自從家長日之後﹐我就開始喺夜晚洗好碗以後趁有少少時間就同口水禧一齊讀書。其實似係我讀﹐佢玩多D。
事緣係早排去Target買野嘅時候﹐咁啱特賣場有D 芝麻街嘅書仔賣﹐USD$1本添﹐見裡面D字唔多兼且牛乸咁大隻﹐正好係用嚟幫禧哥補英文嘅材料﹐於是買咗幾本返屋企試下。
夜晚食完飯﹐我哋兩母子就攤喺梳化攞D書仔嚟讀下﹐有D似學校茶點時間咁﹐佢哋食﹐我就負責派野識兼讀書。好彩﹐暫時口水禧都唔抗拒讀英文書﹐如果抗拒嘅話﹐咁就要諗下用第二D方法同佢學英文。可能係新X坑嘅關係﹐口水禧每次聽到我話﹕「喂﹐去攞D書出嚟一齊讀喇。」佢就會好雀躍咁飛奔去佢房度攞晒新買嗰幾本野出嚟。跟住就會揀本佢想讀嘅遞比我呢個人肉發聲機。
最初﹐我真係唔知應該點搞﹐試過我讀完本書跟住要佢跟住我一句一句(兩﹑三粒字)咁讀一次﹐佢好有心機跟住讀﹐不過有D音發得唔準﹐例如﹕”th”音係條脷要伸出嚟夾喺上下門下咁樣發﹐但係口水禧會變咗用上排門牙咬下唇咁發﹐呢個係發”v”字音嘅方法。又或者讀”play”呢個字﹐佢會讀咗”pray”音。顧得個”p”音就顧唔到個”l”音。於是我唯有將隻字拆開咁讀﹐例如將”play”讀成”p-lay”咁樣等佢識別到”play”同”pray”兩個字嘅讀音係有唔同嘅。我相信佢係知道自己發得唔啱﹐不過暫時又未可以控制得好好。我諗只要一路篤住提佢嘅話﹐總有一日佢會發到個正確嘅音嘅。
讀下讀下﹐我就開始有少少又迷失咗﹐竟然叫佢自己讀﹗例如當佢唔識讀”bubble”嘅時候(讀咗九萬幾次)﹐我竟然問佢bubble係咩字頭﹐應該係發咩音。當然﹐佢都係擘大個口得個窿望住我﹐又少少驚驚哋咁嘅神情。望見佢個樣﹐好彩呢次我算清醒得快﹐即刻扮晒同佢玩下啫﹐卡卡聲笑下等佢無咁驚。我覺得同佢讀書就等如我自己喺度練功﹐盡忍﹐將全身所有嘅EQ都嘔晒出嚟﹐想鬧嗰陣盡量噤住把火﹐諗下佢都未開始學字﹐又點會望隻字就知嗰隻字點讀呢﹖極其量都係問下B發咩音呀咁樣囉。幾驚呀我。
記得我細個讀幼稚園開始D數學已經係無得救嘅境界。禧婆婆以前係個數學老師﹐佢點都估唔到生個女出嚟竟然D數係低B得咁嚴重嘅。印象中有一次呀婆教我做數學功課教到嘔血嘅程度之時﹐我重係亂Q咁答佢﹐於是說時遲那時快﹐佢已經「因為時間嘅關係」攞咗條騰條出嚟好似驅魔人咁同我驅趕體內嗰隻唔識計數嘅惡魔﹐打到手腕個位有少少損咗流血﹐個羅友幾傷就唔洗講喇﹐之後佢話叫我再做過嗰幾條數﹐我又奇積地做啱晒喎﹐所以佢話我係無心機做而唔係唔識做。起初我都覺得可能係﹐所以真係抵打。不過之後十幾年嘅讀書生涯已經好活生生咁證明咗我原來真係數學低能嘅﹐所以禧婆婆由開頭會打獲我到最後都費事再理我數學考試攞幾多分﹐食蛋又好﹐唔食蛋又好﹐每次考數學之前一晚我都驚到瞓唔著﹐第二日返學一見到份卷我就想暈﹐有見及此﹐禧婆婆通常都喺我考數之前一日見我猛喺度背D公式嘅時候同我講「盡力喇﹐唔洗比壓力自己嘅。」我確實係一個齋背書嘅人嚟架﹐我個腦唔曉轉彎架真係﹗
你叫我寫一萬幾千字﹐我會好開心﹔但係若然要我計一條數﹐我會抑鬱架﹗唔好講笑﹐嚟咗十年﹐我都重未識好快咁數散子﹐如果一去買野要我數散子﹐我會遞晒出去比個收銀搞掂﹐佢收多收少我係唔會察覺。(禧爸睇見呢句應該好想打獲我﹗
)
所以我唔係特登唔識﹐而係真係腦唔曉轉彎﹗
每當我諗起自己細個做數學功課嘅慘況﹐我就提醒自己千其千其唔好用同一個方法去招呼口水禧。我知道越迫越鬧﹐只會將佢本來有興趣嘅心拉得更遠﹐令到學英文變成一種壓力﹐死記死背係無意思﹐唔識應用嘅話﹐比你背晒成本字典都無用﹐就好似我背晒D數學公式但唔曉用喺D文字題上又有咩用呢﹖
所以當佢唔識隻字點讀﹐我就讀一次比佢聽下﹐然後叫佢試讀一次。有時佢會問更多嘅問題﹐問下呢隻咁樣英文係點講﹐嗰隻字點解呀咁﹐咁就表示佢都有興趣學下書以外嘅英文字喇。有時本書問What is your favourite activity at school?我就會改下D字﹐變成另外一條問題﹐好似What is your favourite animal/food/toy?佢答完重會走去問佢老豆﹐見佢得意洋洋咁走返嚟話比我知老豆答咩﹐我覺得用呢個方法應該幾適合佢。如果開始覺得佢對眼望第二度﹐無心裝在嘅話﹐我就唔會再讀落去﹐因為夾硬再迫佢聽同讀﹐好快就會有相反嘅效果﹐連埋之前讀嗰D都無晒架喇。
合返埋本書﹐我哋玩一陣波子棋﹐玩最簡單嘅食棋﹐條友仔開頭淨係識食一粒波子﹐重要淨係揀藍色嘅波子先食(幾咁豬兜﹗
)後來玩玩下發現唔對路喎﹐點解下下我同佢老豆都食四﹑五粒﹐自己就得一粒﹐而家終於明白係鬥多波子而唔係鬥多藍色波子﹗
有一晚讀書之前﹐口水禧問我點解要讀書﹐我話佢老師想佢學多少少英文﹐聽完之後佢無駁咩嘴﹐我哋就開始讀書。第二日﹐我做緊家務嘅時候聽到口水禧自言自語﹐細聽之下﹐聽到佢自己喺度有D似顛佬自己同自己講外星話咁但又夾雜少少英文字。同佢老豆對望﹐我哋覺得條友喺度練緊講英文。雖然有D係外星話﹐不過情況有D似佢啱啱學講野嗰陣bi li ba la亂咁發音﹐跟住無耐就開始講佢嘅第一個國語詞語 – 寶貝。當時佢喺香港我喺美國﹐有一日禧婆婆打比我然後話口水禧識講寶貝﹐我重以為婆婆呃我﹐點知當口水禧聽電話嘅時候真係爆咗句國語嘅寶貝﹐真係令我聽到擘大口﹗因為兩歲前嘅口水禧淨係識講個「爸」字同埋一堆外星話﹐呀媽都未識叫呀﹗嗰一刻覺得小朋友學講野真係好神奇﹐當你以為佢好似學極都唔識講嘅時候﹐佢就會突然爆D驚喜比你﹐絕對會超乎你想象同期待﹗
所以而家每當口水禧喺度自言自語講少少英文加外星話嘅時候﹐我哋都唔會打擾佢﹐由得佢講飽佢。有時佢甚至會學佢手上面揸住嗰部phonic玩具學人哋講野﹐講完見我哋望住佢嘅話﹐重會沾沾自喜又有D難為情咁笑﹐如果我哋讚佢講得好呀﹐佢就會博命再多講幾次添。(男仔真係好易呃架﹗)
做呀媽﹐我只能夠鼓勵佢好學﹐如發現佢對某一D野開始有興趣嘅時候就多D同佢一齊做﹐不過可唔可以學好多野就要睇佢自己喇。有朋友叫我送佢去補習英文﹐我覺得真係無咁嘅需要﹐因為我唔認同夾硬嚟嗰隻﹐況且以口水禧羅友尖嘅特點﹐叫佢去上堂學英文﹐肯定條友即刻無晒興趣學﹐因為佢暫時屬於「迫我就唔學﹐唔迫就我自己學」嘅階段﹐所以都係保持現狀好D。咁樣係咪縱佢﹖搞到佢以後大條道理唔讀書唔返學唔考試﹖無咁誇張啩﹖我相信佢唔會咁樣嘅﹐成個呀媽幢喺隔離陪佢讀﹐又唔會叫佢讀死書無嚟趣味﹐無理由會生厭啩﹖況且生仔都知個仔諗咩嘅﹐只要佢接受到個理由﹐佢會自動自覺去做好嗰件事﹐就好似我話老師想佢學多D英文﹐以後喺學校可以講到野無咁悶﹐佢都無駁過我嘴或者唔肯學(以佢而家駁嘴嘅功力﹐要駁一D都唔難)但係佢反而自己日日攞個phonic玩具嚟玩﹐又學部機發D音又玩串生字開頭﹐第一個字母﹐所以我覺得唔洗逼佢佢都會自己學。
呢個係我應用喺口水禧身上嘅方法﹐我同意有D小朋友係需要人篤住先做﹐唔篤就側側膊唔多覺嗰隻。咁可能嗰D就要揾過第二D方法先得。
今晚去咗winnie屋企食飯。席間winnie主人個女有鬼妹同學嚟玩兼過夜。口水禧聽到人哋兩個姐姐講個ice字﹐佢又學人講﹐不過叫佢去同姐姐傾計佢又怕醜唔敢去。
其實個心不知幾想去「目及」住兩個姐姐就真。我知﹐佢對金頭髮嗰D特別情有獨鍾吖嘛﹐上次去巴里島不知幾咁鍾意黐住我其中一個外貌一滴中國人樣都無嘅半唐番表妹﹐人做乜佢又跟住做乜﹐連落樓梯都要行喺嗰個表姨隔離﹐飛起我呢個呀媽﹗我已經有晒心理準備將來95%係會有個西人新抱架喇。算喇﹐唔關我事。
早幾日我問佢想唔想揾同學playdate﹐佢竟然連Clara都話想揾人嚟playdate喎。可惜人哋Clara家陣已經唔記得佢喇﹐喺學校見到都無打招呼﹐都唔知約人人哋肯唔肯同口水禧去玩﹖有時其實我都想約下班裡面嘅同學嚟我哋屋企玩﹐不過唔知人哋鍾唔鍾意同埋得唔得閑。最重要就係個衰仔成日話約人﹐但當人哋嚟到嘅時候就唔肯睬人﹐咁樣我對住人哋個呀媽我好尷尬架嘛﹗好似上次同clara去公園玩﹐個衰仔比呀clara追咗大半個公園都唔睬人﹐呀clara後尾悶到頭耷耷咁樣真係慘﹗之後約咗我哋幾次(嗰陣clara對口水禧重有一團火架﹗)但都撞啱口水禧咳到飛起所以無應約﹐家下已經無呢支歌仔唱lu。或者spring break嗰陣試下約人睇下佢哋重有無「緣份」喇﹗
仔﹐呀媽真係幫你約女仔幫到出晒面架喇﹗
你要識做D先得架大佬﹗
係咪好奇怪點解之前老師就叫我唔洗喺屋企同口水禧講英文﹐驚我哋教錯文法反而累佢好難改﹐家下又叫我哋一個禮拜同佢揾也全英語對話呢﹖我相信係因為老師都估唔到口水禧喺學校把口係咁難撬開嘅﹗如果口水禧肯主動同其他小朋友玩嘅話﹐咁就應該已經學咗好多英文﹐可惜呢條友仔暫時都重係獨行俠咁款﹐唔多機會同其他小朋友交談﹐所以個進度就無大家預期咁快。加上pre-school無咁多固定嘅野比小朋友做﹐返學嗰兩個幾鐘純粹係佢哋鍾意參與邊個活動就自己埋去玩﹐除咗circle time嗰十分鐘要坐定定聽老師講野之外﹐其他時間真係唔洗一定要講野﹐所以口水禧無好似我個牙醫個女咁返咗學一個禮拜就完全忘記晒D母語﹐淨講英文。
所以老師想口水禧試下喺屋企講多少少英文﹐等佢可以習慣下﹐返到學校都可以同人應對幾句。老師真係咁樣同我講﹕「少少就夠﹐可以表達到佢想點就得架喇﹐唔洗話要好流利成個鬼仔咁架﹗夠應付學校生活所需嘅就得架喇。」當然﹐老師覺得同我都溝通到﹐無理由我教個仔講英文會令佢同其他人溝通唔到啩﹖無計喇﹐我哋無西人朋友﹐連唯一嘅半唐番朋友仔都搬咗去東岸﹐咁就唯有靠自己把喇。
瞓飽覺起身零舍醒神﹐學野都容易D﹗照顧小朋友永遠都佔據媽媽99%嘅時間。昔日有時間上下網﹐家下係等佢瞓咗加埋自己做晒野先上blog。而家重要變咗有時間就一齊讀下書﹐咁就要為難一下禧婆婆要隔幾日先有新blog睇佢個孫喇﹗
呀婆﹐絕對無偷懶架我﹐呢個飯後果陣容每晚都有架﹐除非買唔到生果架咋﹗喺加州唔鍾意食生果就蝕喇﹐因為我哋係有好多生果選擇﹐而且唔貴重要大件夾抵食﹐唔食就嘥料喇﹗喺香港都想咁樣﹐不過無心機行超市(人太多)﹐最重要係我懶囉﹗禧婆婆同公公睇完實鬧「又唔見你個C女包返嚟嗰兩個月批生果我哋食嘅﹗
」係﹐係﹐我懶我懶﹗搞掂個visa﹐你哋嚟呢邊﹐我日日批幾盤過你哋食都無問題﹐OK﹖
話時話﹐唔知係咪咁樣食咁多生果﹐我哋三個除咗呢排花粉勁搞到鼻敏感之外都算託賴……就連某人學校呢期有幾件同學唔係流青鼻涕就咳到膶都跌出嚟咁危機四伏嘅環境之下﹐某人都……唔通真係同食多咗維他命C有關﹖
上個禮拜﹐口水禧嘅游水老師比咗個章比口水禧升咗佢級﹐由海星升咗上海馬級﹐令口水禧喜出望外。佢覺得自己成個男飛魚咁堅架喇而家﹗重問我幾時可以去到最高級添﹗而家開始上堂少咗比水抱佢用﹐老師會叫口水禧由離開池邊三幾尺距離游返去﹐當然﹐條茂利係唔識游﹐只會亂扒亂撥遇溺咁嘅款漂埋去池邊喇﹗叫佢大字形攤喺水上面﹐佢大爺就驚死個老師會浸瓜佢咁﹐人哋隻手一鬆開少少﹐佢即刻轉身扯斷人哋件泳衣帶咁制﹗有進步嘅地方就係已經可以自己噤住池邊上水同埋喺池邊跳落水(當然又係要扯斷老師件泳衣咁喇)﹑潛水喺池底執野﹑攬住水抱(其實個樣係好似一個o亞鈴咁嘅野)面向水咁游等等。等天氣熱D學校放暑假嘅時候﹐可以帶佢去D學校泳池練習下。唉﹗四月喇﹐D溫度重係凍爆﹗搞乜呢﹖
今日篇blog有D似一週大事回顧咁嘅﹖
