Maui 2011 – II (6/19) – 口水禧日記

趁嗰兩件蛋散去咗暢泳﹐我重唔「獨自去kowloon」?呀﹗應該係獨自去偷歡先啱。偷乜﹖我呢D上咗年紀嘅中女重有乜好偷﹖咪偷時間上下網﹐寫下blog﹐等遠在印尼嘅禧婆婆或者香港嘅公公親友們可以睇下我哋三件茂利黑仔王有無大鬧Maui比人驅逐出境囉﹗

繼前一日勞累得好緊要之後﹐我哋嗰晚三件沖完涼就bang bang聲「碌」咗去見周公喇。除咗比禧哥煎咗幾廿巴霹靂掌﹑伸咗幾野佛山無影腳同埋午夜驚叫媽媽之外﹐都算係幾好瞓嘅。瞓到朝早禧爸落咗樓下海灘睇靚女我哋兩母子都重係瞓到隻死豬咁﹗

某人睇完靚女返嚟精神爽利﹐重話要同我哋出去食早餐添﹗前一晚上咗網揾下附近有乜好食﹐比禧爸喺yelp揾到附近有間叫Betty’s Beach Cafe嘅餐廳﹐係專門食D鬼佬大大份早餐嗰種﹐有D似平時我哋屋企附近嗰間country waffle咁樣﹐最緊要係有pancake食﹐滿足某人嘅欲望吖嘛﹗

當日係父親節兼某中女嘅35歲牛一﹐個星期日寧舍特別咁樣﹗梳洗過後三條友仔就向Betty’s 進發喇。天色就麻麻哋﹐唔算好熱﹐天都唔係太藍﹐本來想帶口水禧去搭火車﹐但又驚下晝會熱﹐加上某人見到海灘已經不下幾廿次係咁提住話要去海灘玩﹐心諗﹕慳返﹗搭嗰架火車都成美金幾廿蚊三條友架大佬﹐都係揾日早D無咁熱嗰陣先去搭喇喂﹗

出街都要帶住個喼﹖唔係誇張﹐係因為諗住去超市入貨﹐重係入D水呀﹑西瓜嗰D重野﹐停車場離間房都要行一段路﹐帶埋個喼去裝野就無咁論盡喇﹗況且有個鄉下佬超鍾意拖喼﹐淨係尋日出發嗰陣都同朋友姨姨﹑叔叔﹑姐姐講咗唔知N咁多次話嗰架係佢嘅race car﹐佢揸車喎﹗

都係多得我前年帶佢返香港嗰次太多行李推唔晒﹐委派佢做我助手幫我推一個手提行李﹐自從嗰次之後佢就愛上咗推行李喇﹗以後又多個苦力﹐好野﹗

揸咗三里路就到達目的地。Maui呢個地方真係好得意﹐沿海嘅屋多數都唔多靚﹐重有D木屋區feel﹐但記得十年前同禧爸嚟玩嗰陣個導遊帶我哋周圍去睇D富豪嘅屋﹐真係靚到嚇死人﹗不過嗰D屋通常都去咗半山上面﹐海邊就唔多。

D餐廳座落喺D民居嘅小巷入面﹐由大街轉入去之後﹐你成日都會以為自己賴咗野行錯路﹐因為兩邊都係民居﹐點都估唔到前面會有間餐廳喺度。但係通常小巷行行下又會出咗D大街﹐跟住就會見到成列餐廳﹑滑水用品嘅鋪頭等等。

街上有路牌寫住No Parking At Anytime(任何時候不准泊車)﹐但係兩邊泊滿晒車喎﹐不過我哋咁黑仔﹐千其唔好跟人喇﹐費事一陣架架唔抄係淨係抄我哋嗰架先激C人喇。都係乖乖哋泊返要比錢嗰D位喇﹐無謂特登走嚟夏威夷試食牛肉乾喇﹐係咪先﹗

乖乖比錢泊車

口水禧呢幾日出親街都帶住佢個背囊﹐最緊要係佢肯自己拎唔好質比我哋幫佢拎。

行緊去間餐廳途中經過好多鋪頭﹐不過十間有八間都係無開或者係吉嘅。究竟D遊客去晒邊呢﹖D鋪頭咪拍晒烏蠅囉﹖

終於喺個角落頭揾到間野﹐好巴里島feel嘅餐廳﹐全部開放式無玻璃窗嘅﹐等D客食住海風﹐欣賞下靚境咁嘆下野食。

由於揸機嘅呀嬸手勢實在唔到家﹐喺外面勁猛太陽﹐裡面燈都唔開多盞嘅情況之下﹐張相就搞到出面嘅唔清﹐入面嘅太黑……唉﹗

算把喇﹐都係想係咁二比個大概大家睇下咁啫﹗

海上有好多人玩緊降落傘﹐又有人玩水上電單車。呢D活動完全同我絕緣喇家陣﹐我嘅活動只限做跟班﹐服侍下老爺同少爺游完水上嚟抹身同沖涼。(唔好誤會﹐我係幫細嗰件沖咋﹐老嗰件食自己喇﹗

)

以前有玩過水上電單車﹐確係幾好玩﹗不過未玩過降落傘﹐家下叫我玩﹐我有D驚呀﹐一來唔識游水﹐二來驚下面有鯊魚等緊我降入佢個口度﹗雖然係有大把人玩﹐但係唔知係咪睇得太多discovery channel見好多人喺夏威夷滑水嗰陣比鯊魚咬﹐硬係覺得個海入面有鯊魚揾緊食咁﹐大佬﹐太平洋喎﹐附近又有D觀鯨﹑海豚嗰D船帶人出海睇鯨魚同海豚﹐咁容乜易D鯨魚諗住玩大D表演食人架﹗

(係﹐講咁多不如自認我係無膽喇﹐OK﹐我認囉咁﹗

)

嚟夏威夷唔帶衫唔帶褲都千其唔好唔記得帶太陽油同黑超﹗因為D人真係太鍾意陽光﹐所以去到邊都會好似呢間野咁無茶色嘅玻璃窗﹗無辦法喇﹐人哋個海真係特別靚特別藍﹐加咗玻璃﹐咁靚嘅景遮住晒確係幾把鬼嘅﹗

帶細路出門至緊要帶埋佢D「飛佛」玩具。頂唔到一餐飯﹐至少都頂到三分一餐啩﹗

難得嘅三人合照﹗唔記得帶腳架﹐所以多數都係我影佢哋﹐或者呢D自拍面容扭曲﹐塊面跳晒草裙舞嘅相。

如果唔係生日﹐隔離呢條友睬鬼我﹗我隻左眼長期比我勁捽﹐搞到眼角位變色﹐好喇﹐第時唔洗化都有隻smoky eye﹐「慳fan」!前面個blog有好多blog友大發慈悲﹐努力咁昆我唔似35歲﹐明嘅﹐似53歲吖嘛﹗

唔洗再留言安慰我喇各位﹐我經已有D想……嘔喇﹗

無論去到邊﹐佢都可以就地取材﹐乜叉都玩得﹗呢期好鍾意捐枱底同瞓地下。總之唔激C呀媽嗰D佢絕對係唔會做嘅。好彩﹐正所謂﹐你精我都唔笨﹐袋入面大把消毒紙巾同消毒液﹐無廁所就用呢D﹐有廁所就玩夠”dick”佢去洗手﹗

落order嘅時候﹐姐姐問口水禧個pancake要一塊定三塊。我諗住佢喺屋企都唔止食一塊咁少﹐咁就叫三塊喇。點知嚟到先見到D pancake塊費都大過佢塊面﹗佢重話食得晒喎﹐咁就比佢食喇﹐還掂之後要去游水﹐食唔夠野一陣手震肚餓就無癮喇。

我見到就飽喇﹐佢好開心咁係咁鋸﹐係咁淋糖漿。

禧爸叫咗個火腿扒+三隻蛋同炒薯仔

撞鬼佢﹐整乜個樣真係咁鬼似呀幟哥架呢﹖如果邊日呀幟哥嚟美國拍外景﹐咁啱肚痛要去爆石嘅話﹐歡迎外借呢件A貨細佬比佢做替身都得﹗有時坐佢對面望到佢個樣都想笑﹗

聽就聽得多﹐但食就真係第一次﹗呢個egg benedict無得彈﹗見過網上有人教點整﹐淨係個汁都煩死﹐重未講隻蛋喎﹗但係始終有一日我都會征服佢嘅﹗餵食嘅人有度好﹐就係見到野食就有推動力去學同整﹐排除萬難﹐整出嚟迫D白老鼠食咗先﹗

就係因為呢D野食咁大份﹐落完order之後等到幾乎瞓著先送嚟﹗睇怕喺屋企自己整嘅話都要三個人分開時間食架喇﹗除非我有三頭六臂﹗

食完走咗出去行下﹐但係尋日個天色真係麻麻﹐影出嚟D相同企喺清水灣D爛鬼海灘無咩分別﹗唔講都唔知係喺夏威夷影嘅。車﹗

攞呢張相寄去無線睇下請「老臨」嗰個部門收唔收佢先﹗

求其影完幾相求其相就走人﹐去咗超市入貨。揀咗個大西瓜﹐左敲右敲﹐扮晒專業揀西瓜D呀姐咁托起個瓜貼住耳邊敲敲下﹐側邊D人行過見我嘅行為以為我黐線定係跳緊舞咁款﹗後來買咗一盒保線紙﹑兩包腸仔(買一送一)﹑熱狗麵包﹑廿四支水同埋個西瓜﹐盛惠USD3X蚊﹗嘩﹗個西瓜不愧我跳咗part舞嚟揀﹐要USD12個幾一個﹐唔揀個甜嘅﹐你話係咪要攞自己個頭當西瓜咁敲﹗比錢嗰陣個收銀重話因為我係嗰間超市嘅會員﹐用會員價買嗰堆野慳咗USD20﹗﹗﹗唔係啩﹖我重以為我聽錯咗﹐攞咗張單嚟睇﹐真係寫住慳咗USD20喎﹗嘩﹗平時去屋企附近嗰間野慳嚟慳去都係得嗰一個幾毫﹐竟然喺夏威夷慳咁多﹖其實係D野貴啫﹐同我係咪真係識慳錢係一D關係都無嘅﹗不過我當然係會喺禧爸面前耀舞揚威下喇﹐等佢以為真係娶咗個咁知慳識儉嘅老婆返嚟吖嘛﹗

返到酒店﹐有人急不及待要跳海喇﹗

向來我都唔係好鍾意游水嘅人﹐因為嫌游完成身濕deck deck﹐又要沖涼洗頭(日日都要做﹐唔知點解覺得游完水要做呢D野就係麻煩﹗)洗泳衣太煩氣﹗加埋個口水禧就更加煩上加煩﹐都唔知顧咗佢先定搞掂自己先好。所以呢D咁粗勞嘅工夫﹐最好就係交托比無咁多野煩嘅禧爸去做﹐佢哋D麻甩佬著條泳褲就行得﹐我哋D女士又要遮呢度又要剃嗰度﹐又要搽防曬乜乜物物﹐幾咁煩﹗(係﹐我係籍口多﹐實則個原因只得一個﹐就係懶囉﹗

)

呢兩條蛋散﹐話驚個海好大浪扯咗佢哋出去喎﹐所以游離游去都係喺個沙灘邊浮游下就算。咁喺酒店房個缸游就得喇﹐洗乜落去海灘游呢﹖於是游游下兩條友頂唔順話D水好凍﹐要轉戰泳池。