做功課

前日口水禧同姑丈姑媽玩視象嘅時候被問到有無功課做﹐其實係有嘅。不過唔係每日都有得做﹐而係一個月有一或兩次嘅功課。呢兩樣功課分別係Surprise Can同Mascot。Surprise Can 故名思議就係比個罐(一個乾淨嘅油漆罐﹐無裝過油漆嘅﹐放心喇呀婆婆﹗)你返屋企揾件塞得入個罐嘅物件﹐然後寫低三個有關呢件物件嘅特質﹐第二日返學嘅時候﹐老師就會喺circle time攞出張紙讀出嗰三樣特質比其他小朋友估。

如果睇咗前面講家長日嗰篇blog嘅評估問題﹐可能記得有一條係問小朋友可唔可以對一件物件作出幾樣形容﹐其實做Surprise Can嘅其中一個目的就係想訓練小朋友對一件物件嘅觀察﹐然後將佢嘅特質揾出嚟。試想想﹐話明係特質﹐咁就梗係唔好講D人人都有嘅野喇﹐咁樣人哋好難估架嘛﹗所以都幾考小朋友對嗰件物件嘅認識﹑觀察﹑詞彙等等。

初初﹐口水禧做嗰陣都一舊飯咁﹐完全唔知應該比D乜野提示好﹐第一次做嘅係長頸鹿。結果我哋係上網揾關於長頸鹿嘅資料然後揾咗三個特質﹐例如條頸好長嘅﹑住喺savanna(原野﹖)上面﹑身上有唔同顏色嘅紋。唔好講笑﹐除咗條頸好長之外﹐其他我真係唔識﹗或者係醒唔係有D咁嘅特質。

之後口水禧就愛上咗玩呢個遊戲﹐成日喺屋企嘅時候叫我或者佢老豆估野。不過有時個傻仔會不自覺爆咗個答案出嚟﹐例如﹕有毛嘅﹑meow meow叫嘅﹑係貓嚟嘅﹗﹗﹗跟住叫我哋估喎。大佬﹐成個答案講咗出嚟﹐真係好難囉﹐好難估唔到呀﹗

另外一份功課就係My Adventure with Max。老師有隻白兔仔公仔叫Max﹐邊個小朋友輪到佢嗰日攞隻白兔返屋企就要寫一篇關於佢帶咗Max返去之後所發生嘅事。第二日喺circle time嘅時候老師就會讀出篇文比大家聽。

呢份功課對於口水禧嚟講有少少問題﹐事關每次都由一個小朋友帶返屋企然後第二日攞返學校﹐展轉下來﹐隻白兔已經變咗灰兔。加上有D外國人屋企係唔除鞋周屋踩﹐呀Max可能去咗個同學屋企之後就比人周地放﹑或者比狗擔過﹑比貓坐過﹑同學有鼻涕口水揩過等等﹐所以呀Max次次嚟到我哋屋企嘅時候﹐我都唔敢比口水禧玩太耐﹐一來毛公仔對佢氣喘好有影響﹐二來唔知有無病菌喺呀Max身上。除非放長少少假﹐等我洗乾淨咗先比口水禧玩下。所以基本上口水禧同呀Max係無乜adventure可言。咁點算呢﹖唔通寫話呀媽嫌Max污糟唔比我玩咁咩﹖

前幾日夜晚喺度諗緊點做份功課嘅時候﹐突然靈機一觸﹐諗到adventure呢個字﹐咁無話過一定要真有其事架啫﹐可以係憑空想象都得架嘛﹐係咪先﹖於是請大作家口水禧自己諗個故仔出嚟﹐我就好似以前D街邊寫信佬咁幫D唔識字嘅人寫信咁﹐佢講我寫。卒之就寫下一篇哈里波特前轉出嚟﹕

從前﹐有隻叫呀Max嘅兔仔住喺一個星球叫做地球。天黑嘅時候﹐呀Max同Mimi同埋我都會去飲咖啡同埋食晚飯嘅。跟住我哋就會飛去Target度買牙膏。然後Mimi就會變到好大隻﹐咁我就同呀Max上Mimi個頭﹑背脊同個肚dum度玩(本來條友仔話佢同呀Max上咗Mimi個背脊度食咗Mimi﹗﹗﹗﹗)跟住我哋三個就去咗行草地。完。