重有兩個禮拜﹐口水禧嘅pre school生涯就正式結束﹐唔經唔覺都返咗大半年學。九月開學就會入讀pre-K班﹐到時又會係另外一個老師做班主任。同學就多數都係而家pre-school嘅同班同學﹐可能會有新同學都唔定。有D而家一班嘅同學仔就會轉去幼稚園或者其他近佢哋屋企嘅學校返學﹐不過對於口水禧嚟講﹐暫時都無乜唔捨得同學嘅情感住。
不過每個月都會攞返嚟一﹑兩日嘅呀Max就唔會喺新學年跟埋去升班喇﹐呀Max只會留喺pre-school呢邊﹐pre-K嗰邊會有第二隻公仔招呼呢班豆丁。相信到時口水禧都會成日問住呀Max去咗邊架喇。
上星期五又輪都口水禧帶呀Max返屋企做功課。課堂上老師已經表示呀Max係時候要沖個靚涼喇﹗可想而知當時呀Max個樣係幾咁核突呢﹗加上呢排都有同學生輪住病﹐又嘔﹑又咳﹑又流鼻涕﹐呀Max去過咁多人屋企不單止已經由一隻白兔變咗做一隻灰兔﹐佢跟身嘅枕頭仔直頭係慘不忍睹﹐用嚟裝住佢嘅嗰個布袋重污糟過我去超市買餸個環保袋﹐你話唔洗乾淨點敢比口水禧玩吖﹗我好衰﹐有時直頭唔比呀Max入屋添﹗
嗰日口水禧瞓完晏覺就發現回復雪白嘅呀Max同佢個枕頭已經晾咗喺出面曬太陽(我驚乾衣機都殺唔晒D菌呀﹐劈咗出去曬紫外光)。當我覆完診返到屋企嘅時候﹐口水禧已經揸住呀Max四圍咁騰。重比佢發現咗呀Max原來有個奶樽仔﹐口水禧突然鐵漢柔情話要餵呀Max飲奶喎。
我覺得個情境似灌呀Max飲毒藥多D﹗呀Max個款似係招駕唔住中伏被迫飲晒落肚。
呢位人兄餵呀Max飲奶餵得何其興奮﹐想當年餵佢飲奶就真係令我哋何其火滾﹗條友仔係無一次會好順灘比你成功將個奶嘴質入佢個口﹐一定要先食下假奶嘴﹐食到懵下懵下嗰陣﹐我哋再快手掉換個真奶嘴入佢個口﹐因為佢咪埋眼咁享受緊個假奶嘴﹐所以見唔到我哋掉咗包﹗當佢繼續啜下啜下嗰陣﹐實情係已經啜緊奶樽入面D奶都懵然不知﹐就係咁﹐戇居居地飲晒支奶都唔知﹗何其蠢﹗
聽落好似無乜難度﹐但係當你要抱住佢行嚟行去﹐跟住單手換奶嘴嘅話﹐你就會知道自己嘅身手係幾咁好。不過呢D高難度野唔係我做﹐係禧公公或者禧婆婆嘅獨門武功。我係間唔中半夜單獨客串嗰陣先至會要使出獨臂刀神功架啫。都唔知係咩人類嚟架﹐咁樣先肯食奶嘅﹖
求其餵咗唔夠一分鐘就話呀Max食飽喇喎﹐真係……好在係假野﹐如果係真嘅話唔餓C就奇﹗
叫佢同呀Max掃風﹐佢聽到個風字就懶醒對住呀Max吹氣。我老咗都係自己揾間老人院好過旨意佢﹐唔係一陣佢見我飲完咖啡就嚟同我掃風﹐對住我塊面吹氣﹐我就真係一腳掃佢出門口﹗
掃一次比佢睇﹐佢都學到……不過係叉住呀Max條頸嚟掃﹗
我話﹕比你咁叉法瓜咗喇人哋﹗
但係佢笑得好開心喎﹗
跟手重要咁樣托高呀Max個頭向住天花板添……
睇完上面兩張相係咪覺得我話自己揾間老人院個決定實在係正確到不得了呢﹖如果唔係﹐我就會好似呀Max咁樣眼擎擎架喇﹗
嗰日口水禧嘅創作故事係﹕放咗學之後﹐我同呀Max瞓晏覺。跟住我哋一齊喺草地上飲咖啡﹐又喺Starbucks睇Cars。之後返屋企同前園D圍欄油油﹐然後我哋就喺度玩掂蜘蛛網。~完~
↑
耐人尋味﹗
上次返完Saturday school之後重未整好D相架入同學同屋企人嘅合照。
今日見有人喺屋企無所事事﹐於是委派佢幫手油顏色。
一共幫我油咗20份﹐差唔多想將全部顏料貢獻晒出嚟﹐落重本係咁油係咁油﹐水彩畫當油畫咁油﹐實在係洗腳唔抹腳﹗我掛住吸塵第掃﹐都無喺佢隔離睇住﹐預咗轉頭出嚟個廳會變咗淪陷咁嘅場面。結果個廳都唔算好大獲……
佢對手同D衫褲就上晒色﹐家下唔係叫你畫人體藝術畫呀﹐仔﹗
地下有﹑凳又有﹑電話有﹑廁所有﹑洗手盆都有……顏料﹗
請搶手的代價就係如此﹐一分錢一分貨﹐呢個係免費嘅﹐所以要收拾嘅場面係咁上下架喇﹗鬼叫自己唔做咩﹗
結果係……張墊枱紙重好樣過D相架喎﹗
