暑假 – 口水禧日記

細個嘅時候 ﹐ 每逢返學就等放學 ﹐ 放學等放假 ﹐ 最希望就係快 D暑假喇梗係 ﹐ 痞喺屋企都好過去返學 ﹐ 做暑期作業都好過返學日日要交功課。 (當然喇 ﹐ 暑期作業得中 ﹑ 英 ﹑ 數三科嘅題目 ﹐ 平日返學重有社 ﹑ 科 ﹑ 健嗰 D習作要做 ﹐再加 D小測呀 ﹑ 默書呀 ﹑ 考試呀 ﹐ 計落好似做暑期作業抵 D﹗ 雖然都最後都係開學前先嚟臨急抱佛腳亂 Q咁做本暑期作業 ﹐ 因為博老師唔會真係收嚟睇 ﹐ 最多都係同隔離位嗰個同學交換對答案啫 ﹗ )

因為唔係住市區嘅關係 ﹐ 我哋係好少好少出街嘅。日日喺屋企話唔悶就呃你 ﹐ 所以造就咗我練得一身好本領 – 自言自語。最高境界係扮完老師鬧全班學生 (所以可以一鬧鬧成粒鐘 ) ﹐ 跟住轉頭抱個公仔扮思奶搭巴士同對面 D 思奶吹水 ﹐ 一個人分飾幾個角食色﹕

思奶 A﹕ 「買餸呀 ﹖ 」

思奶 B﹕ 「係呀 ﹐ 諗住買 D野煲湯囉。」

思奶 C﹕ 「嘩 ﹐ 你個仔定女呀 ﹖」

思奶 B﹕「女嚟架 ﹗ 好鬼曳 ﹗ 」

以上對白全部爆肚 ﹐ 無劇本 ﹐ 高音甜低音準 ﹐ 總之專業到個個思奶都唔同聲嘅。

到肥玲同 barbie 加入我嘅生活之後 ﹐ 自言自語變咗兩個低 B婆互相對話 ﹐ 暑假嘅生活更加有聲有色 ﹐ 因為兩姐妹多咗個節目叫「開片」。唔係自相殘殺 ﹐ 就係出去片其他嘅細路朋友 ﹐ 通常都一班女仔片一班男仔。呢個就係我細個嘅暑假。

多得口水禧帶挈 ﹐ 同暑假脫咗節 N年嘅我 ﹐ 今年開始又有返個暑假喇 ﹗ 不過呢個假對我嚟講純粹係唔洗朝早趕返學趕到斷氣 ﹐ 朝早可以瞓多少少 ﹐ 夜晚可以夜瞓少少而已。家務事一樣要做。

呢件蛋散 ﹐ 日日都問我 ﹕ 「媽媽 ﹐ 今日我哋去邊呀 ﹖ 」有時直頭比 order 我話 ﹕ 「今日有太陽 ﹐ 去下公園好喎 ﹗」

落雨 ﹐ 我唔想出街 ﹔ 更加唔想帶佢出街。除非去有瓦遮頭嘅停車場然後直上百貨公司唔洗淋住雨 ﹐最憎雞咁腳兩母子衝入人哋鋪頭咁狼狽。天氣太熱 ﹐ 又唔想出街 ﹐ 都唔多想帶佢出街 ﹐ 原因咪就係熱囉。但我唔係自閉中年人呀。

終於明白點解細個嘅時候好恨呀媽帶我哋出街而呀媽又唔係點帶我哋出街。我屋企唔近任何商場遊樂場 ﹐ 最近都要搭半個鐘先有個街市。莫講話以前嘅街市 ﹐ 即使係而家嘅街市 ﹐ 有幾多個呀媽會鍾意帶細路去街市吖 ﹗ 重要我哋住到深山咁遠 ﹐ 禧婆婆更加唔會帶我同肥玲去買餸喇 ﹐ 咁鬼辛苦 ﹗

家庭主婦每日時間都好緊迫 ﹐ 繁鎖嘅家務再加小朋友突如其來嘅「偷襲」 – 打爛野 ﹑ 倒瀉野 ﹑ 病呀 ﹑ 打交呀等等 ﹐ 包保你唔會有得閑坐低飲茶食包嘅時間 ﹗ 以前見呀媽一日到晚忙過港督咁嘅款 ﹐ 都唔明有咩咁多野做嘅佢 ﹐ 而家完全明晒 ﹐ 由開眼做到瞓覺都未做完。

有時都覺得日日要佢痞喺屋企好悶 ﹐ 但我想騰少少時間出嚟都好難。等到我騰到時間嘅時候 ﹐ 就係佢瞓覺嘅時候 ﹐ 我得閑 ﹐ 到佢唔得閑 ﹐ 要去揾周公。

盡可能 ﹐ 前幾日天氣唔熱 ﹐ 帶佢去公園玩下。有時放棄一 D家務 ﹐ 帶佢去書局打書釘。星期三帶佢去學游水 ﹐ 星期日禧爸同佢去游水。真係出唔到街 ﹐ 出去淋下花當出咗街 ﹐ 佢都照單全收。 (幾易氹 ﹗ )

真係真係連淋花嘅時間都無 ﹐ 唯有請佢自己娛樂自己 ﹐ 揾野比自己做下。油顏色 ﹑ 玩車 ﹑ 睇卡通 ﹑ 砌火車軌 ﹑ 搓泥膠 ﹑ 畫公仔 ﹑ 玩水玩冰玩鹽玩黑椒 ﹑ 剪雜誌 ﹑ 影 video乜都好喇 ﹐ 自己諗 D野出嚟玩 ﹐ 因為呀媽真係唔得閑坐低陪玩。

夜欄人靜 ﹐ 有諗過個仔大個喇 ﹐ 有無野要教佢 ﹖ 認真諗過 ﹐ 你話專登坐低教 ﹐ 就真係無乜 ﹔ 不過平時佢問我答 ﹐ 確實有袋過野落佢待架喎。嗰日喺書局睇咗本有好多太空圖片嘅書 ﹐ 佢見到個土星有個環圍住 ﹐ 今日佢攞個砌咗一個圓圈嘅火車軌笠落自己個頭殼然後問我「呀 ﹐ 似唔似嗰日睇書嗰個星球呀 ﹖ 」類似咁嘅例子好多 ﹐ 通常我當佢學咗野架喇。

英文 ﹑ 國語 ﹐ 我隨口爆架咋 ﹐ 無教「波 paul 魔科」 ﹐ 教都唔知我講乜喇。聽得明先嚟同我研究發音喇 ﹗ 咁耐都係淨係知自己個名國語點叫 ﹐ 同埋問佢「知不知道」 ﹐ 佢答 ﹕ 「豬兜」(口水禧講「知道」嘅國語發音 ) ﹗

瞓前講故事嘅環節好少發生 ﹐ 一來未洗完碗未沖涼我唔會坐佢張床。二來佢上床時間已經遲到唔容許再講故事而係要即刻瞓 ﹐ 三來 ……講故事唔洗一定要瞓前講 ﹐ 幾時講都得喇。呢期佢話想我讀 D英文書佢聽 ﹐ 諗諗下又真係好似唔多有讀比佢聽喎 ﹗ 我都希望可以應佢要求 ﹐ 讀比佢聽下或者甚至係教佢讀下。時間呀 ﹐ 時間呀 ﹐ 好似我周身嘅肥膏咁多就好喇 ﹗

瞓覺片 ﹐ 我放棄。都唔可以叫放棄嘅 ﹐ 應該係我抱住順其自然嘅態度 ﹐ 因為我相信我個仔當佢做到一樣野嘅時候 ﹐ 佢自然會得嘅 ﹐ 就好似佢游水一樣。為咗戒片 ﹐ 大家瞓得唔好 ﹐ 第二日互片就唔好喇。我成日同自己講 ﹐ 如果係有問題 ﹐ 早戒遲戒都會有問題 ﹔ 如果無問題 ﹐ 佢自己戒都唔係問題。

呢個禮拜終於都似返個夏天喇 ﹐ 溫度終於都衝破 80大關 ﹗ 好彩車咗窗簾 ﹐ sunroom下晝熱到吖 ﹗ 拉咗窗簾好好多。家務幾纏身都好 ﹐ 永遠唔會忘記我第一任務係要做「煮婦」。老爺少爺落 order﹐ 一家之煮就做野。甜品係少爺 order嘅 ﹐ 堅持自家制嘅永無塑化劑乜劑物劑咁大劑。

其實喺屋企無咩唔好吖 ﹐ 有野食 ﹐ 有冷氣 /風扇嘆 ﹗ 有呀媽有老豆陪 ﹗ 細路總係唔明 ﹐ 係要到佢哋都做咗人父母嗰下先明架喇 ﹗ 儘管成日話喺屋企好悶 ﹐ 唔返屋企 ﹐ 要整爛間屋企等我哋唔洗返屋企呢 D傷盡比錢供樓嘅禧爸嘅心 ﹗ 算數 ﹐ 個個細路嘅潛臺詞都係「好悶呀」呢句架喇 ﹐ 我細個都唔知講幾多 ﹗