拿﹐咁樣係咪似樣D呢﹖無咁呃鬼喇嘛﹖似夏威夷喇嘛﹖
完全無執過任何顏色架﹐眼睇同影出嚟係一樣色架﹗當然﹐有咁靚嘅天色同陽光﹐就梗係熱到呀媽都唔認得喇﹗
不過嚟到呢樹﹐都係為咗佢嘅陽光啫﹐我諗好少有人會好似我咁﹐見到陽光會周街揾樹陰遮住﹐屬於見光死嗰一類﹗無法喇﹐當你發現面上開始有D深淺不一﹐有啡色又有黑色嘅斑﹐搽乜都唔甩嘅時候﹐你就會知道自己已經唔可以再「同陽光玩遊戲」架喇﹐因為你實會輸比個太陽﹗
九月禧哥開學會返下晝班﹐到時唔好彩要出去室外co-op嘅話﹐一個禮拜暴曬四日﹐每日兩粒幾鐘﹐攝氏38度﹗都係留返D quota到時用喇﹗
朝早九點幾起身後決定去食拉麵。我確係懶同抗拒去旅行要喺酒店房整野食嘅人。嗰日喺超市買嘅野食﹐除咗個西瓜之外﹐其他嘅都重係原封不動未開過放咗喺雪櫃﹐有99%嘅可能我係會攞返去退。
所以我哋會上網揾下邊度有野食又平又好食﹐然後就去做白老鼠囉。呢方面﹐電車男禧爸最強﹐我哋落LA又好﹑Las Vegas又好﹑溫哥華都好喇﹐都係咁樣揾食。
見外面個天色靚到暈﹐出門口前都要出下個露台望下喇﹐呢D陽光與海灘嘅靚景﹐我哋好少見架咋﹗
欣賞完靚景之後就拿拿臨出門去醫肚。之前一晚食完晚飯返嚟酒店發現有蓋嗰個停車場無位泊﹐唯有過對面泊露天嗰個喇﹐說時遲那時快﹐落車嗰陣又落雨﹗好﹗無得頂﹗
不過咁﹐呢度間唔中落下毛毛雨係好正常嘅事﹐佢夠膽出出下太陽都會落一兩分鐘毛毛雨嗰下夠晒特別﹗所以D植物好綠﹐馬路邊嘅樹好大棵﹐好鬼靚﹗
我哋帶嚟部GPS好不幸地係唔支援夏威夷嘅路﹐好在禧爸部電話可以當GPS﹐所以舊嗰部唔做野都影響唔到我哋去揾食。由酒店出發﹐行大約都係幾里就去到目的地。不過行緊嗰陣都有懷疑過賴野行錯路﹐因為沿途一D都唔似會有餐廳喺附近嘅款﹐四圍空曠都乜都無﹐淨係得個枯晒草嘅山頭同一D建築地盤。
你睇下﹖間野連招牌都無﹐你話行過唔知重以為係一間乜野公司架咋﹗實則呢間係一間拉麵鋪嚟架大佬﹗估佢唔到呀呢﹖
十年前我同禧爸嚟過夏威夷玩﹐當時我哋去Honolulu (壇香山)嗰邊玩﹐喺酒店落街周圍揾食﹐行行下喺D橫街窄巷見到一間非常兜痞嘅食店﹐周身唔多銀嘅我哋﹐見人哋D野幾平﹐於是就衝咗入去醫肚﹐其實當時都無乜要求架喇﹐喺三藩市賴得太多野嘅我哋已經對於尋找美食有D絕望﹐味覺已經好耐唔洗點用咁濟﹗出乎我哋意料之外﹐嗰間野嘅拉麵簡直係我咁大個人食過最好食嘅拉麵﹗D麵嘅質地簡直係彈到唔識形容﹐雖然我次次都係揀最cheap嘅牛油粟米拉麵﹐但我哋兩條友可以食足咁多日咁多餐都唔厭﹗返到三藩市去到Japan Town見咁多鋪頭係日本人開嘅﹐走入去叫碗拉麵﹐一食都食唔返夏威夷嗰隻味道返嚟﹐直頭可以話係無得比﹗即使朋友介紹過三街有間好食嘅拉麵﹐我哋去食過都覺得同夏威夷嗰間兜痞野無得比﹗你話嗰間野係咪落咗我哋降頭呢﹗十年喇﹐無一間我哋食過嘅拉麵可以同佢比﹐就連禧爸之前去日本食過拉麵都話覺得仍然係夏威夷兜痞野最正﹗可惜﹐我就淨係記得人哋個兜痞樣但唔記得人哋間鋪個名﹐家下你叫我去揾返佢出嚟﹐我都無計﹗自從嗰次之後﹐每逢我哋食過覺得OK嘅食店﹐我哋都會攞卡片﹐以防第時再揾唔返。
呢間野呢﹐未至於我要攞卡片﹐但係喺Maui要食唔係西餐嘅野又要平嘅話﹐呢間都可以諗諗佢。佢話自己係食fusion野嘅﹐即集日本﹑中國﹑同泰國菜於一身嘅餐廳。不過佢中午嘅menu就真係睇唔出佢有好多選擇囉。不過我哋一心係諗住去食拉麵﹐所以我哋鎖定咗目標﹐齋睇拉麵嗰欄有乜好野。
呢個就係個中午菜單喇﹐就係得呢度一版咁多﹐後面係飲料。侍應姐姐介紹咗一輪﹐不過禧爸神早已經喺網上睇咗食評﹐心中已經知道要試邊D野食。於是我哋就叫咗個Steam Pork Bun﹑兩款拉麵﹑一碟炒年糕。
個Steam Pork Bun初時睇個名重以為係叉燒包添﹗後來上到嚟先知唔係﹐不過就有D似北京填鴨嗰隻食法囉。基本上係換咗入面塊肉﹐用咗豬肉咁啫。嗰兩碗拉麵呢……可能可以昆到外國人﹐但望落個樣我就覺得佢用咗冷麵嗰隻麵而唔係拉麵嗰隻麵。味道還可以﹐但口感唔係拉麵嗰回事。咁多樣野埋單加埋小費大約係USD4X蚊﹐喺呢度原來算係唔太貴喎。
幟哥等住比食評
食完又匆匆去超市買西瓜﹐又係我西瓜大嬸出動嘅時候喇﹗今次見到有隻西瓜size細少少﹐但價錢係九毫七一磅﹐平過上次買嗰個。牌上面寫住係本地貨﹐其實都唔理佢係本地定外太空種架喇﹐總之係自然甜同自然爆就得喇。自然甜同自然爆喎﹐香港都未必有呢種西瓜食喇﹗係咪先﹖
點解要去旅行先嚟食西瓜呢﹖事關去旅行好難食到好似喺屋企食野咁均衡﹐食唔夠菜同生果嘅後果唔洗多講都知幾麻煩﹐加上佢哋日日咁樣暴曬幾粒鐘﹐唔食返D多汁多維他命C嘅野分分鍾會變史泰龍﹐夾硬爆就即變忽必烈﹗加上口水禧日日唔爆下石﹐個肚仔係會脹到好似就嚟要生咁樣﹐頂住個胃佢就大把籍口唔食野架喇﹗所以貴係貴咗D﹐不過為咗唔好因為去旅行搞到病住返去嘅話﹐盡可能都每日食D生果喇﹗
樣樣生果都貴﹐最抵食就係西瓜﹐又大又甜﹐一個頂幾日。問你怕未﹗
返到酒店﹐換好行裝﹐兩位戇男又再戰沙灘。見天色好﹐陪佢哋落去幫佢哋影返D沙龍喇。(幫兩個麻甩影沙龍﹐真係諗起都覺得飽到上心口﹗
)
赤腳踩落D沙度﹐嘩﹗滾燙到幾乎變咗「紅燒人掌」﹗
好Q熱呀D沙﹗邊個想練鐵沙掌就嚟喇﹗包你練埋鐵沙腳掌都重得﹗
↑仍然係只敢徘徊響岸邊嘅兩條懦夫↑﹐老嗰個重話D水有D凍添﹗
攞呢兩件去餵鯊魚﹐睇怕都無魚吼喇﹗因為條魚為咗要食佢兩件蛋散﹐重要千辛萬苦游到幾乎上岸咁濟先食到﹐咁辛苦為咩呢﹖不如捕下出面浮潛嗰班友重好喇﹗
對口水禧嚟講﹐落海灘最開心嘅玩意就係玩衝浪。不過唔係人哋滑水好有型嗰D衝浪﹐佢玩嘅係比浪沖上岸嗰隻沖呀﹗唔覺意吞咗啖海水重好擔心D水有毒﹐驚到乜咁﹗原來D海水鹹對佢嚟講即係有毒﹐咁都比佢諗到﹐唔怪之得死都唔肯游喇﹐原來係驚再飲多啖毒水﹗
我企喺海邊睇住佢兩條茂利就咁係個海度一陣跟D浪沖出去﹐好快又跟住D浪沖返返嚟﹐嚟嚟去去幾廿次﹐玩嚟玩去D水都係到咁上下高度﹐真係幾乎企喺度都瞓著﹗
太陽曬到頭殼頂可以煎蛋咁濟﹐撇低兩個低B仔﹐我自己上房嘆下冷氣﹐upload下相﹐寫下blog好過喇﹐唔係邊得你哋日日有新blog睇呀﹗
講下笑啫……實情係根據我嘅了解﹐我唔即刻寫低呢幾日做咗D乜呢﹐我嘅記憶好快就會伴隨我嘅青春咁樣消失架喇﹗已經試過好多相影完無即刻寫﹐比我唔知飛咗去邊喇﹗既然游水唔係我嘅飛佛﹐咁一於就痞喺房寫blog喇。
曾經聽過一個朋友講話喺呢度夏天唔曬黑少少會比人覺得好怪。因為當個個人都古銅色咁出街而你一個白雪雪嘅話﹐咁D人就會覺得你梗係成日匿喺屋企唔出街嘅怪人。咁都得﹖係真唔係呀﹖咁我走之前都要揾日落樓下乾燒又好﹑濕蒸都好喇﹐點都要學古天樂咁曬黑少少先可以返去先得﹗
口水禧呢頂帽行到邊都比人扯佢頭殼頂對貓耳仔﹐最難得係扯嗰個有佢自己扯得鬼咁high同happy﹔比人扯嗰個有佢自己置身事外﹐完全當唔關自己事嗰下高境界﹗難為我哋側邊嗰D唔知應該做D乜野反應好﹗試過有個女人重叫口水禧同佢一齊扮貓叫﹐但口水禧聽唔明﹐直頭唔知人哋同佢講野﹐但我同禧爸聽得明吖嘛﹐咁係咪即係要我哋兩老幫佢扮貓叫應酬下嗰位auntie呢﹖
喺樓上整整下D相﹐嘆緊我帶去嘅炭燒咖啡﹐突然禧爸打電話叫我落去睇口水禧玩海盜船泳池﹐重要特別聲明「嗰度好多樹陰﹐唔怕曬﹗」
好喇﹐放低手上面嘅野﹐落樓下捧下場喇﹗落到去見禧爸坐咗喺池邊﹐口水禧就揸住條草喺池入面玩。見我去睇佢﹐重即刻要表演sir滑梯我睇下佢幾勁添﹗
我睇緊嗰本講五歲小朋友特徵嘅書有提過四歲半至五歲嘅小朋友好鍾意得到大人﹐尤其是媽媽嘅認同。所以五歲嘅小朋友會特別乖﹐因為想取悅媽媽(或者平時照顧佢嘅人)。口水禧未到五歲﹐所以重有四歲半小朋友反叛嘅特質喺度﹐呢個trip真係比佢成日激到生蝦咁跳﹗但間唔中都有籍得讚嘅地方﹐尤其佢做完之後專登叫你去睇下佢執玩具執得整唔整齊﹑洗面台抹得乾唔乾淨等等。有時重會問D幾嘔嘅問題﹐例如﹕「呀媽媽﹐點解我而家咁大隻嘅﹖係咪我大個仔食多咗野呀﹖」﹑「呀﹐媽媽﹐我而家識得沖廁﹐係面因為我大個仔﹐知道邊個制用嚟沖廁呀﹖」(根本細個都識沖架喇﹗)諸如此類嘅自己讚自己問題或者引導性焗你一定要讚佢叻嘅問題等等﹗問你怕未﹗
已經泡咗喺海水/泳池水幾粒鐘嘅口水禧個樣浸到唔同咗添﹗
每日我哋都係得一個節目﹐通常下晝兩點幾就要口水禧瞓晏覺﹐黃昏就同朋友一家出去食飯。咁樣某人就唔會因為眼瞓而大鬧餐廳﹐搞串個party﹗
夜晚我哋去咗食日本野喎﹐其實唔知邊忽似日本野……
有個叔叔企喺個爐前面一路同你吹水一路搞下D花臣野攞D刀叉敲枱敲凳噴下火咁。
呢招叫做火山爆發……
火山爆發呢招係我家嘅家常便飯喇﹐噴得重勁過呢個﹗
