐亦都唔係扮晒野懶有型﹐只係因為每次返去香港都只有短短個幾兩個月嘅時間﹐對比起身在外地嘅大半年嚟講﹐呢個幾兩個月真係唔係多﹐所以我通常都會陪屋企人多。好不幸﹐今次禧婆婆又再次攞唔到簽證﹐令到本來諗住隨我哋一齊返美國嘅打算都要取消﹐睇見媽媽又要再次為咗攞唔到簽證嘅失落實在令我諗唔到有乜野理由可以留低佢自己喺屋企而我就帶埋口水禧出街去見朋友。所以好抱歉﹐我今次真係無乜揾過朋友見面﹐唔係因為朋友對我唔重要﹐不過相比起父母屋企人嚟講﹐我當然會選擇陪家人多D。

其實禧婆婆都係喺差唔多我哋臨近要鬆人嘅前一兩個禮拜先去「大戰」美國領事館﹐得知又係mission impossible之後﹐我已經聯絡咗荷里活嘅導演﹐睇下可唔可以安排下下次嘅M:I:IV比禧婆婆伙拍湯告魯斯﹐咁就大條道理攞個工作簽證嚟美國開工喇。劇本我都度埋比導演喇﹐就係講特工一號禧婆婆同二號Tom Cruise因為攞唔到簽證而要漏夜十字懸垂吊入去領事館偷簽證兼夾掉晒拒發簽證嘅通告紙﹐等D領事第二日無得比拒發簽證嘅紙比人局住要批晒所有人嘅申請……谷鬼氣﹗

好﹐自首完﹐要剷要鬧﹐隨便喇……還樹我都聽唔到嘅(講笑啫﹗)

呻多樣野先﹐重有一堆衫未摺。

話說今趟又係我隻身帶住口水禧連同四個大喼兩個細喼﹐重有背脊一個背囊返香港。飛機上好不幸坐喺三件PK後面。當我啱啱等到口水禧想瞓嘅時候﹐前面坐窗口位嗰個人兄就開始玩佢嘅開窗遊戲。每隔幾個字甚至係五分鐘就開一次個窗嘅太陽擋。將本來暗暗哋嘅機艙照到光過去照太陽燈咁撐眼﹗口水禧當時個頭墊喺我個大脾度面向窗咁瞓﹐就係因為嗰個PK不停咁開窗而撐眼撐醒咗。結果無得瞓唯有睇電視。期間不停比前面個人開窗撐到眼都開唔到咁濟﹐於是我喺忍無可忍之下憤而上面叫嗰條友唔好再猛咁開窗﹐D光好X撐眼﹗點知嗰件蛋散重要嘴瞄瞄咁話佢有權開窗﹐跟住就唔Q睬我添。三個男人都當我透明﹗谷鬼氣﹐我鬧佢做乜每隔五分鐘就開一次窗啫﹖睇嚟睇去咪都係嗰個天﹐有乜唔同﹖但D光就好騷擾到其他人。佢跟手都係嘴瞄瞄口o翁o翁唔Q知佢講乜。跟住我坐返埋位之後﹐佢係隔耐咗先開一次窗嘅﹐咪就係隔三個字先開一次咁大把囉﹗頂佢﹗開埋機門喇笨﹗

之後一路我哋都無瞓過喇﹐十四個鐘都喺度睇日光。嗰個人渣後尾索性成個窗開Q咗佢唔Q閂添﹐玩野﹖有得佢自己玩飽佢囉﹐死老野﹗鬼唔望佢哋對眼撐到快D白內障呀﹗我真係唔想咁樣去話佢﹐但係唔好真係持住老就唔理其他人感受先得架﹗重要蝦一個帶住細路嘅女人﹐呢D人拎去吞晒D幅射造福人群把喇﹗

後來我去完廁所經過廚房﹐見到有空姐同空少喺度打牙跤﹐於是我向佢哋投訴有人開住個窗好撐眼。佢哋重以為係開一兩次﹐好間唔中嗰隻﹐重叫我戴眼罩。我話我唔係要瞓覺﹐不過我齋坐喺度都覺得好乸撐眼﹐莫講話我個仔可以瞓到覺。成個經濟客位係得嗰條茂丙一個開窗﹐附近個個都瞓緊覺﹐我哋個位重光過開晒燈嗰陣﹐結果個空少話會去睇下喎。都知佢哋做唔到D乜。我真係好想發爛渣﹐不過我驚一陣比人搭手扣嚇親我個仔。唯有心諗﹕你三個PK一陣落機嗰陣最好行快D唔好比我見到你哋﹐唔係嘅話﹐我包你三個加埋我上youtube都似﹗

十幾個鐘裡頭﹐呢三個PK無乜點瞓覺﹐不停大聲講野大聲笑﹐我戴住耳機都可以清楚聽到佢哋把聲﹗重要喺我頭上個手提行李櫃攞野嗰陣跌咗件衫落嚟笠住我個頭﹐我無得瞓已經好火滾﹐對眼撐眼到標眼水﹐至憎人整到我個頭同塊面架勒﹐家陣重要係兜頭笠添﹐我……我真係想起身一個鐵沙掌將佢推去機頭呀﹗

之後臨落機前派餐﹐有個高級少少嘅空姐嚟叫佢閂窗(唉﹐早唔嚟﹐臨落機先嚟﹐把鬼咩﹗)我聽到個PK同空姐理論話佢有權開窗﹐點解唔比佢開﹖後來個空姐講唔掂佢﹐不過個PK都閂咗一半窗﹐當係叫做閂咗﹐我真係服咗佢﹗個天真係有咁好睇嗎﹖係咁下次不如出去坐喺機翼嗰度睇飽佢喇大佬﹗

就係咁﹐我哋兩母子眼光光坐咗十幾粒鐘先到香港。

喺香港個幾兩月裡面﹐見盡唔少自私精﹐不知所謂﹗我只想問一句﹐而家呢個年代﹐係咪已經唔興講句「唔該借借」﹖甚至簡短如「唔該」都會講完口爛架呢﹖上至80歲下至十幾歲都o亞Q咗呀﹖唔理面前係呀婆或者細路都好﹐總之自己趕/唔趕時間想超越前面嘅人就用個身去撞開人﹐目無表情就咁行咗去就算﹐話知比佢撞嗰個跌死又好﹐嚇死又好﹐總之就係人擋殺人﹐佛擋殺佛咁嘅狀態就為之正路勒。黐線﹗

摺衫時間到。