絕對唔係嘆緊茶食個包咁爽呀我﹐去完學校co-op﹐散咁濟﹗
不過趕住明日嘅見家長大日子﹐所以要做起口水禧份問卷﹐見家長嗰陣交比老師以便傾下口水禧喺學校嘅表現﹑進度﹑心智發展各方面嘅事。重忙過我自己返學嗰陣﹗一份六頁嘅評估報告﹐包括咗小朋友嘅溝通能力﹑動態動作體能﹑靜態動作體能﹑解決問題能力﹑人際關係等等﹐每一部份都有六條問題要答﹐做好之後老師就會同家長研究﹐如果發現個小朋友有D野未達到要求﹐學校可能會安排跟進。
記憶之中﹐我比老師見親家長都係公式化嗰幾句心散﹑未盡全力﹑上堂傾計﹑坐唔定﹑唔集中﹑可以再考好D﹐總之就係煮到你返屋企(多數係一行出個課室就開始
)比呀媽剷到上天花為止。其實我細個讀書成績都唔算差﹐何解無論考第幾都會同以上紅字嗰D野掛到勾架呢﹖
我最鍾意就係「心散」
﹐因為到而家我都未研究到究竟點樣先可以黐返實個心唔再散>>>
﹖我淨係知我又唔係先天性或後天性心漏﹐但我嘅症狀係比心漏嘅人更嚴重﹐因為係直情成個心散咗﹗你話幾咁大件事﹗
細個最憎就係家長日﹐因為發現原來家長日先至係我哋做學生嘅年初二﹐嗰日個個都實比呀媽開年。忘記咗以前禧婆婆去見老師嗰陣會傾D咩﹐多數都係同我個班主任一唱一和咁煮煲大檸樂過我飲咁啩。材料﹕以上紅字﹐缺一不可﹐但係可以再添加其他負面評語(入味D)﹐加鹽加醋﹐好彩好似未試過用騰條埋「憲」(<<<頂﹐突然唔記得點寫添﹗)。我唔介意佢哋話我成績唔夠好﹐因為自己知道能力係咁上下﹔但係好介意老師根本唔了解我而妄下判斷累我比呀媽鬧。
攞起呢份問卷﹐終於發現呢個世界有D人真係好幸福嘅﹐因為D問題唔係測試緊小朋友有幾叻﹐亦都唔係想挖出呀邊個邊個乜野水皮。呢份係一份真正關心學生各方面發展嘅問卷﹐做得好就講句好﹔做得唔好﹐唔緊要﹐有人會幫你去跨過難關等你都有得進步。
熱切期待明日嘅家長日﹐放心﹐無論老師講乜都好﹐聽日一定唔會係口水禧嘅年初二。
