當小朋友學識咗講野之後﹐千其千其唔好喺佢哋面前講秘密﹐因為佢哋好快就會同你唱通街﹐重要加鹽又加醋﹐慘在其他人個個都認為小朋友係唔會講大話﹐細路講嘅一定係真話﹐咁我哋做呀媽嘅就真係o亞子吃黃連喇﹗
話說口水禧一日到晚都唔認自己係小朋友﹐佢點都話自己係大人嚟。於是我就同佢講﹐起碼要18歲先算係大人﹐細過18歲都唔係大人﹐少過15歲就直情係小朋友添。於是佢就話自己唔係四歲﹐係四十幾歲喇喎﹗
通常佢咁樣講完﹐我都會駁佢話﹕「下﹖你四十幾﹖咁你唔係我生架喇﹗因為我都係得三十幾歲咋喎﹐我點會有個四十幾歲嘅仔呀﹖」
就係咁﹐我就領咗野喇。
有一日﹐我以為自己有心臟病﹐於是走去睇醫生﹐當日重帶埋口水禧一齊陪我去。護士小姐入嚟同我駁好D做心電圖嘅線之後﹐喺調較部機之前就問我幾多歲……
護士﹕how old are you? (你幾歲﹖)
我:thirty four. (三十四)
說時遲那時快﹐有條蛋散即刻快到無輪咁搭嘴話”thirty eight!”(三十八﹗)
護士即刻停手轉頭望住我﹐個樣好似懷疑我報細數﹐個仔唔抵得幫我更正返咁嘅樣。
我頂﹗
你個衰仔包﹐平時唔見你D英文咁流利反應咁快﹐喺呢個時刻你又會突然D英文勁咗咁多嘅呢﹖﹖﹖﹖﹖﹖
我叫佢唔好亂講嗰下﹐佢重好理直氣壯咁對我講﹕「你三十八吖嘛﹗」我重以為佢唔知thirty eight係點解添﹗原來佢係知架喎﹗
嗰下幾乎唔洗用心電圖check都肯定我會有心臟病喇﹐唔比個衰仔激到有先至奇喇﹗
拿拿臨同個護士姐姐解釋返話我個仔唔識英文架﹐佢亂咁講架咋﹗護士姐姐重以為我揾籍口呃佢﹐於是佢轉頭去問口水禧幾多歲……
護士﹕how old are you?
口水禧﹕呀﹐四十幾點講呀﹖
我都唔執輸﹐教佢講forty。條茂利當然會照講喇。
就係咁﹐護士姐姐就笑笑口無再理佢喇。我補多兩飛話比個護士知﹕「我個仔尋日話比人知佢五歲﹑前日係三十幾歲﹑今日就四十幾歲。」
如果你重未比呀仔/女知自己幾多歲﹐我強烈建議無論幾時﹐今年下年下下年都好﹐記住話比佢哋知你永遠都係十八歲﹗記住呀﹗
