如常生活

天災人禍﹑國仇家恨﹑該死不該死﹑想死不想死﹐這些話題讓人實在有點吃不消﹗我對中國歷史的認識﹐只能慚愧地承認只有中三程度﹔地理好一點﹐有中五程度。化學物理沒有什麼程度(未曾試過及格﹗)﹐輻射核爆﹐我的頭同時也「R爆」﹐這邊廂誰和誰說末日大災難將至﹔那邊廂誰和誰卻說不會核爆。爆也好﹐不爆也好﹐生活還得過。我只知道要是我不做好今晚那頓菜﹐我就肯定給人「鬧爆」﹗

聽說輻射塵今或飄到加州上空﹐OK﹐正好今天在costco買了一瓶海鹽﹐應該夠我三人吞至腎虧有餘﹔加上天文臺說今晚有風暴﹐也許現在坐在床上寫blog之時已吃了不少輻射﹐明早起來變得明艷照人﹗

輻射塵﹖管它﹗老娘明天還要去學校co-op當雜工呢﹗

其實想了幾天﹐人家正在水深火熱之中﹐而我卻在這裡寫自己在香港吃喝玩樂的東西好像有點麻木不仁吧﹖不過看夠了壞消息﹐負能量比輻射更能傷人﹐要是你也想看些正面一點的東西﹐「稍移玉眼」繼續往下看﹔相反的話﹐看到這裡就夠了。

我哋3月8號去咗迪欣湖。同行有口水禧嘅爺爺﹑嫲嫲﹑禧婆婆同埋口水禧姑媽。香港嘅迪士尼我都係去過一次咁大把﹐重要係六年前嘅事﹐當時可以搭車嘅時候有經過迪欣湖﹐不過始終都未去過。

接近中午時分﹐我哋先食咗野﹐跟住帶口水禧去搭成個鐘嘅巴士﹐等佢過足癮坐樓上最前嗰排兼有埋安全帶比佢扣餐飽。此人某D時候會突然有好強嘅安全意識﹐例如喺超市坐手推車﹐無論條帶夠唔夠長去環抱佢﹐佢都誓C要扣安全帶。但爬高爬低玩D我警告佢唔准玩嘅野嗰陣就完全無晒危險意識呀下﹗

陪佢一齊坐嘅重任交由佢老豆負責﹐因為我哋個個都驚坐完巴士條脷會乾到枯萎。點解﹖如果你自問可以喺一個半鐘頭入面不停講野而唔會口乾嘅話﹐唔該過幾招我旁下身。沿途有人會一路係咁問以下問題﹕

點解巴士高嘅﹖點解巴士會郁嘅﹖點解巴士行得慢嘅﹖點解巴士有兩層嘅﹖點解巴士會著紅燈嘅﹖點解有人要落車嘅﹖D人去邊度呀﹖點解要返屋企嘅﹖點解嗰度係佢屋企嘅﹖點解我哋坐上面嘅﹖點解巴士要上橋嘅﹖點解巴士要過隧道嘅﹖點解隧道上面有山嘅﹖(如果係過海巴士﹐唔該答埋點解隧度蠏海入面嘅﹖同埋點解隧道無水嘅﹖呀﹐我想有水呀﹗)點解隧度有燈嘅﹖點解隧度有綠色嘅燈嘅﹖嗰D點解係紅色嘅燈嘅﹖(嘔未﹖等我下刪其他問題。順便講埋﹐以上問題巡環再用﹐非常環保﹗)

有個咁強好奇心嘅小朋友係好﹐不過側邊嘅人個口就會辛苦D囉。唔怪之得近來發現我面上嘅法令紋越嚟越深﹐上咗年紀同個口講得多野不無關係。係時候要儲定筆錢去拉皮﹗

喺過咗青馬大橋之後﹐我哋就轉搭另外一架專車去迪欣湖。到達嘅時候﹐只有兩對新人喺度影緊結婚相。口水禧離遠已經望到有個公園喺度﹐頓時唔記得老豆呀媽姓乜﹐朝住公園拔足狂奔揾入口。

公園內最吸引口水禧嘅就係呢個地下噴水池。好在一早都覺得佢可能會玩水上單車都會唔知點解濕身架喇﹐所以帶定咗衫褲鞋袜內膽做士o卑﹐結果梗係用得著喇﹗只要睇下D相就知點解要換過D衫喇。

開頭都還得好內斂﹐玩玩下都要不顧一切擁抱水柱﹗禧婆婆睇到EE呀呀﹐驚佢粒孫會冷親。隔一陣就喺我隔離講話：「好喇﹐玩夠喇﹐叫佢換衫喇﹗一陣冷親喇﹗」無計架喇呀媽﹐個個細路見到有得玩水都係玩到呀媽都唔認得咁濕架﹐佢今次叫做玩得矜持咗架喇﹐上次喺美國去discovery kingdom玩嗰個水次﹐佢直頭係濕到自己都會噴水呀﹗

本來上面張相影嘅時候係想捕佢睇水睇到比水兜面噴個狼狽樣嘅﹐等我痞咗一大輪﹐擺好晒手勢乾等嘅時候(佢係濕等﹐我係乾嘅)﹐條水柱仔噴上嚟都唔到佢條腰﹐結果跪計失敗咗。

前世唔知係咪無水沖涼架呢佢﹖

玩玩下﹐有個小妹妹加入。初初佢都係玩得好內斂下﹐玩玩下睇見面前一個瘋顛嘅哥哥玩得咁忘我嘅境界﹐個小妹妹都開始想有樣學樣﹐跟住口水禧騰嚟騰去。不過可能佢無帶多套衫替換﹐所以佢爸爸要捉實佢係咁E用對手掂下D水就算。

夏天嘅時候咁樣玩應該重好玩D添﹐不過要著返對防滑嘅鞋會好D。嗰日口水禧玩到連對波鞋都濕透﹐帶咗襪都無用喇﹐一著落對鞋度咪又整濕﹗於是夾硬要同佢喺公園旁邊嘅鋪仔買對類似croc咁嘅鞋﹐重要得粉紅色添﹐無計喇﹐唔通打赤腳返屋企咩﹗所以下次應該帶對防滑拖鞋嚟。

睇下﹐玩玩下變咗無下裝添﹗(有底橫嘅﹐放心﹗)當然﹐呢個情境已經叫旁邊嘅禧婆婆面容扭曲﹐不停催促無下裝小朋友快D換衫。

迪欣湖嘅洗手間確係無得彈﹗乾淨﹑超大﹑裝修靚。入咗去唔覺得入咗公廁﹐以為入咗好靚嘅酒店廁所一樣。可能嗰日係閑日無乜人﹐放假係咪都一樣咁乾淨就唔知。

我記得以前中學嘅時候﹐同朋友去一D好差嘅商場廁所都無問題。最多快用快閃人。而家有D新嘅商場廁所其實比起舊時去嗰D已經叫做乾淨好多﹐改善好多﹐但係每次帶口水禧去廁所都搞到我要媽媽叉叉佢先出得返嚟。細路仔手多多周圍掂﹐掂完又摸返自己塊面﹐如緊廁嘅呀媽眼睇住但又制止唔到真係火上頭殼頂﹐唔惡言警告驚佢一陣捽埋眼就大件事。去完出嚟洗手又未必有小朋友洗手盆﹐局住要單腳企﹐另外一隻腳頂起個40磅嘅蛋散﹐重要一隻手托住佢﹐另一隻手快快同佢洗乾淨對手﹐中間又要惡言相向一輪﹐因為佢連洗緊手都要手多周圍摸﹐嗰下真係無EQ時乜Q都無﹐所以喺香港嘅時候﹐大家唔難會碰到一個顛婆喺廁所鬧仔﹑喺街鬧仔﹑喺地鐵鬧仔……形象盡毀﹗(我知﹐我無乜可言架喇)

搞完一大輪出返嚟﹐諗住玩水上單車﹐點知管理員叔叔話大風唔安全唔可以玩。咁唯有租單車踩下喇。嘩﹗HKD120一粒鐘(唔知有無記錯)﹐無計﹐難得一次﹐慷慨少少囉﹗

唔講得笑﹐呢架野叫我一個人踩﹐雖則我有對甲組腳﹐但真係唔會踩得郁。(定還是我一直都係自己發力踩郁部車﹐而隔離嗰個其實係扮踩架呢﹖)真係好重呀﹗中間爺爺踩過幾下﹐婆婆又踩過幾下﹐我覺得齋用腳圍住湖邊行都無踩單車咁吃力。日日咁踩法﹐好快練到佛山無影腳或者旋風霹靂腿﹗

口水禧有得坐有得睇但係無得踩﹐條氣好唔順。一吼我哋兩件老野停低車坐埋一二邊會氣嘅時候﹐口水禧就即刻坐去側邊D位想踩﹐可惜吖﹐鬼叫你腳咁短咩﹗

踩唔到單車﹐唯有喺路邊一D鋼架度洩憤﹐排解下D壓力。

真係好似動物須嘅馬騮﹗唔係誇﹐佢喺屋企都係咁樣爬高爬低。已經四歲嘅佢活動能力大增﹐膽量相對亦都增強百倍。以前會怕高唔敢爬高﹐家下只要佢對手掂到嘅地方都無一倖免唔比佢揸過爬過佢都唔心息。

唔止愛上攀爬﹐重好鍾意由高跳落地。完全明白好似佢呢D望落疑似過度活躍嘅蛋散見到有野擒真係會按耐不住想擒下﹐因為佢呀媽細個都係呢隻model﹐見野就爬﹐見野就跳﹐重好熱愛壁虎功添。之但係我明唔等如其他人會明。曾經試過因為佢對攀爬跳嘅狂熱而喺一個遊樂場嚇走其他嘅小朋友﹐個個比父母夾去縮埋一二邊﹐得返口水禧自己繼續狂熱落去。情境好奇怪﹐但我唔怪人哋﹐唯有口水禧跳多兩野就夾走佢費時阻住人。

曾經當口水禧得歲幾兩歲嘅時候﹐我帶佢去公園玩。眼見有D大少少嘅細路周圍爬﹐有D重爬喺一條明明係類似一條管咁嘅滑梯(有個蓋喺上面嗰種)嘅頂﹐當時我覺得好牙煙﹐亦都有少少覺得個細路曳。不過過多秒﹐我就諗﹕「車﹗細路係咁架喇﹐自己細個嗰陣再危險D嘅都爬過喇﹗咪扮晒野喇﹗」如今﹐我個仔都做緊一模一樣嘅野﹐有時想制止佢﹐但又覺得天性如此﹐樣樣都唔比嘅話都唔等如係愛錫佢嘅行為。加上四歲嘅年紀特質就係咁樣﹐呢種性格嘅細路係唔會停到落嚟﹐如果每樣野都要鬧的話﹐我個口重慘過陪佢搭多幾次巴士。

但係﹐喺香港嘅時候﹐為咗唔影響其他人﹐為咗唔會因為小朋友喺遊樂場玩發生碰撞繼而雙方父母口角﹐為咗唔會比其他人ji ji jip jip令自己血脈沸騰﹐好無奈﹐我多次需要惡言制止口水禧某D我個人覺得其實OK嘅行為﹐我只可以有時瞓覺嗰陣同口水禧講有D野留返返去美國嗰陣先玩喇﹐費事整到人比人鬧喇。

如果公園無人嘅話﹐我會有得佢自我狂熱下﹐有人喺隔離就跟返大隊咁玩﹐費事煩。喺雞雞學校﹐老師任由學生用佢哋自己嘅方法喺滑梯sir落嚟(有大人喺隔離睇住)﹐有D小朋友趴喺度sir﹔有D趴喺度頭向下sir﹔有D瞓喺度sir﹔有D瞓喺度頭向下咁sir﹔有D調轉坐﹐背住咁sir﹐我望住班小朋友個個sir到卡卡大笑﹐sir完又即刻再去sir多次﹐重要再創多幾樣新招式出嚟﹐我就覺得咁樣先係最幸福最開心嘅小朋友。既然遊樂場嘅設施係為咗小朋友而起嘅﹐咁點解唔可以由得佢哋用自己想用嘅方法去玩嗰樣野呢﹖只要喺安全許可嘅情況之下進行﹐其實無乜野係唔可以比佢哋試架喎。

可惜嗰次睇見嗰D家長嘅面部表情﹐我覺得大家係唔接受口水禧嘅玩法﹐甚至佢哋嘅眼神令我覺得佢哋特登要阻止佢哋小朋友同口水禧玩或者學口水禧咁跳。其實﹐當一D家長望住疑似失常嘅口水禧之時﹐我何嘗唔想喺佢哋明明係講廣東話但係對住個細路要轉channel講D笑死人嘅英文嘅時候望返佢哋呢﹗但係我尊重你有你嘅自由﹐同時亦都唔該閣下尊重我同我嘅細路唔想好似異類咁比人眼超超嘅權利。

A~~~~講咗去邊呀大佬﹗

迷人pink lady鞋一對。如果以為佢會唔肯著﹐咁就錯晒喇。佢不知幾咁鍾意對鞋﹐日日都話要著。今日喺costco同口水禧食緊下午茶﹐佢問我﹕「呀﹐媽媽﹐點解男仔唔可以著裙嘅﹖」我話﹕「邊個話唔可以著呀﹖女仔都可以著褲喇﹗點解男仔唔可以著裙﹖世界上有D地方嘅男仔係著裙架喎。」

記得喺香港嘅時候有一日口水禧猛話要著肥玲條短裙﹐婆婆話男仔唔可以著裙。當時我講比婆婆知口水禧學校比家長嘅手冊上面寫住如果co-op嘅時候見到有男仔攞D公主衫嚟著嘅話﹐千其唔好干涉甚至係阻止佢哋咁做﹐因為呢個年齡嘅小朋游雖然已經可以分到男仔同女仔﹐但係喺男女兩性之間嘅區別﹑衣著﹑打扮等等各方面係無乜野具體嘅了解。即使一個小男孩著咗公主裙加埋高踭鞋都好﹐唔等如呢個細路有易服嘅傾向﹐呢D只係純粹出於好奇心先會想試。可能喺街見到人哋著﹐喺屋企見到家姐表姐姨媽姑姐著﹐咁佢又跟住著嚟玩下架啫﹐所以大人唔洗咁緊張要即刻迫佢除返落嚟或者斥責佢哋呢個行為唔啱。

不過大把家長係接受唔到有得小朋友咁樣做﹐包括禧婆婆﹐佢聽完即刻話﹕「老師講就實啱架o拿﹖邊個話男仔可以著裙﹗」<<<<呀婆婆﹐我都唔係盲目咁順從老師或者書本講就信架﹐我都有觀察小朋友D行為然後自己用個腦思考架嘛﹗正如有小朋友鍾意著鴛鴦襪/鞋出街﹐你迫佢著一對一樣嘅﹐咁佢問你點解一定要咁著嘅時候你會點答呢﹖「係咁架喇。」﹑「無得解﹐係咁。」﹑「我話著咩就著咩。」﹑「你咁著﹐人哋會以為你黐線架﹗」﹖有無諗過如果咁樣答佢哋會令到佢哋將來長大之後會因為成日都怕人哋笑佢而變得乜都唔敢做(犯法野除外)﹐即使諗嘅野係啱嘅都唔敢表達自己﹖

如果係我嘅話﹐我會答﹕「你可以咁樣著﹐不過街上面可能會有人用好奇怪嘅眼神望住你或者甚至會問你﹐話你﹑笑你。但只要你覺得自己著得舒服﹐又唔影響到其他人﹐其實係無問題嘅。」聽完重想唔想著就由得佢自己決定。

如果時裝設計師怕人笑﹐咁我哋就唔會有新款時裝喇。

嘩﹐離題離到我吖﹗

口水禧身後係一個小小嘅池塘﹐種咗荷花(定係蓮花﹖﹖﹖)重有D草咁。我哋聽到D青蛙嘅叫聲﹐不過就見唔到佢哋出沒。真係有D可惜﹐如果唔係﹐口水禧就可以睇下青蛙(或者唔知係咩蛙品種)嘅樣同點樣跳。

好得意﹐小朋友成日都好鍾意用手去摸D佢哋覺得好新奇嘅野﹐包括廁所裡面嘅一切。而家有好多小朋友書入面都有好多圖畫黐咗D唔同質地嘅野比D小朋友去摸下每樣野嘅表面唔同嘅感覺。如果草地無屎嘅話﹐我唔介意佢連鞋都剝埋用對腳板底去試下踩草係咩感覺。

係咪睇緊有無人跌咗錢落去﹐諗住發個橫財幫補車錢﹖

一對moh-look!

影完呢張懶係friend嘅相之後﹐我哋兩個分別喺手背﹑手臂同腳(﹗﹗﹗)上多咗十幾廿粒紅點﹐痕到PK﹗我一對肉臂有如生麻風﹐又痕又核突﹐好彩第二日天氣涼返少少﹐我出街都可以著長袖﹐不過係唔敢「業」高衫袖﹐費事人哋見到以為我生咩傳染病嚇C人﹐因為真係好核突﹗我喺回程嘅飛機上帶埋支藥膏﹐以防痕到爆頭嗰陣可以即刻搽嚟止痕。到咗今日雖然已經完全唔痕﹐但係D印就重喺樹﹐不過無咁深色﹐好過無。

點解嗰個口水禧瞓喺草地上面look嚟look去都無事﹐我哋兩個坐一坐都賴野﹗不過好彩真係唔係佢賴野﹐如果唔係﹐都唔知佢點樣可以忍住唔R﹐因為我唔R都要狂咪十字都未必止到痕﹐何況係口水禧﹗