返完暑期班嘅口水禧日日都無乜細藝﹐襯老豆放假﹐我哋乘機揾D地方去玩下喇。早前老師問我哋有無帶過口水禧去Tilden Park Little Farm﹐佢話嗰度有個農場﹐小朋友可以自己帶野去餵D動物食﹐老師話嗰度幾好玩﹐叫我有機會就帶口水禧去玩下。
星期六起咗身﹐諗起老師講話有得餵動物﹐一於就去Tilden Park睇下喇。
口水禧知道有得睇動物非常開心﹐叫佢自己搽防曬換衫去廁所﹐乜都肯制。
唔講唔知﹐呢條友仔平時都好鍾意照鏡﹐尤其係被我整蠱加咗野上佢個頭嗰陣。有時會對住塊鏡做幾個好浮誇嘅表情自娛一番﹐然後又自己笑笑笑﹗唔識佢嘅人可能會以為佢黐黐哋線﹐但我覺得小朋友咁樣幾過癮吖﹗表情多嘅人總好過一舊飯咁木無表情啩﹖
求其抹兩抹就話搽好晒喎﹐塊面重係一達二達﹐好似倒瀉麵粉成面都係咁。兩母子好勤力喺廁所係咁搽呀搽﹐捽下捽。點解個老豆唔洗搽﹖懶囉﹗然後曬到有斑嗰陣就走嚟問點解佢塊面會咁花架呢﹖梗係喇﹐乜鬼都唔搽就走去曬吖o拿﹗
搞完一輪終於出得街。喺網上面yelp揾到個地址﹐話係喺UC Berkeley附近﹐我都聽過老師提過好近UC Berkeley﹐所以都好放心跟住個GPS去。點知去到GPS話嗰個地址﹐發現唔多對路喎﹐點解會喺個校舍範圍裡面嘅﹖間大學無理由會整個牧場出嚟架﹖問咗好幾個人﹐喺個校園兜嚟兜去都揾唔到兼無人知個牧場喺邊度。心諗口水禧重好大期望會見到D牛同羊架﹐呢次真係大件事﹐如果去唔到個牧場﹐怕且老豆同呀媽要落車趴喺地下扮牛扮羊都得喇﹗
好彩即刻喺網上揾到另外一個地址﹐其實個牧場係喺一個郊野公園裡面﹐所以只要揾到個公園就等如揾到家牧場架喇﹗yelp嗰條友真係大整蠱﹐嚇到我哋都唔知瓜咗幾多細胞﹗事關個牧場係收三點半﹐我哋兩點九重喺UC Berkeley門口左騰右騰﹗
經過九曲十三灣之後﹐我哋終於嚟到位於山頂嘅郊野公園喇﹗(你話係咪好想中爆亂寫地址嗰蛋散呢﹗
)比佢老點嘥咗我哋成粒鐘﹐由唔急變咗人有三急﹐真係……唉﹗
呢個公園好大﹐基本上呢度嘅郊野公園都係大到霸幾個山頭都得﹗裡面有好多設施比人享用﹐例如你可以租一塊地嚟搞BBQ派對﹑參觀牧場﹑野餐﹑露營﹑參加公園搞嘅活動等等。天氣好嘅時候﹐呢度D人都好興一家大細約埋朋友親戚去郊外玩下食下聚下﹐等D小朋友可以接觸下大自然﹐大人又可以抖下呼吸下新鮮空氣。
公園入口前有車位任泊唔洗錢。呢D就係嗰區嘅居民每年交嘅地稅其中一項貢獻。
出門前有D懷疑呢頭會涼涼哋﹐但又因為上次去動物園嗰野比網上嘅天氣報告呃咗﹐搞到著錯衫﹐今次先幫口水禧著短袖短褲﹐然後帶定長袖長褲同埋外套以防萬一大風。嘩﹐好彩你精我都唔笨﹐去到目的地﹐禧爸一落車話﹕「嘩﹗都涼涼哋架喎﹗」佢係個怕熱唔怕凍嘅人﹐連佢都話「涼涼哋」兼且主動自己披件外套嘅話﹐咁即係「凍凍哋」喇﹐所以即刻同口水禧變身﹐換走晒D短袖短褲。
牧場第一炮 – 牛。臭到真係……
因為我哋同D牛只係隔一個欄杆而已﹐所以佢哋嘅屎係喺我哋面前表露無遺﹐非常天然無添加劑﹐好有機﹗
有隻牛鬼殺咁嘈係咁叫﹐口水禧問點解隻牛係咁叫﹐我話﹕「知你嚟﹐所以咪叫下你同你打招呼囉﹗」佢真係信架﹐佢會即刻轉身同隻牛講﹕「hi!牛﹗」
此時先至發現最重要嘅野無買﹐係咩﹖無買飛入場﹖
個牧場係免費入場架。我哋竟然係兩梭蕉咁嚟﹐唔記得帶D西芹或者生菜嚟餵動物呀﹗
真嘥料﹗無計喇﹐咁四圍行下睇下熟習下環境都好﹐下次嚟就更知定喇。
入面有雞鴨鵝﹐好似重見到幾隻火雞添﹗全部走地﹐非常健康。
似唔似隔離屋變態佬裝人沖涼﹖
上次喺oakland zoo﹐山羊綿羊撈埋嚟養﹐真係分唔到邊隻打邊隻。呢度就分開養嘅﹐而家終於知道山羊係乜野樣。
白色嗰隻探過個頭出欄外﹐不過見無帶手信嘅口水禧嚟揾笨之後就縮返入去兼唔望人。
呢堆羊去到邊都成群成群咁一齊郁﹐禧爸話﹕「羊群心理咪就係咁囉﹗人行佢又跟住行吖嘛﹗」估唔到嚟一轉牧場﹐除咗比口水禧睇動物之外﹐更加令無乜墨水嘅禧爸突然對動物心理學又多咗D認識﹗
一條斜路有乜野用﹖用嚟測試體能囉。你睇﹗最後生嗰個影都無埋﹐跟住後面嗰個行到頭耷耷﹐最肥嗰個咪殿後負責影人個羅友囉。因為後生嗰個實在太快﹐我帶住成百磅嘅肥肉﹐真係用韁繩鞭到開花都跑唔到咁快追到去影正面喇﹗
真係揾就揾咗兩個鐘﹐睇就十幾分鐘。鬼咩﹐無帶野嚟餵人﹐係咁架喇。所以如果想帶小朋友去嘅話﹐就記住要帶手信喇﹗
後生仔都係咁鍾意整一字馬﹐唔知有乜咁好玩。老豆見到驚驚哋﹕「睇住個祠堂呀﹐仔﹗」
喺草叢堆扮唔知咩動物。
睇完動物重有下場去
又係另一個口水禧好鍾意嘅節目 – 搭火車
由牧場揸過去火車站只係十幾分鐘﹐原來呢個火車我同禧把十年前坐過。
口水禧好有耐性咁等火車返嚟埋站
話佢知十年前爸爸媽媽都嚟過﹐但無佢份。問佢嗰陣去咗邊﹐佢話佢喺醫生度。下﹖點解喺醫生度架呢﹖原來佢以為個個媽媽生BB都係先由醫生將一個BB放入去媽媽個肚裡面﹐然後嗰頭個媽媽就再生返個BB出嚟﹐咁就叫做生BB喇。
都唔係無道理﹐不過嗰D BB好貴架喎﹐你呀媽我生唔起呀﹐仔﹗
樹林入面有迷你火車軌﹐一望個size就知架火車係幾咁細架喇。
細還細﹐都拖到幾十卡仔
上車後好興奮﹐因為以為即刻會開車(你老豆開嘅就會)﹗
十年前得我哋兩條茂利坐﹐十年後多咗條茂利一齊坐
好彩有帶外套﹐嘩﹗呢度重凍呀﹗因為穿過樹林﹐陰風陣陣﹐凍到縮縮下﹗
開始有D不滿咁耐都未開車嘅……
悶到玩車飛
你睇佢兩仔爺幾咁識揾野解悶﹗
我哋後面重有十幾卡﹐前面都有好多卡﹐所以架火車頭都幾大力。
穿過彎彎曲曲嘅山路﹐沿途都係樹﹑樹﹑樹﹑都係樹。口水禧梗係開心﹐重話夏威夷嗰個無咁好玩添。嘩﹐你早講吖嘛﹐嗰個六十幾蚊﹐呢個三蚊一個人﹐六十幾蚊嗰個唔搭慳返嘅錢夠你坐呢架坐到羅友扁晒都得喇﹗
坐完火車﹐三條友要去買杯野飲下先。希望可以下次揾個時間整埋野食去個郊野公園野餐玩下喇。
又突然收工﹖係…..眼瞓﹗
