Maui 2011 – V(6/21) 續 – 口水禧日記

上回講到大家喺街 lam 雪糕 lam 得好開心之際 ﹐ 望到對面街有間野門口有個牌寫晒 D 水上活動嘅價錢。一睇不禁嘩嘩聲成頭問號 ﹖ ﹖ ﹖ 點解 ﹖ 點解 ﹖ 點解 ﹖ 點解會咁平嘅 ﹖ 例如喺網上睇到海上降落傘 “parasailing” 要 USD65 一個人 ﹐ 但嗰 D 街鋪又會寫住 USD7 一個人咁平架呢 ﹖ 個價真係超級差天共地得好離譜喎 ﹗ 於是喺八啩嘅心理驅使之下 ﹐ 我哋就一人 lam 住個甜筒走入去問個究竟。

唔問尤自可 ﹐ 原來係個局嚟嘅 ﹗ 呢 D 所謂嘅階街鋪之所以可以攞到特價 ﹐ 係因為佢哋會要求 D 客人去一 D新起嘅酒店聽下有關購買酒店套房嘅講座 ﹐ 即係好似我朋友住緊呢種要 time sharing 嘅野。一般都要幾萬蚊美金再加每年 USD2000 維修費用 ﹐ 咁客人就可以一世都享用該酒店嘅套房服務。不過叫得做 time sharing﹐ 即係你只可以每年揀一個禮拜嚟住間酒店 ﹐ 並唔係你鍾意幾時就幾時嚟住返一頭半個月嗰種 ﹗ 聽朋友講話好似父母埋咗單嘅話 ﹐ 個業權都會繼續由子女承繼嘅。唔鍾意可以透過酒店賣返出去都得。

而家 Maui 好多呢類渡假屋型式嘅酒店都不停咁招緊新客 ﹐ 於是呢 D 酒店就同 D 街鋪聯手氹 D 人去聽講座 ﹐ 其實即係「月黑風高殺人夜」 ﹐ 個營業員會盡力咁喺你荷包夾你張信用卡出嚟同佢買返個單位。所以咁樣每介紹到一個人去聽講座 ﹐ 嗰 D 街鋪應該係有回佣收嘅 ﹐ 唔怪之得幾咁落力叫我哋去聽 ﹐ 見我哋話想帶個細路去坐潛艇又話又特價。但講嚟講去 ﹐ 即使你落咗搭去咗聽講座 ﹐ 嗰個 USD7嘅海上降落傘都唔係真嘅 ﹐ 根本就無咁平 ﹐ 只可能係比正價平少少。車 ﹗

嘩 ﹐ 入咗去都好難出返嚟 ﹐ 結果我哋死都話要問下朋友呢幾日有咩行程先再決定兼夾趕住帶口水禧去坐火車 ﹐ 嗰個女人先好唔願意咁放我哋走咋 ﹐ 幾險呀 ﹗ 真係如果扯住人對腳唔會比人告非禮 ﹐ 睇怕我哋兩對腳比人落咗水泥黐咗喺嗰間鋪頭裡面喇 ﹗

不過咁 ﹐ 如果真有興趣想買返間酒店套房嚟嚮受下 ﹐ 可以即接同酒店斟嘅 ﹐ 只要你表示有興趣想攞 D 資料 ﹐ 包保有大把人飛出嚟好好招呼你 ﹗ 唔洗去揾街鋪嘅 ﹗

脫離咗黑店嘅魔掌之後 ﹐ 我哋三個就走咗去搭 Sugar Cane Train。其實都係陪口水禧搭架啫 ﹐ 十個男仔 ﹐ 九個半都迷火車 ﹐ 有架咁得意嘅點可以唔去搭下呢 ﹗

三條友合共六十幾蚊 ﹐ 玩大約一粒幾鐘。佢係沿住 Lahaina市咁行下比你睇下附近嘅風景咁喇。對小朋友嚟講 ﹐ 應該係幾好玩嘅。平時喺 D 公園坐嗰 D 好蚊型 ﹐ 呢架大好多。而且個車頭會噴蒸汽又會好似火車咁發出烏烏聲 ﹐ 同 Thomas 差唔多。

我完全唔明點解我喺相入面可以肥成咁 ﹗

夏威夷好多日本人 ﹐ 所以周圍都可以見到日文。

初頭重以為係比中國人睇 ﹐ 後來醒起係比日本人睇就真。

口水禧呢期咁啱又迷返 Thomas﹐ 所以見到架火車竟然自動叫我影佢同架火車。如果唔係比面架火車 ﹐ 條友家陣好難會咁企定定比你影喇 ﹗ 你睇我其他嗰 D 相唔係偷影就係吼佢唔覺意嗰陣影 ﹐ R 腰又趴地咁先影到 ﹐ 扮晒大明星唔比人影咁款 ﹗ 超 ﹗

後面嗰個山其實係好鬼高大嘅 ﹐ D 山脈有 D 似恐龍爪咁。所以聽講侏羅紀有幾幕係喺度實地取景架喎 ﹗ 你喺套戲入面見到由好高影落去成座荒山野嶺嗰 D 就係喺度拍架喇。陰公 ﹐ 侏羅紀 ﹐ 咁多年前 ﹐ 唔知而家 D 後生知唔知我講乜呢 ﹗

唔知行乜野運 ﹐ 隔離嗰件竟然咁比面 ﹗ 其實前幾張係令轉面架 ﹐ 比我兇兩野先肯望下鏡頭咋 ﹗ 頂佢 ﹗

成架火車除咗我哋三個 ﹐ 重有隔離位有兩母女係亞洲人 ﹐ 聽佢哋對話好似係日本人。個細路女好搞笑 ﹐ 竟然攞佢呀媽部相機叫我哋唔好郁﹐ 比佢同我哋影相。於是佢呀媽就問我哋洗唔洗用返我哋部機幫我哋影。影完禮尚往來就更係要幫返人哋兩母女應影喇。

我覺得我個頭已經圓到同一粒魚蛋無乜分別 ﹐ 分分鐘係圓過粒魚蛋添 ﹗ 問你怕未 ﹗

梗係唔知比我昆咗 D 乜野先肯咁合作喇 ﹗

沿路先經過一 D 新樓地盤 ﹐ 然後係民居。我哋離開個站之後就經過 D 普通民居 ﹐ D 屋真係好殘 ﹐ 間間都舊到好似就離散咁。然後個後園成個垃圾崗咁 ﹐ 雜草叢生 ﹐ 亂七八糟 ﹐ 一片黃泥地無乜點打理。又多雜物 ﹐ 間屋嘅窗有 D 連玻璃都爛咗 ﹐ 是但揾 D 野封住就算。

但係再行遠少少 ﹐ 望上半山 ﹐ 你會見到成大塊哥爾夫球場嘅綠色草地 ﹐ 遠少少會見到 D 大屋好鬼靚好鬼新 ﹗ 記得以前嚟嗰陣聽導遊講話嗰 D 山上嘅大屋閒閒哋郁下都過幾百萬美金 ﹐ 向海嘅獨立屋直情唔知咩人先買得起咁貴 ﹗基本上有錢嘅多數係白人 ﹐ 而嗰 D polynesian (波里尼西亞人﹐ 生活喺中或南太平洋千個島嶼上) 通常都係勞動階層。你會睇到富有嘅人去窮少少嘅地方居住 ﹐生活方式各樣都同當地人產生好大嘅對比。係好定唔好 ﹐ 我唔識分 ﹐ 或者對嗰 D 本土人嚟講都未嘗唔係好事 ﹐ D 野可以賣貴 D﹐ 還掂你班有錢佬都唔自在嘅。多遊客帶旺旅遊業變咗製造就業機會等等。不過我係覺得好大對比而已 ﹗

其實沿途都有個導遊呀叔一路行一路介紹四圍嘅風景同 Maui 嘅背景 ﹐ 但由於架火車太嘈 ﹐ 所以我根本聽唔到佢講乜。淨係聽到少少有關海嘯唔知邊一年發生過咁。

所以我估計佢有講過呢個 sugar cane train 以前可能曾經係運作過嘅。相入面睇到嘅舊火車同設施應該都係以前用落嘅野 ﹐ 家下變晒遊客參觀用。

你話 D 男仔見到呢 D 火車野點會唔發顛吖 ﹗

呢個係拖住我哋幾卡車嘅火車頭。行到終點嗰陣走咗去。原來係去咗調頭。事關條路軌係無 U turn 比佢調頭嘅 ﹐ 於是去到終點嘅時候 ﹐ 架火車頭就會甩開原本拉住嗰卡車 ﹐ 自己走去第二條路軌自己調頭 ﹐ 然後走返嚟本來屬於車尾嗰卡車嘅前面扣住嗰架野 ﹐ 咁就可以拖返我哋返去架喇。即係本來你向前面行 ﹐ 回程嘅時候你會變咗坐倒頭車咁解囉。