乜野係雜炒blog﹖咪即係幾日積積埋埋搞到一大堆相唔知點講個主題﹐不如一次過炒晒佢﹐睇下消唔消化到嗰D囉。
其實大把野想講﹐不過無咁多時間暢所欲言﹐唯有諗起邊樣就講邊樣﹐無乜組織可言﹐消化唔到就……食D胃藥囉咁。
有時我會自己睇返過去寫咗D乜野﹐講咗D乜野廢話﹐唔好講笑﹐有時真係唔睇都唔記得原來發生過呢D事呀﹗你話我係幾咁老人痴呆呢﹗睇D舊嘅﹐再睇下新嘅﹐發現原來唔經唔覺近呢幾個月嘅blog竟然係用廣東話多過書面語﹗記得寫呢個blog嘅初期﹐本來見人哋用廣東話寫﹐自己都想用廣東話﹐因為有時覺得好似會親近D(唔知想親近邊鬼個﹗
)﹐但諗諗下又覺得都係用返書面語喇喂﹐有好多親戚唔識睇廣東話﹐寫咗廣東話咪即係叫佢哋唔好睇﹗於是從一開始就用書面語寫喇。一路寫呀寫﹐寫寫下變咗如果嗰日想鬧人發洩嘅話就會轉臺用廣東話﹐覺得發洩得到肉D﹐事關我由細喺香港長大﹐講慣咗廣東話﹐鬧人都用廣東話喇(爆粗嗰陣都係廣東話臺)﹐唔係話唔可以用書面語鬧人﹐不過用廣東話順口又直接﹐於是就係呢個原因﹐呢個blog就開始有廣東話嘅出現喇。後來搞搞下連平時嘅blog都用咗廣東話﹐但係又唔見有人投訴話睇唔明喎﹐所以我就順理承章繼續用落去。(得﹐我明﹐咁樣教壞細路吖嘛﹐君不見家下D後生嘅中文書寫能力係有相當嘅進步空間﹗包括我喇……重繼續寫廣東話﹗唔寫中文都應該寫英文﹐但我寫一篇英文blog怕且都要幾日﹐況且得我睇﹐唔會有其他人想睇啩﹖
)咁既然無人反對﹐咁我就間唔中廣東話﹐間唔中又轉下臺喇﹐難得禧婆婆同公公都未出聲柄話睇唔明…..
其實講咁多廢話做乜呢我﹖寫就寫喇﹐鬼有人理你寫中文定法文咩﹗車﹗
*************************
尋日帶口水禧去檢查牙齒兼定期洗牙﹐醫生重同口水禧影咗X光﹐見到下排中間兩隻門牙恆齒已經準備好on your mark痞咗喺對乳齒下面﹐表示換牙嗰陣就將會係呢兩隻牙先出。上排門牙重未排好位﹐所以醫生覺得應該係下排換牙先過上排。
唔洗半粒鐘就洗好成棚牙﹐皆因無蛀牙同無乜牙石要清﹐醫生讚口水禧保持得棚牙好好﹐淨係提醒佢刷牙嗰陣要留意刷好左上排嘅牙﹐因為口水禧係左仔﹐用左手揸牙刷﹐所以刷左邊嘅牙無刷右邊咁就手﹐所以點咗D顯示劑之後﹐見到左上排有幾粒牙深色少少﹐即係未刷得算好乾淨﹐不過牙醫話見過咁多小朋友﹐口水禧棚牙算係保持得最好嗰個﹐有人聽到之後沾沾自喜﹐陰陰嘴笑。今次牙醫同佢洗好牙之後重同佢落埋flouride﹐以前唔敢落係因為嗰D flouride完全唔適宜吞落肚﹐輕則肚痛﹐重則會嘔﹐所以之前洗完牙之後﹐醫生都無比口水禧棚牙搽野﹐就係費事佢吞鬼晒落肚。不過今次見佢都咁大個﹐可以試下﹐搽咗之後嘅半小時內唔可以飲水﹑漱口同進食﹐好彩去睇牙醫之前整咗個勁飽肚嘅早餐比佢食﹐所以半粒鐘唔食野絕對無問題。
返到屋企之後﹐每次口水禧刷牙都好緊張﹐次次刷完都要我話比佢知棚牙夠唔夠乾淨同白。
其實牙醫話小朋友應該都用牙線﹐刷牙之前清乾淨牙嚹之間嘅殘餘食物﹐然後先再刷就更加可以防止蛀牙。另外就係少D食糖果同飲好甜嘅果汁﹐呢D野口水禧暫時都唔係好有興趣住﹐所以暫時都未有蛀牙。
**********************
話說前日去walmart行行下突然見到本野幾過癮﹐專係比preschool嘅小朋友學野做嘅練習本嚟嘅﹐係咪有D好奇想知點解一向反對迫細路放假都要喺屋企做額外嘅作業嘅人都會買D咁嘅野返屋企比自己個仔做架呢﹖聽我講埋先喇……
咪比佢個外表嚇親以為係一本暑期作業之類嘅野﹐其實入面有D玩意都幾好玩架喎﹐叫下D細路油下顏色﹑分下類﹑數下野﹑重有科學﹑字母﹑音樂等等嘅遊戲比小朋友做下﹐有時重叫佢哋剪貼下D圖片咁﹐唔係一尾淨係寫字寫字再寫字﹐然後計數同埋串生字。
所以有人見到有得填顏色玩下遊戲咁好玩﹐自己話要買返屋企。其實之前我已經見過本野﹐不過嗰陣見條友仔連眼尾都唔望下﹐買返去盞最後要走返嚟退野﹐加上嗰陣年紀重細﹐叫佢坐定定真係幾難﹗而家大D就唔同﹐有D野比佢打發時間﹐佢覺得過癮。呢個年紀完全無做功課嘅概念﹐乜野攞上手都覺得係玩具嘅口水禧﹐當然亦都當咗本野係佢嘅其中一件玩具喇。
返到屋企重拿拿臨催我快D開咗佢比佢畫野﹐個表情專注到以為度緊買邊隻馬添﹗
上面先講完左手刷牙﹐呢頭就變咗右手揸筆(間唔中會交比左手代勞一下)﹐所以佢老師話比佢搞到對唔知究竟佢係唔係左仔。我就有鬼得佢﹐邊隻手順D就用邊隻﹐還掂又唔係我隻手。
唔知喺邊度學嘅揸筆手勢﹐我哋從來都無教過佢要點揸﹐但佢自己自自然然咁樣揸。
暫時未控制得到完全唔油出界﹐不過見佢係有特登控制住﹐不過都係照飛咗出界。
填顏色呢部份﹐每頁叫個細路用一種顏色去油D圖畫﹐目的係要小朋友分得出邊隻色打邊隻色。當然﹐對口水禧嚟講﹐除咗以上嘅作用之外﹐重有就係比佢學識D顏色嘅英文叫法﹐第時去幼稚園返學﹐其中一個條件就係要小朋友識分辨顏色。
一口氣畫咗十版八版先夠喉……其實同小朋友一齊做呢D練習遊戲係幾好玩嘅。如果唔係因為要計分﹐我相信好多小朋友嘅創意就可以得到啟發。不過有時教育理念比扭曲之後﹐有好多對小朋友學習同發揮潛能嘅機會都不得不犧牲﹐太可悲﹗
之後搬咗盒積木出嚟自己砌咗舊野﹐佢話係一棵樹﹐樹上面有幾隻貓頭鷹。
我喺廚房煮飯﹐聽到客廳不時傳嚟一陣又一陣積木倒塌嘅聲﹐然後就有個人大叫︰「媽媽﹗點解D積木會跌嘅﹖」(明顯把聲好慶﹗)
我﹕「有地深吸力吖嘛﹐老師今日唔係咁講咩﹖」
禧﹕「呀﹗以後都唔要地深吸力呀﹗」(發緊老脾)
我﹕「下﹖無地深吸力嘅話﹐D積木飛咗上天花板喇﹗」
禧﹕「呀﹗我想D積木飛晒上去呀﹗」(非常唔講道理地發老脾)
我﹕「下﹖咁唔止D積木飛晒上天架喎﹐你去疴屎或者疴尿嗰陣﹐佢哋都會飛上去﹐黐喺我個天花板架喎﹗」(通常呢D時候硬碰盞衰﹐我寧願講D核凸野引佢笑﹐次次都有效﹗)
禧﹕「呀﹗好呀﹗」(明顯覺得好得意﹐聲線轉為開心)
我﹕「E﹐咁我個天花板咪全部都係你D屎同尿﹐咁核凸架﹗Mimi唔同你住架喎咁樣﹗」(補多句有埋動物喺裡面嘅話﹐佢嘅怒火全部熄滅。
)
如是者來來回回幾次發火熄火再發火又熄火再再發火又又熄火之後﹐當然仍然會聽到積木倒塌嘅聲﹐不過嗰個乜火都無晒嘅人竟然開始識一邊大笑一邊自己同自己講﹕「呀﹗哈哈哈﹗地深吸力又嚟喇﹗呀﹗哈哈哈﹗」然後就係一連串佢自己停唔到嘅笑聲。
佢嗰隻招牌喪笑﹐應該無乜邊個未見識過喇啩……
最後終於比佢砌好﹐重要我比部相機佢自己影。我提佢﹕大佬﹐揸實我部機呀﹐我唔想做地深吸力嘅實驗呀﹗
**************************
某日睇咗手上本食譜﹐作者介紹話aged steak (唔知中文點叫呢D扒﹐即擺放咗一段時間嘅牛扒)嘅肉地較軟﹐肉味重﹐尋日同口水禧去超市嗰陣身痕買咗塊嚟試下。
其實見佢吊喺廚窗嗰大舊肉好似比人煙燻過黑黑哋咁色﹐等我重以為舊野切出嚟都會係好似D鹹魚(人)擺咗幾日咁嘅色﹐開舊野出嚟嗰陣都有D驚會唔會有臭味﹐點知一開出嚟﹐見到係鮮紅色嘅﹖咁同其他嗰D有咩分別﹖幾乎以為比人呃咗﹗上網睇下先知道aged steak其實同普通牛扒嘅顏色係無分別嘅。
所有嘅疑慮喺我「吉」支探熱針嘅時候一併消除。無錯﹐aged steak嘅肉質係軟D﹐所以支針好容易就「吉」到入去。
食譜嘅作者話加埋洋蔥圈就更好食。學野學全套﹐我梗係照跟。呢碟野就係我哋三個人嘅晚餐喇。
唔好嚇親禧婆婆﹐一陣話我虐待佢粒孫﹐話我唔比飽飯佢食﹗除咗牛扒同洋蔥圈之外﹐重整咗薯蓉同蕃茄湯呀﹐呀婆﹗唔好話口水禧食到飽﹐我哋兩件老嘅都食到攤喺度咁濟。
細路仔嘅味覺唔知係咪因為未受太多污染﹐非常識飲識食﹗呢條友仔一見碟牛扒上枱﹐已經自動飛撲叫我比牛肉比佢。平時整嗰D牛扒﹐佢通常食好少就唔食﹐淨係食晒側邊D伴碟。呢舊野﹐佢大呀哥竟然食晒我比佢嘅份量(唔係好多﹐其中一舊而已)﹐重無話咬唔到呀乜乜物物嘅籍口﹐想再食好野﹖等老豆發達先喇﹐仔﹗
講笑啫﹐成餐飯自己整﹐有湯有洋蔥圈有薯蓉有扒﹐三個人份量(湯同薯蓉都重有剩﹐夠我同口水禧食多兩餐﹗)都係USD25以內有找﹗抵過去出面嗰D貴到嚇C人嘅扒房喇﹗
想食嗰D就真係要等發咗達先去得喇﹗有人話出面嗰D都未必有屋企呢餐好食喎﹗
回味緊……
偷咗我D mascara搽呀你﹖
**********************************
呢個禮拜暑期班嘅主題係講磁力。可能又係我細個無聽書喇﹐老師話地球係一舊有磁力嘅星球﹐分南動北兩極﹐磁場由地球嘅中心去到北極然後再到南極bla bla bla(記唔到咁多﹗)
用嚟做磁石嘅石頭叫lodestone﹐放一塊葉喺水上面﹐將舊lodestone擺喺塊葉上面就可以做指南針。E…..乜唔係黃帝發明指南車先架咩﹖
唉﹗書到用時方恨少﹐乜鬼都唔記得晒﹗
仔﹗唔該你千其唔好好似呀媽咁呀﹗
黐滿咗汽水蓋之後﹐即使D蓋唔係直接掂住舊磁石﹐D蓋互相之間都會有磁力攝住大家﹐但當你拎開D蓋之後﹐D磁力就會無晒。我重懶係發現新大陸咁稟告老師﹐點知老師話﹕啊﹗因為D蓋黐上去舊磁石之後會被改變D唔知咩野﹐令到D蓋會有磁力﹐因而可以互相攝住大家。但當你攞走舊磁石之後﹐汽水蓋嘅磁力就會消失架喇。
除咗D細路﹐我係在場唯一一個唔知呢個道理嘅成年人。唉﹗
之後circle time﹐老師教埋D細路﹐我就連幾歲嘅人仔都不如喇…..嗚~~~嗚~~~
然後老師同佢哋玩遊戲﹐每人一邊膊頭黐住一張正同一張負﹐老師會播音樂﹐成班好似遊街咁行嚟行去﹐當音樂一停﹐就要去揾個同自己異性相吸嘅人嚟黐住。
明顯地﹐某人係唔知發生緊乜野事……
喺老師嘅安排之下﹐醒咗幾個靚女同口水禧黐埋一齊﹐果然係艷福無邊﹐羨剎老豆﹗
口水禧嘅新目標﹗可惜﹐上多兩堂暑期班完結﹐開學嗰陣大家唔同班。口水禧又「失戀」喇﹗
茶點時間﹐尋晚等某人瞓咗之後﹐焗咗個磅蛋糕比佢今日帶返學校當茶點﹐食得都幾滋味架喎﹗有美相伴﹐胃口自然更佳﹗
仍然係最早去最遲離枱嘅人﹐優哉悠哉咁慢慢嘆……
加上八掛﹐乜都關佢事四圍望﹐有乜辦法唔最尾嗰個食完吖﹗
索性調轉頭坐﹐望到夠﹗
同老師去咗探動物……
執地下D草隊比D兔仔食﹐無人吼佢條cheap 乾草﹗但隔離呢隻爆炸裝竟然埋嚟搭嗲。
每日都一定有嘅項目﹐就係乜都好﹐總之比佢哋出去發洩多到用唔完嘅精力﹗唔搾乾佢哋嘅精力﹐就等住返屋企比佢哋搾乾我哋D呀媽嘅精力同體力喇﹗
跳喇﹐跳多D﹐返屋企都好瞓D﹗
蠶繭﹐我已經由最初嘅唔敢行埋去到家下已經見慣不怪喇﹗
E﹐邊個除咗對魚網C襪放喺度呀﹖
答案
↓
Sparky﹐收返你塊皮喇﹗
