重新開始

所以今年都唔例外﹐一樣比佢去參加pre-K嘅暑期班﹐目的除咗想等佢繼續習慣喺英語嘅環境返學之外﹐亦都比佢習慣下pre-K嘅上堂模式﹐唔洗等到開學嗰陣先嚟重新學過晒﹐到時連D同學都要重新習慣完全唔同嘅上堂方式﹐唔大混亂至奇﹗

Preschool嘅時候﹐日日都好自由咁喺每個唔同嘅活動攤位穿梭﹐有D同學直情係日日都喺室外玩﹐幾乎唔入嚟課室做其他活動﹐例如畫畫﹑玩積木﹑搓泥膠等等。除咗circle time焗住比我哋夾入嚟之外﹐其他時間都好難請到佢哋入嚟﹐所以曾經聽過有D家長話覺得個仔日日都淨係嚟學校跑下跳下﹐無乜機會學其他野﹐好似嘥咗D時間。其實如果佢哋有嚟今日個暑期班嘅話﹐佢哋就會知道preschool呢個返學蜜月期喺九月開學嘅時候就要正式講再見喇﹗因為pre-K嘅上課模式係完全唔同架﹗

今日去到學校﹐負責嘅老師走嚟問我口水禧講唔講到流利嘅英文﹐當佢知道個答案係「唔可以」嘅時候﹐佢二話不說就請我留低幫佢翻譯。當時我心諗「嘩﹗咁嚴重要翻譯﹖」不過都即管留低睇下有D乜野做喇。

circle time嘅時候﹐老師再唔係做動作多過講野﹐基本上係當好似五﹑六歲上幼稚園咁樣係咁講野或者同學生對答。班上只有口水禧同另外一個女仔同年﹐其他嘅大多數到五歲幾六歲。所以老師唔會特登就口水禧嘅程度嚟上堂﹐嗰下我完全明白點解我要留低做人肉字典機。

一嚟就教地深吸力﹐當然唔係真係成個科學堂咁教得好深入嗰種﹐只係輕輕「賴」過下D皮毛﹐教D學生唸下口簧”The earth is round and round, and it spins and spins. There’s something called gravity and it keeps things to go down.”當然口水禧係擘大個口得個窿喇﹗所以大部份時間我好似D國家領導人身後嘅翻譯人員咁不停喺口水禧耳邊口o翁o翁解釋返老師講乜。

到分組活動時﹐口水禧走咗去玩玩具廚房﹐但老師要求每個學生都要去每個活動攤位做野﹐所以口水禧唔可以再好似以前咁自由同漠視老師嘅吩咐喇。因為今日係第一日﹐口水禧非常唔習慣﹐猛問「點解要去做嗰D野呀﹖」﹑「點解要去玩嗰個玩具呀﹖」﹑「我唔識呀﹗」等等不滿嘅情緒﹐重話想出去室外玩﹐但我話老師無開度門﹐即係唔可以出去玩住。我解釋佢知pre-K已經係大哥哥班喇﹐唔可以再好似以前preschool咁鍾意做乜就做乜﹐要開始聽老師話﹐做好老師吩咐嘅事之後等老師開門﹐先可以出去玩。好彩口水禧都唔算超級鍾意反抗嘅細路(或許係慣咗被制服於我嘅淫威之下唔敢反我)﹐但我肯定九月開學嘅時候﹐佢嘅同學仔都真係需要一段時間先可以習慣全新嘅上課模式喇。(而家已經可以預計到第一個星期co-op班人係會幾咁虛脫﹗大獲﹗)

從今日睇嚟﹐pre-K嘅模式係一返到學校就先嚟個circle time﹐老師每日(或成個禮拜)有個主題﹐喺circle time時教D學生有關嗰樣主題嘅野﹐然後就大家分頭去唔同嘅活動攤位做D同當日主題有關嘅活動。跟住做完室內嘅活動﹐老師就會帶大家出去室外做其他都係同個主題有關嘅活動﹐玩到咁上下就食茶點(或者午餐)﹐食完就係free play自由活動時間﹐最後再嚟多個circle time講下故事﹐唱下歌跳下舞咁﹐然後就bye bye放學。

我明白點解學校對preschool同pre-K安排唔同嘅上課模式。我估大多係配合唔同年紀嘅小朋友心智發展階段嘅特質而定。年紀細嘅﹐好難要佢坐得好定然後係咁聽老師講野﹔但年紀大少少就應該識得服從老師嘅指令﹐所以上堂會多少少規律。咁樣習慣咗之後﹐到第時上幼稚園就唔會習慣唔到亂咁嚟搞到老師要柄爆喇。

唔怪之得舊年老師嚟家訪嘅時候話通常講外語嘅小朋友第一年唔會講好多英文﹐最多都係一句起兩句止。但到咗第二年就會講多D﹐梗係喇﹐一個星期返多一日﹐每日困喺課室猛咁講﹐想唔識講都幾難。

雖然呢六堂暑期班我又要做返超齡書童陪返學﹐不過起碼比我了解到pre-k究竟係點樣一回事都好﹐我返到屋企就知道點樣幫口水禧快D適應喇嘛。因為我同禧爸都無喺呢度讀過書﹐所以完全唔知究竟D細路上堂係做D咩架呢﹖

九月﹐口水禧將會係下晝班。而家呢個暑期班都特登為咗幫佢哋調整時間而定喺朝早十點半上堂(平時係朝早九點)。九月就會係十二點幾返學上堂﹐放兩點幾﹐咁D作息時間通通都要轉晒佢﹐變咗要晏少少上床同起床﹐下晝放學要瞓個晏覺咁樣先得。夜晚晏D瞓﹐可以一齊揾D野做下﹐學下英文讀下故事書咁囉。咁我咪都要調較下我嘅作息時間﹖

重有一件大事﹗今日老師攞條蛇﹐呀Sparky﹐出嚟比小朋友托喺大脾玩下﹐口水禧唔識C梗係話要玩喇﹐當老師當咗Sparky喺口水禧大脾嗰陣﹐呀Sparky想爬上口水禧條頸再去背脊﹐口水禧以為Sparky想R佢痕﹐縮住條頸幾乎想夾瓜呀Sparky﹐喺佢哋兩個互相糾纏嘅時候﹐我鼓起我三十五年而嚟宇宙最強嘅勇氣……用手指…………………………甲掂過Sparky一下﹐又凍又林﹐D皮好核凸呀﹗(唔好意思Sparky﹐我唔想踩到你咁架﹐但我真係好驚你D皮﹗)跟住老師重以為我有興趣想比Sparky喺我大脾玩下﹐嚇得我吖﹗我唔係李珊珊呀﹐我無咁好身材攤喺地下玩蛇架﹗我會暈架﹗

老師話聽日要餵Sparky食老鼠……我諗我要帶定白花油捽多D喺個鼻哥窿同「魂精」﹐重有就係教定口水禧如果媽媽暈咗﹐記得大力D用指甲「咪」我人中呀﹗