嘩哈哈哈哈﹐問你怕未﹗今朝錄得紀錄﹐6:30自動彈起﹐其實之前天未光已經醒醒哋﹐不過聽唔到街外垃圾車倒垃圾嘅聲﹐知道應該係六點都未夠﹐起身都唔知做乜好﹐於是典咗一輪﹐見天光喇﹐垃圾車都出動喇﹐我都係時候出動喇喂﹗
我係咪會繼續咁Q無聊喺度日日報告自己幾點起身﹖報埋今日﹐以後應該唔會喇啩﹐除非係有日失咗手遲咗或者比今朝更早起身喇﹐或者會報下。係﹐我夠晒無聊﹐我知。
照舊都係做嗰D例牌野﹐不過今日唔可以好悠閒咁食早餐喇﹐因為口水禧今日開始返summer school﹐比平時返學重要早十五分鐘。
之所以我想早D起身﹐唔洗搞到返學日日好似倒瀉X咁趕到氣咳都係其中一個原因。重有就係因為想學其他嘅呀媽咁早D起身等第時D同學約playdate朝早去公園玩﹐口水禧都唔洗因為個呀媽晏起身而搞到無得去同同學玩吖嘛﹗(幾咁偉大﹗
)可惜係我呢頭痛改呢個遲瞓遲起嘅壞習慣﹐嗰頭個天呢兩日係咁落雨﹐搞到同學仔都無得約去公園玩lu﹐妖﹗
(唔洗玩得咁大呀嘛個天﹗
)
算﹐我等﹗總有一日個太陽會出返嚟﹐D同學仔都會出返嚟嘅﹗
今日放學之後同口水禧去咗Target一轉﹐比我哋見到呢幾盒野﹐係D用嚟裝飾牆壁嘅卡通貼紙。口水禧鍾意長頸鹿﹑貓頭鷹同埋毛毛蟲﹐順理成章就托咗呢三盒野返屋企。
其實早喺裝修間屋嘅時候﹐我哋特登同佢間房有一面牆油咗深藍色﹐本來係打算整下D nemo貼紙上去幅牆度﹐所以揀深藍色係因為似海。點知買返嚟嗰盒野係要當牆紙咁用水整濕咗再黐上幅牆度﹐我唔敢輕舉妄動呀﹐一陣搞到幅牆濕咗水發mo﹐X哥柄到我開花都似﹗但係佢又唔得閑整喎﹐所以盒野重坐住喺個櫃桶裡面已經第三年喇﹗
今日比我見到呢D貼紙﹐重話可以除返落嚟而又唔會損壞幅牆喎﹐咁梗係好過用水嗰隻喇﹗大家又唔係唔知我係「高手」﹗
係咪好奇怪點解口水禧間房或者我哋屋企無D學英文生字或者中文生字嗰D大型卡紙貼到一屋都係﹐反而貼呢D無聊野呢﹖好簡單﹐因為我哋兩件唔好學囉﹗
純粹係我嘅低能想法咋下﹐屋企有貼嘅家長﹐千其唔好理我講乜﹐你繼續貼喇﹗無﹐我個人唔鍾意嗰D卡黐到周屋係啫﹐無咩特別原因。拿﹐唔好嬲呀﹐話明係我自己個人諗法咋﹗
雖然我無乜藝術天份﹐對手亦都唔靈巧﹐但衰在又好鍾意搞呢D野喎﹗結果搞到好似同口水禧爭嚟玩咁﹐幾樣衰﹗
重有一個更重要嘅原因係﹐因為口水禧張床褥好重﹐次次換床單逗起張床褥嘅時候都會唔小心刮花側邊幅牆﹐久而久之﹐幅牆幾乎比我刮都花過我塊面﹗禧爸由以前見我刮一次就「唉」一次﹐到而家已經麻木。
所以呢D貼紙不但美化口水禧間房﹐重可以遮醜添﹗一物幾用﹐抵唔抵先﹖
重有一個原因係口水禧近來成日扭要我哋陪佢瞓佢間房喎﹐真係撇極都撇唔甩。於是我想試下貼D佢好鍾意嘅野喺佢床邊等佢瞓著之前可以望下﹐分散佢嘅注意力。唔知得唔得架﹐即管試下囉﹐就算呢樣唔得﹐咁起碼都有美化同遮醜嘅作用先喇﹗
貼嘅時候最緊要係……揾咗邊忽係最花li look先﹐一野貼鬼住佢﹐無眼屎乾淨盲﹗
口水禧都好醒﹐問咗我哋貼邊度先貼落去。可能佢都知幅牆比個豬兜呀媽刮得有點花得過份﹗
今日喺target佢見到呢隻野重自己爆咗隻horse字出嚟。不特止﹐今朝我偷睇到佢喺學校同同學仔個呀婆吹水﹐佢同個呀婆講(指住遠處兔仔籠裡面D兔仔話”It’s bunny! Over there!”
circle time嘅時候﹐老師問佢野﹐佢唔會再問我點答而係自己答。雖然有D係亂咁答﹐但係佢個樣好從容笑口筮筮咁答咗幾句添。
好認真嘅師傅
洗完頭無梳﹐係咁上下樣衰架喇﹗將就下喇﹗
嘩﹐今晚強勁﹐五點就食晚飯﹐食完都係六點咁上下。重同禧爸講下個後園D圍欄大家吹咗一輪水﹐洗埋碗沖埋涼都係八點多D咋﹗所以先有時間喺佢瞓之前拆一盒貼紙嚟貼咋。
大功告成﹐某人亦都就嚟眼都擘唔大喇﹗
一個spotlight照喺X哥度﹐總司令嘅街坊裝。
呢張好似拍緊唱片封套﹖
以後就有大把friend陪你喇﹐哥仔﹗
欣賞中……
*********************************
題外話﹕
一向都有腳趾外翻嘅問題﹐我對腳好比一對鳳爪。早排睇過一本書講解腳趾外翻治療法﹐裡面提過腳趾外翻會引起腰酸背痛而患者又未必會察覺兩者嘅關係。最好就梗係做手術切走凸出嚟嘅部份﹐我有個親友早幾個月做咗呢個手術﹐成個月都出唔到街。諗起舊骨比人切咗一忽都覺得有D冷汗喺背脊流﹗
治標唔治本嘅方法有好多﹐其中就係套D野喺隻腳度﹐拉返開隻腳趾公﹐等嗰舊凸出嚟嘅骨唔好再繼續凸落去。
我嘅腰患已經纏擾咗我好耐﹐有時痛到坐都坐唔直﹐真係企又痛坐又痛﹐連行都痛﹗不得已時重要求救於禧爸同我捽兩野﹐然後再熱敷。平時盡量留意自己有無寒背或姿勢唔正確﹐但都係治下標而已。
頭先喺target比我揾到呢樣野﹐可以套喺D腳趾度將十隻腳趾都拉開﹐重好過我喺香港買嗰個淨係笠腳趾公﹐重要個套硬到爆﹐戴住根住瞓唔到。
想睇舊野要比D膽量﹐事關我影嘅時候係套住喺我對腳上面﹐而我對腳確係好恐怖嘅。唔想睇請轉臺﹗
提咗你架喇﹗
拿﹐係你自己唔轉臺架咋﹐唔關我事架﹗
拿﹐好走喇下﹗
拿﹐重唔走喎﹗
拿﹐唔走無機會架喇﹗
走唔走呀家陣﹗
拿﹗
拿﹗
拿﹗
比咗機會你架喇﹗
係你自己攞嚟架﹗
拿﹗
係唔走喇嘛﹖
係喇嘛﹖
好﹗
開嚟見我﹗
十﹗開晒﹗贏咗﹗
