睇咗呢個blog一段時間嘅人應該知道我其中一個C穴係就係……
唔知﹖自己去睇喇>>>>高手高手高高手
講過如果我唔搞掂呢壇野我正「契媽」﹗(係﹐唔做得契妹喇﹐連個仔都覺得我似38歲咯……
)成個冬天都過咗咁濟﹐完全的唔起心肝﹐一路都寧願做「契媽」都唔想掂D針線。我唔止怕打針﹐我連揸針都怕﹐總之但凡有個針字嘅野都好黑我憎呀﹗
可惜陰天嘅日子開始唔多﹐陽光普照嘅日子就越嚟越多﹐次次食晚飯嗰陣都好撐眼﹐都知道已經去到避無可避嘅境界﹐唔出手唔得架喇﹗其實部衣車買咗好耐﹐擺喺車房封晒塵咁等緊我呢個高手解封放佢出嚟見識下乜野叫高手。
呢幾日我潛咗水就係為咗呢個大project﹐一共八塊布﹐要車十二條直線。
比著識車野嘅人﹐真係唔洗一粒鐘就搞掂喇﹗但係對於好似我呢D有車野縫野剪野障礙嘅人嚟講係一件苦差﹐因為我係完全剪/車/縫唔到直線嘅人嚟嘅﹗除咗車野之外﹐我最憎嘅大頭針亦係我嘅大敵﹐無幾何唔會比佢㓤到爆粗嘅大頭針真係令我望見都有D抑鬱﹗加上我係個急性子﹐我對於要逐忽逐忽咁度尺寸然後逐支逐支大頭針咁㓤係超無耐性嘅﹐但唔㓤又會肯定車條斜線出嚟﹐成幅長方形嘅窗簾當堂變先一塊梯型嘅布﹗
所以﹐無計﹐大頭針﹐走唔甩﹗
幾經辛苦﹐又跪又趴又痞﹐幾乎小兒麻痺咁濟終於㓤好﹗
因為怕㓤到手指﹐所以真㓤得好慢。相信我嘅老爺奶奶呢D專業人士睇見我以龜速嘅姿態咁樣㓤大頭針﹐當初都好後悔放咗我入屋﹐家下影衰晒佢哋﹗
㓤好晒﹐成身好似打咗幾套拳咁辛苦﹐每當抬頭望見前面重有幾塊要㓤我就想C﹗不禁個內心又好波動﹐不停問究竟係邊個發明大頭針呢個滿清十大酷刑呀﹖﹖﹖簡直係攞你命3000﹗
我嘅架步﹐「航」咗喺度三日無收過。唔收得架﹐因為一收嘅話﹐我第二日就唔會想攞出嚟繼續做架喇﹗因為呢幾日陰天落雨﹐我內心個「契媽」又好想走返出嚟喇﹐正所謂太陽唔曬盲對眼﹐我都唔覺窗簾嘅重要性﹗人真係要針㓤到肉先知痛架﹗(唔怪之得呢個世界要有大頭針喇﹗
原來係咁﹗)
車開上咗身咁﹐日日車﹐夜晚食完飯﹐搞掂個廚房﹐踢埋口水禧上床瞓之後我又開工喇。唔講都唔記起﹐我三十幾歲人﹐今趟係第一次用衣車架咋﹗難以置信嗎﹖以前讀書無家政堂咩﹖唔係喎﹐我有上家政架喎﹐不過嗰陣個老師係唔比我哋用衣車車野﹐一定要用手縫。所以部衣車D線係禧爸幫我穿好晒﹐我先埋位車架。
第一次踩落個腳制真係有D驚﹐好驚D手指會隨住塊布扯咗入去支針度連自己D手指都車埋落塊窗簾度﹗
所以踩下又停下好勁窒窒通﹐斷斷續續﹐最後……
呀媽﹐我嘅第一條線呀﹗救命呀﹗我自己望見都有D熱淚盈眶呀﹗
整佢個制吖﹗﹗我車到直線喇﹗得咗喇﹗
睇唔睇條邊都係剪到「一岩一蠶」咁呢﹖真係無計﹐又唔係手抽筋﹐但真係唔知點解會咁樣衰﹗
我一直都係機器嘅殺手﹐掂乜爛/壞乜嗰個境界﹗幾高級下架﹗由讀書嘅時候掂親嘅電腦唔係比我format咗C drive就係跪低要裝過晒D野﹐所以識一個IT老公對我嚟講係好重要嘅(對於佢嚟講係一種折磨
)我呢個殺手係可以去到邊都有股力量影響到人哋嘅電腦都壞埋﹐由大學嘅computer centre裡面嘅電腦﹐到canteen收銀處嘅電腦﹐再到攞回鄉證嘅X(shit,突然唔記得咗嗰個地方叫咩添﹗中旅社﹖新華社﹖)嘅電腦都會喺我一踏入嗰一刻跪低晒要停工嘅﹐問你怕未﹗
點解要提我呢個隱藏多年嘅絕技呢﹖正當我越車個心越熊嘅時候﹐我同禧爸講不如買D布返嚟﹐我自己再車多一套窗簾替換﹐咁就唔洗搞到而家車緊嗰套好快就殘晒喇﹐我重夠膽講話我可以試下從頭由一塊四邊都未閘骨嘅布自己裁自己車添﹗重話想整個套比將凳添﹐幾大口氣呀﹗
點知話口未完﹐車車下突然有D野彈到我塊面鬼C咁痛﹗停咗一停跟住又再繼續車﹐但係望真D部衣車…….
E?個針頭呢﹖去咗邊呀﹖
點解頭先重係尖頭﹐家下變咗倔頭嘅﹖
原來我整斷咗支針呀﹗
真係問你驚唔驚﹗我諗工廠做車衣嘅人日車夜車都無我咁勁﹐車嗰幾條線都可以搞到部衣車斷針﹗
當堂將剛才一鼓作氣嘅偉大理想碎到體無完膚﹐鐵布衫都即刻變咗一件底衫咁謝﹗我呢D心靈好脆弱架嘛﹐唔洗咁樣打擊我呀嘩大佬﹗唔車咪唔車囉﹐唔洗斷針咁大反應呀嘩﹖
結果自嗰下嘅打擊之後就車得真係好唔順利﹐唔係D線打kick就係車車下連條線去咗邊都唔知﹗
得喇﹐明喇﹐收到喇﹐唔車喇﹐好未呀﹖但都比我完成埋手頭呢套先喇唔該﹗終於尋晚車到一點鐘﹐喺我一股怒火之中完成喇。在旁觀戰嘅禧爸拿拿臨收埋部衣車先﹐因為我車到最後一條線已經開始拍枱拍凳掉較剪飛線「碌」﹐佢驚我一陣嬲得濟會吞針自殺啩﹗
車好D野就攞咗去洗﹐今朝起身掛上去睇下﹕
以後唔洗再曬到鴛鴦面喇﹗
以後都唔洗再做「契媽」喇﹗
以後都唔洗再心掛掛有D野未完成囉囉孿﹗
拿o﹗製成品呀﹗遠睇都唔差架﹐近睇喇喎﹐後果自負﹗
相信以前個家政老師都無諗過當日乜叉都用白膠漿當針線嘅C女包今日竟然可以用部衣車車好條窗簾腳出嚟……雖然車到斷針……
