自從口水禧學咗游水之後﹐雖然仍然都要吸住D氣喘藥﹐但係個身型就明顯同以前未學游水嘅時候有少少分別。
講開嗰D氣喘藥﹐早兩日帶佢去陪我覆診嘅時候多口問咗我個醫生有關口水禧D藥﹐佢話D藥無乜副作用﹐而且重係要嚟防止氣喘發作架添﹐所以佢叫我唔洗同口水禧停藥喇﹐繼續每日都噴一次同食住singulair。
上個月﹐我去咗抽血驗下乜野令我D鼻敏感咁嚴重﹐發現原來我對sycamore﹑timothy grass﹑貓狗等等都會敏感。我屋企前園有一稞sycamore﹐基本上我成條街都大把呢種樹同埋timothy grass﹐所以唔打乞懥就奇喇﹗就算斬咗門口自己嗰棵都無用喇﹐風一吹﹐隔離屋嗰棵都一樣可以泡制我﹐所以都無乜計仔。
我知﹐實有人會問咁重做乜要養住隻貓呀﹐重唔劈佢出街﹖好彩呢排禧婆婆唔得閑睇blog啫﹗
因為佢已經哦咗九萬幾次話Mimi整到佢個孫有喘氣同鼻敏感。即係咁﹐就算我掉咗隻貓﹐但都唔等如已經將所有致敏源嘅野斷晒尾。不過如果我劈咗陪住口水禧長大嘅Mimi就肯定不單止唔會令佢立即無鼻敏感﹐反而重會帶咗心靈上嘅影響比佢添。
或許會有人覺得我喺度揾籍口唔想掉咗隻貓﹐我認我一定唔會掉咗隻貓呀﹐因為我覺得我嘅理由非常之充份喎﹗Mimi已經同我生活咗快將十年﹐當初領佢返嚟係因為覺得間屋得我同禧爸兩個人好悶﹐無乜生氣﹐於是就想屋企有隻寵物行行企企﹐叫下都好。我最討厭一有咗小朋友就掉晒家中D寵物嘅行為(我個人討厭呢種行為﹐但唔等於我喺度批評呢個行為係啱定錯﹐做過呢樣野嘅朋友千其唔好誤會我﹗)。由我帶Mimi返屋企嘅嗰一刻開始﹐我覺得我有責任要養到佢埋單嗰一秒為止﹐因為佢既然成為我哋屋企嘅一份子﹐就永遠都係我哋嘅一份子﹐正如你無理由唔想養嘅時候就劈咗自己嘅仔女出街架啫﹖Mimi同口水禧唔同﹖只係爭在一個係我生一個唔係我生啫﹐但係兩者共同嘅地方就係兩個都係我親手帶返嚟呢個屋企架嘛。既然我對口水禧有責任﹐咁我睇唔到我點解唔洗對Mimi都負責任喎。
小朋友依附喺動物嘅感情有幾多係我哋大人無法想象嘅。即使你以為佢日日都同隻動物(屋企同學校嗰D)一齊都唔見佢走去同D動物玩下﹐掉鬼咗D細路都唔知喇﹗你以為喇﹗學校嗰兩隻兔仔已經退咗休去咗其中一個老師屋企住﹐學校買咗兩隻新嘅兔仔返嚟。魚缸嘅魚瓜咗老襯﹐學校又買咗新嘅魚返嚟。口水禧去完香港返到嚟﹐第一日去返學就發現魚缸嘅魚唔同咗﹐兩隻舊兔仔失咗蹤﹐前兩日對guniea pig去咗人哋屋企抖暑唔喺學校﹐口水禧都不停問住點解D guniea pig唔見咗嘅﹖幾時返嚟呀﹖去咗邊個屋企呀﹖
當你以為「車﹗畜牲嚟啫﹐某D地方嘅人會煮嚟食添﹐有乜咁矜貴啫﹖點同人比呀﹗」我覺得小朋友唔係咁樣諗(除咗嗰D有暴力傾向或者屋企虐待開動物嘅細路)﹐口水禧視所有嘅動物都係佢嘅朋友﹐返學放學都會同佢哋打招呼﹐見到人都未必咁醒目即刻記得要打招呼﹐要我提佢先記得﹐但對D動物係會主動走去講’hi’。(係﹐無家教﹐我失敗我唔識教仔﹗
)
mimi已經喺口水禧嘅人生入面存在咗四年幾嘅時間﹐我想象唔到有一日當佢瞓醒覺﹑放學返嚟﹐見唔到mimi喺窗邊曬太陽﹑喺屋企行嚟行去﹑喵喵聲叫﹐口水禧會點樣反應。更加唔希望比佢覺得「啊﹗第時如果當我唔想負責或者怕麻煩嘅時候﹐一野劈咗佢出街就可以甩身﹐OK﹗以後我都可以咁樣對任何人﹑任何事﹑任何野喇﹗yo!
」我總覺得喺照顧小朋友嘅身體同時﹐亦都要顧及精神同心理上嘅需要。
況且醫生亦都話只要我同禧爸有鼻敏感﹐即使屋企無貓都好﹐口水禧都賴硬野架喇﹐除非我滅絕晒全世界所有會令到我哋鼻敏感嘅野喇。最理想應該係離開地球喇﹐係嘛﹖
既然外國嘅屋咁大﹐無理由人同寵物係唔可以並存架﹖我可以做嘅就係保持屋企清潔﹐每個人都注意衛生﹐唔比mimi入房﹐邊個同mimi玩完一定要洗手﹑出完花園玩﹐入返屋要洗手洗鼻換衫等等。
有D事﹐逃避並唔可以完全解決問題﹐反而教導個小朋友明白點樣可以避免賴野方為上著。尋日先去完winnie屋企﹐口水禧玩winnie嘅玩具之後未洗手就抹面捽眼﹐結果眼又紅又痕。我而家去親有寵物嘅朋友屋企都一定帶埋口水禧嘅眼藥水同氣喘藥以備不時之需。細路仔邊會成日都記得洗手吖﹐帶定藥就可以一賴野就即刻治療﹐減低不必要嘅後為症。
我所講嘅野全部都係講緊唔威脅到生命安危嘅時候架咋﹐對於嗰D一掂動物就會有生命危險會搞出人命嗰D係兩回事嚟架大佬﹗唔好一概而論。
去Maui期間發生咗一件事﹐搞到禧爸一返嚟就即刻落重本買咗條新泳褲比個仔。事緣係口水禧著開嗰條Thomas孖煙囱泳褲入面係有層成條三角底橫嘅網﹐喺夏威夷嘅時候﹐口水禧成日話個網會黐JJ﹐搞到剝泳褲嗰陣喊到隻野咁﹐重話以後唔著泳褲﹐一於無下裝咁去游水。初初以為係嗰邊D水嘅問題﹐點知返嚟之後第一次去上堂之後都樣發生JJ黐網事件﹐於是禧爸為咗保住個仔嘅祠堂﹐走去買咗條一分錢一分貨嘅新泳褲過口水禧﹐一著﹐即刻無晒事。第一次著完嚟﹐口水禧一剝泳褲異常興奮喺廁所大叫﹕「媽媽﹗條泳褲唔會黐JJ架﹗媽媽﹗唔黐JJ呀﹗你聽唔聽到呀﹖」幾乎想我同佢擺返幾圍慶祝咁濟﹗
暑假天氣熱﹐加上口水禧學游水嘅學校每個星期日都開放比學生帶家長去游水﹐呢排條友仔游多咗好多水﹐感覺上個身型有少少唔同咗。雖未至於係飛魚咁fit﹐不過硬係覺得個膊頭橫咗D﹐對腳大力咗同D肌肉實咗﹐成個人黑咗就唔洗講喇。
嗰日同佢影相時發現從背後睇重好始開始有少少倒三角形嘅添。不過……
唉﹗呀生﹐都係繼續做多D運動喇你﹐呢個側面真係連你老豆都唔及你個肚咁大﹗
講起大肚諗起口水禧前幾日食緊晚飯突然我講﹕「媽媽﹐我以後唔生仔呀﹗」
我>>>
(嘩﹐喺我面前講好喇﹐唔好喺爺爺同嫲嫲面前講呀大哥﹗)
口水禧﹕呀﹐我唔生仔呀﹗
我﹕點解呀﹖
口水禧﹕總之唔生喇我。(重講講下想喊咁樣)
即時醒起我哋睇緊嘅電視節目叫’I didn’t know I was pregnant’﹐個節目係講有D女人有咗都唔知﹐直到生嗰一刻先突然知道肚裡面有BB要出世。電視一邊訪問D女人一邊重演當日生BB嘅情景。大概口水禧見到D 姨姨生BB嘅時候痛到面容扭曲兼喊到爆咋﹐佢諗起我哋成日笑佢個肚腩大到裡面裝咗好多BB就嚟生咁款﹐佢以為自己真係會生BB﹐而且會痛到好似電視裡面D人咁﹐所以好驚。
我﹕你唔會生仔架﹐放心喇﹗
口水禧﹕呀﹐點解我唔會生仔呀﹖
我﹕要女仔先會生架咋﹐男仔唔會生仔架﹗
口水禧﹕呀﹐點解淨係女仔先生仔呀﹖
我﹕因為BB要住喺子宮裡面囉﹐男仔都無子宮﹗淨係女仔先有子宮架咋﹗
口水禧﹕呀﹐咁我係咪無子宮呀﹖
我﹕係呀﹐你老豆都無架﹗
口水禧﹕呀﹐咁你呢﹖
呢個時候真係想大聲講﹕你覺得呢﹖重好問喎﹗痛到我PK呀你﹗衰仔﹗
