補品

尋日﹐我喺屋企去洗手間嗰陣﹐一解開褲啱啱坐低﹐突然眼角有隻黑色嘅野由我肚皮好快咁行上我塊面度﹐我都未嚟得切望清楚自己係唔係眼花﹐重係口擘擘之際﹐隻野竟然入咗我個口﹐我又唔知係反應快定慢﹐人哋一入咗口﹐我就即刻合埋棚牙﹐一啖就咬落隻野度﹐重感覺到我係咬住佢個尾﹐一聲非常清脆嘅聲音喺耳邊傳嚟﹐唔講重以為自己食緊一塊好脆嘅薯片添﹗

頂﹗已經嚇到三魂唔見九魄嘅我即刻擘開口伸手入去捉返隻野出嚟一望﹐原來係隻好大嘅曱甴﹗﹗﹗﹗﹗﹗﹗﹗﹗﹗﹗﹗﹗﹗﹗﹗﹗我驚到徒手就咁揸爆咗佢﹐然後掉咗落地下。我條脷唔敢掂D牙﹐個口唔敢合埋﹐唔敢吞口水﹐因為我怕吞咗D曱甴味落肚﹗ (yuck!!!!!!!!!!!!)我衝出去客廳﹐禧婆婆同肥玲坐喺梳化望住我褲都未拉返鏈個樣﹐以為我唔知黐咗邊條筋﹗我繼續用甩咗牙齩咁嘅口形想話比佢哋知我咬咗隻曱甴﹐而家唔知點算﹐但我又唔敢直接一下就講我食咗曱甴﹐一邊講一邊怒火中燒﹐所以我頭幾十秒爆咗好多粗口鬧隻曱甴﹐聽緊我講野嘅禧婆婆同肥玲仍然係一頭霧水﹐鬧呀鬧鬧呀鬧……

我擘大眼﹐見到自己張床﹐啱啱天光﹐頂﹗原來係發夢﹗撞鬼佢咩﹐嚇到我扎醒嘅時候發現自己個口仍然係維持緊甩牙齩嘅狀態﹐仍然係未敢吞口水……

點解﹖﹖﹖﹖點解﹖﹖﹖﹖點解要成日咁樣整蠱我架呢﹖我最驚蛇蟲鼠蟻﹐但我久唔久就會發夢比佢哋爬入件衫﹑咬到流血﹑一路跑一路比佢哋追﹑然後成群咁將我大包圍再咬到我爆缸……每次嚇醒先知原來係發夢啫﹐不過經已嚇到膽都破裂咗﹗

今次都算係最益我嘅一次喇﹐唔單止要入我件衫﹐重要比我咬咗啖補身添﹗咁算唔算當做比我報返仇咁呢﹖

頂﹗諗起都想嘔……發夢嘅野唔洗咁迫真呀嘩大佬﹐嗰下咬落去好甘脆嘅感覺仍然纏擾緊我呀﹗