報時訊號﹕而家係星期一晚10﹕47。眼皮有D重重哋﹐個腦一如平時一樣戇戇哋
﹐少有地咁早曉眼瞓。皆因今朝天啱啱光就醒﹐攤喺床攤到七點半就真係醒晒﹐再攤到八點幾九點彈起身迎接我新嘅一日。
對於一直都係早睡早起嘅人嚟講﹐我上面嘅如同廢話﹐人哋日日月月年年都係咁架喇﹐有乜咁出奇啫﹖但對於做咗夜貓N年嘅我嚟講就唔同喇﹐都唔知幾耐未試過一點前瞓。(除咗時差嗰陣) 咁夜瞓嘅原因有三份一係天生瞓覺有問題﹑三份一係生咗仔﹑三份一係習慣。開始覺得我有D語無倫次嘅可以轉去其他blog架喇。
我一直都係個會瞓瞓下半夜醒幾次嘅人﹐街外有聲﹑屋企有聲﹑甚至無聲嘅情況下我都自自然然會醒。有時唔好彩醒咗會瞓唔返﹐典嚟典去到差唔多天光先嚟再次眼瞓﹐但可以比我瞓嘅時間已經唔多﹐因為以前要起身返工或者返學。生咗仔之後就係因為個仔起身就要跟住起身架喇。因為咁樣嘅緣故﹐嗰日我成個人都會好似活喺夢幻之中﹐即係發夢咁遊晒魂喇。
有時係瞓上床之後典到頭都暈都重未瞓得著﹐可以由十一點典到半夜兩點都係眼光光望住天花板。即使係日頭明明覺得好眼瞓﹐但嗰晚一樣係瞓唔著嘅。
生咗口水禧之後呢隻半夜自然醒就更加嚴重﹐醒得重多﹐而且係醒咗之後會迫自己落床去睇下件蛋散有無踢被。如果唔起身去睇﹐我個腦就會諗住口水禧喺隔離房凍到縮埋一舊好慘好慘﹐結果都係過唔到自己嗰關﹐死都要爬起身去睇下。所以冬天嘅時候﹐我係喺口水禧間打地鋪﹐因為半夜一坐起身就見到佢有無踢被喇嘛﹐唔洗凍到乜咁重要一晚過幾次房去睇佢。
然後就係之前諗住同佢戒夜片﹐早瞓瞓唔著﹐又怕半夜發顛會唔醒抱唔到佢去廁所或換片(係﹐我有時唔知行咩好運會半夜唔醒嘅)﹐到第二朝就等住接收一張漏咗尿尿嘅床單。於是﹐我將自己瞓覺嘅時間由十二點嘅一點推到半夜兩﹑三點﹐諗住等埋佢去埋廁所我先去瞓。亦都因為咁樣﹐真係會好眼瞓而突然可以一覺瞓到天光﹗wow!
再再因為全日九成時間都比咗個仔同做家務﹐只淨返個夜晚比我﹐於是貪心起上嚟會上網上到四﹑五點先瞓﹐朝早七點幾起身同口水禧返學都係咁話。(得﹐呢個係我究由自取﹐自打一拳﹗
)
咁樣嘅生活過咗好多年。去夏威夷之前﹐因為口水禧放暑假﹐有時重會朝早先瞓﹐搞到成十一﹑二點先起身添﹗
嗰兩件蛋散就九點幾起身等食早餐變咗等食午餐。(得﹐呀婆唔洗鬧﹐我自己再打多自己一拳﹗)
唔知點解去完旅行之後覺得唔好再咁樣嘥時間喇大姐﹗早D起身做野喇﹐夜晚早D瞓喇﹐重後生咩家陣﹐精神上捱到個樣已經捱唔住喇﹗
早瞓嘅話﹐半夜再醒點算﹖
今朝起身後洗好面﹐突然好生性哋去書房吸塵﹐抹好張枱等呀X哥開工開得舒服D。平時佢係對住一枱貓毛直至吸塵大俠出動打救佢為止。X哥今朝唔知有無比我嚇親﹗(可能係以為我顛到晨早流流咁想吸塵﹗)出去淋花﹐鋤泥﹐將尋日喺costco買嘅灌木種落泥地。搞搞下口水禧起咗身﹐我哋一齊食pancake﹐今日新花款呀少爺非常讚賞﹐因為多咗朱古力豆豆同生果喺面。食完洗埋碗都係十一點幾﹐出去再淋埋前園嘅花﹐執下垃圾返入嚟都係三點幾。同佢沖好涼食D生果﹐同呀婆呀公講完電話開始煮飯。夜晚八點半前踢咗佢去瞓﹐因為明天係summer school嘅第一日。
八點半之後就係我自己嘅時間。十一點前眼瞓﹐timing唔錯﹗(希望一陣刷完牙會瞓得著﹐唔洗典到兩點﹗)。
好似咁樣時間見洗好多喎。睇下我維持到幾耐呀下﹗
