Maui 2011 – VIII & IX(6/24&25)

之所以將24同25號兩日黐埋一個blog寫係因為24號嗰日都無乜特別活動﹐都係例牌嘅食同玩。朝早起身本來想去試間新野﹐點知行錯路再加門口嘅長籠﹐嚇到三條友都係走返去食地茂算喇﹗嗰條人籠閑閑哋都要等成粒鐘咁上下﹐真係等得嚟個肚都唔見咗﹗

front夾dickenson嘅地茂Sunrise cafe已經成為咗我哋早餐嘅落腳點﹐價簾物美(我哋嘅standard嚟講喇)﹐食得飽肚時又坐得舒服﹐雖然係無幾粒星嗰D靚餐廳咁豪裝﹐不過以咁嘅價錢嚟講就真係唔可以要求有靚裝修架喇﹐OK喇﹐都叫做有得聽下海浪聲嚟食早餐﹐唔錯架喇﹗

寫咗咁多篇Maui之旅先發現原來從未post過差唔多每日必食嘅雪糕喎﹗呢個就係連食幾日嘅菠蘿椰子雪糕喇﹐睇下口水禧食到咪晒眼就知佢食得幾滋味喇﹗

因為雪糕鋪啱啱喺正sunrise cafe隔離﹐真係唔行過去買嚟食都覺得好遺憾﹗呢個亦係我哋成日去sunrise cafe嘅其中一個原因﹗

食完雪糕﹐我哋就去咗對面街睇下有無小朋友T-恤﹐通常去一個地方﹐我都想買一件有當地特色或者寫住嗰個地方名嘅衫比口水禧做紀念。殺入去對面ABC store揾到想要嘅野之餘﹐重有D意料之外嘅野賣﹐掃咗少少濕碎野如菠蘿味嘅茶包﹑木刻嘅細兜仔同印有hawaii hello kitty嘅鎖匙扣等等無聊野。

三人買完又返去酒店比嗰兩個盡地一鋪玩埋最後一日嘅沙灘暢泳。兩個曬到舊炭先返上嚟﹐禧爸重曬到條頸皮膚敏感兼額頭甩皮﹐邊個叫佢成日抗拒搽多D太陽油﹐又話立黐黐﹐又話白雪雪﹐總之佢次次都好薄咁求其搽一層野膚衍我就算﹐同佢搽得厚﹐重要比佢柄添﹗呢次佢重唔賴野﹗唔痛都偷笑喇傻佬﹗

夜晚同朋友去咗間叫Sensai嘅日本餐廳食飯﹐質素都係咁喇﹐總之喺Maui唔係咁容易揾到貴得嚟而又真係超好食嘅食肆架咋﹗呢間野重要串到叫人三日前好打電話去訂枱添﹗

返到酒店已經八點幾﹐禧爸同朋友出咗去飲野﹐我同口水禧沖好涼就開始執行李。諗住第二朝上機前再去sunrise食個飽D嘅早餐﹐事關Hawaiian airline提供比客人食嘅飛機餐實在太嚇人﹐如果想食好少少(應該係D味正常少少嘅)就要即時比錢買﹗係﹐你無睇錯﹐佢係寄倉行李逐件計錢﹑飛機上用佢嘅耳筒每個USD5﹑租用佢嘅電子儀器如DVD機嗰每個好似係USD15。要比錢嘅飛機餐都唔多好食﹐唔洗錢嗰D就……

所以我哋諗不如早D起身去食個勁嘅早餐﹐跟住直接去還車同去機場check in﹐時間都唔會好趕﹐重可以避過個嚇人飛機餐添﹗分分鐘重可以食多劑雪糕先上機﹗正﹗

第二朝六點半起床﹐執埋D牙膏牙刷等等朝早要用嘅用品﹐剷埋口水禧起身﹐三條友仔好快就離開酒店。之前同朋友約好喺候機室見喇﹐因為佢哋無我哋咁顛﹐要晨早出去食早餐。所以佢哋遲過我哋出發去機場。

幾驚間野未開門呀﹗好彩大部份美國叫得自己係食早餐嘅餐廳都早到五﹑六點就開門﹐因為D外國人係超早起身架﹗同佢哋鬥早起身﹐我哋呢D夜晚人實輸梗﹗嗰日去到間野﹐入面已經有人喺度鋸緊佢碟早餐嘅炒蛋喇﹗不過我哋都算幾早架喇﹐排第二﹗店員梗係心諗︰「呢三件餓鬼做乜今朝咁早嘅﹖平時太陽曬到頭殼頂先出現架喎﹗」

坐低叫野食﹐幫口水禧pancake大王叫咗全份嘅pancake早餐﹐一共有四塊﹐另外重有少少生果。禧爸叫咗個waffle早餐。我﹖無食到egg benedict喎﹐叫咗碟雞翼同焗薯(你話係咪黐線吖﹐晨早流流食雞翼﹗)

嗌咗野之後四圍影下相。由間食店行出少少(其實係人哋後園)就係海﹐坐喺度食野都咪話唔盞鬼﹗有海風又海浪聲重有……雞翼﹐係咪好襯先﹖

雖然地方簡陋﹐但好奇怪地我同禧爸都鍾意呢度。整定我哋兩條霉燦係唔識欣賞高級餐廳嗰D fine dining架喇﹗

重有呢個吊飾呀﹐點解我唔見D鋪頭有得賣架﹖幾乎想叫人拆落嚟賣比我﹗佢唔係風鈴﹐只係一個掛飾而已。我好鍾意木製嘅裝飾(唔環保﹐我知)。最怕響到隔離街都聽到嘅風鈴﹐大風嘅日子﹐夜晚想瞓得好都難﹗

pancake大王嘅早餐到咗。呢期可能日日游水燒耗體力嚴重﹐佢都幾擦得下﹗差唔多成碟野食晒咁濟﹗我見佢係咁質入口都有D驚佢飽過頭一陣喺飛機同我嘔返晒出嚟就弊喇﹗好彩﹐係佢自己自願食嗰D通常都好少會嘔。

以前試過夾硬迫佢食﹐瞓覺嘅時候同我嘔到一床都係﹐臭到暈﹗張床單重要黐晒D餸喺度﹐掉入洗衣機都洗唔甩﹐要用手執返然後再洗多次先得。發誓以後唔再迫佢食野﹐佢一話﹕「我飽喇」或者「我個肚好脹」﹐即刻請佢離座。如果知佢係特登留肚唔食正餐諗住等生果﹐我會同佢講﹕「我諗你都食唔落生果架喇﹐呢D你都食唔晒咯﹗咁我唔切生果架喇。」咁佢就會好自然咁拿拿臨食咗面前嘅野﹐然後叫你切生果。如果佢都堅持唔食﹐咁即係真係飽到嘔咁濟﹐千其唔好迫佢食埋佢﹐除非你想聞佢D嘔吐物﹗

禧爸嘅唔知咩Belgium waffle bla bla bla加辣腸﹐佢個waffle係第二次食架喇﹐佢話好食喎﹗唔食甜野嘅人都話好食﹐我諗應該唔會差得去邊啩。

呢個焗薯我好想學整﹐初初以為係炸嘅﹐後來睇真D個menu先知係焗。不過唔知用乜野醃料整呢。又無睇清楚個名﹐想喺網上揾個整法都唔得喇。

呢個雞翼嘅特別之處係肉地一D都唔乾﹐完全唔明點解炸出嚟嘅會有咁嘅效果﹗通常出面食嘅buffalo wings都比人炸到乾過我個荷包﹐但呢個唔會﹐我同X哥懷疑係先用水「霎」然後再係咁二炸下。(如有高手知點解﹐請指點下迷津﹗唔該﹗)

食完出去影多兩幅條街﹐乜X鋪頭都未開門。同夜晚周街都係人差好遠。

雪糕店嘅老細呀﹐朝早都會有人想食雪糕架﹐你早D開門做生意得唔得呀﹖

無雪糕食﹐只可以喺回憶入面回味喇。三條友去還車再搭接駁巴士去機場。搞完晒野掉低個大喼去寄倉(唔知會唔會又唔見咗佢﹗)都成身汗咁濟﹗

去到候機室成棚人坐晒喺度等上機

記得細個喺啟德機場個餐廳都可以喺個大落地玻璃望出個停機坪睇飛機。廿幾三十年後﹐如今係我肚裡面出嚟嗰個喺我面前同佢老豆趴喺玻璃度睇飛機﹐成個畫面都幾得意。當日睇飛機嗰件家下變咗肥思奶﹐懶洋洋坐喺凳上睇書同偷影嗰兩件蛋散。

小蛋散話﹕媽媽﹐我揸飛機載你去買野吖。去safeway同costco。(咁近都要搭飛機﹖你老豆唔係姓李架喎﹗)

真係勢估唔到﹐返到三藩市都繼續黑仔﹐落咗機先醒起我同禧爸個袋漏咗喺飛機上面﹐D銀包證件全部喺飛機度﹐只係踏出咗個機門幾步﹐已經已經返唔到入去飛機度﹐我諗係安全理由啩﹐所以漏咗野嘅人係要企喺架機出面等入面嘅服務員攞出嚟比你嘅。

攞返D野﹐拿拿臨去攞寄倉行李喇﹐人人都攞晒喼﹐我哋都攞咗﹐不過至弊今云係唔見咗個寄倉booster呢﹗又係成條行李輸送帶都無晒野﹐淨返我哋幾條友喺度﹐其他人散晒水嗰隻。後來有條友唔知喺邊度攞返個booster比返我哋。

好喇﹐攞齊晒野﹐搭返巴士去停車場攞車。落咗巴士﹐人人認領返D喼﹐個個散晒水嘅同時﹐地下得返一個手提喼。但係嗰個喼唔係我哋架喎﹗咁我哋嗰個喼呢﹖今次輪到唔見咗個細喼﹗shit!停車場唔見喼重大獲過喺機場唔見喼﹐因為係無得聯絡任何人架嘛﹗心諗︰「唔係咁當黑呀嘩大佬﹗」喺呢個時候﹐我望見遠處有個呀佰拖住個喼仔好熟口面﹐於是禧爸九秒九跑去折住成堆人問有無人攞錯喼﹐當堂個呀佰先知攞錯咗我哋個喼﹐即刻係咁sorry。交換返個喼﹐三人安全去到餐廳﹐朋友一家已經到咗一陣﹐聽見我哋幾乎又唔見喼都笑到口都大埋﹗