自從Clara去咗下晝班之後﹐佢對口水禧嘅痴纏可以話無晒咁濟﹐喺學校撞到都無再追住口水禧玩。當然﹐悶柴口水禧亦都何嘗唔係當人透明﹐視而不見咁款「掂行掂過」﹐大家變咗陌路人(咁似某對明星夫婦嘅﹗
)。
一直以嚟﹐口水禧喺學校都唔算好合群但又唔算完全唔合群嘅小朋友﹐有時佢都會主動撩下同學講野﹐不過都係爆一兩粒字嗰隻。再唔係嘅話﹐大家坐埋一齊玩﹐可以係唔洗講野都得架﹐連搶玩具都唔洗講野﹐肢體語言就夠架喇。總係覺得條友仔咁樣都唔係辦法﹐埋唔到堆第時返學咪好孤獨囉﹖咁唔掂架喎大佬﹗
好彩暑假唔係個個同班同學都有報暑期班﹐有幾個同學仔嘅媽咪會成日約其他同學仔playdate﹐叫做有D野比個仔做下﹐又有得同家長吹下水﹐自己亦都可以抖下氣。
上個星期四﹐有個同學家長約人去動物園﹐拿拿臨幫口水禧報名一齊去喇﹐還掂買咗年票。於是嗰日放咗學﹐我同口水禧就去動物園匯合晨早已經入咗場嘅另外一個媽咪同兩個同學仔。
出發前諗住萬無一失睇下動物園嗰區乜野天氣先﹐費事去到著唔夠衫凍到玩到縮下縮下就唔好喇。我哋屋企呢邊就熱到爆﹐但出面嘅天氣就分分鐘同我哋相反架嘛﹐所以都係穩陣D好。網上嘅天氣預告話當地係華氏六十二度﹐嘩﹗咁咪要著長袖同長褲喇﹐重要加多件外套添﹗因為上次去過覺得嗰度因為喺山上面﹐所以都幾大風﹐於是迫口水禧換鬼晒D短袖短褲﹐準備埋大家嘅茶點之後我哋就出發。
路上口水禧都好開心﹐成隻雀咁唱晒歌﹐全程車都無瞓過﹐重以為放咗學佢會眼瞓添。去到動物園﹐嘩﹗個太陽猛到吖﹐重要個天一舊雲都無喎﹐室外溫度差唔多成八十度﹗撞鬼個網上天氣預告呀﹐玩得我哋透喇今次﹗我都叫做著咗短袖﹐但口水禧係長袖同長褲喎﹐真係望見佢我都流緊汗﹗唉﹗
正當我諗緊點算好呢﹖咁熱重著成咁點玩呀﹖但有個人已經好心急想跳車出去﹐係咁話唔熱喎﹐唔洗買件短袖比佢換喇喎。既然你咁講﹐咁我無謂送錢比人喇喂﹗
入到場打咗個電話比同學個媽咪之後﹐我哋就朝住佢講嗰個地方行去揾佢哋。無幾耐就見到兩個同學仔T同埋L﹐重有個已經疲態盡現嘅媽咪跟住嚟緊。見到佢都不禁想敬禮﹐事關T同L係超活躍嘅小朋友﹐佢哋嗰日喺個動物園成日都一個向左走﹐另外一個向右走嘅。同學媽咪朝早十點半已經帶咗嗰兩個小朋友入場﹐我哋去揾佢哋嗰陣係中午一點﹐嗰三個鐘頭裡面﹐呀媽咪分咗幾多次身去追兩個唔同方向走嘅小朋友實在係估計唔到咁多次喇﹗
其實L同學成係同學媽咪個女﹐呀T同學個媽咪病咗無嚟﹐所以其實帶住人哋個仔去玩都幾大壓力架﹐尤其是個細路係唔多聽你支笛嘅話﹗
上面張相係我追緊口水禧同L﹐L媽咪向令一方向追緊T。你話若然我無去﹐咁L媽咪真係要揾人撕開自己兩忽先追到兩隻野喇﹗
好彩有帶帽嚟﹐如果唔係就實曬到變炭都似。頂帽望落都有少少變態feel﹐有D似以前日本軍人個樣咁。不過喺呢度夏天去室外玩就最好戴呢D帽喇﹐不單止遮個塊面﹐重可以遮埋條頸後面﹐唔洗曬到甩皮。不過影相嘅時候就會唔見咗對眼囉﹗(倍添變態feel!)
好彩我同L媽咪都有年票﹐咁我哋帶入嚟嘅小朋友就可以免費。點解咁講呢﹐原因係呢三件蛋散真係把鬼﹐完全係無睇動物﹐淨係猛喺度揾野爬﹑揾野「捐」﹑玩水﹑玩滑梯﹐車﹗呢D野求其喺街邊都玩得喇﹗不過D細路係咁架喇﹐一多人一齊玩就係咁﹐咪有得佢哋玩囉﹐還掂唔洗錢﹗(應該係比晒錢喇一早﹗)
見到地下有個水凼又玩一大餐﹐最正係兩個語言唔多通嘅人都有共同嘅愛好﹐就係踩水﹗話咗無士睥鞋換﹐一於都唔理咁多照伸隻腳去踩多兩腳。
我諗唔叫佢哋行嘅話﹐佢哋係可以喺度玩幾粒鐘直至太陽落山。
然後T同學猛話要去坐火車﹐排緊隊嘅時候架車要十五分鐘先到﹐於是攞D茶點大家食下。口水禧自己食晒成盒西瓜(因為同學仔唔食)﹔同學仔就食咗少少我帶去嘅brownies同芝士。就係咁﹐一路食一路等火車。
我就乘機同L媽咪傾下閑計。佢話個女日日都叫悶﹐’driving me crazy!’係L媽咪嘅口頭禪﹗因為重要照顧個大仔﹐所以唔係好多時間可以帶個女去玩或者唔夠精神招呼個女﹐所以唯有約多D playdate比個女消耗體力﹐唔好喺屋企嘈生晒。T同學嘅媽咪有病﹐食咗藥好辛苦﹐重要湊個BB女﹐所以無精神湊T同學﹐於是嗌救命揾人幫手湊仔。好彩L媽咪咁啱諗住去動物園﹐如果唔係都唔知T媽媽點算﹗
喺呢度湊細路就係咁﹐無人無物好似我哋咁重慘﹐得唔得閑都要自己湊﹐唔係叫邊個同你湊呀﹖病都要自己湊呀﹗試想象一下一件嘈住嗌肚餓﹐另一件鬼殺咁嗌悶﹐重有個賴咗屎喪喊﹐有兩個打緊交爭玩具﹐你話個呀媽有乜法子唔黐線呢﹗如果唔係邊得嚟咁多顛媽自己殺咗自己嘅仔女﹗我都係嗰句喇﹐生幾多﹐真係要量力而為﹐生咗先算到頭來只有自己同小朋友賴野。
坐完火車﹐L媽咪趕住要去接個仔放學﹐於是又急急腳帶住兩件細路鬆人﹐點知呢三件野竟然喺度玩角力﹐真係以為自己個頭有角咁鬥頂對方個頭﹗
咪睇兩個男仔蝦一個女仔﹐L同學都唔野少架﹗鬥頂頭佢都唔輸蝕幾多架咋﹗
頂咗一輪﹐口水禧放棄﹐變位冷眼旁觀。原因係….
佢睇中咗側邊嘅車仔機動遊戲吖嘛﹗我叫佢等同學仔走咗先玩喇﹐因為L媽咪好趕時間﹐費事一陣口水禧去玩﹐同學仔又話要玩﹐搞到L媽咪遲咗去接仔就唔好。
同學仔走晒之後﹐我哋玩咗幾個遊戲﹐由於禧爸無嚟﹐陪玩迷你過山車嘅任務就落喺我身上﹐大佬﹗真係
暈得一陣陣﹗嗰個口水禧落嚟重要再玩其他野﹐我比咗D飛佢叫佢去玩﹐我坐喺不遠處睇。
我想比佢試下自己學下排隊﹐比張飛個哥哥﹐然後自己入去揾位坐。全程我都睇住﹐唔怕有拐子佬嘅。第一次去玩嘅時候﹐我見到口水禧圍住個飛機遊戲行咗一個圈﹐個哥哥唔知同佢講乜﹐我見口水禧轉個頭過嚟好似想揾我救命。我無行埋去﹐想睇下佢點解決。最後佢行咗去一架飛機旁邊準備想上去﹐不過唔夠高﹐好彩個哥哥托一托佢﹐咁口水禧就順利上咗去﹐重自己扣好安全帶添。玩完落嚟﹐佢走埋嚟我度﹐我問佢做乜行咗個圈先上飛機﹐佢話因為佢想揾可以坐前面嘅位嘅飛機﹐但比人坐晒﹐所以唔知點算好。我讚佢叻﹐後來自己揾到一架有後面位嘅飛機上去﹐唔洗哥哥幫佢揾。又識自己扣安全帶添﹗個傻仔好開心咁笑﹐重話要再去玩多一次。睇嚟信心又增加咗少少。比著以前﹐會死拉住我同佢去﹐或者係揾唔到位就走返返嚟喊﹐話之張飛已經比咗人。我總覺得人嘅信心係建立返嚟而唔係鬧就有。
不過……我就無乜信心再坐嗰架吊車囉。但係最後都係比口水禧迫咗上去坐。唉﹗八千幾尺嘅火山都敢上﹐但始終係敵不過十幾廿尺嘅吊車﹐一坐上去對腳又麻痺﹐口水禧郁一郁我都驚一驚……因為今次比我見到原來架野係會經過獅子籠上面架﹐雖然係個頂有網圍住﹐但係硬係驚會跌咗落去無網嗰邊﹗點解以前連玩幾轉過山車都面不改容﹔玩free fall都唔怕高﹐家下唔係玩完暈就係驚到麻痺架﹖﹖﹖
