好耐無見

對上篇blog已經係N日之前﹐呢幾日真係幾乎連排毒都無時間﹐所以又點會有得update個blog呢﹖ (無理由要我中X毒為咗寫blog嘩﹖)

其實都有D搞笑﹐我又無相無video﹐咁我應該點寫上個星期嘅呔家探訪好呢﹖

拿﹐諗清楚呀﹐齋字架咋﹐相同video我都懶得去撻喇家陣﹗

對上一次見佢哋應該係之前……唉﹐已經唔記得咗喇﹐都真係幾耐下喎﹗本來由香港返嚟之後都可以見下面食下飯嘅﹐不過除咗受時差嘅侵襲之外﹐口水禧學校嗰排都幾多野﹑活動比我哋D co-oper做﹐所以連覆呔媽電話都無機會。多數係佢下晝揾我﹐但我又miss call﹐到我夜晚諗起要覆電話幾時候又已經太夜﹐唔好意思打比人。就係咁樣﹐搞下搞下輪到佢哋返去香港成個月﹐所以到家下先有機會聚一聚咋﹗

上個星期係呢度嘅Memorial Day長週末假期﹐口水禧已經好耐無見過呔仔兩兄弟﹐時不時都會問下呔仔幾時嚟。於是就約咗星期六佢哋過嚟我哋度玩。而家細佬已經唔再食媽媽奶﹐所以煮野食都容易咗好多﹐唔洗驚搞到呔媽無得供應比細佬。由於獲獲都係人哋嚟到我先整野食﹐搞到傾計嘅時間唔多﹐於是我就決定前一晚包好D雲吞雪入冰格﹐咁第二日煮返熱就食得。由於呔仔同細佬重細﹐食雲吞好似對佢哋嚟講鹹咗D唔適合﹐於是就整咗雜菜湯加星星通粉過佢哋三件蛋散食﹐我哋四個老野就食雲吞喇。(呀﹐應該係我同禧爸兩件老野同另外兩件步向中年先啱﹗)

之前一日我重同禧爸講話我去超市買餸﹐講下講下重話應該唔會咁黑仔無韮菜啩……無韮菜重包咩雲吞呢﹐係咪先﹖(其實當然重可以包喇﹐我大把鼻涕﹗)講笑啫﹐我點敢叫佢哋食我D鼻涕雲吞呀﹐唔驚出街比人鬧咩﹗無韮菜當然係重有大把其他材料包雲吞﹐不過係我用慣咗韮菜﹐一時間要我轉第二樣野嘅話﹐我會好騰雞啫。

點知……一去到超市﹐真係六合彩唔見我中﹐好日唔會無韮菜﹐就真係比我撞正嗰日無韮菜賣﹐重比我見到有個麻甩佬立咗最後一包添﹗霎時間真係個內心亂到呆咗企喺度唔知點算﹐我甚至走去人哋個貨倉問人「有無韮菜」呀﹖但都揾唔到一紮比我買﹗於是我就立咗包韮黃﹐諗住都係韮﹐不過一個係菜一個係黃﹐應該差唔多。後來諗起屋企附近嗰間華人超市可能會有韮菜﹐就算到時無嘅話﹐咁咪買韮黃囉。於是就拿拿臨殺去另外一間超市開始我嘅「尋找韮菜的故事」喇。

其實嗰日啱啱打完鼻敏感針加抽咗血﹐隻左手手臂又痛又軟﹐扭呔都好吃力﹐都有諗要唔會轉食第二D野唔包雲吞好呢﹖因為隻左手直情好似比人挑咗手筋咁舉都好難舉﹗不過我又唔想人哋一場嚟到我走去嗌pizza返嚟﹐諗諗下都係食住家野好D﹗

撲到去嗰間超市門前個停車場﹐竟然發現間超市執咗笠﹖﹖﹖﹖﹖又會遲唔執早唔執﹐係喺我要揾韮菜嗰日執咗架呢﹖﹖﹖﹖真係唔講句「有無韮菜」都唔得喇﹗始終都係一條韮菜韮黃都無﹗望下隻錶﹐已經就快六點﹐要趕住返屋企煮飯喇喎大佬﹐於是唯有匆匆走返屋企叫禧爸再去過第一間超市度同我買韮黃喇。呢度無街市有呢樣唔好﹐街市呢檔無都可以去第二檔度買﹐但呢間超市無就要揸車去第二間買。

返到屋企即刻打比我嘅人肉食譜禧婆婆﹐confirm下用韮黃係咪都無問題先。其實我都多舊魚﹐韮菜﹑韮菜花﹑韮黃都差唔多味﹐一定可以用架喇﹐但硬係要問下人我先安落。

第二日我淨係整雜菜湯比D細路就無其他野要煮喇。朝早叫禧爸帶口水禧出去放電﹐等佢可以瞓個晏覺﹐如果唔係﹐條友眼瞓就會揾人出氣﹐通常受害者唔係呔仔就係呔爸。唔知點解口水禧專揀D老豆嚟恰﹐佢自己個老豆喇﹑呔仔個老豆喇﹑同學D老豆﹑我個老豆佢都唔放過照恰。恰﹐即係同人講野會語氣麻麻哋友善(即係無禮貌喇)﹐人哋問佢十句有九句唔應人﹐但係你問佢鍾唔鍾意同叔叔玩呀﹐佢又會話鍾意呀﹐家下D後生諗野真係令人費解﹗

下晝四點幾﹐呔家四件終於到步﹐呔仔可能係啱啱瞓醒兼太耐無見﹐一入門口有D R底﹐企咗喺佢老豆隔離唔肯郁﹐以前佢一入嚟就會一支箭衝入去sunroom開始玩玩具﹐但嗰日明顯係有D生外﹐呆企咗一陣。反而細佬就無有怕﹐入到嚟四圍巡視下﹐搞下呢樣嗰樣﹐同我哋笑下又自己入去sunroom「做野」﹐呔仔見細佬爭取時間「開工」﹐於是都唔執輸收起佢份矜持﹐唔嘥時間齋企喇喂﹗

說時遲那時快﹐有條茂利喺房大嗌﹐原來佢話聽到叔叔講野﹐所以知道呔仔嚟咗﹐於是都要破繭而出喇﹗不過最搞笑係﹐佢哋都係各有各玩﹐倒晒D玩具出嚟之後﹐每人一個角落頭尋寶﹐完全零交談嘅﹐但可能咁樣對佢哋嚟講算係叫做同小朋友一齊玩架喇。

呔媽呔爸嚟之前買咗麥樂雞﹐到咗即刻開餐﹐一邊食一邊傾下返香港嘅野﹐巧合地﹐呔媽同禧爸都話怕咗同另一半返香港﹐因為嗰另一半返咗香港之後就有如提早更年期咁成日都好掹﹐話我/呔爸成日攞佢哋嚟出氣喎﹗禧爸見有同道中人﹐即刻好似放監咁大講特講我點樣喺香港虐待佢(又唔講自己虐待我嗰D喎﹗)﹐呔媽重話以後唔好叫佢同呔爸一齊返香港喎﹗有人即刻跟埋一齊講埋一份添﹗喂﹐咪講到我哋兩個成個變形人魔咁先得架﹐好似之前重講過話不如兩家人一齊去香港架喎﹗咁快就想縮﹖

當我哋講得眉飛色舞嘅時候﹐嗰三件仔係無理過我哋繼續好忙咁玩玩具。果然係唔會放過一分一秒呀下﹗

唔經唔覺﹐講下講下就差唔多六點﹐之前嗰兩公婆隊完麥樂雞之後﹐都唔知佢哋重食唔食得落飯﹐不過佢哋話重食得喎﹐咁我就一於開波煮喇。搞掂咗細路嘅先﹐佢哋食先﹐食完去玩﹐咁我哋幾個老野就會有安樂茶飯喇嘛﹗

小朋友食完就到我哋大人開餐喇﹐韮黃雲吞﹐食落都還可以﹐不過我自己覺得鹹咗少少﹐可能呔爸媽嗰晚返到屋企要飲多幾杯水喇﹗

最慘就係個bread pudding呀各位﹐我係喺internet度揾返嚟嘅食譜﹐所以我覺得賴咗野囉。後來我問咗個朋友攞佢本書嚟睇﹐方才發現原來做bread pudding一定要用法包嗰種外皮比較硬同厚身少少嘅麵包﹐因為要浸喺D蛋漿入面焗﹐麵包唔夠硬﹐焗出嚟就會太林太爛兼樣衰﹗食落就更加唔洗講喇﹐好似食無牙爛飯餐咁嘅口感囉。重要我pat pat痕﹐搽柚子蜜落D包度﹐搽唔係問題﹐但最好挑走D果皮﹐因為唔挑走D果皮﹐食落啖啖都係果皮﹐我覺得有D苦﹐難為呔爸重比我硬質多舊﹐真係實在唔好意思﹐上次嚟食個lava cake又賴野﹐今次個bread pudding又賴野﹐但我保證下次應該會有個正常嘅bread pudding過你哋食﹐因為我已經揾到個好好食嘅食譜﹐亦都揾自己做咗實驗﹐個味道同口感係得嘅﹐放心放心﹗

不時都會聽到呔仔講野﹐都講到幾個字一句咁長﹐重記得第一次同呔媽講電話嘅時候佢問過呔仔講野嘅事﹐當時嘅呔仔係未識講野(得嗰一歲幾﹐唔識講野都好正常不過嘅事)﹐事隔一年﹐呔仔已經可以講到好多﹐重識同我哋對答添﹗例如你問佢要幾多生果﹐佢會話﹕「好多生果﹗」呔爸問佢攞玩具﹐佢會答︰「唔好﹗」佢老豆以為個仔乜都會答唔好﹐喺呔仔答完一連串「唔好」之後突然整蠱呔仔話﹕「買好多玩具好唔好﹖」呔仔轉數快﹐識得答︰「好﹗」真係你精我都唔笨呀﹐老豆﹐想陰我﹐無咁易﹗

最好笑嘅係呔仔如果有野唔順意嘅話﹐佢即時會爆出佢嘅口頭禪﹐你估唔估到係乜野﹖包你估唔到……就係…….唔要細佬﹗呢句野連佢老豆呀媽都R頭唔知關細佬乜野事﹐細佬就更加唔知點解自己會成為咗呀哥嘅口頭禪主角喇﹗例如臨走嘅時候﹐呔仔想帶一架口水禧嘅火車返屋企﹐點知呔爸媽唔比佢攞走﹐呔仔扁咗下嘴﹐個樣好唔開心咁突然講咗幾次「唔要細佬」﹗喺遠處比呔爸抱住嘅細佬望住呀哥O咗嘴﹐個樣好似﹕「下﹖又關我事﹖」但呔仔當然唔係認真地想唔要細佬喇﹐呔爸話試過呔仔咁樣講完之後問呔仔送咗細佬比人好唔好﹐呔仔會話唔好。所以我諗呢句野純粹係呔仔嘅暗號﹐比佢老豆呀媽知道佢講呢句說話嘅時候即係代表佢有野唔happy咁啫。不過我同禧爸好衰﹐聽完呔仔講之後不停笑﹐真係無D同情心﹐難為細佬O住嘴望住呀哥百思不得其解﹗﹗

就係咁﹐傾下講下笑下﹐佢哋一家就打道回府。希望呔爸返屋企之後無肚疴喇﹗