今日個blog明益肥玲﹐見你買比口水禧件野都幾過癮﹐好喇﹐比輯Mimi嘅性感寫真你又點話吖﹗點性感法﹖成個無著衫﹐露晒毛咁喎﹐又瞓地又趴地伸埋脷﹐重唔夠性感﹖唔係下下都要靠去書展先揾到性感嘅。
2002年9月﹐我正式開始返工。有一日出街食晏嘅時候喺公司樓下見到有間臨時租賃嘅ASPCA「鋪頭」。ASPCA即等如香港嘅愛護動物協會之類嘅組織﹐佢哋除咗有動物收容中心比D想領養寵物嘅人去揀動物之外﹐重會不時租一D鋪位做臨時嘅領養中心﹐每日車少少動物去嗰度比人領養。
喺門口行咗幾次﹐入去睇咗幾次又出返嚟﹐心大心細唔知應唔應該領養動物好﹐我講過喇﹐我一領養咗就要負責到人哋「埋單」嗰日架嘛﹐返工又諗﹑放工又諗﹑食飯又諗﹑瞓覺都諗。過咗幾日﹐下定決心﹐好﹗還掂屋企得我同禧爸兩個人﹐兩個唔出聲嗰陣間屋好似入咗黑洞咁靜﹐無嚟生氣咁﹐整返隻動物起碼有D聲有野郁下﹐喺屋企行行企企都好吖﹗結果就係咁樣﹐我哋屋企就多咗樣「生物」喺屋企浮游喇。
由於當時住嘅apartment係唔比養狗嘅﹐所以我哋唯有揀貓嚟領養囉。開頭想揀貓BB﹐因為貪人哋細細隻好可愛。不過後來又改變心意﹐想揀成咗年嘅貓﹐因為我覺得貓BB咁可愛﹐大把人會搶住領養佢哋﹐多我一個唔多﹐少我一個唔少。但成咗年嘅貓就未必有咁好彩會有人想領養﹐咁如果我領養一隻﹐世界上就會少一隻因為唔可愛而被剝奪生存落去嘅權利嘅貓。(講到呢D﹐真係會越講越火滾﹗
)而且我未養過貓﹐基本上我對貓有少少驚﹐成日覺得佢哋會抓人或抓傢私﹐但成咗年嘅貓應該會好D啩﹖(我估架咋﹗)重有就係成咗年應該知道要去沙盤大小二便﹐唔洗我訓練喇﹐咁聽落好似我適合養成年貓多D喎﹗好喇﹐就拍板決定領養成年貓。
禧爸由中學開始屋企就有貓﹐所以即使我對貓一D認識都無﹐佢都可以教我點樣抱﹑點樣養。不過Mimi唔係一隻鍾意被抱起四圍行嘅貓﹐所以到今日我仍然係唔識抱貓嘅。
當日嘅午飯時間﹐食完晏之後﹐我哋兩個就走咗去睇仔睇女。鋪位入面擺放咗四﹑五隻大貓﹐好似地下有D細貓。我哋逐個籠伸個頭埋去睇下D貓﹐又睇下籠出面掛住嘅資料卡﹐寫咗關於嗰隻貓係喺邊度比人執返嚟﹑點解主人唔要﹑性格脾氣﹑健康壯況﹑適唔適合有小朋友嘅家庭領養等等。有D貓瞓到唔講以為已經仙遊咗咁款﹔有D驚到縮埋一舊﹔有D你未打招呼佢已經噬起棚牙想隻揪咁嘅樣﹔最後一個籠就係當時被叫Tommy嘅Mimi。佢係咁多隻貓入面唯一一隻主動走埋嚟門口係咁同我哋喵呀喵﹐揩嚟揩去﹐你伸隻手指入去佢會係咁用個頭頂你手指嘅貓。真係我哋企咁耐佢就應酬我哋咁耐﹐我哋行開咗再返嚟﹐佢又拿拿臨再嚟過一輪熱情嘅招呼﹐咁嘅情況之下﹐有乜辦法唔揀佢呢﹖
再睇下佢張資料卡﹐寫住佢叫Tommy﹐兩歲嘅貓女(但叫Tommy???
)﹐係一隻tiger cat (有老虎紋嘅貓)﹐前爪被declawed。我哋唔知咩叫declaw﹐不過覺得呀Tommy姐都非常友善﹐事關我去睇十次貓﹐十次都比D貓兇我﹐可能我樣衰﹐唔係好受佢哋歡迎。但呀Tommy姐對我一D野都無喎﹐咁我就同禧爸揀咗領養Tommy喇。
同在場嘅一個義工佰佰講I want to adopt Tommy﹐呀佰個樣喜出望外﹐非常殷勤咁講解點樣養貓。又將隻貓攞出嚟交到我哋手上﹐叫我哋坐底抱住佢﹐睇下隻貓鍾唔鍾意我哋﹐當然喇﹐醒目嘅Tommy姐梗係蛇咬都黐實我對大脾推都唔願走喇﹐我時時都覺得動物都有靈性﹐除非有自殺傾向架啫﹐唔係嘅話﹐有邊個想比人人道毀滅吖﹖從來動物都只會求生而唔會求死﹐為咗生存不惜一切﹐只有人類先會咁傻放棄自己架啫。
(呀媽生你出嚟好辛苦架好痛架大佬﹗愛錫下自己條命仔喇﹗
)
由於當時係食晏時間﹐我之後重要返工﹐所以只可以早少少放工﹐然後去返個鋪位接走呀Tommy姐﹐臨走前﹐義工重幫我同比我抱到面容扭曲嘅Tommy影咗張相。其實牆上面都有好多之前去領養咗動物嘅人同佢領養嘅嗰隻動物嘅合照貼咗喺塊板度﹐有時行過見到都會不禁停低落嚟逐張睇下﹐睇嗰隻動物重獲新生嘅眼神﹐睇新主人揾到寵物嘅眼神﹐確實令人睇完好感動。細個嗰陣知道無人領養嘅動物會有人道毀滅嘅下場﹐曾幾何時﹐夜晚想起會瞓唔著﹐想象如果我係嗰隻動物﹐被毀滅嘅一刻前﹐我腦海會唔會有主人同我一齊嘅片段﹖會唔會有主人遺棄我嘅片段﹖我諗係會有嘅。
所以呢D有幸可以同新主人合照嘅動物簡直係開心過中咗六合彩﹐因為無野會比生命更重要。
放工去接Tommy返屋企﹐義工已經將佢放咗喺一個摺成屋形嘅紙盒入面﹐重有少少貓糧。義工交個盒比我﹐連同一張Tommy打過針嘅針卡﹐送我送到出門口。
我明白佢當時嘅心情﹐因為如果我係佢﹐我都會好替Tommy開心﹗記得以前打算去做義工之前﹐我都有諗過去ASPCA度做﹐貪嗰度大把貓貓狗狗比我玩餐飽。但諗深一層﹐去得嗰度嘅動物﹐唔係所有都有機會出得返去﹐我接受唔到呢個禮拜重同我玩得慶起﹐下個禮拜再去﹐其他職員話比我知上個禮拜同我玩嗰隻野已經bye bye咗喇。因為咁嘅緣故﹐我放棄咗去屋企附近間ASPCA度做義工﹐走咗去老連咁遠嘅Guide Dogs for the Blinds度做。所以作為一個ASPCA嘅義工﹐見到有人嚟領養動物﹐等如救咗一條生命﹐心裡面一定有種說話都表達唔出嘅喜悅﹗
上到車﹐我放咗Tommy出嚟﹐佢對陌生嘅環境非常驚﹐直頭有D好似覺得我綁架佢嘅表現﹐不停低聲哀鳴。後來我開始行車啟程帶佢返去佢新嘅屋企。到達之後﹐我落車去乘客坐位諗住抱佢上樓﹐點知條友驚到縮咗喺我張凳下面﹐死都唔肯出嚟﹐搞咗好耐都唔肯出嚟﹐無計可施﹐唯有夾硬拉佢出嚟放返入紙箱裡面先﹐費事一陣跳車走佬﹐我都唔知去邊度揾佢。
打開屋企門﹐放佢出嚟﹐佢驚到震過貓王﹐但又非常八啩四圍探路﹐嗰下醒起未買沙盆貓沙﹐萬一佢驚到賴喺地氈咪大件事﹗於是將佢放喺廁所閂埋門﹐拿拿臨走去target買佢D用品。收銀員見我神色匆匆賴晒X咁嘅樣重開我玩笑問我”Is it for emergency?”我話佢知我啱啱領養咗隻貓返屋企﹐醒起無沙盆比佢去廁所﹐個收銀員收完錢叫我快D返去放返隻貓出嚟去廁所喇。
返到屋企﹐搞好D沙盆﹐放返Tommy出嚟﹐不過佢無野疴﹐依然係四圍騰﹐間唔中有走埋嚟我側邊聞兩聞﹐然後又行開。嗰晚﹐佢不停咁跳上跳落我哋張床﹐好彩第二日係星期六唔洗返工﹐成晚都無覺好瞓﹗
第二日起身後﹐決定同佢改名﹐事關就算我哋叫Tommy﹐佢都唔應我哋架喇﹐明明係隻貓女﹐叫乜鬼野Tommy吖﹗唔知點解﹐我成日都覺得貓應該係叫Mimi﹐於是從嗰刻開始﹐Tommy就變咗Mimi喇。
往後﹐Mimi慢慢習慣咗同我哋生活﹐我哋亦都習慣咗屋企有隻野會郁會發聲嘅。嗰陣佢就好似而家口水禧咁成日比我哋影佢相﹐睇電視就坐喺我哋大脾瞓覺﹐夜晚當然都係同我哋一齊瞓喇。
最初佢成日都會喺喉嚨定發出一D起痰咁嘅聲﹐搞到我哋好擔心﹐以為佢有病﹗點知有一日同有養貓嘅同事傾開﹐我話比佢知我隻貓好似有哮喘﹐我個同時擘大眼望住我O晒嘴﹐然後佢就扮比我睇問我係咪咁樣呀﹖我話係呀﹐佢笑到合唔埋個嘴。原來當貓開心嘅時候就會發出嗰種聲﹐唔怪之得我哋唔見Mimi自己趴喺地下瞓嗰陣會有呢D聲﹐淨係上我哋身嗰陣先有喇﹐撞鬼佢呀禧爸﹐又話自己養咗咁多年貓對貓都幾熟﹐呢個咁特別嘅野竟然會唔知嘅﹖你話係咪比佢激C﹗幾乎我就準備帶Mimi去睇醫生架喇﹐好彩得個同事講一講先知原來係正常不過嘅事嚟﹗
另外﹐之前咪話領養mimi嗰陣﹐佢嘅資料卡上面寫住declawed嘅﹖我問埋個同事﹐佢聽到話mimi已經declaw﹐即刻好驚訝咁問我係咪我帶mimi去做嘅﹖我話我連乜野叫declaw都唔知﹐領養mimi嗰陣佢已經係declaw咗架喇。後來個同事先講解我知究竟係乜野﹐佢之所以知道﹐原來因為佢帶過佢其中一隻貓去做﹐做完返屋企先知原來個手術非常唔人道﹐令到隻貓受咗好大嘅痛苦。
唉﹗有時人類嘅自私真係好恐怖﹗有D野做之前真係要問清楚自己良心過唔過意得去先好做﹐但假如你嘅答案係「我過意得去架」﹐咁我勸你不如唔好養。
由於知道mimi已經喪失自衛嘅能力﹐所以佢係一隻家貓﹐唔可以出街。出咗去隨時無命返嚟﹐縱使我知道佢好想出去﹐但我相信佢連一隻老鼠都打唔過﹐放佢出去盞送佢去C﹗所以佢都係乖乖哋喺屋企嘆下世界把喇﹗
就係咁樣﹐一養就養咗九年﹐當時兩歲嚟我哋屋企嘅mimi﹐如今已經係隻十一歲嘅呀嬸﹐計落原來mimi同我都係屬龍架喎﹗
大肚嘅時候﹐有一晚我坐喺梳化上﹐mimi趴喺我大到籮咁大嘅肚上面幫我按摩緊﹐我對佢承諾將來細佬出咗世﹐媽媽都會一樣對mimi咁好﹐當時mimi又「哮喘發作」。
好可惜﹐細佬實在霸佔我太多嘅時間﹐令到mimi一日到晚都要坐冷板凳。每當我坐落梳化時﹐mimi就想跳上我大脾﹐但都比我趕返落地﹐因為我唔想黐咗mimi嘅毛然後又去抱口水禧。再之後直頭要mimi夜晚瞓書房嘅獨立位﹐因為我嘅房間唔可以再比mimi入嚟喇﹐口水禧掂過mimi或者有mimi嘅毛喺地下比口水禧掂過﹐然後條友在捽眼捽鼻嘅話就會眼紅﹐皮膚腫起一舊。所以為咗兩個都唔洗比我鬧﹐我唯有隔開佢兩個。夜晚如果我閂咗房門﹐mimi會爪門大叫﹐嘈醒隔離房嘅口水禧。所以無辦法唯有分間房比mimi自己瞓。朝早起身就放返佢出嚟。
即使地位動搖咗﹐唔再係惜日主人嘅「脾上明珠」﹐mimi從來都無對口水禧作出任何襲擊﹐連呷醋嘅行為都無。有時重會行埋去口水禧身邊用個頭揩下佢﹐不過多數都比口水禧嘅過份熱情嚇到調頭走。
以前有客人嚟﹐mimi唔會睬人﹐而家會主動跳上人哋度。朋友話﹕「呀﹐你隻貓梗係craving for love(渴望愛)!係咪好耐無乜點抱隻貓呢﹖」嗰句craving for love仍然深深印喺我腦海。
或者﹐我曾經對mimi都有發過脾四﹐怪佢喺我忙湊仔忙家務嘅時候重四圍搗亂比多D野我做﹐至使佢家陣鍾意黐住禧爸﹐對我就不理不睬﹐當我透明。禧爸唔喺屋企﹐mimi會四圍揾老豆。老豆返屋企﹐mimi開心過口水禧﹗禧爸喺書房痞一日﹐mimi就喺書房痞一日﹐重要趴喺書枱上面望實禧爸﹐成隻二奶狐狸精咁款﹗
任憑禧爸有時覺得佢煩住晒而鬧佢﹐mimi仍然都最愛佢老豆﹗(頂佢吖﹗當日邊個抱佢返嚟架﹖跌斷腳醫咗好多錢﹐我冒住比佢老豆丙都極力爭取要醫返好佢﹐呢隻野已經完全唔記得晒﹗)
有時﹐我都覺得好內疚架﹐當日坐喺梳化上實牙實齒嘅承諾好似唔係好兌現。但係﹐諗深一層﹐日日有得喺呢個天窗下曬太陽伸懶腰﹐再唔係攤喺sunroom嘅窗臺望下後園嘅松鼠(好想出去捉﹗)﹐夏天嘆住冷氣曬太陽﹔冬天瞓喺火爐前瞓覺﹔間唔史有個顛婆埋嚟用腳捽自己個肚皮兩野﹔有時搞爛老豆D野比老豆大剷都好﹐始終都有個家﹐有瓦遮頭﹐有三個唔會拋棄佢嘅主人……雖然口水禧有時見我話要吸塵唔得閑陪佢玩﹐因為mimi甩毛﹐我怕鍾意喺地下碌嘅口水禧黐咗毛上身﹐口水禧就會話唔要mimi﹐但我知道﹐如果有日真係唔見咗mimi﹐口水禧會喊C同埋叫我哋即刻揾返mimi返嚟。
