風爭 – 口水禧日記

Spring Break嘅最後一日天氣回暖﹐其實正確D嚟講係熱添呀﹗好彩一直都無收埋晒全部嘅短袖衫﹐就係怕呢度D天氣咁反復﹐一時凍到顛﹐第二日又熱到嘔﹐點都要放返幾套短袖短褲看下門口先得嘅。

近牌禧爸憶起兒時嘅其中一樣玩意﹐就係放飛機喇……呀﹐唔係﹐係放風箏先啱。條友話細個成日會去放風爭(咩年代呀佢﹖真係同佢有代溝呀﹗)﹐重話之前先去買D玻璃粉﹐溝落D膠水之後就搽上條風爭線度﹐愛嚟界(個南極星又發顛出唔到個正字喇﹗)人哋條風爭線喎。問佢界嚟做乜﹐佢話唔界人都會比人界﹐嗰陣個個都係咁玩架喎。問佢﹕「乜你唔驚界斷咗人哋條線會比人打咩﹖」佢話﹕「次次都比人界斷我嗰隻架喇﹗」好明顯就係比人昆咗喇﹐玻咩璃粉吖﹖人哋求其比罐粉絲碎你咋嘩﹖

於是有日喺walmart有人戚起條筋就買咗一隻盛惠USD$1嘅風爭﹐重同個仔講揾日去放風爭喇。USD1嘅風爭﹖聽落都覺得流流哋……不過呢家野我唔識﹐聽佢講點用玻璃粉講到成個專家咁﹐我咪坐埋一邊睇野囉。

星期日﹐有個連咩係風爭都唔知嘅茂利聽到話有得去公園放風爭非常咁雀躍。知道放風爭嗰度會好猛太陽﹐於是比頂草帽佢戴定去﹐費事一陣曬到變咗炭頭。佢兩仔爺成出門口﹐我呢個黃種賓賓梗係襯屋企無人拿拿臨執屋清潔下喇。

無幾耐屋企電話響起﹐禧爸話隻風爭比口水禧放咗上天﹐無錯﹐唔止隻風爭上咗去﹐連埋條繩都逃之夭夭喇。以前有大導放白鴿拍戲﹐今有茂利放(走)風爭玩野﹐真係唔寫個服字過佢都唔得。

於是兩父子又戇居居去walmart再買過一隻。經過屋企重接埋我添。

口水禧好緊張佢隻風爭﹐落咗車邊行邊話要同隻風爭戴帽遮太陽。港童禧又出現喇﹐書包乃係老豆呢D隨從負責「咩」嘅﹐睇呢張相真係好有小學生放學feel。加埋佢頂草帽﹐幾有少爺feel呀﹗

禧爸﹕「你就好喇﹐有頂帽戴下﹗難為我少咗層野保護D頭皮﹐家下比太陽曬到個頭殼愛嚟煎荷包蛋都得呀﹗」

努力中嘅老豆同搞搞震嘅細路幾大對比﹗

成個球場有樹陰嘅地方就無凳﹐有凳嘅地方就無樹陰﹐明玩野喇﹗佢哋兩個負責玩嘅就無所謂﹐我呢D「咩」袋影相觀戰嘅就慘喇。適蓬攞人命咁濟嘅花粉季節﹐眼又痕﹑鼻又痕﹑耳又痕﹑喉嚨痕到真係想飲啖哥士的入去清下嘅我﹐影影下相又要「呻」鼻涕兼抹下眼淚﹐側邊D人唔知可能以為呢個呀媽有無咁誇張﹐睇個老公同個仔放風爭都要感動到喊嘅﹖

初初睇佢哋兩個咁興緻勃勃﹐我真係幾想睇佢兩個咁嘅一高一矮一老一嫩組合究竟可以點樣合作放到隻風爭上天架呢﹖重可以放到隻風爭飛走咗咁犀利﹖成個球場得個熱字﹐一滴風都無架喎﹐究竟頭先嗰隻係點飛上天架呢﹖真係耐人尋味﹗睇咗下面段片你就會明白我嘅疑惑架喇﹗

霎時間真係無喇喇有D風﹐於是兩條友就喪放喪掉﹐卒之喺好努力嘅情況之下比佢哋放到隻風爭上去。可惜係USD1嘅貨仔梗係無咁著數喇﹐條線放到盡都係得咁高(幾層樓咋﹗)莫講話v放到天咁高﹐連球場側邊D燈柱都高唔過呀陰公﹗

所以D風稍為弱少少或者甚至係無風嘅時候﹐隻風爭就會打白鴿轉咁繼而跌返落嚟﹐於是造就咗機會比禧爸賴D風唔夠勁搞到放唔成嘅籍口勒。而我亦都明白點解佢話佢細個成日比人界走隻風爭喇﹗(無界走埋個頭咪偷笑囉﹗)

之後佢哋多次喺度等﹐等風再起時就即刻再放過。

呢位助手真係唔稱職得好緊要。我坐喺一邊睇嘅時候﹐不停聽到佢比人叫佢行開﹐點解會咁呢﹖梗係喇﹐人哋叫佢放手掉隻風爭上天嗰陣﹐佢就亂咁掉﹐搞到D線打晒kick不特止﹐重要時不時隻風爭條尾比佢隻腳踩住﹐一唔係就踩住條線﹐一係就人哋放得好地地嘅時候﹐突然發現某人一對腳係同D線盤埋一齊﹐結果隻風爭都係長時間飛唔高過六尺嘅﹐唔怪之得佢老豆放咗一陣就頂唔順要收工喇。