~劇終~
上次家長日做嘅問卷﹐其中有一條係問小朋友有無攞D角色扮演嘅衫嚟著﹐跟住就會將自己扮成嗰件衫嘅人物﹐例如著公主衫就扮公主﹐著超人衫照扮超人。開頭我係圈咗「無」嗰個答案﹐因為口水禧真係無咁嘅嗜好﹐學校有好多呢D衫掛晒喺度比D小朋友攞嚟著﹐但我從來都無見過口水禧去攞嚟著。再加上係我哋屋企無買呢D衫比佢著(除咗萬聖節之外)﹐所以我咪話無囉。
老師初頭見我圈「無」﹐神情有D顎然﹐我見佢咁顎然﹐我都顎然﹐大家相對望咗幾秒﹐佢打圓場話﹕「啊﹗可能colin未到嗰個階段啫﹐無野嘅﹐哈哈﹗
」佢見我重係呆望住佢﹐估到我可能腦海已經充滿疑問﹐於是又拿拿聲解釋﹕「一般呢﹐呢個年紀嘅小朋友都有豐富嘅想象力﹐所以佢哋會成日幻想自己係另外一個角色。就算而家無呢﹐過多一段時間都會有嘅﹐唔洗擔心。就算真係真係無﹐亦都唔代表個小朋友係有問題﹐可能佢比較成熟﹐諗野大人咗少少咁解架啫﹗」聽完佢咁講﹐於是我就問佢﹕「咁如果佢有時睇完D卡通之後會攞D玩具槍出嚟就圍話要fare D壞人﹐保衛地球﹐咁算唔算係都有少少幻想咁呢﹖」即時﹐我可以從老師嘅表情睇到佢心裡面嗰句﹕「妖﹗早響吖嘛﹐呢D梗係算係喇﹐低B婆﹗」(我幫老師設計嘅對白嚟啫﹐老師無我咁粗魯嘅﹗
)但的而且確覺得佢係鬆返口氣﹐笑笑口咁話﹕「啊﹗咁梗係算喇﹐總之唔理有著定無著嗰D衫都好﹐即使係言語上有講過都當係有架喇。」跟手就改咗我個答案﹐由「無」變「有」。
此時有另外一個老師插嘴﹐佢話佢個仔試過托起呀媽喺超市買返嚟嘅大brussel sprout(裡面有D一粒粒好似兵乓波咁大嘅菜﹐呢D菜好似大樹菠蘿咁本身係由一大個呀媽裝住一粒粒細細個果肉﹐切開個呀媽然後攞D果肉出嚟食﹐即好似榴槤咁有殼裝住果肉。)喺自己個膊頭度﹐大聲對住呀媽話”Mom, look! I’m going to burn down the whole house! burrrrrrrrrrrr!!!(呀媽﹐睇下﹐我要燒晒成間屋呀﹗)”一路講重要一老托住棵野扮周圍掃射。聽完真係笑爆我個嘴咁濟﹗
其實口水禧好細個都會咁樣﹐有時佢會攤隻手板出嚟叫我睇下﹐我睇到係一隻無野嘅手板﹐但係佢會話﹕「你見唔見到我捉咗隻caterpillar呀﹖」跟住重會對住自己隻手講野問隻caterpillar肚唔肚餓﹐眼唔眼瞓。有時會同佢個老婆講野﹐如果我唔幫佢個老婆扮聲會應佢﹐佢就會問我﹕「呀﹐媽媽﹐點解呀老婆唔講野嘅﹖」此時﹐我就會話佢知老婆瞓著咗﹐叫佢唔好嘈醒呀老婆。
再大個D嘅時候就開始有角色扮演嘅傾向﹐例如成日話﹕「媽媽﹐我唔係人﹗我係caterpillar/狗/大笨象/長頸鹿/海豚/MacQueen/巴斯光年﹗」等等。即使係對住老師或者警察都好﹐人哋問佢叫咩名﹐佢都會將當時扮演嘅角色名講比人哋聽﹐上次返去香港過海關嘅時候﹐人哋海關叔叔睇緊佢本護照﹐跟住問口水禧﹕「小朋友﹐你叫咩名呀﹖」口水禧同人講話﹕「我唔係小朋友﹐我係caterpillar呀﹗」個海關望住我﹐一抽二lung嘅我狼狽之下極速兇咗口水禧一野叫佢唔好玩﹐講個真名出嚟比人知喇。點知佢重話﹕「咪講咗囉﹐我話我係caterpillar吖嘛﹗」
「喂﹗你講個名唔係你本護照上面個名﹐一陣有警察嚟拉你呀下﹗」於是佢先死死哋氣講咗自己個名出嚟。過咗海關﹐一邊行我一邊同佢講「以後對住著制服嘅人唔好玩呀﹐做緊正經野唔可以玩架大佬﹗」
有時我揸緊車﹐如果前面有人亂咁切我線﹐搞到我要大罵嘅話﹐我會喺倒後鏡見到坐喺後面嘅口水禧舉起隻手臂指向前方﹐另一隻手搭住舉起嘅手臂(唔洗驚﹐佢唔係豎中指﹗
)﹐我問佢做咩﹐佢話佢要幫我射走D壞人﹐跟住個嘴就會o都起﹐係咁烏烏烏~~~~~~~咁聲扮緊自己係巴斯光年射D雷射擊光出嚟﹗笑C我﹗呢D情境會連睇緊電視新聞見到有警察拉咗個賊嗰陣﹐口水禧都會舉起佢隻擊光手對住個電視話要幫警察捉壞人。救命﹐有無咁搞笑呀大佬﹗
記得我喺度提過一本書叫Your Four-year old :Wild and Wonderful (可能嗰陣係提過三歲嗰本)﹐書中講過四歲至五歲呢個年紀會令人有少少頭痕﹐因為係最活躍而又唔多聽話嘅時候。所以本野叫wild and wonderful﹐即係你頂得佢順嘅話﹐你會發現佢好多好過癮好搞野嘅一面﹐於是就係wonderful﹔相反﹐你覺得佢嘅行為係無法忍受嘅話﹐咁你會覺得佢係wild。其中一個特點係呢個年紀成日都會亂o翁廿四﹐係又講唔係又講﹐真亦假時假亦真﹐有時佢講完一D野都唔知佢係作出嚟嘅定係真有其事﹐你認真就會好嬲﹔你處之泰然就會無野。個作者話﹕「盡量忍﹐忍得幾多得幾多﹐鍾意可以同佢亂吹廿四﹐你會發現呢個年紀嘅想象力超出你預料之外﹐你越同佢亂吹﹐佢會越比到驚喜比你﹔但如果你唔鍾意嘅話﹐唔好鬧﹐唯一可以做嘅係扮聽唔到﹐聽完唔比反應。」
就好似佢做呀max份功課咁樣﹐明知佢喺度亂講亂作﹐但我都有得佢講乜我就寫乜﹐因為我唔可能要求一個四歲嘅人有三十幾歲嘅邏輯思維。明明隻貓同兔仔係唔會飛﹐亦都唔需要去買牙膏飲咖啡﹐但係呢個就係小朋友嘅思維世界囉﹐我夾硬幫佢改咗﹐咁咪穿晒煲比老師知道份功課係我做嘅﹖
所以我照寫囉﹐我負責寫咋喎﹐唔負責度橋架喎。
當然﹐有時趕時間趕到甩褲﹐佢重喺度玩﹐又話caterpillar唔洗著褲﹐又話唔洗刷牙﹐呀之呀左﹐真係火都嚟﹐都會大聲喝佢唔好玩住﹐快D同我搞掂D野先。所以有時我會同佢講「當你見到呀媽急到賴咁嘅樣﹐即係我唔得閑同你玩喇﹐做咗正經野先﹐做完先玩。」咁佢梗係唔會聽一次就記得喇﹐所以有時都係要提佢「媽媽做緊正經野呀下﹗」有時佢會識趣閃開﹐有時都唔知個C字點寫繼續點火﹐最後梗係比我擊退喇﹗
但要分得清邊D係駁嘴邊D係亂講﹐駁嘴萬萬不能﹔至於乜野係駁嘴﹐例如我叫佢唔可以喺人哋講緊野嘅時候插嘴﹐而佢即刻話﹕「呢D唔係插嘴係講野﹗」咁呢D我就當係駁嘴﹐會嚴厲柄獲甘先得﹐因為我好憎細路喺大人講緊野嘅時候插嘴埋嚟扯住自己個老豆呀媽同佢講話應佢﹐有D家長真係會咁做﹐我明明同緊佢講野﹐佢會突然轉頭去同佢個小朋友講野﹐聽個細路投訴呀媽唔理佢﹐佢好悶﹐要呀媽同佢玩之類﹐我超憎﹗搞到我好似同同下個人講野變咗同空氣講野咁﹐忽然之間我都唔知講唔講落去去。所以我哋都正在更正口水禧呢個壞習慣。除非係有危險求救﹐咁又唔同。
所以如果你接觸嘅小朋友有豐富嘅想象力﹐不防同佢鬥吹下水﹐你會發現當你回應佢亂講嘅野嘅時候﹐佢會立即眉飛色舞咁繼續拉住你喺度天馬行空﹐其實都幾過癮幾開心(當你唔係煩緊一D緊急倒瀉X嘅事嘅時候)。
