Maui 2011 – VI(6/22) – 口水禧日記

星期三 ﹐ 已經開始有 D 快樂不知時日過嘅症狀 ﹐ 開始「唔記得今日係星期幾嗰隻 ﹗ 朝早起身決定去 Kihei揾食。由我哋住嗰樹去 Kihei﹐ 揸車大約四十分鐘 ﹐ 事關 Maui呢度 D高速公路唔係真係咁高速 ﹐ 得 45mph﹐ 差唔多等如我哋喺 SF 行 local 差唔多 (係 ﹐ 講緊超速嘅話 …..正確嚟講應該係 35mph﹐ 視乎邊區 )

去到目的地啱啱好對面有個停車場 ﹐ 重要唔洗錢添 ﹐ 泊好車過對面就係喇。

呢 D 地茂食店同遊客區嗰 D 靚靚裝修嘅餐廳真係差好遠架 ﹐ 接受唔到去咁核突嘅地茂食野 ﹐ 就只有去靚嗰 D 食貴野。當然 ﹐ 食物嘅質素正常嚟講應該係好過呢 D 地茂嘅。

呢間 Kihei Cafe 入到去要先 order 野食 ﹐ 然後先去揾位坐嘅。順帶一提 ﹐ 有 D 地茂係要客人比現金嘅 ﹐ 靚嗰 D 梗係可以錄卡喇 ﹗

我最驚就係用呢 D 黑板寫到密密麻麻有咩食架喇 ﹐ 一來近視加散光 ﹐ 二來真係無乜心機睇咁多字。比個餐牌我重好喇 ﹗

不過電車公禧爸喺網上睇人食評嗰陣已經睇咗 D 人有乜好介紹 ﹐ 而我同口水禧亦都心中有數知道自己想食乜 ﹐ 所以個牌唔多洗望就已經可以落 order。

呢個茂利去到邊都係 pancake。

唔洗為咗塊 pancake 搞到個樣咁詼諧喇 ﹗

比咗錢就唔該稍移玉步出去露天茶座自己揾位喇 ﹗ 非常有離島或者西貢 feel。呢度最好嘅一個地方就係當你坐喺有瓦遮頭嘅地方之時 ﹐ 你係唔會覺得好熱嘅。唔會話好涼 ﹐ 但嗰種程度係可以接受嘅。嗰日外面係華氏八十幾度 ﹐ 即係攝氏三十三 ﹑ 四咁上下 ﹐ 坐喺街邊食野都 OK﹐ 雖然間唔中要聞下 D 車嘅廢氣同趕下烏蠅。我估可能同路邊種咗大樹有關 ﹐ D 樹遮咗 D 太陽 ﹐ 隔走咗 D 熱氣 ﹐ 所以就算無冷氣風扇坐室外都唔會有汗 ﹐ 除非你好似口水禧咁個羅友有野咬咁周身郁四圍騰 ﹐ 咁就包你去到邊都變狐仙都得喇 ﹗

對面馬路行出 D 就係海灘喇 ﹐ 所以成日都會有著住泳衣或者打大赤肋嘅人喺街行嚟行去甚至入食店食野。所以你話我身邊嗰兩位男士係食得幾咁開胃呢 ﹗ 我開唔開胃﹖ 我係良家婦女嚟架嘛 ﹐ 點會四圍「目及」仔架啫 ﹗ (戴住黑超嗰陣就唔知喇 ……學檸檬話齋 ﹐ 戴咗黑超就無人知我講真定假喇 ﹗ 有「目及」>>﹖ 無「目及」>> ﹖ 喪「目及」>> ﹖ 我自己都唔知 ﹐ 隔離嗰個點知 ﹗

唔怪之得佢幾乎想入室內嗰陣都戴住黑超喇 ﹗ 我明喇 ﹗ 個樣就向住我笑 ﹐ 好似聽緊我講野咁 ﹐ 其實對眼就 ……

重唔比我「大碌篤爆」 ﹗

地茂食店係唔講 D 傢私互相之間襯唔襯 ﹐ 所以更加有住家 feel囉 ﹗ 呢個位啱晒古先生坐 ﹐ 咁唔洗特登走去曬太陽燈 ﹐ 重可以一路食飯一路曬 ﹐ 慳返唔少時間 ﹗

等野食期間被佢發現附近有間鋪頭門外有對長頸鹿 ﹐ 叫我幫佢同對長頸鹿影相。拿 ﹗ 呢 D 佢自己想影嘅相呢 ﹐ 佢係會好歡容咁任影嘅 ﹐ 佢無興趣嗰 D 呢副面口唔係咁好樣架囉。

睇下佢 ﹐ 為咗對長頸鹿搞到自己幾咁「霎熟」 ﹗

有個茂利話睇咗網上 D 人讚呢個炒飯好食 ﹐ 於是就跟住叫喇 ﹐ 點知 ……炒飯係要用隔夜飯先夠乾身架嘛 ﹐ 呢碟野比某人形容為得個樣靚 ﹐ D 飯好爛。食咗半碟放棄。其實望見隔離枱嗰碟重食淨更大碟都知唔慌好野 ﹗

其實睇網上嘅食評要小心 ﹐ 外國人同亞洲人 (甚至係中國人 )嘅口味有時真係差好遠 ﹗ 有 D 野外國人可能覺得頂瓜瓜 ﹐ 但對我哋中國人嚟得個甜字。換轉我哋食蝦醬通菜嗰陣 ﹐ 隔離 D 外國人可能個個掩住個鼻以為我哋食緊 X 咁臭嘅野架 ﹗

另外一條茂利食咗幾日 egg benedict 都仍然繼續食 ﹐ 懶得再叫其他野。不過呢個 egg benedict 太重芝士 ﹐ 完全無 dijon mustard味或其他野 ﹐ 一味得個芝士 ﹐ 重要一大劈咁淋到成碟都係 ﹐ 望見就覺得飽咗八成 ﹗ D 薯仔多到食完之後飽到年尾咁濟 ﹗

pancake 王嘅 bear bear熊 pancake。我而家驚緊佢返到屋企要我整熊人 pancake 比佢 ﹗

落力地搽牛油落糖漿 ﹐ 然後靜靜地一野食晒成碟大過佢塊面嘅 pancake﹗

其實基本上我哋呢幾日每日都係食兩餐正餐架咋 ﹗ (咁慳 ﹖ ) 起身去食野已經十點幾十一點 ﹐ 食完個咁勁嘅早餐 (或者直頭可以當午餐 ) 已經差唔多一點。返去酒店之後佢兩個掛住去跳海 ﹐ 我就喺酒店房嘆下 ﹐ 到晚飯時間有時個肚都重未覺肚餓架 ﹗ 不過除咗呢兩餐正餐 ﹐ 我哋食好多西瓜嘅 ﹐ 夠飽有餘喇 ﹗

食完野就諗住去附近 D 市場行下睇下乜野紀念品。

喺朋友屋企食過一次 ﹐ 有菠蘿同椰子味嘅 pancake。都幾好食 ﹐ 所以買包嚟試下喇 ﹐ 睇下可唔可以自己第時學整。

Maui好多木雕嘅製成品賣。三件野 USD12。右邊嗰塊野係書簽。中間係口水禧嘅磁石龜仔。

係 ﹐ 你無睇錯 ﹐ 我連植物都有買。左邊棵野種喺一舊 lava rock(岩石 ﹖ )上面 ﹐ 話舊石係唔知邊座山上嚟架喎 ﹐ 係經唔知嗰座山神開光保佑嘅幸運之石 ﹐ 乜都好喇 ﹐ 我睇中佢棵野咁過癮喺舊石上面咋大佬 ﹗ 當然 ﹐ 如果為我哋帶嚟好運嘅話 ﹐ 我絕對唔介意架 ﹗

右邊三條野﹐ 聽禧婆婆叫佢做雞蛋花 ﹐ 喺 Maui係可以種到成棵樹咁 ﹐ 周街都有。不過我哋嗰度天氣應該唔可以將佢隊去室外種喇 ﹐ 因為佢頂唔到太凍嘅天氣。唔緊要 ﹐ 入屋我都唔驅架 ﹗ 以前禧婆婆有幾棵喺我屋企 ﹐ 但我無打理好 ﹐ 結果當然係神早就埋咗單升咗天喇 ﹗

跌夠錢之後 ﹐ 我哋就返咗去酒店。當嗰兩件蛋散落咗去跳海之後 ﹐ 我諗諗下不如都落去襯下熱鬧喇 ﹐ 還掂嚟咁多日都無游過水曬過太陽 ﹐ 點叫做嚟過夏威夷呢 ﹗

好 ﹐ 我就捨命陪君子 ﹐ 搽好太陽油換好泳衣就出發。點知 ……

鬼整佢個海呀 ﹐ 咁 Q大浪嘅 ﹗ 一個大浪有時有成個口水禧咁高兜頭潑埋嚟 ﹐ 人都坐唔穩 ﹐ 個羅友同對大脾先慘 ﹐ 磨住 D 沙咁比 D 浪撞上個沙灘時磨一野 ﹐ 到 D 浪落返海嗰陣個人又比 D 浪捲返落海又磨多一野 ﹐ 嘩頂 ﹗ 家陣去海灘做屁股磨沙 spa咩我 ﹖ 痛到我吖 ﹗ 但咁都未夠慘 ﹐ 重有一口都係沙 ﹐ 因為 D 浪潑埋嚟嗰陣擘大咗個口講「嘩 ﹗」就係咁 ﹐ 海水連埋 D 沙一齊入晒個口度。我個頭就唔洗講喇 ﹐ 成頭 D 沙好似人哋有頭皮有到落大風雪咁款 ﹗

重有再慘 D 嘅事 ﹐ 唉 ﹗ 當你享受緊呢個天然嘅屁股磨沙 spa之時 ﹐ D 浪除咗大力到推郁你個人搞到四腳朝天又好 ﹐ 反轉再反轉又好 ﹐ 你點都要睇實你條泳衣帶 ﹐ 著比肩尼嘅就睇實埋你兩個 cup喇 ﹐ 分分鐘 D 浪走晒 ﹐ 你坐喺 D 沙上面嗰陣係露晒點 ﹐ 大家望住你架 ﹗

我 ﹐ 當然係無著比肩尼喇 ﹐ 只係傳統老土呀媽型一件頭泳衣 ﹐ 但係無論係一件頭又好 ﹐ 幾多件頭都好喇 ﹐ 你泳褲入面係可以有無盡咁多沙同時唔單止幫你做緊 pat pat 磨沙 spa﹐ 重有邊度都做 spa﹖ 自己諗下喇 ﹐ 我淨係行返房嘅時候已經要磨住沙咁行 ﹐ 沖涼嗰陣就幾乎磨沙磨到周身無老泥 ﹐ 唔好講某 D 位清洗 D 沙粒時係幾咁麻煩 ﹗

除咗磨沙之外 ﹐ 由於 D浪真係好大力 ﹐ 捲上岸捲返落海 ﹐ 你條泳褲分分鐘係可以變咗條 T-back嘅。我就試過半 T-back咁磨住沙被捲落海喇。玩咗幾野真係頂唔順 ﹐ 口水禧連個潛水鏡都送埋比個海添 ﹗ 到佢哋轉戰去泳池之時 ﹐ 我真係頂唔順坐住泡沙喺下身 ﹐ 拿拿林走返房沖涼。

一除件泳衣 ﹐ 覺得自己成個「流沙湯圓」一樣 ﹐ 身上面由沙灘黐返酒店房嘅沙多到有大半個企缸個底 ﹐ 沖又沖唔走 ﹐ 吸又吸唔到 (因為太濕 ﹐ 係隔咗幾日都仍然係濕嘅 ﹗ )﹐ 最後老笠人哋 house keeping把掃把搞掂咗 ﹗ 自嗰次之後 ﹐ 去沙灘都係咪搞我喇 ﹐ D 善後功夫真係煩到爆炸呀 ﹗