由Maui返嚟之後﹐口水禧愛上pancake+朱古力豆+生果+一杯牛奶。
前日重要多碗紅莓送pancake添﹗
仍然係以前嘅兔仔pancake做主打﹐
最近游水落嚟……呀﹐sorry
應該係游密咗水啫﹐因此食量多咗少少﹐
一塊兔仔已經唔夠佢擦﹐
再加多條毛毛蟲。
我覺得自己就嚟可以喺街邊擺檔賣pancake﹐
順便做埋天才表演﹐
即叫即煎﹐任何圖形﹗
天才嘅意思係…..
可以煎出任何變形變種嘅pancake圖案﹗
絕對與實物不相符嘅境界﹗
呢期暑期班要自己帶茶點。
第一日﹐求其同佢帶咗包餅乾同一條蕉。
發現其他同學帶到成圍枱咁多款野食。
原因係佢哋返學前可能無食早餐﹔
可能淨係飲咗杯奶﹔
可能食得唔夠飽﹐
所以家長質咗好多野食係小朋友個茶點袋度。
呢位人兄﹐
出門前肯定係飽到嘔嘅狀態﹐
所以茶點嘅食量會比其他人少。
不過比下面﹐
都會食少少。
今日放學去咗食In-&-Out。
返到屋企要瞓晏覺﹐
因為傍晚要去學游水。
瞓咗兩粒幾鐘起身﹐
又食。
尋晚整好嘅朱古力brownies﹐
係口水禧嘅飛佛﹗
食過人哋呀媽整嗰D﹐
出口狂言叫我學整喎。
其實我整幾次﹐
但佢食咗都懵然不知﹐因為……
獲獲都整得太乾﹐
所以佢以為自己食緊餅而已。
所以佢嘅記憶裡面﹐
呀媽係無整過brownies嘅。
無錯﹐我應該自我檢討下。
呢個經過佢嘅測試﹐
合格有餘。
帶咗少少返去學校做茶點﹐
佢返嚟話全部食晒﹐
條蕉都食咗﹐
重話係自己剝蕉皮添。
口水禧面部肌肉發達﹔
五官時不時抽筋咁不停郁﹔
表演欲隨時發作﹐
所以喺街上都會突然無緣無固失控地大把表情。
再加佢獨創嘅肢體動作﹐
好聽叫得意﹔
唔好聽叫疑似過度活躍。
除非係過緊海關或被警察盤問緊﹐
其他時候有得佢「發作」。
唔影響人嘅情況下﹐
佢有權郁動佢面部同身體嘅每一部份﹐
連食飯都會咁樣﹕
戚眼眉
O嘴
合埋眼
搖頭
伸脷
瞪大眼
舉手舉腳
扭羅友
唔趕時間嗰陣睇佢做呢D樣都幾搞笑
邊度遺傳返嚟﹖
咁樣衰嘅野
梗係我喇﹗
以上表情全情係我講佢做
全部都係同動物有關。
於是我出咗一條難題比佢(見佢個樣太囂)
我問﹕屎嘅樣係點扮架﹖
佢嘅反應先係呆咗
然後面有難色
一頭霧水
比我考起
拒絕再睬我。
