夜半揾蟲蟲

據講嗰位同學生嘅係蟯蟲(pinworm)﹐即幼兒園最常見嘅寄生蟲。透過小朋友因為肛門痕癢而R屁股之後無洗手﹐蟲蛋有可能留咗喺手指甲入面﹐再經由嗰位小朋友就圍摸玩具摸野食散播開去﹔亦可由鼻腔吸入再落消化系統而傳染。每一隻蟲乸可以生一萬至萬五粒蟲卵﹐專門揀半夜小朋友瞓著覺嗰陣﹐肛門鬆馳而出嚟係肛門附近生蛋﹐因為蟲卵雖要氧氣孵化﹐所以蟲乸要爬出嚟生蛋。(頂﹗寫到呢度我已經周身痕﹗但我無生蟲呀﹗)

領咗野嘅小朋友通常會出現R pat pat現象﹐更甚係有可能會嘔吐﹑遺尿﹑磨牙﹑肚痛﹑嘔心﹑情緒不穩﹑食欲不振﹑失眠﹑營養不良等。

口水禧無乜R pat pat嘅行為出現過﹐不過就有時夜晚瞓覺嗰陣會磨牙(我都會)﹐所以為穩陣起見﹐頭先趁佢瞓到gurt gurt聲嗰陣﹐我同禧爸就嚟個復活節前節目 – 揾蛋蛋。至於喺邊度揾同點揾就唔洗講喇啩。

幾驚真係會見到我最唔想見到嘅野﹐正所謂仇人見面份外眼紅﹐一陣容乜易氣上心頭﹐見到條蟲乸喺度生緊蛋﹐我火起上嚟一手箝落去嘅時候唔小心箝埋禧哥個祠堂﹐我就即刻慘過條蟲喇﹗

好彩﹐並無任何發現﹗(唉﹐今晚咋喎……)都唔知我洗唔洗隔日咁檢查架呢﹖好乸煩呀D死人蟲﹐搞到我要焗住威嚇口水禧喺學校記住要洗乾淨對手先好食茶點。D細路真係﹐你唔篤住佢去洗﹐佢分分鐘唔鬼洗就去攞野食塞入口﹑lliu完鼻就去玩玩具﹑R完JJ就周圍摸野﹐點搞好呢﹖睇嚟呢幾日都要留多少少時間喺學校幫手篤住D細路一個二個同我洗乾淨對手先准行出廁所﹗