幾日唔出現﹐唔係以為Sparky食老鼠唔夠飽﹐老師將我都攞去餵埋Sparky呀嘛﹖
就算將我斬件﹐我呢個肥身怕且都啃瓜Sparky多喇﹐真係見到我對甲組腳﹐Sparky都飽到濟﹐到晒頂喇﹐重邊度食得落吖﹗
其實返學嘅時候除咗要幫手老師做野之外﹐重要睇住口水禧有無失控搗亂﹐因為佢唔係好識聽英文﹐所以有時其他人會以為佢玩野﹐叫住都重繼續做D人哋叫佢唔好做嘅事﹐加上呢班嘅老師唔會專登就小朋友嘅程度﹐佢直情當全部細路都已經準備好去幼稚園嘅狀態﹐多咗要佢哋服從老師﹐所以我都要睇實口水禧﹐必要時都要爆D中文叫佢聽住人哋講乜野。
返咗第三日﹐雖然間唔中都重會亂嚟﹐不過已經叫做知道circle time時要坐好(間唔中都會周身郁)﹑老師唔叫就唔好伸手去搞人D野﹑老師講野嘅時候唔准傾計﹑每一日都要去晒所有活動攤位做過晒D野先可以去室外玩等等。可能有人會覺得搞笑﹐因為呢D野喺香港由K1﹐甚至而家嘅nursery班已經開始要學架喇﹐點解我哋呢間學校會咁遲先教架呢﹖(我唔清楚其他學校係點樣
) 其實係因為小朋友未到某一個年紀嘅時候﹐根本就唔識點解要遵守規則﹐所以當你迫佢去服從咁多課室嘅規矩嘅話﹐佢哋有D會極力反抗甚至係遇強越強﹐做出更加多破壞性嘅事﹑有D會喊住反抗﹑有D喊住被制服等等﹐咁樣唔等如學識咗要守規舉﹐只係勉強被迫要守﹐而當有機會唔守嘅時候就會睬你都傻﹐一於搞破壞。
但係pre-school嘅時候係咪有得佢哋拆咗間學校都唔管佢哋呢﹖有D人成日都會覺得鬼佬唔理細路﹐有鬼得佢哋自由發展﹐所以D鬼仔鬼妹好多都好曳﹗其實曳嗰D係真係父母唔理唔教啫﹐屋企有教嗰D嘅小朋友唔會咁離譜架﹗其實preschool嘅時候主要都係講講講﹐重覆再重覆咁哦班細路﹐預咗係要犯咗錯再講﹐講完又再犯架喇﹐但係有一日你會發現班友仔大大下係會識得要排隊﹑唔准對同學郁手郁腳﹑circle time時間到咗就一定要放低手上面嘅野即刻去集合﹐以前初初開學嗰陣係老師打咗鐘﹐我哋要逐個捉入嚟﹐有D又再走﹐我哋又要追出去咁樣。但而家當老師一打鐘﹐D細路會好似觸電咁掉低晒D野﹐拿拿臨颷去集合﹐口中重會唸唸有詞話”oh, circle time! circle time!”幾搞笑架﹗
好多人都讚成「嚴刑伺候」呢個方法最有效﹐從前我都一樣咁認為﹐唔聽話就勁柄﹐再唔聽就梗係打獲甘喇﹐重洗講咁多咩﹗一打就驚﹐驚就聽話架喇﹐重唔係最有效﹖但隨住口水禧嘅「爆出」﹐參考下D育兒書同親身睇過口水禧學校老師教細路嘅方法﹐以及嗰D小朋友由麻煩友變聽教聽話嘅好幫手之後﹐我對「嚴打嚴鬧」呢套有少少保留﹐但未至於完全摒棄﹐中西合壁就最好。(所以有時都會鬧仔﹐我講過我唔係好人架喇﹗)
接近五歲嘅小朋友開始會有自我克制嘅能力知﹐明白有D野可以做有D唔可以做﹐會盡量控制自己唔好做錯事﹐當然都有失手賴野之時﹐所以有時都需要大人提醒下。雖然我同口水禧日對夜對﹐但係佢嘅少少轉變﹐無論係身體上定係能力性格上都好喇﹐唔多唔少我都可以察覺得到。就好似早前提過佢而家間唔中都會做D野嚟等你讚下佢﹐例如幫手執枱﹑收拾玩具﹑刷完牙會抹返乾淨張枱等等﹐然後就會問你乾唔乾淨呀﹐等你讚下佢。所以襯住呢個階段開始教佢哋守規舉就係最好嘅時機喇。
我都試緊到底係真定假﹐嘗試鬧少D﹐讚多少少﹐嬲到爆嘅話都係剷一兩句就算﹐勁嬲嘅就……但我絕對無體罰﹐儘管嬲到頭殼頂冒煙都好﹐最多都係勁鬧。暫時口水禧都未有任何嘅行為令到我想破戒﹐遲D就唔知喇……
*****************************************************************
尋日又陪太子返學﹐當我簽到嘅時候﹐竟然聽到動同埋眼尾見到有個人主動走埋去動老師講good morning喎﹗老師開頭聽唔到﹐口水禧再大聲少少﹐兼伸個頭埋去再講多次﹐第二次老師終於聽到﹐應咗佢。有人好開心跟住就走咗去玩玩具。
呢個禮拜嘅主題係地深吸力﹐每一日老師都會設計幾個同主題有關嘅攤位比小朋友去邊玩邊學。
口水禧最有興趣嘅梗係同車有關喇。原來因為有地深吸力嘅原因﹐一件物件被推郁之後就要一D野或者物質嚟整停郁緊嘅嗰件物件。(唔知我有無聽錯﹗真係搞笑﹐家下好似係我去返summer school咁﹗)當一架車落緊一條大直斜嘅時候就會加速﹐只有彎位(curve)先可以令架車減速。嘩﹗呢個聽落係人都知嘅事﹐我無諗過係同地深吸力有關﹐大佬﹐我讀文科架嘛﹐鬼知呢D野﹗
老師教佢哋想玩就自己開著車底個制等架車自己行﹐玩完要自己熄咗佢。我知我知﹐係人都識喇﹐熄制之嘛﹐有幾難呀﹖有工人全天候服侍嗰D咪唔識囉﹗有D細路真係會玩完掉底就走人﹐要捉佢返嚟熄返架車。
為咗要證明彎位會整慢架車﹐老師重整咗D上斜落斜同彎位比D細路睇下。佢重解釋比D小朋友﹐三藩市有D地方有好多勁急嘅大斜路﹐如果唔係整咗D「之」字形嘅彎路﹐包你架車由最高嗰度衝落嚟快過火箭﹗講真﹐我以前以為係為咗靚而整到D路咁樣架咋﹗(係﹐我讀得書少﹗
)
點解要玩平行木呢﹖因為老師要小朋友知道因為有地深吸力﹐所以人可以平衡。如果無咗地深吸力﹐個人喺空中飄浮嘅話﹐喺無重狀態下係平衡唔到嘅。除咗呢樣﹐重可以順便比D細路練下身手咁喇。
呢條友仔行平衡木係無問題嘅﹐不過要單腳平衡兼烏低身執個豆袋喇喎﹐真係有D難度喎﹗
咪以為佢一野就掂﹐試咗幾次先得架咋。
重唔係次次得添﹐間唔中得﹐多數唔係好得﹗
畫畫枱每日都唔會少﹐好似聽過老師講過係教育局規定學校要有幾個範籌嘅科目包括藝術﹑科學﹑數理﹑常識﹑體育同埋重有唔知一大抽野咁喇﹐我記唔到咁多野﹗
自從佢嘅體能比細個增強咗之後﹐坐定定嘅活動真係唔係好吸引到佢喇。有時畫野都係求求其其畫兩筆就走人﹐趕住出去玩。
呢個遊戲係老師喺加拿大旅行嗰陣買架喎﹐幾過癮架﹗一個個人仔嘅身上刻咗D坑﹐愛嚟彼此扣住然後砌出唔同嘅組合。目的都係教小朋友點樣平衡D公仔之餘﹐重可以穩定成堆野嘅重心﹐咁佢哋就唔會咁容易跌晒落嚟散晒喇。
口水禧唔單止要學點樣砌呢堆人﹐重要學下由失敗中吸取教訓同練習下比D耐性。因為開頭佢砌唔到﹐D人散晒跌落嚟之後﹐佢就會一臉不悅﹐口中埋怨話「媽媽﹐點解會唔得嘅﹖你幫我整吖﹗我整唔到嘅﹖」我睬佢都傻﹐要砌自己砌﹐最多我從旁指導架啫。
散咗幾次之後﹐佢開始知道發生乜野事﹐知道一邊加咗個人﹐另外一邊都要加返個嚟平衡先唔會散。
一路玩一路話想砌高D﹐好﹗自己搞掂佢喇。
呢排喺屋企成日玩層層疊﹐兩個玩意其實有少少似﹐所以某人開始明白放個人上去嘅時候除咗要平衡之外﹐重有就係要輕手D﹐唔好太大力一野質上去。
每砌一個而又唔跌落嚟嘅話﹐佢就會沾沾自喜。
呢個因為自己努力而成功咗嘅笑容係唔係比起要靠人先成功嘅笑容更滿足呢﹗
砌砌下走咗去玩隔離個轉盤…….
玩完砌野﹐走去玩陀螺。
不過梗係重未控制得好好喇。
仍需努力﹐其實真係唔容易整到唔跌。
跟住部相機就無晒電﹐所以餘下嘅節目完全影唔到相喇。
呢舊玩具D小朋友都有份整架。個公仔對眼係小朋友鑽嘅﹐D木嘅邊係佢哋用沙紙磨嘅﹐重有D頭髮都係佢哋自己整嘅﹐其實都真係幾好玩﹐我咁大個都係嗰次先有得做下木工嘅手工咋﹗做好之後就可以放喺繩上面游走﹐只要平衡得好嘅話﹐舊野就唔會跌落嚟﹐我哋重搞咗個比賽添。
有女仔喺度﹐就算跌親都唔可以話痛﹐幾歹都話無事﹐咁至叫做man呀﹐係嘛﹖
有時都唔係好聽指令﹐人哋做咗嘅動作佢先慢人兩拍跟住做。比佢老豆睇﹐佢老豆笑到彎晒腰。笑係好笑呀﹐不過有時真係要控制下佢嘅失控行為﹐試過幾乎整親人﹐結果係比老師話囉。其實都要佢試下比人話嘅滋味﹐唔好等佢以為成日都有呀媽照住。
寫寫下無咗下文﹖好明顯係……
眼瞓﹗
