唔經唔覺﹐口水禧嘅pre-school生涯就嚟到閉幕嘅一日喇。想起九個月前嘅佢重係帶住個伴讀老書童一齊去返學﹐我真係爭咗未紮兩個春麗髻喺個頭兼喺課室企喺佢隔離幫少爺磨墨架咋﹐你話我有邊忽唔似書童先﹖
話說上次返完Saturday school之後一直都未有時間整D相架交貨﹐拖下拖下﹐卒之咪又要臨急抱佛腳囉﹗之前好彩叫口水禧幫手油好咗底色﹐last day前一晚我就剪剪貼貼﹐左黐右黐﹐本來諗住整多幾隻公仔喺上面﹐但實在無能為力﹐因為除咗縫野係我嘅C穴之外﹐我連剪貼手工藝方面都係殘障嘅﹐當晚一共要剪十六隻豬仔﹐彎彎曲曲﹐剪完發現右手手指公個虎口位甩皮喎﹐慌唔係揸得把較剪太大力咩﹐攞咗剪雞骨嗰度力嚟剪紙﹐天下間有無邊位高手有我呢份咁深厚嘅耐功呢﹖
嗰晚我做到四點幾先收工去沖涼瞓覺﹐朝早六點幾(即個幾鐘頭之後)就要起身焗bread pudding﹐因為嗰日大家話搞個大食會喎﹗點解我會咁pat pat痕焗野呢﹖咪就係其他D家長認咗頭帶咩蛋糕仔呀﹑生甘荀﹑餅乾﹑曲奇﹑啫哩﹑生果嗰D野食﹐除咗曲奇餅之外﹐其他都係買嘅野食。我都唔知帶咩好喇﹐諗住自己都有份食但又唔想晨早流流食凍野﹐於是就自告奮勇話我焗bread pudding喇。話實好彩係整bread pudding咋﹐因為我前一日要整相架﹐根本就無時間焗蛋糕曲奇嗰D﹐bread pudding勝在要當日朝早焗﹐熱辣辣食先好食﹐所以雖然係瞓咗個幾鐘就要起身﹐不過我喺呢D情況之下係唔會起唔到身﹐因為直情會瞓唔著﹐驚瞓過龍唔知醒賴野﹐所以通常都會瞓下又醒﹐醒完又瞓﹐間唔中睇下鐘。
當晚嘅戰況係咪好激烈﹖好彩返唔齊人咋﹐齊嘅話我一共要整20份﹐睇怕都唔洗瞓﹗
當我喺學校攞出嚟嘅時候﹐老師見到問我幾時整﹐我答佢話前一晚﹐佢笑。
枱上面有支rubber cement﹐真係唔講由自可﹐講起把幾火﹗黐野黐到我一手都係﹐但係點咗rubber cement嗰條野又唔見黐得實D紙碟喎﹐陷bang 冷黐晒去我D手指頭度﹐頂﹗黐喺我到把鬼咩﹐家陣我想黐落D紙碟度呀大佬﹗重搞到我一手都係添﹗有用過呢家野嘅人應該知道D膠水黐咗上手之後乾咗係會變咗一達達透明膠咁﹐捽下佢就會變一粒粒﹐好似鼻屎咁﹐若然真係鼻屎嘅話﹐根據嗰晚黐喺我手上嘅粒粒數量已經夠我將自己個鼻由兩個窿liu咗變一個窿﹐打通晒兩個單位﹐咁就唔會鼻塞喇﹗洗手又難洗﹐要逐隻手指慢慢捽甩D粒粒﹐唔講以為個project主要係為咗黐住我十隻手指添﹗呢鋪真係為藝術而犧牲呀我﹗(自備嘔吐袋喇唔該﹗
)
改良咗嘅bread pudding應該係咁嘅樣﹐有D人會將D包再切細D﹐變咗一粒粒正方形咁﹐會容易D「筆」。不過我已經通咗頂﹐實在無能耐再刁豆腐咁刁個bread pudding喇﹐食落唔似食緊無牙爛飯咪算囉﹐唔好咁高要求喇﹗
一焗就焗咗兩底﹐一大一細﹐以備唔夠食。
呢個係前幾日自己做白老鼠嘅時候影低嘅造型。何公呔爸+何門曾氏﹐你哋嗰晚食嘅同呢個真係天淵之別﹐請受民婦一拜!
你哋嗰晚食嗰劈野﹐咁都夠膽放入口﹐我真係對你哋嘅勇氣佩服到有如滔滔江水數之不盡(你睇我老公幾樣食到﹗)……
證明你哋確係敬老同有愛心﹐唔忍心打擊我自信﹗真係唔講句「多謝家姐」又點得呢﹗
包好晒D野食﹐拿拿臨整埋老爺同少爺嘅pancake早餐﹐再食豬餿咁倒入自己個口﹐羅友比火燒咁趕住出門口﹐皆因嗰日要co-op﹐叫咗禧爸送我哋去學校﹐因為已經遲到﹐費時無位泊車重要周圍兜揾車位﹐趕到X淋X賴就唔好喇﹐因為通常咁樣趕法﹐個天都實同你玩盡D﹐就喺你9秒9跑到學校嘅時候﹐手上面嗰兩盤野食就唔會遲唔會早﹐時間啱啱好﹐喺正門口眾目睽睽之下跌落地請個地板食。
所以安全起見﹐都係叫禧爸送好D。
成枱野食﹐不過我已經
到唔想食。除咗雞翼同我自己整嗰盤野之外﹐其他嗰D我都無興趣食。我唔可以空肚食早餐架﹗(其實已經唔係空肚﹐喺屋企已經食飽。)
小朋友開心地開餐﹐夾晒我切好諗住伴bread pudding嚟食嘅士多睥梨﹐但個pudding就無食﹐我間唔中都偷望下有無人挖一羹半羹嚟試下﹐好彩都有家長食。但佢哋嘅評語係唔會睇得穿講真定講假﹐實會話好食架。
所以我嘅目標只係無人食完肚疴告我﹐我就覺得夠架喇﹗
今個學年最後一次為佢哋準備茶點喇﹐有D同學九月唔會再喺度讀。唔知何年何月再見喇﹗
雖然係最後一日返學﹐但老師都有比佢哋做surprise can同呀max。
九月開學就唔會再用呀max做功課喇﹐老師同D小朋友講話呀max都要放暑假去下旅行。等D細路唔覺得係同呀max分離。重比佢哋逐個逐個摸下呀max同佢講bye bye。
當日有兩個同學搞生日慶祝﹐於是喺最後一日返學﹐我哋都有得唱生日歌﹗
circle time都係講關恐龍嘅主題﹐重唱恐龍歌。成班行嚟行去扮恐龍。
返咗九個月學﹐每次嘅circle time歌舞呢部份佢都好投入。而家連其他環節都會主動參加﹐主動舉手。雖然都未明晒老師講乜﹐但有勇氣靠估同講自己想講嘅野。
飲飽食醉嘅恐龍群。口水禧有D似比人打斷手腳嘅恐龍﹗
唱完生日歌﹐我哋送咗禮物比老師﹐就係用淨返嘅班會錢接咗條頸圈比老師戴。
幫補下老師最近架車比人撞到total lost唔知有無得賠嘅損失﹐因為對方揸嗰架車都係偷返嚟嘅。認真佩服老師嘅EQ﹐即使發生咗呢件事﹐但佢第二日返嚟上堂都重可以好似無事發生過一樣﹐完全唔會比私人嘅事情影響到嚟學校嘅情緒。我覺得作為一個教育工作者﹐應該要有老師呢個控制情緒嘅條件﹐即使再有點樣唔開心﹐都唔等如可以返到學校揾學生嚟出氣發洩。
唔單止係老師自己個人嘅情緒﹐佢連其他人﹐例如co-op嘅家長或者小朋友嘅情緒都好關注﹐講明任何家長如果朝早覺得自己個小朋友發脾四﹐有玩野嘅跡象﹐老師唔介意個家長留返個細路喺屋企唔返學﹐因為唔想個細路嚟到鬼殺咁嘈或者玩野玩到個個大人或細路都受佢影響。唔係個個學校比家長隨便比小朋友缺課架﹐因為D學校問政府攞資助係會計埋每日學生出席人數嚟攞錢﹐即係今日你唔返學﹐學校就攞唔到政府對你嘅教育資助比學校嘅錢。但係老師為咗唔影響其他人﹐寧願無咗D錢﹐而唔係話之你返到嚟喊死發晒顛﹐跟住罰到你驚然後收聲。
小朋友有情緒﹐大人都一樣有。試過上個禮拜有個家長本來要co-op﹐但唔知咩事返到學校時突然眼濕濕標晒眼淚咁﹐老師見到後就問我可唔可以留低co-op﹐因為佢唔想嗰個家長情緒不穩而影響到D細路。老師嘅細心﹐唔單止教育小朋友知識﹐就連家長同小朋友嘅情緒都照顧埋﹐我覺得呢個係教育小朋友點樣體諒其他人有唔開心嘅時候﹐我哋旁邊嘅人盡量幫下手比多D空間人哋抖下氣﹐穩定下情緒﹐即使無問過人哋發生咩事﹐但少少嘅幫忙已經係對當事人一個好大嘅舒緩位好好咁處理自己嘅情緒。
我成日都好驚萬一有一日我要co-op﹐但咁啱唔好彩突然偏頭痛發作或者病咗去唔到學校﹐無人替我點算﹐我諗而家我唔洗咁擔心﹐老師同其他家長應該會幫下手。
小朋友好好奇﹐係咁摸老師條頸圈。
口水禧自己都衝咗出去摸埋一份。比著初初返學﹐佢實係坐喺度當唔關自己事。
散會後﹐我將另外一盤未開過嘅bread pudding比咗老師。佢話嗰日我喺email度話整嘅時候佢已經想問下可唔可以整多少少比佢帶返屋企。(係咪氹我架咋﹖
)所以佢好開心咁即刻捧咗盤野入佢房。
你話西人有時假又好﹐虛偽又好﹐有D時候佢哋講善意嘅謊言都係為咗對方好落台。(我唔係話老師呃我攞盤野返去倒咗佢)只係同佢哋D人相處咗一段日子﹐覺得有時講下善意嘅大話未嘗唔係一件好事﹐至少會比對方一個鼓勵或者等人哋心裡面好過D咁啫。我就試過懶誠實直接講完野之後比人鬧﹐諗諗下講到人哋唔知點落台又確實係會激起人哋把火嘅。做人圓滑D好﹗(又唔知講咗去邊……
