呢個係乜東東﹖
之唔係口水禧眼中嘅mimi囉﹗
呢個﹖有D似單細胞繁殖出嚟嘅野……
望望下又覺得似海膽咁款喎﹗
答案﹕太陽﹗
口水禧學校每日喺室外co-op嘅嗰位家長嘅小朋友可以喺circle time嘅時候出去老師塊白板度畫出當日嘅天氣﹐佢哋畫太陽都無咁好笑﹐有時畫落雨或者大風嗰D包你笑爆嘴﹗口水禧都好恨有得出去畫﹐可惜呀媽唔爭氣﹐話咗我係下晝班人材﹐鬥早返學我實唔夠人砌﹐上次都幾乎爭到咁濟﹐可惜只差少少就比前面行先我一步個家長立咗個”outside”位去做﹐於是口水禧眼白白睇住同學仔做咗嗰日嘅weather man。
有時出面雪雪凍或者落雨嘅話就更加無人想出去企喇﹐所以口水禧做weather man嘅好夢可能要等prek-k開學之後先可以達成喇。
不過你估條友真係咁有表演欲上出去講天氣咩﹐咪又係為咗可以喺塊板畫野﹗可能見人哋畫得多﹐佢都學咗同學畫太陽嘅方法﹐不過佢個太陽就好似多咗好多鬚咁囉﹗
上個星期五放spring break前學校同小朋友慶祝復活節﹐除咗出去後園揾復活蛋之外﹐重每人有一袋禮物﹐裡面有幾隻裝咗提子乾同D花生果仁嘅復活蛋同埋兩支粉筆。有咗呢兩支粉筆﹐口水禧呢塊畫板後面嘅黑板仔就可以大派用場喇﹗
咁大個仔都係第一次接觸粉筆呢樣野咋﹗一揸上手就即刻畫咗嗰個「多鬚太陽」出嚟。因為呢個報告天氣嘅遊戲﹐佢呢排就學咗sunny(晴朗)﹑rainny(落雨)﹑windy(有風)﹑cloudy(多雲)﹑warm(暖)﹑cold(凍)﹑chilly(凍凍哋)等等嘅生字。呢條友仔暫時對天文嘅野都幾有興趣﹐好鍾意研究點解有太陽﹑點解會落雨﹑點解有雲﹑點解天光天黑﹑點解我哋天光婆婆嗰度就天黑﹑點解天係藍色﹑點解有黑雲﹑點解多雲會見唔到太陽呀等等﹐所以襯佢有興趣就教佢呢方面嘅英文字﹐佢有時聽完會問第二個字又點解或者英文點講﹐喺學校聽同學講天氣嘅時候就唔一舊飯唔知人哋講乜。雖然咁樣嘅教法未必個個人都會認同﹐不過我鍾意咁樣教小朋友﹐因為比較容易入手吖嘛﹗
記得以前讀小學嘅時候﹐每日放學我都會偷偷哋喺黑板老笠一支粉筆返屋企﹐然後喺宿舍個走廊幅牆畫公仔(係﹐我無家教﹐無公德心﹗
)。我當然唔係鼓勵大家去畫牆做塗鴉少女/男﹗只係因為口水禧鍾意畫野喺塊板呢件事我多咗個啟發而已﹐就係有時教細路野並唔係一定要喺紙上面畫呀寫呀咁﹐如果將呢D野移施去一塊白板或者黑板上面﹐等小朋友可以用唔同嘅寫野工具喺塊板上面畫又好寫又好﹐可能會令到佢哋更加有興趣去學一樣野﹐甚至更投入更容易入腦。
若然當日呀媽係喺幅牆度教我數學﹐等我可以一邊學計數一面過下用粉筆畫野寫字嘅癮﹐可能我會因為想寫多兩野而想做多兩條數﹐久而久之D數都會進步咗﹐唔洗成日滿江紅添﹗
黑板白板只係其中一兩個例子﹐有D小朋友鍾意玩車仔﹐用車仔嚟學加減數未嘗行唔通喎。試過同口水禧同埋學校其他嘅小朋友用積木砌英文字母﹐令我意想不到嘅係呢D小朋友你叫佢揸筆可能未必寫得出一粒字母﹐但係佢哋竟然係可以用工具砌到好多字母出嚟﹐咁樣睇嚟其實佢哋一早就識認D字務母﹐寫唔出係因為手未能夠控制揸筆度力同埋幾時轉左轉右嘅筆劃而已﹐所以唔應該寫唔出就柄﹐讀唔出就鬧﹐有時可能喺字卡上寫得工工整整嘅字母佢哋會認唔出﹐但喺街見到一D圖案會令佢哋聯想到D字出嚟都唔定呢﹗
圖解喺下面個video裡面呀﹗
