lindsay wildlife museum

上完第一個暑期班嘅週末﹐口水禧閒賦在家喺度玩角色扮演﹐點解會戴住頂草帽﹖因為睇緊Toy Story唔知第幾集﹐入面個小朋友戴住頂草帽影咗張相﹐重有就解個主角Woody都有頂牛仔帽﹐於是口水禧就有樣學樣都整頂帽嚟笠下扮有型。重要騎住隻明明係搖搖鹿但比佢當做係馬話要去救人喎﹐睇佢係咁搖係咁搖﹐隻野喺個地下猛咁打轉﹐口水禧重好覺得自己好威猛咁款﹐真係笑到我哋口都爛咁濟﹗

百無聊賴﹐諗起上次口水禧學校去野餐嗰陣﹐我見到個公園隔離有間野叫lindsay wildlife museum﹐聽講有D動物睇下架喎﹐上下個網址睇下果然係有D雀鳥同其他少少動物睇﹐最緊要係終於都揾到口水禧一直夢寐以求想見嘅貓頭鷹﹗大佬﹐成日叫我帶佢去樹林揾貓頭鷹喎﹐人哋夜晚先出嚟架嘛﹐叫我去邊樹變隻貓頭鷹先得架﹖唯有黐住D貼紙頂一頂喇﹗

我哋呢度大大小小都幾多動物展覽嘅場館﹐好多都會安排一D活動比小朋友去參加。我估最主要係灌輸保護自然生態嘅正確知識比小朋友﹐等佢哋都會愛護下大自然﹐尤其係對D動物多D認識。

記得我一年班嘅時候﹐學校都有帶我哋去動植物公園同埋彭福公園﹐對於當時嘅事物到而家都重有少少印象。不過喺學校好似無乜有教過保護大自然或野生動物嘅野﹐印象中呢D知識喺香港嘅教育裡面好少被提及。

同口水禧嚟呢度除咗等佢見下佢好想見嘅貓頭鷹之外﹐亦都想佢開下眼界﹐話晒真解無乜幾何有得咁近距離望到D雀。莫講話佢無見過﹐就連我同禧爸都一樣未見過﹐入到個場館最興奮好似係我哋兩件老野﹗

上次因為買咗oakland zoo嘅年票﹐所以而家去其他嘅動植物公園我哋嘅入場費都會有折頭。口水禧免費﹐我同禧爸半價﹐十蚊都唔洗﹐三個人就可以入場喇﹐幾抵﹗

一入到去以為D動物喺個玻璃箱裡面﹐上面頂有D標本﹐點知……

原來企喺上面嗰D係真嘅雀嚟架﹗正當我哋望住呢兩隻野嘅時候﹐左邊嗰隻突然R隔肋底﹐嚇得我哋吖﹗禧爸話初初望住下面嗰隻嘅時候﹐眼尾立過覺得上面好似有野郁﹐重以為自己眼花添﹗

其實驚嘅原因除咗因為以為佢哋已經去咗賣鹹鴨蛋但又突然喺你面前郁之外﹐重有就係因為呢幾隻全部都係鷹嚟嘅﹐睇下佢個嘴尖到﹐嘩﹐一陣一個唔鍾意飛落嚟琢我個頭咪大件事﹗重有就係因為我矮佢又企得高﹐所以影出嚟望落好似好細隻﹐其實都唔係好細架咋﹐如果要琢嘅話﹐我覺得佢絕對係可以琢到我變光頭架﹗大佬﹐我唔想同幟哥情侶裝呀﹗

不過呢幾隻鷹全部都係執返嚟架﹐佢哋本來係野生嘅﹐不過受咗傷﹐好返都唔可以再返去大自然靠自己生存﹐所以場館就留咗佢哋喺度渡過佢哋嘅餘生﹐做下part-time還返D醫藥費咁囉。

行行下顎高頭見到有對好大嘅眼睥住我﹐真係有D恐怖﹗因為貓頭鷹對眼好Q大﹐粒眼珠又圓又大又黑﹐側邊重要有D黃色包住﹐望住你嗰陣可以望好耐都唔「斬」眼﹐真係我副隱形眼鏡都乾時佢一D事都無﹐繼續望實你﹐好似就快想落嚟琢我頭殼咁﹗等我攞相機出嚟影佢嘅時候﹐佢又唔望我喇喎﹐但佢嘅正面就好似佢嗰塊牌上面嘅嗰個樣咁樣﹐你話點會望到佢牛咁眼咁望實你時﹐個心第一下會唔驚吖﹗

呢隻個髮型真係比我哋笑咗好耐﹗唔知佢係唔係聽得明知道我哋笑佢﹐因為笑完之後佢長期都係用個背脊得住我哋﹐間唔中又八掛想望下我哋走咗未﹐見佢轉少少頭過嚟偷望﹐一見我哋笑﹐佢又即刻令返轉面。不過貓頭鷹條頸真係好扭得﹐差唔多就嚟360度轉一圈都得﹗

呢個就梗係假架喇﹐若然係真嘅﹐睇怕為食總司令跟住落嚟都唔洗再幫幟哥揾替身lu!早前有個新聞話有兩夫婦遠足嘅時候遇上熊bear bear﹐隻野由九十米咁遠嘅距離突然衝埋嚟襲擊嗰兩夫婦﹐結果個老婆走得甩﹐但個老公就不幸比隻bear bear熊埋咗單﹐所以都唔知點解市面嗰D bear bear熊個樣會係咁友善同埋叫做Forever Friends架呢﹖

以前有個同事同朋友去露營﹐夜晚不幸遇上熊﹐同事同朋友三人縮咗入個營裡面﹐隻熊重跨過其中一人嘅營﹐突然望見地上有半打可樂﹐隻熊執起D可樂﹐喺其中一罐篤個窿﹐坐咗喺地下飲可樂﹐重飲得好開心好high﹐一邊飲一邊搖一邊發出D唔唔聲﹐狀甚享受。三人靜觀其變﹐但內心驚到爆炸﹐驚隻熊飲完重想飲但無晒可樂會發火殺咗佢哋。好彩隻野飲咗幾罐就走咗。三人見隻Forever Friends走咗之後拿拿臨執返晒D野即刻走人。呢獲真係食熊膽都補唔返個嚇破咗嘅膽﹗

故事教訓﹐去露營乜野都唔洗帶﹐但記住要帶可樂﹗(講笑啫﹗不過我覺得可樂可以用呢個橋段拍廣告﹗)

拿﹗呢個就係口水禧同佢老豆唔同嘅地方喇﹗

老嗰個就恭恭敬敬……

呢個就當我透明﹗

懶理已經張牙舞爪嘅呀媽企喺後面都照樣搞搞震﹗

嚇破膽同食咗豹子膽有乜分別﹐睇呢兩個人辦喇﹗

每一日﹐場館都會安排一D時段比參觀者再近距離睇D動物﹐大家坐定之後﹐工作人員就會先介紹下隻動物乜野來頭同喺邊度生活。呢隻禿鷹喺1993年就入住呢個展覽館﹐原因係當時隻鷹比電電親跌咗落地飛唔到﹐比個農夫發現之後﹐個農夫即刻打電話比場館人員報稱有隻禿鷹受傷。相入面隻鷹企嘅位置後面其實係一間動物醫院﹐專門救D受傷嘅野生動物﹐喺美國已經好耐歷史。

當獸醫執咗隻鷹返嚟之後發現佢左邊隻翼嚴重燒傷﹐唔可以再用﹐於是幫隻鷹切咗左翼﹐無咗一邊翼﹐隻鷹根本就唔可以再喺自然環境生存﹐就算唔餓死都遲早做埋人哋份早餐﹐有見及此﹐場館人員就包咗隻鷹嚟養﹐隻鷹亦都要每日出嚟表演下佢嘅彈跳神功比大家睇﹐當係還返D醫藥費囉。