Maui 2011 – I (6/18) – 口水禧日記

賣大包呀喂﹗呢度有大包賣呀﹗一日兩篇blog﹐明益街坊﹗(睇啱埋鏡拼﹐唔買都睇下喇﹗)

朋友喺Maui有間time sharing嘅單位﹐每年佢哋都會揾個星期跳出煩囂﹐去嗰樹渡下假。見我哋三條霉燦成日痞喺屋企﹐今年叫埋我哋一齊去玩下﹐還掂個單位係一分二﹐即等如兩個酒店房咁樣﹐一家住一間﹐益下我哋﹐因為我哋淨係出機票錢同飯錢﹐住﹐免費。(跟住佢哋就知咩叫後悔……因為我哋真係黑仔王﹗)

18號倒X咁早嘅飛機﹐前一晚執行李。雖然都係美國﹐而且個單位內係有洗衣機同乾衣機任用﹐不過帶過細路出門嘅人都知道D細路嘅「林審野」何其多﹐如果你想有個無咁煩嘅旅途﹐就唔該醒目D帶多少少野以備無患﹐D人發起爛咋上嚟即刻有野封佢把口﹐咁就包你有個美好回憶嘅旅程。

搭Hawaiian airline﹐一件寄倉行李USD20。每個最多50磅。手提行李免費。因為某人係小童又唔夠60磅﹐坐租車要祖埋個car seat﹐耝埋個car seat要比多USD70﹗cheap爆嘅父母度過諗過﹐將個booster放大喼寄倉都係USD20﹐慳USD50喎﹗重要係自己嘅booster唔洗坐人哋大眾用過嘅car seat﹐好似抵D﹐於是決定將口水禧嘅衫褲同booster同放一個大喼寄倉。

往時執親行李最頭痛就係過磅。獲獲要逗起個搭喼﹐手騰腳震咁企喺個磅上面猛嗌﹐「得未呀﹖幾多磅啫﹖下﹖我無力喇喂﹗得未啫﹖睇到幾多磅未呀﹗妖﹗點呀﹖….下刪幾廿字!」另外嗰個就會鬧﹕「妖﹗你郁嚟郁去點睇呀﹖個磅定唔到落嚟呀﹗唔好郁喇﹗忍下得唔得啫﹖你唔好郁喇﹐逗高D個磅喇﹐我遮鬼住晒呀﹗」

何必咁辛苦啫﹖唔鬼磅有佢爆喼囉﹗講笑啫﹗你估我有幾億未開頭未﹗過磅要罰錢架嘛﹗唔磅點得呀﹗

早幾日喺walmart見到呢個專門要嚟磅行李嘅電子磅﹐初頭禧爸重話不如買走針嗰款喇﹐我死都唔制呀﹐用嗰款一陣咪又係定唔到落嚟支針好似汽車水撥咁「發嚟發去」﹗幾大都要電子喇﹐係咪先﹗清清楚楚﹐過定無過磅﹐一睇D數字就清楚晒﹐唔洗再估支針係咪指住2定3呀咁﹗

底下有個勾勾住行李個手挽﹐一舉起個磅﹐只要定少少﹐佢就會好快o都一聲定咗個磅數比你睇﹐唔洗估估下。呢個發明無得頂﹐以後唔洗再為咗個喼係唔係過咗0.1磅而嘈喇﹗

嗰晚執到十二點幾就拿拿臨去瞓﹐因為朝早要四點半起身食野跟住出門口趕8點嘅飛機。口水禧呢D大鄉里無出過城咁﹐九點上床﹐竟然十二點都未瞓得著﹐話開心得濟喎﹗真係頂佢唔順﹗話佢知第二朝都係要四點幾起身架喇﹐眼瞓佢嘅事呀﹗好彩﹐一點前終於聽到佢瞓著嘅呼吸聲﹗

其實我嗰晚都撻咗上床典極都瞓唔著﹐唔係因為興奮﹐係因為太早喇﹐平時唔係呢個鐘數瞓﹐上咗床眼光光咗好耐先瞓﹐唔夠一陣個鬧鐘就響﹗起身準備喇﹗

早一日喺超市買咗D熱狗腸同麵包﹐嗰朝係A貨幟哥整嘅早餐﹐佢猛話條腸好食。車﹗條腸又唔係佢整嘅……

口水禧有個地方要讚下佢(唔鍾意睇可以飛落下一段)﹐就係無論瞓得幾少都好﹐即叫即醒﹐唔發老脾。只要略施小計﹐講D佢有興趣嘅活動﹐佢會好合作起身速速換衫。所以嗰日雖然瞓得咁少﹐佢大少爺都好合作起身換好衫就埋位食野。係佢老豆同佢影相嗰陣硬係要整色整水整D古怪樣出嚟﹐成個面抽筋咁款。

睇佢呢個髮型就知前一晚喺張床度瞓唔著典得好勁﹐D頭髮直頭係失控地飛晒起身﹗望落重有D似電咗髮咁樣添﹗

搞呢搞路搞咗一輪﹐終於都出到門口。我係一個好怕出遠門嘅人﹐因為成日都擔心呢樣唔得帶﹐嗰樣唔記得熄火鎖門。結果六點半咁濟先開始去機場。路上都算順﹐係臨到機場嗰段路無喇喇塞車﹐嚇到我哋吖﹗飛機八點起飛﹐四十五分鐘前就要check in﹐咁即係七點三要到機場喇。但係塞緊車嗰陣差唔多七點﹐我哋重要先泊車﹐再搭接駁巴士去機場添﹐容乜易送機尾架﹗好彩唔係塞咗好耐﹐點知行行下部GPS跪低咗無晒野睇﹐我哋唔知個停車場喺邊架嘛大佬﹗好彩噤咗個reset制部機又著返﹐好不容易揾到個停車場泊好車之後賴晒X咁颷去個巴士站等車﹐幾驚會比人放飛機﹗喺美國比人放飛機係閒事﹐約好晒接你去機場嗰D服務公司隨時甩底﹐跟住話因為無接到你order都夠膽講嘅。

好彩等咗唔夠一分鐘就有車嚟﹐個司機重好好人幫我哋搬野上巴士﹐重話下次唔洗企喺室外等﹐有個站喺室內﹐嗰度有免費咖啡同muffin任攞。唉﹗都嚇到唔識肚餓喇大佬﹗邊食得落﹗

上咗shuttle之後安落晒﹗兩件蛋散氣定神閒咁。口水禧不停話去到要做乜做乜﹐又話要游水又話要表演游水比姨姨同叔叔睇。

去到機場﹐雞咁腳走去check in﹐點知一磅﹐個姐姐話我個大喼多咗兩磅。比禧爸睥咗兩野﹐拿拿臨打開個喼睇下有無野可以過落個手提行李。一打開﹐人哋就見到禧爸本厚過砧板嘅書﹐即刻指住本書叫我哋攞本野放喺個磅度磅下﹐跟住就話﹕「係勒﹗就係呢本野﹐攞走佢喇﹗」到我睥返佢。佢重話係因為朝早我塞多咗兩個火牛入去先搞到過咗磅喎。

交低咗個寄倉行李﹐三條友又雞咁腳去過X光﹐除鞋除褸除袋﹐點知我過極都搞到部野o都o都聲﹐心諗「唔係嘩﹗除得嘅都除晒架喇喎﹐腰帶都除埋出嚟﹐唔通要除埋個『爸爸』﹖﹖﹖﹖﹖」個海關重要我雙手擺頭添﹐好彩呢個時候﹐無頭髮嘅某人竟然靈機一觸指點咗我一個迷津﹐就係我頭上面嘅髮夾。除埋D髮夾之後再過多次部機﹐終於都無事喇﹗頂﹗嚇得我吖﹗

過咗海關﹐重見到朋友一家好游閒咁坐喺度揸住杯starbucks等上機添﹗

重比佢哋話我哋咁鬼遲出門口架﹗妖﹗最衰就係無喇喇塞車﹗

上咗機擺好晒D行李﹐真係服咗我老公﹐咁鬼大件都比佢安置好晒﹗我最驚就係上機嘅時候頭頂D行李櫃比人擺滿晒﹐我一個人帶住口水禧O住個嘴唔知點算好﹗呢趟有個苦力幫手﹐唔洗我粗勞喇﹗口水禧熱切期待飛機開始加速同飛起嗰一刻﹐明明眼瞓到暈都要頂住﹐等到飛咗上天先肯著尿片瞓覺。

一如既往﹐帶咗野鋪好張凳﹐帶埋佢D老婆同被﹐條友仔打橫瞓喺我大脾﹐對腳晾喺佢老豆對大脾上C服地瞓咗。原以為好咯﹐個仔瞓咗我哋兩老都有得瞓下養下神﹐點知……

坐我哋後面嘅三母子﹐個呀媽喺四小時四十分鐘裡面除咗有四十分鐘安靜過之外就無停過嘴係咁大聲講野﹗一上機﹐佢已經成個電臺廣播劇咁講故事比兩個仔聽﹐其實我對帶細路出街嘅人係好包容﹐我明白佢哋要照顧小朋友﹐有時都身不由己。所以大聲講故事我都算數。但係佢連叫D仔唔好係咁睇DVD都講幾廿次﹐同左邊嗰個講完又同右邊嗰個講﹐跟住又到左邊嗰個﹐然後再同右邊嗰個﹐每個講幾次﹐我好想起身幫佢收咗兩條o靚仔部機﹐五分鐘後先比返佢哋。然後個呀媽又要每個仔講下自己睇嗰套戲係講咩﹐然後個媽媽又好慣常咁用誇張(超高音﹗)嘅語氣回應”Oh my god! I’m scared! Oh mine!”。然後就係一輪嘅串字呀﹑常識﹑數學堂﹗總之就一浪接一浪﹐我都學識咗D生字﹗

瞓唔到又郁唔到﹐真係坐到我都有D火火哋。好唔容易啱啱恰著﹐又比後面個細路猛咁踢我張凳踢醒﹐再唔係就起身去廁所嘅時候扶我張凳嘅時候連我頭殼頂D頭髮都揸埋﹐痛到我比佢嚇醒﹗一係就喺夢中都重聽到個呀媽把聲係咁問D細路問題﹗

唉﹗比佢揸斷頭髮嚇醒咗之後就瞓唔返﹐呢個時候禧哥已經喺度玩緊佢D車仔。其實係我瞓著之前佢已經起咗身玩車仔﹐跟住我太眼瞓瞓著咗﹐跟住先比人扯頭髮扯醒嘅。突然覺得我個仔都唔算嘈﹗

其實後面嘅兩個小朋友係唔算嘈而且算乖﹐雖然佢未停過係咁踢我張凳﹐但我可以接受﹗最嘈係佢呀媽啫﹗後來禧爸去完廁所返嚟話我知原來個呀媽帶咗成大堆flash card﹐唔怪之得佢係咁問D仔D字點串喇﹗原來係咁﹗

我呢個呀媽真係懶喎﹐淨係掛住瞓覺……但係嗰位媽媽喺教小朋友知識嘅同時﹐有無諗過應該教下自己咩叫公德心呢﹖

終於我哋架飛機比預定時間早到咗四十分鍾。九點幾我哋就到達Maui。十年前﹐我同禧爸都去過夏威夷同Maui。不過上次去Maui係一日遊﹐所以去咗邊我哋兩條蛋散都唔係好清楚﹗

Maui嘅天氣同三藩市唔同。呢度比較濕﹐所以熱起上嚟有D黐立立﹐呢獲口水禧個隔肋底就真係有汁同黐立立喇﹗落咗機就去等寄倉行李﹐朋友攞晒佢哋嗰D﹐我哋重等緊。等呀等﹐成條行李輸送帶都無晒行李﹐咁我哋嗰件行李去咗邊呀﹖

唉﹗都話衰開有條路架喇﹗原來件行李跟唔切我哋上機﹐比人放咗去下班機。航空公司話可能中午一點半會送去我哋住嗰度。重比咗個電話禧爸叫佢如果收唔到行李嘅話可以打去問下。當時我哋係朝早九點幾。

既然個行李未有住﹐我哋唯有去攞車先。點知……

朋友都有租車﹐人哋一去到個租車公司就即刻喺塊電腦板度見到自己泊架車喺邊﹐但我哋租嗰架就唔見﹐淨喺喺禧爸個名側邊有三粒星。朋友都笑我哋係黑仔王﹐唔見行李又唔見車﹗

最後終於有車﹐三條友推住行李正要行去攞車嘅時候﹐明明出緊太陽架嘛﹐又會無喇喇落雨架呢﹖越落越大﹐我同口水禧唯有揾個有瓦遮頭嘅地方等禧爸揸架車嚟﹐落住雨帶住個細路重要周圍揾車真係幾攞命架﹗

攞咗車之後﹐一行六條友就起程去食野先﹐因為個酒店單位要下晝三點先有得check in﹐唔去食野都唔知做乜好。朋友帶咗我哋去酒店附近嘅商場﹐入面好多賣紀念品嘅鋪頭同埋一個美食廣場。我哋幫襯咗一間賣越南粉麵同三文治嘅檔口﹐我同禧哥一齊食碗雞絲湯粉﹐禧爸就食豬肉三文治。我哋附近有個台﹐坐坐下有D小朋友喺度表演跳舞﹐口水禧見有D女仔著咗條草裙﹐心口又攞咗兩個碗當比肩尼咁用﹐問佢想唔想同人合照﹐條友都唔知幾有興趣﹗撲埋去企喺前排﹐成個壯男咁款﹐幾咁man呀(<<佢自己覺得)﹗

D小朋友好搞野﹐上身係用D碗咁嘅野cup住個心口﹐下身就整條草裙﹐咪睇佢哋年紀細細﹐扭起上嚟真係唔野少﹐我諗叫我去扭﹐唔洗兩秒﹐可以call定白車﹗

呢隊D「碗」大D﹐啱晒禧爸喇﹐唔怪之得條友係咁扮晒影個仔﹐其實個鏡頭係對住D跳舞姐姐就真﹗又碗又扭﹐唔流鼻都真係偷笑﹗

重有唔同顏色嘅草裙﹐扭起上嚟又真係幾好睇架喎﹗

成日聽D人講話跳呢D舞因為係咁扭條腰﹐咁條腰都會幼D﹐但係你睇下相中嘅妹妹們條腰同我有得揮喎﹐但佢哋好扭得下架喎﹐咁究竟可唔可以瘦腰架大佬﹖

睇到鬼咁開心嘅口水禧都忍唔住要當眾手舞足道一番﹐起勢咁跳﹗

間唔中又停低望下D靚女扭成點……

由於坐咗好耐﹐佢已經非常咁坐唔定﹐個羅友直情係有好多野咬咁﹐見個商場唔多人﹐有佢走下喇。佢顛起上嚟﹐竟然走咗上台去執人哋跳舞跌落地嘅羽毛﹐比個司儀喺咪叫佢攞返比人﹐全世界嘅目光即刻轉移過嚟我哋度﹐真係羞家喇仔﹗好偷唔偷﹐走去偷條毛﹗﹖

而家呢條友仔出街成日都好似食咗忽得咁通樹跑﹐唔知重以為佢係因為被困荒島困得耐得濟﹐一放出嚟就唔記得重有個呀媽喺度。頭也不回咁係咁走。話佢又唔聽﹐鬧都唔頂得好耐﹐唔理佢又真係會走咗去﹐激C人﹗我可以做嘅係差唔多見佢個勢想走佬嗰陣先發制人話定佢一定要跟實我﹐咁樣會好少少。

跑得咁急﹐偷咗野呀﹖

等極都未夠鐘去酒店check in﹐行李又無晒下文﹐於是又轉戰starbucks。

入嚟呢度真係要千叮萬囑佢小心唔好打爛野﹐後面嗰排野如果爛咗﹐我哋成個trip邊度都唔洗去﹐日日一家三口嚟幫手洗杯當賠錢都得喇﹗

夏威夷唔知係咪遊客多﹐乜野都貴過人﹗本來諗住條友仔D泳褲喺晒失蹤嗰個喼裡面﹐無辦法都要同佢買過條。點知去到D鋪頭﹐唔單止好難揾細路仔嘅泳褲﹐就算揾到都唔知係唔係要嚟游水﹐因為D質地重薄過人哋D絲巾﹐但郁下都要四五十蚊一條﹗諗諗下真係唔抵﹐不如買小朋友游水用嘅尿片重抵喇﹗(我哋係cheapi父母﹐幾乎係如果可以唔著嘅話﹐都可能會叫個仔無下裝咁去游水架﹗)

Double chocolaty chip frappacino係唯一佢飲過嘅starbucks飲品。通常係呀媽飲﹐佢黐幾啖。所以條友會博懵啜好大啖先放手。

等下等下﹐差唔多兩點幾﹐朋友話可以試下去酒店check in﹐睇下可唔可以早D攞到房。

你話我哋唔係黑仔王都無人信﹗check in嗰陣﹐酒店同朋友講個電腦壞咗﹐乜都亂晒籠﹗最快要四點先有房攞﹗兩點幾等到四點﹐你話點算好﹖唯有又坐咗喺酒店樓下嘅露天茶座繼續等運到囉﹗尋日天氣好熱又鬼C咁曬﹐雖然叫做有D瓦遮頭又有風﹐但因為近海﹐吹埋嚟嘅風都有少少黐立立﹐搭完飛機塊面已經「立遲遲」﹐喺飛機瞓咗一陣諗住落機去到酒店可以刷下牙﹐洗個面﹐點知都要繼續呆坐下﹐個身又有汗﹐最麻煩係口水禧見到人家個泳池已經好唔耐煩係咁問幾時可以游水﹐一陣又走去池邊玩水﹐一陣又去追雀仔﹐真係我哋坐都坐唔安樂又要去追仔﹗鬼C咁熱就唔好四圍跑喇﹐再唔係就坐喺烈日當空下暴曬﹐乜鬼防曬都未搽﹐又要去捉佢返嚟坐﹐佢又駁嘴駁到乜咁﹐真係想一腳踢Q佢落去游飽佢喇﹗

坐坐下見佢勢色唔對﹐諗住都係買條泳褲過佢跳落水解悶﹐喺呢個時候﹐朋友嘅手電響起﹐原來係酒店揾佢﹐想話佢知要之前嗰個客唔記得咗尋日要check out比返間房酒店﹐後來酒店去揾佢先拿拿臨執野走﹐走咗酒店重要執房﹐要過多三個鐘頭先可以比房我哋。三個鐘頭﹖﹖﹖有無真係咁黑架﹖朋友嚟咁多獲都未試過﹐唔係我哋累街坊係咩吖﹗真陰公呀佢哋﹗

禧爸嘅耐熱程度超乎我嘅想象﹐長袖長褲﹐喺攝氏31度之下係幾咁狐仙﹗

朋友拍枱都無用﹐無房就係無房﹐吹酒店唔脹﹗一行人又走去超市買野兼食晚飯﹐係﹐我哋四點幾五點食晚飯喇﹗係咪好頂癮呢﹗口水禧知道無得游水﹐非常之唔happy﹐本來唔想食野﹐但我同佢講話一陣無力游﹐於是佢又被我昆咗食咗D意粉。其實我都諗住比佢落下水喇﹐唔係﹐下次講乜都無人信我架喇﹗食緊飯嘅時候﹐航空公司打電話比禧爸話終於將個行李送咗嚟Maui﹐不過要兩三個鐘先送到嚟酒店。你話係咪搞笑﹐酒店離機場不過係四十五分鐘車程﹐但佢哋要兩三粒鐘先送個行李嚟酒店﹐明玩野喇大佬﹗態度又差﹐禧爸打咗幾次電話去問個行李嘅下落﹐不單止話唔知個行李去Q咗邊﹐重鬼咁唔好老皮叫禧爸唔好成日打去喎﹗乜Q野航空公司嚟架﹖

食完飯返到酒店已經七點咁上下﹐終於個行李又同我哋重逢喇﹗朋友亦都攞到房喇﹗

咁靚嘅渡假酒店﹐收得人又貴﹐年中重要比錢維修﹐唔怪之得激到朋友鬧到佢爆喇﹗

我哋住間房係向海嘅﹐幾乎係喺騎樓跳落去行多幾步走可以落海咁濟。所以向海嘅房要一年前book定。

上到去﹐嘩﹗有廚房架大佬﹗所以我朋友係會喺酒店自己整野食﹐夜晚先出去食。廚房有煲有廚具有洗碗碟機微波爐﹑電爐等等。朋友嗰間個廚房重大D添﹗

廁所除咗有沖涼企位﹐重有個按摩池。呢個按摩池救咗我哋﹗話說口水禧不斷話要去游水﹐夜媽媽﹐出面又黑又涼﹐個個由朝早喺外面等到夜晚先有房﹐又熱又出汗﹐鬼死咁想快D沖涼瞓覺﹐話晒夏威夷同三藩市都有成三粒鐘時差﹐我哋當時八七八點﹐已經係三藩市嘅十點幾十一點架喇﹗朝早咁早起身之後無瞓過晏覺﹐口水禧根本就已經就嚟不支倒下﹐但又唔想搞到佢覺得比我哋昆咗﹐點算好呢﹖

昆佢話個按摩池係小型泳池嚟架﹐喺裡面都可以游水架喎﹗條友真係信﹐拿拿臨水都未放就剝晒自己光豬等入去﹗