有D小朋友可能天生就好鍾意動物﹐口水禧成日周街見到人哋拖狗出街行﹑見野生嘅松鼠通街跑﹑見到學校嘅雞同guinea pig等等都會情不自禁同人哋打招呼(係同隻動物唔係同個主人)﹐然後就會話﹕「你今晚同我瞓﹗」
﹐好彩呢D說話係對動物講﹐暫時重未對人講啫……
有一日﹐佢無喇喇同我講話想摸下羊﹐失驚無神叫呀媽去邊樹揾隻活羊返嚟比佢摸呀大佬﹗又無理由帶佢去超市比舊羊肉佢叫佢當摸咗隻羊架﹐雖然理論上都算係摸咗隻羊……
上次去三藩市嗰邊個動物園都無留意有無羊﹐因為嗰樹大風到幾乎黐咗假眼睫毛都會飛甩咁濟﹐都無心情真係留意下有乜野動物。諗住揾D牧場睇下有無羊喇﹐但又唔多覺附近有D咁嘅野喎﹗梗係喇﹐開得牧場都要一達好大嘅地﹐唔去到山卡喇嗰D地方又點會有牧場呢﹖
點知有一日﹐收到另外一個動物園嘅信﹐係一封關於申請該動物園會籍嘅資料﹐見一年會員價唔算太貴而且都唔係太遠水路﹐重會有D活動比小朋友參加下認識下唔同嘅動物﹐去其他動物院又有折頭﹐最緊要係有羊喎﹐諗落都幾好玩喎﹗於是上個禮拜就去咗做水魚勒。
動物園一星期開七日﹐每日十點至四點。諗住還掂都做會員﹐成年流流長任去唔嬲﹐所以我哋都係慢條斯理喺屋企食埋野先出門口﹐去到都兩點幾﹐玩個幾兩個鐘就返屋企。
一入到去就見到吊車站﹐每人盛惠USD3。準備上車前都覺得架野郁得幾快﹐重要唔會停低比你上車﹐要你自己配合﹐禧爸顧住執好買完飛嘅野﹐唯有就我負責抱口水禧坐上去架吊車度喇﹐不過真係無估到架野唔停同埋個管理員突然叫我哋快D坐上去﹐所以都嚟唔切比個位口水禧就一野抱咗上我大脾就算﹐幾驚坐遲咗會比架野撞到屁股繼而再比佢推咗我哋出去﹗驚魂未定﹐我就要開始飽受畏高嘅折磨﹐因為架吊車係無底晾腳嘅﹐就好似人哋坐上雪山頂峰嗰隻吊車咁樣。
其實都唔算好高嘅﹐幾層樓咁囉﹐不過下面無底嗰下就嚇人D﹐一時又驚跌咗隻鞋落去﹐一時又驚跌咗個仔落去﹐雖然有野攔住我哋嘅﹐不過畏高嘅人係咁架喇﹐所以戴假髮就咪上去坐喇﹐對手都唔知愛嚟扶住D柱好定係噤實個假髮好﹗
坐坐下有D腳痺﹐禧爸以為係口水禧坐痺咗我對腳﹐重話比個仔佢抱住﹐嚇得我吖﹗我唔係比佢坐到腳痺呀大佬﹐係驚到腳痺咋﹗重叫我遞個仔比佢﹐想嚇到我個心停止泵血咩﹗所以有得對腳痺住咁坐咗十幾分鐘兜咗一圈先返落嚟。
當你被吊喺半空嘅時候向下望就會望到D動物﹐不過唔算睇到好多﹐通常都係經過D馴少少嘅動物上空﹐都啱嘅﹐你話如果架野係兜過獅子老虎個籠嘅上面﹐萬一真係一個唔好彩跌咗落去﹐咁就真係「忍著淚說一聲goodbye喇﹗」
如果比我見到下面有獅子老虎擔高頭望住我等食嘅話﹐真係驚會嚇到失禁﹐同隻野洗咗頭就唔好意思喇﹐係咪﹗
禧爸喺高空負責影嘅相﹐我﹖邊度重敢郁﹗
坐完架野成龍咁嘅身手跳返落嚟之後我哋就開始用返自己嗰對麻痺嘅腳行下睇下勒。動物園分咗幾個唔同嘅區﹐不過我哋都無特別話唔想睇乜野﹐所以是但揀咗一個區睇下。
行行下﹐見到口水禧個真身好出力咁喺樹上面飛嚟飛去﹐真係唔去參加奧運就嘥晒。點解話係口水禧嘅真身呢﹐你睇下佢哋兩個嘅做型同台型就知﹗
隻馬騮真係無停過咁fing嚟fing去﹐上上落落﹐高低杠360度旋轉﹐真係睇佢表演都值回票價﹗
重要有時會吊喺棵樹度停低同你對望﹐好似等緊你鼓掌咁款﹐如果越嚟越多人圍觀嘅話﹐佢又會拿拿臨再飛過比大家睇﹐總之就係盡顯身手﹗
再行前D﹐竟然見到禧爸嘅真身喎﹗
見唔見到佢嘅咁嘆呀﹖一個人住個大籠﹐重要有張吊床過佢搖下搖下﹐enjoy非常﹗個款同我屋企嘅老爺平時攤喺梳化個嘆樣似到十足﹗
(呢個無相可以比大家對比﹐因為正常情況見到佢咁嘆嘅話﹐我想中佢多過想影佢喇﹗
)
睇完我屋企嘅老爺同少爺之後﹐我哋重有睇過好多動物﹐不過無影相嗰D就唔記得係D乜野喇。最記得係嚟到alligator個竇喇。Alligator係鱷魚家族其中一種﹐其實個樣真係同鱷魚好似﹐你叫我分我就真係唔多識分喇﹗整咗做手袋嘅話就應該大把濶太會識分嘅。
我見到有兩個女仔爬咗去一舊大石上面喺度睇隻alligator﹐都企得幾邊下﹐如果一個唔覺意叉錯腳﹐咁隻alligator就真係開心C﹐通常一個人跌嘅時候隻手都會亂咁抓想揾野扶﹐所以如無意外﹐一個跌應該都會拉埋隔離嗰個一齊跌﹐咁隻alligator就可以食大餐﹐一次過食兩份巨型sashimi(刺身)喇﹗
望望下嗰兩個姐姐﹐突然喺我眼前見到alligator個竇裡面嘅地下有隻龜喺樹爬下爬下﹐個樣好想爬出嚟咁款﹐我以為有人咁多手喺龜竇捉咗隻龜掉去餵alligator﹐於是想叫管理員嚟救龜﹐點知禧爸C都唔肯叫﹐真係吖﹗佢唔叫﹐我叫﹗車﹐又話要鼓勵個仔有野唔明就大膽問﹐家下有機會示範又唔出擊﹐好﹗呢D面皮厚野都係等C9出馬喇﹐D男人真係……
就喺嗰時有個管理員行緊埋嚟﹐我走去同佢講話有隻龜喺個alligator竇裡面﹐點知佢好平常咁話﹕「係吖﹐我知吖。」我問佢「乜唔驚隻龜比隻alligator食咗架咩﹖」佢話﹕「佢哋好friend架。」
啊﹐原來係咁呀嘩﹗真係唔講唔知喎﹗得喇﹐佢都覺得無問題﹐咁我都無問題喇。叫做出過力﹐知道隻龜無危險我都安心D。
曾經細個返學嘅時候﹐有一日搭巴士途中(我平時係搭褓母車﹐嗰日唔知點解會搭咗巴士返學)見到馬路上有隻狗喺馬路中心掙札﹐見佢兩隻後腿企都企唔起身﹐淨係靠前腿喺度爬下爬下﹐應該係比車撞嘅﹐但當時我無落車﹐架巴士走咗。之後每次想起件事覺得好內疚﹐一路到家陣都會時不時諗起嗰一幕。亦都試過喺其他國家半夜聽到有人集體群歐一隻狗至死﹐到而家都重記得D棍打落隻狗嘅聲同隻狗嘅哀叫聲。雖然已經事隔廿幾年喇﹐而家間唔中瞓唔著都會諗起﹐曲佢個街﹐何解世上會有人咁冷血架呢﹖而家我唔會再怕﹐只要我喺街上見到有動物受傷或者有人比我聽到佢虐待動物嘅話﹐我一定會制止佢﹐唔犯法嘅話﹐我真係想一棍歐返D冷血PK﹐等佢都試下比人歐嘅滋味﹗
所以﹐對於見到隻龜喺裡面件事﹐我可能係多事﹐不過我覺得自己做咗應該做嘅事﹐知道隻龜無危險嘅話﹐我自己良心會好過D。兼且我想口水禧見到媽媽並無老點佢﹐如果有野唔明想知答案﹐唔需要驚﹐大膽D問﹐雖然人哋未必一定會答你﹐但係唔問就肯定永遠都唔知答案吖嘛﹗
跟住就同口水禧去咗睇爬蟲類動物﹐係喇﹐我最驚嗰D野喇﹗不過口水禧都唔係好大興趣﹐都唔出奇嘅﹐小朋友呢個年紀應該多數都鐘意有毛嗰D動物多過爬蟲類嘅。所以佢見到D蜥蜴都無講佢嗰個金句﹕「呀﹐今晚同我瞓﹗」
行行下就見到口水禧嘅飛佛喇﹗最特別嘅地方係D羊係無野攔住嘅﹐即係話你可以埋身索油﹐任索唔嬲﹗完全滿足晒口水禧所有對羊嘅願望呀﹗所以佢嗰句金句喺嗰場度不知講咗幾多次﹐放蕩非常﹗
D羊好搞笑﹐企晒喺度唔郁﹐好似D model咁﹗
其實莫講話小朋友﹐就連我呢個超齡人士見到D「走地羊」都非常興奮﹐雖然以前喺海洋公園都有餵過下羊食野﹐不過始終都隔咗度圍攔﹐真係唔覺自己同佢有幾近。加上一隻羊比幾個細路係咁圍﹐幾支蘿蔔係咁隊住個嘴﹐食到唔想食﹐好似D明星比幾廿支咪隊住嚟訪問咁款﹐個樂趣真係唔係好多。
但係呢度D走地羊無遮無掩﹐你有本事摸得佢C服嘅話你摸到夠﹐重可以同佢梳下毛添﹐真係正﹗又唔會有人喺你隔離用催促嘅眼神望住你﹐好似同你講「摸夠未﹖到下個喇﹗」我覺得咁樣先係真正比小朋友體驗同動物相處嘅機會﹐係真正比佢哋接觸大自然嘅一課﹗(當然﹐獅子老虎嗰D就唔洗喇﹗
)
口水禧見到有得摸羊﹐當然係老豆呀媽都唔記得係邊個就撲埋去係咁摸返夠本喇﹗
隻羊對眼好搞笑﹐好似合埋咗笑緊咁﹐但其實係開咗眼架﹗
C纏爛打重要個樣懶得戚咁﹗
D羊已經飽經訓練﹐一路食一路比人按摩唔會反抗﹐實行係你有你摸﹐我有我食﹐費事睬你﹗
chok禧
間唔中有D羊仔出嚟亮下相比大家摸下。家長陪同兼講解係好重要嘅一環。有D家長完全唔理個細路﹐有得佢哋追D羊﹐有一件差唔多都十歲八歲﹐竟然喺度扯D綿羊毛﹐係真扯嗰隻﹐重要係扯甩咗成執毛喺空中飄揚嗰隻添﹐跟手重想再扯﹐隻羊已經想咬佢﹐佢重要作個勢喺度挑釁﹐我企喺佢隔離真係鬼唔望隻羊噬佢一野﹐我會橋埋手唔Q救佢﹗(我認我唔係好人﹗)當我想出聲話佢嗰陣﹐佢老豆抱住個細嘅見我同另外一個鬼婆睥緊佢個仔嘅惡行﹐跟住先出聲叫個仔唔好扯。唔排除如果無人望住﹐個老豆未必會制止個仔。
後來唔知係唔係同一個家庭嘅另一細路﹐佢想摸隻羊但係隻羊怕咗佢﹐企咗上舊石度諗住企咗上去個細路就無佢乎﹐點知條細路都跟住爬上舊石﹐在旁嘅義工年青人叫都叫唔住﹐個細路就……一手噤落散到周地都係嘅羊屎﹐真係令我大開眼界﹗有無人同佢即刻去洗手我就唔知﹐因為我都驚佢成家都好似十世未見過羊咁一陣唔知會點樣瘋狂法﹗於是我哋三個就拿拿臨去揾個廁所洗手徹離個「走地羊場」。
有時聽到有動物咬死/傷細路嘅新聞﹐結果永遠都係殺咗隻動物。但好多時係大人唔睇住個細路﹐主人唔睇住隻動物﹐個細路又可能太細唔知唔應該拉扯動物嘅毛/手腳/耳仔/嘴﹑插眼插鼻﹑或者係唔覺意用咗令動物誤會有攻擊性嘅眼神去望隻動物﹐往往好多時發生唔應該會發生嘅意外。
口水禧由細細個開始﹐我哋就叫佢摸街上面嘅狗或者人哋嘅貓之前一定要問咗人哋可唔可以摸﹐可以摸嘅話就只可以摸頭殼頂或者後尾枕﹐近屁股同條尾﹑四肢同塊面任何一忽都唔好摸﹐唔好同隻動物對望互睥﹐摸嗰陣唔好大叫或者手舞足道懶興奮﹐輕輕手摸完就慢慢行開唔好跑。最好就係一個人摸(呢個真係好難叫得聽D細路﹗)﹐唔好撈埋其他人同時間摸﹐因為可能同一時間有人摸咗唔應該摸嘅位而令隻動物狂性大發亂咬人﹐動物係唔識「冤有頭債有主」嘅道理﹐總之邊個最近就o趙邊個先﹐有D重會你越反抗大叫佢越咬得大力D兼且咬住唔放口。
以前做義工嘅狗場嗰度D人教話如果真係不幸比狗咬/狗咬狗嘅話﹐唔好用棍打﹐要用水潑﹐或者用個一個裝咗石仔/銀仔喺入面嘅空樽係咁搖發出聲音嚟制止﹐大叫可能會激發隻野再顛D都唔定。
真嘅大象佢唔睇﹐淨係吼住隻假野﹗
後來我哋去咗睇獅子。呢隻獅子係我去過咁多動物園(野生或唔係野生)之中唯一一隻會郁同叫嘅獅子。唔知你有無一樣嘅經驗﹐就係通常動物園嘅獅子老虎都係懶到出汁嘅﹐獲獲見親都係成堆攤晒喺地瞓到地震火觸都唔曉醒嗰隻﹐唔知重以為瓜咗添﹗所以我都係睇電視先見過識郁嘅獅子架咋﹗
呢隻獅子非常敬業樂業﹐本來坐喺遠處嘅樹陰底下發呆﹐點知突然大叫一聲﹐慢慢起身向我哋行埋嚟﹐一路行重一路吼﹐其實都幾嚇人﹗我咁大個人都係第一次聽隻獅子喺我面前吼﹐原來真係唔洗好用力﹐佢都可以吼得好大聲﹐而且把聲真係好惡﹐唔怪之得可以做萬獸之王同埋獅吼功真係咁堅﹗
段片影影下cut咗係因為我哋太驚想走人﹗因為諗起2007年三藩市動物園走咗隻老虎出嚟咬死人﹐所以見隻獅子向住我哋磨拳擦掌咁款﹐驚佢真係會跳出嚟﹐所以拿拿臨熄機走。其實理應就唔會跳嘅﹐因為中間重隔咗一條大深坑﹐除非隻獅子識輕功﹐如果唔係飲飽食醉都唔會想咁辛苦表演跳高跳遠啩﹗三藩市嗰隻原來係因為有人挑釁隻老虎﹐所以激到隻野火滾跳出嚟咬人。事實上隻老虎係咬瓜咗其中一個有份挑釁佢嘅人﹐同埋咬傷其他兩個同黨。不過﹐當然﹐最後隻老虎都係比人射瓜咗喇﹐重要切咗D腳掌出嚟攞去化驗添。唉﹗
所以以後去睇呢D動物嘅時候﹐千其唔好大叫﹐大動作﹐掉野入去﹐連揮手都唔好。我重同禧爸講﹐下次都係袋定幾隻雞脾﹐萬一隻野跳出嚟﹐就即刻掉晒D雞脾比佢食﹐正所謂「雞脾打人牙較軟」吖嘛﹗拖下時間快D閃。
係咪真係洗得﹖我唔知﹐亦都唔想知呀﹗
