自從九七之後﹐
總司令就有個特別嘅生日。
因為人生日佢生日﹐
係會有好多人上街遊行嗌口號嘅﹗
好彩佢唔係特首﹐
如果唔係﹐
一路聽生日歌﹐
一路切住個蛋糕﹐
一路有人喺街外叫自己落台﹐
你話件蛋糕點啃好呢﹗
一如我哋嘅作風﹐
除咗禧哥生日有野慶祝有禮收之外﹐
佢嗰兩個「脫俗」嘅父母﹐
係唔會送禮物比對方嘅。
無D情趣呀呵﹖
係咁架喇﹐
送嚟送去咁Q煩﹗
重要我買禮物咪即係等如佢自己買比自己﹐
因為我都係用佢D錢買之嘛﹗
本來早幾日諗住叫口水禧畫張卡﹐
點知忙到唔記得叫。
相信壽星佬應該唔會介意嘅。
喺街食完晚飯買咗個蛋糕返嚟切。
唔嗜甜嘅壽星公知道屋企有兩件等食蛋糕但苦無籍口﹐
我一問洗唔洗買個蛋糕呀﹐
佢就好醒目咁想話問下禧禧喇﹐
點知呢頭句野都未問出口﹐
嗰頭有條友仔已經答咗「好吖﹗」
講起生日蛋糕﹐
突然諗起一件往事。
某人話未試過有一個自己嘅生日蛋糕。
於是喺九八年佢25歲嘅生日當晚凌晨12點﹐
有條茂柄托住個蛋糕喺壽星公樓下等電電梯。
重要同個看更大家喺度對錶﹐
睇下有無早到或遲到﹗
看更呀佰重緊張過托蛋糕嗰個﹐
猛話﹕「等下一部﹐呢部上去會早到咗一分鐘架﹗」
好彩當時成個大堂得兩個人﹐
如果唔係﹐
以後喺嗰樹出入睇怕都要笠絲襪先得喇﹗
點解咁講﹖
因為自從嗰晚送蛋糕事件之後﹐
每次個看更見到我都會陰陰嘴笑﹗
有時我無去一排﹐
下次去嘅時候佢重會話﹕「咁耐唔見你嘅﹗」
頂﹗點解禧爸嗰個看更夜晚唔瞓覺架啫﹖
ERrrrrrrrr
今朝睇咗佢哎呀呀哥個節目﹐
人揸鑊剷擺pose﹐
呀A貨又話要學喎﹗
睇佢揸刀個樣幾咁變態﹗
個仔忽然好孝順見我搶佢老豆蛋糕上粒車厘子﹐
即刻飛撲話要餵老豆食﹐
洗唔洗咁呀﹐禧哥﹗
睇呢張相就聯想第時個老豆無晒牙﹐
個仔餵佢老豆食野個情景喇﹗
重要補多個birthday kiss添﹗
嘩﹗唔怪之得個老豆一路食蛋糕﹐
一路猛話個蛋糕好甜呀﹗
得喇﹐今晚發個甜夢喇你﹗
又大一年喇老細﹐
希望你身體健康﹐心想事成﹗(唔係點做我張長期飯票呀大佬﹗)
Happy Birthday!
