Maui 2011 – VII(6/23) – 口水禧日記

前一晚佢哋好早就瞓 ﹐ 因為我哋廿三號會跟朋友上火山 ﹐ 由酒店揸車要兩個鐘頭 ﹐ 所以要抖夠精神先可以出發。點知 ……

一路瞓一路比口水禧伸幾腳煎幾巴就預咗架喇 ﹐ 朝早四點幾五點個電話響起 ﹐ 原來喺三藩市嘅朋友打嚟 ﹐ 佢唔知 Maui係慢三藩市三個鐘頭 ﹐ 所以佢唔知我接電話嘅時候係朝早五點。聽完個電話重瞓鬼得返咩 ﹐ 結果係臨到鬧鐘就響前半個鐘先嚟有少少睡意 ﹐ 但係夠鐘都一定要起身架喇 ﹗

拿 ﹗ 「總司令」嘅功架就係呢 D喇 ﹐ 睇真下喇 ﹗

佢話我成日話佢似 X 哥係等如網上欺凌佢喎 ﹗ 咁叫佢總司令會唔會覺得好 D 呢 ﹖

睇下佢食得幾咁滋味 ﹗

住咗幾日 ﹐ 我已經開始手痕想吸塵抹野 ﹐ 睇見間房垃圾崗咁實在係周身唔聚財咁。個廁所 D 用過嘅毛巾簡直係慘不忍睹 ﹐ 好在就快返屋企啫 ﹗ (Time sharing嘅酒店係唔會日日嚟清你間房 ﹐ 只會一個星期嚟同你換下床單同毛巾 ﹐ 執下張床 ﹐ 其實有無換床單我係唔清楚嘅。除咗呢 D 野之外就無架喇 ﹐ 唔會同你抹下枱洗下廁所架。 )

又拖喼 ﹖ 係呀 ﹐ 火山上係無餐廳架 ﹐ 要自己帶野食上去野餐。又要帶水 ﹐ 又要帶食物 ﹐ 外套長褲等等 ﹐ 唔拖個喼真係唔知揾咩裝咁多野好。

同朋友約好去附近超市等 ﹐ 因為我唔夠瞓 ﹐ 驚一陣上火山時萬一頭痛就乜都唔洗睇 ﹐ 尤其係偏頭痛發作就大獲喇 ﹐ 所以諗住去買杯咖啡飲下打個底。

路上遇見呢位改裝架單車為電單車嘅人兄 ﹐ 果然係一部電。單。車。呀下 ﹗

近 D 睇真係成架單車咁架 ﹗ 不過呢度無論係真電單車又好 ﹐ 電。單。車。都好喇 ﹐ D 人唔戴頭盔都唔覺有警察抄牌架喎 ﹗ 所以有時喺街上面望見 D 人同周圍嘅環境都覺得好有南亞 feel。

一邊飲野一邊等朋友。佢哋要去超市買三文治攞上去火山食。我哋就由總司令煎好咗 D 香腸 ﹐ 一陣喺火山食熱狗。人上火山參觀 ﹐ 我唔止參觀 ﹐ 重喺火山食熱狗 ﹐ 係咪有 D 羅友痕 ﹖

而家嘅口水禧去親邊度都特別手多腳多。見野就用手去搞下 ﹐ 幾乎地下有劈 X 佢覺得得意嘅話都會伸手去篤 ﹗ 次次叫佢唔好搞 ﹐ 佢一定即刻搞。打唔爛嘅都好 D﹐ 最怕佢去搞人哋打得爛嗰 D 野 ﹐ 因為以佢嘅能力 ﹐ 一定可以喺一分鐘之內跌落地下打爛嘅 ﹗

見到呢堆熊仔都無咁驚 ﹐ 跌落地都唔爛先喇。通常玩完都一定要佢執返好 ﹐ 喺外國嘅店鋪 (除咗賣貴重野如珠寶店嗰 D 直頭唔會入去喇 )通常對小朋友都好仁慈嘅 ﹐ 只要你個細路唔太過份做 D 破壞性嘅野的話 ﹐ 人哋都唔會野野窒住晒 ﹐ 叫你唔係幫襯就唔好搞咁小器。如果有 D 野真係唔想小朋友掂嘅話 ﹐ 多數都有張卡喺度寫明叫家長小心唔好比小朋友掂 ﹐ 咁身為家長就要自己識做喇。

呢隻熊仔係夏威夷嘅 starbucks先有架 ﹐ 有人見到即刻抱上手話要同佢影相。唔知點解 ﹐ 嚟咗幾日覺得佢個樣唔同咗 ﹐ 呢張相望落都唔知似邊個。

佢話 D 熊仔係咁嘅樣架喎 ﹗ (有咩 ﹖ 人哋幾時變咗 angelina jolie 呀 ﹖ )不過而家對佢嚟講 ﹐ 個嘴形一 o都出嚟 ﹐ 佢就話人哋個嘴係咁樣 ﹐ 雀仔呀 ﹑ 長頸鹿呀 ﹑ 羊呀﹑ 魚呀個個都係咁嘅嘴喎 ﹗

)

又係夏威夷獨有嘅水樽

買好晒野上返車就開始兩個鐘頭嘅長征去火山喇。沿路都有好多田地種咗 D 唔知係咪蔗嘅農作物 ﹐ 望落對眼都好 C 服 ﹐ 總好過望石屎森林喇 ﹐ 係咪 ﹖

瞓唔夠又容易暈車浪嘅我攤喺後座瞓到上咗火山先醒。

Haleakala National Park 入場費盛惠每車 USD10﹐ 超抵 ﹗

我哋已經喺六千七百尺嘅山上面喇喂 ﹗ 但係都重未算最高呀 ﹗ 門口嚟架咋老細 ﹐ 入咗場重有大把路再上高 D 架 ﹗

呢度若莫係七千尺 ﹗ 已經高過 D 雲海架喇 ﹗

七千尺上的午餐。除咗飛機餐會喺咁高度食之外 ﹐ 重有乜野機會咁食午餐吖 ﹖

我地幾兜友喺度一邊嘆熱狗或三文治 ﹐ 一邊嘆靚景 ﹗ 有乜咁靚 ﹖ 當 D 雲飄走咗露出藍色嘅天 ﹐ 遠望無盡嘅山頭 ﹐ 即刻都覺得個心胸都廣闊咗 (唔係升 cup呀下 ﹗ 唔好亂諗 ﹗ )﹐ 嗰度又靜又乾淨 ﹐ 吸啖氣都寧舍醒神喇 ﹗

睇下 ﹗ D 雲散開之後個天幾靚 ﹗ 雖然嗰度都好曬下 ﹐ 不過室外溫度其實得六十幾架咋 ﹐ 所以上去火山記得帶外套 ﹐ 小朋友就最好帶埋長褲。重有就係太陽眼鏡或者帽 ﹐ 因為再上高 D嘅時候 ﹐ 直頭會高過 D雲 ﹐ 無雲就覺得特別曬架喇 ﹗

食完野可以去附近嘅遊客中心行下 ﹐ 裡面有好多介紹呢個火山嘅資料同歷史。

呢張黑白相入面係 D 當年上呢度起路嘅工人 ﹐ 當中我諗都唔少嚟自中國﹐ 比人賣豬仔嚟美國嘅海外華工 ﹐ 咁高嘅山﹐ 睇怕都唔知整瓜咗幾多工人喇 ﹗

重有 D 相係影低以前 D 人點上呢個山 ﹐ 原來係騎馬上去架 ﹗ 有 D人重會喺度紮營過夜 (1900年 )﹐ 過咗幾廿年之後 (1930年 )就有 D 旅館比人投宿 ﹐ 當時一間房都有幾張碌架床比人瞓。

口水禧身後就係瀕臨絕種嘅動物 ﹐ 叫 nene (個 “e”字上面有一劃 ﹐ 不過南極星出唔隻字 )。喺呢個火山上面都唔係淨返好多隻架咋 ﹗ (喺中國睇怕已經攞晒去做燒鵝喇 ﹗ )

驟眼望落其實同我哋平時喺湖邊見到嗰 D 鵝差唔多樣之嘛。不過呢 D 可以頂到喺咁高嘅山上生活 ﹐ 應該都係幾罕有嘅品種。不過今次嚟到淨係見到呢個標本咋 ﹐ 真嘅半隻都無見過喎。

口水禧同佢老豆玩影相成日都影到 D 好怪又搞笑嘅情景出嚟。例如呢張我一睇到就忍唔到笑喇 ﹗ 一係企前 D 影埋半身 ﹐ 一係企第二個位影 ﹐ 唔知點解佢哋要咁樣影 ﹐ 搞到好似口水禧挨住隻頻臨絕種嘅 nene 咁﹐ 好搞野 ﹗

呢棵野睇怕都好少見喇啩 ﹗ 又係話好罕有 ﹐ 就嚟摺埋嘅品種喎。

遊客中心門口有一棵真嘅 ﹐ 不過睇嚟已經升咗天咁嘅樣。聽朋友講前幾年嚟嗰陣 ﹐ 呢棵野係好似上面張相入面嗰棵咁嘅樣架 ﹐ 呢兩年再嚟就變咗咁。睇 D 告示話以前有好多 ﹐ 不過上嚟火山嘅人行埋去企喺棵野隔離影相時踩親佢 D 根 ﹐ 呢 D 植物一被人踩到 D 根就會被破壞 ﹐ 嚴重嘅會死。所以火山上嘅遊客係要行特定嘅路線而唔可以擅自踩落 D 泥土度 ﹐ 企喺棵植物隔離影相架 ﹗

不過唔洗驚以後無得再睇呢棵野 ﹐ 事關側邊都重有幾棵 BB喺度 ﹐ 有一棵重出緊花 ﹐ 生大 D 高 D 嘅話 ﹐ 就會好似 postcard入面嗰棵咁靚架喇 ﹗

就咁睇 ﹐ 你會以為佢係白色 ﹐ 其實係銀色嚟架 ﹗ 因為火山上嘅太陽太強勁 ﹐ 日日咁曬法真係唔掂 ﹐ 所以棵野自己有層銀色嘅野保護自己唔洗食咁多太陽嘅輻射。

有時大自然嘅野真係你估佢唔到 ﹐ 更加係吹佢唔脹 ﹐ 望住佢哋 ﹐ 你只有感到喺佢哋面前 ﹐ 人類其實都係好豆泥架咋 ﹗

呢度應該係八千尺高喇 ﹗

口水禧成日話想飛上天去 D 雲度 ﹐ 嚟度呢樹 ﹐ 已經係高過晒 D 雲喇 ﹗ 幾架勢 ﹗

騰雲架霧就係咁 ﹐ 同搭飛機時喺窗口向外望爭好遠架 ﹗

咪以為八千尺已經係最高喎 ﹐ 重有得上架大佬 ﹗ 之前幾日已經喺網上睇過少少資料 ﹐ 因為都要睇下口水禧咁細可唔可以上咁高嘅山 ﹐ 驚佢有高山症。拿 ﹐ 網上話架咋 ﹐ 我唔係專家真係唔知真唔真架。網上面嘅人講話正常嚟講 ﹐ 小朋友 (無講幾多歲 ) 上七千尺係無問題嘅 ﹐ 高過七千就要視乎小朋友嘅身體反應。如果發現小朋友有呼吸困難 ﹑ 頭痛 ﹐ 甚至係想嘔呀頭暈呀咁呢 ﹐ 就要帶返佢落山。

我哋一路上嘅時候已經問住口水禧有無頭痛 ﹑ 頭暈 ﹑ 作嘔任何唔 C 服 ﹐ 佢囂到咁樣答話 ﹕ 「我完全無問題喎 ﹗ 」好喇 ﹐ 唯有叫佢如果有唔舒服就要即刻同我哋講 ﹐ 千其唔好死忍呀 ﹗ 當然重要略略解下乜野係高山症比佢知喇 ﹐ 如果唔係﹐ 佢會以為我昆佢唔比佢上火山 ﹐ 一陣真係死忍爛忍﹐ 頭痛都唔出聲咪弊 ﹗