開心到過咗龍

上回提過口水禧嘅零食種類陝窄非常﹐旁邊嘅人都凳佢苦悶。其實﹐我哋並唔係日日都係咁苦悶架﹐間唔中都會食垃圾食物﹐例如漢堡包﹑薯條﹑麥樂雞等等。呢兩樣野我就真係無本事喺屋企整而又覺得好食。曾經試過買新鮮嘅漢堡牛肉返屋企諗住自家制個漢堡包﹐但係我食到自己想嘔﹐可能係舊肉太厚﹐而且有D香料係我頂唔順嘅味道﹐所以食到一半都已經想嘔咁嘅樣﹐自從嗰次之後就無再喺屋企整過喇。

有時好趕或者實在無精神煮﹐又或者係D時間啱啱喺唔係食飯時間之間但又見肚餓屋企又清晒倉嘅話﹐就係我哋去食垃圾嘅機會喇。

通常都去In & Out﹐感覺上D野質素好D﹐薯條係即時用新鮮薯仔炸﹐唔係用急凍雪藏貨﹐D麵包同埋D牛肉係佢自己話每日新鮮整架咋﹐真唔真就唔知喇。不過都無比口水禧食過有牛肉嘅漢堡包﹐佢淨係食grilled cheese burger(烘芝士包)﹐聽過好多關於D漢堡牛肉嘅故事﹐所以都係唔比佢食好D。咁我哋又食﹖唉﹗漢堡包由以前喺香港到而家﹐唔食都食咗咁多年﹐家下先嚟驚﹐要中招就已經中晒架喇﹐家下先嚟唔食又有乜用﹖ (係﹐我哋係極度呀Q嘅

)

我諗都無乜幾多小朋友可以抵受薯條嘅誘惑﹐包括表面好似六根清靜嘅口水禧都一樣對薯條好著迷。香口野﹐除非無晒味蕾﹐如果唔係都好難忍到手唔去攞嚟食。上次返香港嘅時候﹐口水禧喺爺爺嫲嫲度食飯超慢﹐嫲嫲問係咪因為細個食得燉飯多﹐所以唔慣用牙o趙野﹐我即刻篤某人背脊告知嫲嫲有人食麥樂雞同薯條嗰陣快到你都睇唔切呀﹗有時重一次塞幾條入口﹐成隻餓狗搶X咁樣心急。唔慣用牙o趙野﹖扮晒野咋啩﹗

D細路真係好鬼衰﹐一有其他人喺度嘅時候就會影帝/后上身咁﹐D演技呃到下人﹐特登慢慢食﹐好似食得好辛苦﹐博下有無人會餵或者直情准佢食少少就唔食﹐跟住可以去玩。同我單對單嗰陣又唔見佢食得咁痛苦喎﹗一碗魚蛋河食員重可以嚟多個菠蘿油都面不改容﹐我係多佢一杯凍奶茶啫﹐我都覺得飽﹐佢竟然可以同我一樣食量﹗不過一有婆婆喺度﹐嗰碗魚蛋河就必定係要婆婆餵先會食得完囉。所以唔好上佢哋當呀﹗

E﹐講開薯條點解變咗篤某人背脊嘅﹖

而家口水禧大個咗﹐好多野都會主動出擊。返學喺circle time大家估surprise can嗰陣﹐條友仔無論聽唔聽得明晒人哋比嗰三個提示都好﹐佢都會照舉手撞答案架。你問佢知唔知桶裡面係咩﹐佢會話唔知﹐不過都照舉住隻手。我通常都有得佢﹐撞下無壞嘅。我想要嘅唔係佢估中答案﹐而係佢願意主動參與﹐願意嘗試唔怕錯嘅習慣。其實小朋友好多細個嗰陣都唔怕瘀﹐只係因為後來錯咗會被打擊甚至係鬧或者罰先會變得怕事怕失敗﹐於是明明想知或者知道答案都唔敢講﹐怕錯怕瘀怕被罰。我覺得咁樣好慘﹐無晒自信﹐企起身大聲講句野都唔敢。

所以每當我哋喺In & Out等攞野食嘅時候﹐口水禧都會話一陣人哋叫我哋個號碼嗰陣﹐佢要出去攞野食﹐我哋都有得佢去試。每次佢捧住D野食返嚟個樣都好囂咁﹐好開心自己完成咗一件任務 —- 親自去接自己心愛嘅薯條返嚟。